الملك فؤاد الأول

 الملك فؤاد الأول : 👑

( ١٠٠ عام على الاستقلال 🇪🇬 ) 

إتولد فى ٢٦ مارس ١٨٦٨ ؛ فى قصر الجيزه ؛ هو ابن فريال هانم ووالده هو الخديوى اسماعيل .

طبعا كان عنده اخوات كتير غير أشقاء لأن والده الخديوى اسماعيل اتجوز كتير و خلف كتير . لكنه كان الطفل الوحيد لوالدته فريال . وكان هو اصغر اشبال الخديوى اسماعيل .

فى ١٨٧٩ تم عزل والده عن الحكم وإجباره على المنفي ؛ وكان وقتها فؤاد عنده ١١ سنه ؛ وأخوه الأكبر توفيق هو اللى بقي خديوى مصر .

طفولته كانت فى المنفي مع والده فى نابولى فى إيطاليا واللى درس فيها التعليم العسكري.

مات الخديوى اسماعيل فى ٢ مارس ١٨٩٥ و توفيت والدته ٢١ فبراير ١٩٠٢ ؛ واللى كان فؤاد متعلق بيها جدا و بيحبها و كان مقرر أنه لو خلف بنات هيكون اول حرف في اساميهم هو حرف ( ف ) زى والدته .

**********

ساهم فؤاد فى إنشاء الجامعه المصريه مع أخته الغير شقيقه الاميره فاطمه اسماعيل ؛ وحضر إفتتاحها لكن للاسف الاميره فاطمه كانت توفيت قبل الافتتاح ؛ و فؤاد كان أول رئيس لجامعة القاهره .

*********

بعد وفاة الخديوى توفيق ؛ حكم مصر بعده ابنه الخديوى عباس حلمي الثاني ؛ ووقتها فؤاد عمل محاوله أنه يكون ملك ألبانيا ؛ بإعتبار أن أصول محمد على باشا من هناك ؛ و باعتبار أنها اخدت استقلالها من الدوله العثمانيه و كان شايف أن أسرة محمد على هى الأجدر بحكم ألبانيا ؛ لكن ده طبعا محصلش . صحيح هو دخل في الاعتبار كأحد المرشحين لكن موصلش للحكم في النهايه .

*********

فؤاد اللى عاش طفولته وشبابه اغلب الوقت فى أوروبا ؛ كان إلى حد ما متأثر بالجو المتحرر ده الغير موجود ومتاح فى الشرق ؛ فبيقال عنه أنه كان بيقامر كتير و إن كان سلوكه ( طائش ) إلى حد كبير ؛ و عنده علاقات نسائيه و كان شبه مفلس في أوروبا وعليه ديون بسبب تهوره .

قرر فؤاد أنه يتجوز من أميره غنيه تقف جنبه ؛ وفى ٣٠ مايو ١٨٩٥ كتب كتابه على الاميره شيوه كار بنت الامير احمد رفعت ( يعنى بنت عم فؤاد ) ؛ و اتجوزوا فى قصر العباسيه فى ١٤ فبراير ١٨٩٦ ؛ انجب الثنائى : 

- اسماعيل ( واللى مات طفل رضيع ) 

- ‏فوقيه ( واللى هتلاقوا قصة حياتها هنا : https://www.facebook.com/1083771090/posts/10220081053871648/ ) 

*********

بيقال عن فؤاد أن طبعه كان صعب جدا وحاد المزاج ( بيقال أن صعوبة طبع فاروق موروثه من والده خاصة في سوء تعامله مع نساء أسرته ) ؛ فؤاد كان مديون زى ما قولنا وكان معتمد بشكل كبير على ثروة زوجته ؛ و بيقال أنه كان بيضربها و بيهينها وحتى فى مره حاولت تهرب من القصر و اشتكت لأخوها أحمد سيف الدين ؛ واللى بدوره أطلق الرصاص على فؤاد ( انتوا متخيلين فؤاد كان بيعمل ايه فى شيوه كار لدرجة أن اخوها يقرر يضربه بالنار ؟ ) الرصاص أصاب فؤاد فعلا لكن مماتش وفى رصاصه من ضمن الرصاصات استقرت في حنجرته و أثرت على صوته و احباله الصوتيه وخلت صوته خشن جدا وبيقال أنه كان أشبه ب عواء الذئب .

وقت استخراج الرصاص من جسد فؤاد مكنش ينفع الدكاتره يستخدموا البنج فكان حاسس بالألم بكل خليه و فى قصة بتقول أنه كان شايف طائر كان بيغرد ٣ مرات على شباك غرفة العمليات وقت اجراء العمليه .

طبعا تم الطلاق بينه وبين الاميره شيوه كار فى ١٨٩٨ بعد فترة زواج قصيره جدا الله اعلم شيوه كار عانت فيهم قد ايه ... 

