النبيله بكيزه نيفين عباس حليم 💝👑
والدها هو الامير عباس حليم ( إتولد فى ١٨٩٧ و كان امير و بعدين بقي نبيل فى عهد الملك فؤاد وبعدين الملك فاروق رجعله لقب أمير ؛ و بالتالى أولاده خدوا لقب نبلاء و هو ابن الأمير إبراهيم حليم ابن حليم باشا ابن محمد على؛ ووالدته هيا الاميره الفت بنت الأمير عثمان فاضل والاميره بكيزه )
والدتها هى توحيده هانم يكن ؛ ( اتولدت فى ١١ ابريل ١٩٠١ ؛ معندهاش القاب صحيح لكن هيا حفيدة الاميره توحيده بنت الخديوى اسماعيل و اتسمت على اسمها . ( ملحقتش تشوف جدتها لان الاميره ماتت فى عز شبابها فى التلاتينات من عمرها ؛ و حتى والدتها وحيده هانم ماتت من غير ما تشوف احفادها ؛ وتوحيده كانت بنتها الوحيده )
*********
سواء عباس حليم أو توحيده الاتنين كان عندهم تجربة زواج سابقه ؛ فالنبيل كان متزوج من جيسيكا ديلما ماريا هارينجتون ( كل المصادر بتقول أنه لم ينجب منها ؛ لكن فى يوم حد علق عندنا فى الصفحه وقال إن النبيل خلف منها بنت وولد ؛ والولد مات فى سن صغير والبنت اسمها نعمت الله)
وتوحيده كانت متجوزه من محمد اسماعيل عاصم من وقت ما كان عندها ١٨ سنه وعندها ابن اسمه اسماعيل ( توتس) و إتولد فى ١٦ نوفمبر ١٩١٩ ؛ و سمته اسماعيل على اسم حبها الاول ( الأمير اسماعيل داوود )
و فى ابن اسمه حسن ( مش مذكور فى كتاب نيفين حليم لكن اسمه مذكور فى شجرة عيلته فى موقع Geni ) .
***********
اتقابلت توحيده مع عباس حليم فى رولان جاروس و اتجوزوا فى ١١ ابريل ١٩٢٨ ؛ و سافروا مع بعض أوروبا و حضروا الأولمبياد فى امستردام .
كانت نيفين حليم اول ذرية الثنائي ؛ فكانوا مبسوطين بيها جدا ؛ اتولدت فى ٣٠ يونيو ١٩٣٠ فى الاسكندرية فى قصر جدها ؛ أما اختها علويه الفت و اخوها محمد على اتولدوا بعد كده فى بيت والدتها فى جاردن سيتي اللى كان باباها اداهولها كهدية زواج وقت زواجها الاولانى.
**********
" اتربيت انى ممنوع أشتم ولازم أكون مؤدبة حتي مع الخدم ولازم أشكر الجميع كل شوية ."
***********
كانت من وهيا صغيره بتبوس ايد عماتها و جدتها ؛ ولما جدها قالها تبوس أيده رفضت وقالت أنا معنديش اى نيه انى ابوس ايد اى راجل طول حياتى .
جدها المقصود هو احمد مدحت يكن والد والدتها توحيده من زوجته وحيده هانم ؛ و جدها ده كان ظهر فى التليفزيون الفرنسي مع مجموعه من المكتشفين