أما عن اخوها اللى أطلق الرصاص فتقدروا تعرفوا حصله ايه من هنا : 

https://www.facebook.com/112522095452694/posts/3509112942460242/

**********

فى يوم من الايام كان أحد العمال في القصر و اسمه عم ادريس ( ظهر فى مسلسل الملك فاروق ك لبيس للملك ) ؛ و قال لفؤاد أنه شافه فى الحلم قاعد على عرش مصر ؛ ضحك فؤاد و مصدقش لان السلطان حسين كامل اخوه هو اللى كان بيحكم مصر وقتها و عنده ابن هو الأمير كمال الدين حسين ؛ ده غير أن فى اخوات تانيين للملك فؤاد و أبناء للخديوى اسماعيل اكبر منه بالسن ؛ يعنى كان فكرة وجود فؤاد على عرش مصر فكرة مستبعده ؛ لدرجة أنه قال لعم ادريس من سخريته ؛ أن لو ده حصل هحط صورتك على الجنيه ... 

المفاجاه أن فؤاد استلم عرش مصر فعلا وبقي سلطان مصر .... و عم ادريس اتحطت صورته على الجنيه ؛ وتقدروا تعرفوا بقية الحكايه من هنا : 

https://www.facebook.com/112522095452694/posts/3494142967290573/

***********

بعد وفاة السلطان حسين كامل ؛ رفض إبنه كمال الدين حسين أنه يتولى العرش ؛ وفى الوقت ده ورغم وجود أشقاء اكبر من فؤاد إلا أن الإنجليز اختاروا فؤاد للحكم على أساس أنهم فى وقت الحرب العالمية الأولى و عاوزين حد يكون تحت جناحهم ... 

لكن فى الحقيقه ان الشخص المتهور الطائش مش هيكون تحت جناحهم و هيطلع داهيه سياسيه و هيغير الدستور و هيعدل الألقاب فى الاسره و هيعدل نظام وراثة العرش و هيستقل بمصر و يبقي اول ملك من أسرة محمد على .

فؤاد بقي الحاكم التاسع من أسرة محمد على فى يوم ٩ اكتوبر ؛ وحكم لمدة ١٩ سنه ؛ من ١٩١٧ : ١٩٣٦ ؛ و بقي لقبه السلطان فؤاد الأول 👑

فؤاد كان بيزور بلاد كتير و استقبل ولى عهد المملكه المتحده ( إدوارد السادس ) فى مصر اكتر من مره ؛ وسافر الصين و سافر فى قونيه و زار بيت جده الأكبر محمد على باشا و سافر فرنسا و انجلترا و استقبل هنا ملك اثيوبيا و غيره كتير من الحكام و الملوك .

*********

فؤاد للاسف الشديد كانت علاقته مش لطيفه مع اللى حواليه منهم طبعا زى ما قلت مشكلته مع زوجته الأولى و اخوها ؛ ومنهم امينه هانم الهامى واللى عمل معاها مشكله كبيره بخصوص مدرستها ( المدرسة الالهاميه ) ودخل معاها فى نزاع عليها و اخدها منها و تقدروا تعرفوا قصة المدرسه من هنا : 

https://www.facebook.com/112522095452694/posts/4759592960745561/

وكمان كانت علاقته سيئه بالنبيل عباس حليم وأسرته لانه جرد النبيل عباس حليم من ألقابه وحطه فى السجن لأنه كان بيطالب الملك بمزيد من الحقوق للعمال والفلاحين .

كمان كانت علاقته سيئه بالامير كمال الدين حسين و رفض الاعتراف بزوجته الثانيه الاوروبيه و بابنه منها رغم أن لولا تنازل كمال الدين حسين عن العرش مكنش فؤاد بقي ملك .

كمان كان معظم أفراد الأسرة مستاءين من الملك فؤاد بسبب قوانين تعديل الألقاب فى الاسره واللى بيها قلل درجات القاب أفراد كتير من أمراء أو اميرات إلى نبلاء أو نبيلات فقط مما أثر على مخصصاتهم الشهريه .

كمان كانت الاسره متضايقه من الملك فؤاد بسبب قوانين وراثة العرش ؛ بعد ما خص العرش فقط فى نسله من الذكور وأولادهم ؛ وده أنا شايفاه كان بداية النهايه لان الملك فؤاد انجب ولى العهد فى سن كبير نسبيا وكان متوقع تحصل وفاة فؤاد وتولى فاروق فى سن صغير و ده اللى حصل واللى سبب مشاكل طبعا واذى للاسره كتير بعد كده وإنهار العرش كله ؛ وكان الأجدر أن فؤاد يفكر في مصلحة الاسره ككل . 

وكان معظم أفراد الأسرة شايفين أن فرع فؤاد هو آخر فرع ممكن يكون ولاية عرش مصر عنده و كان الغالبيه شايفين أن فرع الخديوى توفيق زى الأمير محمد على توفيق و الأمير محمد عبد المنعم هما الأجدر بالحكم وان لو كانوا فعلا وصلوا للعرش كانت حاجات كتير اتغيرت .

***********

فى يوم كان السلطان فؤاد بيتمشي فى حديقة القصر و لمح سيده غجريه من اللى بتضرب الودع و تشوف الطالع ؛ و طلب دخولها القصر و بشرته أنه هيكمل على كرسي العرش ومش هيتم عزله أو نفيه ؛ وان فترة حكمه هتكون كويسه و ملكه هيكون عظيم بس بشرط واحد ؛ قالتله انت كنت ناوى تسمى اى بنت تخلفها بحرف ال فاء ؛ لا خللى كل ذريتك ذكور وإناث بحرف الفاء ؛ و انقشه على جدران وأبواب قصرك دايما .

**********

بعد أزمة زواج فؤاد و طلاقه من الاميره شيوه كار واللى كانت حديث كل العيله ؛ امتنع عن الزواج ولفتره طويله جداا كانت حوالى ٢١ سنه ؛ عشان يقرر يتزوج من امرأه من خارج الاسره العلويه و يربطها علاقة خطوبه بشخص بتحبه ( الجينات دى بتفكركوا بمين هااا ؟ 🙈 ؟ ) 

طبعا العروس كانت ( نازلى صبري ) الفتاه الجميله ذات الثقافه الفرنسيه و التعليم الأوروبي ؛ واللى تم إجبارها على الزواج من فؤاد رغم رفضها فى حفل بسيط جدا دون زفاف ( بسبب أحداث ثورة ١٩١٩ ) ؛ و لا حتى كان فيه صورة زفاف ولا اى صوره فوتوغرافيه هتجمعهم ببعض مدى الحياة ... 

تم الزواج فى ٢٤ مايو ١٩١٩ ؛ فى قصر البستان ؛ و انجب الثنائى : 

١- فاروق 

ولادة الملك فاروق كانت صعبه جدا و إتولد قبل معاده ( سبحان الله ابنه برضه الملك أحمد فؤاد الثانى إتولد برضه قبل معاده ) ؛ و طبعا وقتها مكنش فى سونار لمعرفة جنس المولود ؛ و فى حكاية لطيفه أن وقت ما كانت نازلى بتعانى من آلام الولاده جه طائر جنب الشباك ؛ و ساعتها فؤاد قال لو غرد ٣ مرات يبقي هييجى ولى العهد ؛ و فعلا غرد العصفور ٣ مرات و فعلا جه ولى العهد ) 

٢- فوزيه 

٣- فائزه

٤- فائقه

٥- فتحيه 

************

فى ٢٨ فبراير ١٩٢٢ ؛ و بعد مناهده مع بريطانيا و بعد نفي سعد زغلول و ثورة ١٩١٩ ؛ أصدرت بريطانيا تصريح إنهاء الحمايه البريطانية على مصر و أن بموجب التصريح ده مصر دوله مستقله ذات سياده ؛ واحتفظت بريطانيا بحق الحفاظ على رعاياها و مصالحها في مصر ؛ و بكده تحولت مصر من سلطنه الى مملكه فى ١٥ مارس ١٩٢٢ ؛ وتحول لقب السلطان إلى الملك فؤاد الأول ؛ و ده كان بعد ميلاد الأمير فاروق و الاميره فوزيه . 

************

علاقة فؤاد ب نازلى كانت سيئه جدا ؛ كان مانع ظهورها تماما فى اى مناسبات رسميه و مانع اى صور فوتوغرافيه ليها حتى لو معاه ؛ وكان مانع خروجها من القصر ؛ ويقال كمان أنه كان بيضربها وكان وحاطط عليها جواسيس بينقلوله اخبارها اول باول و بتقول ايه وتكلم مين ؛ كان بيتحكم مين يزورها فى القصر ومين ميزورهاش ؛ كان متعدد العلاقات حتى مع وصيفات نازلى نفسها ؛ كانت بترافقه سيده فرنسيه فى كل المناسبات الرسميه أو الحفلات ؛ وكان ممكن يقعد بال سنه ميكلمش نازلى أو يزورها فى جناحها ؛ وحتى كانت بتقابل اولادها ساعه واحده فى اليوم .

نازلى مكنتش مبسوطه و اشتكت للسلطانه ملك و امينه هانم الهامى ؛ واللى بدورهم حاولوا مع فؤاد أنه يحسن علاقته ب نازلى ... و ده محصلش 

وبيقال أن بعد وفاة فؤاد اول حاجه عملتها نازلى أنها لمت هدومه كلها ومتعلقاته الشخصيه و ادتها لبتوع الروبابيكيا كنوع من أنواع الانتقام .

*********

فؤاد مات فى قصر القبه فى ٢٨ ابريل ١٩٣٦ واندفن فى الرفاعى و تولى بعده إبنه الملك فاروق الاول .

و دى مشاهد نادره جدا من جنازة الملك فؤاد : 

https://youtu.be/XLNHP-qelzw

#إيمان_الشرقاوى

Tweet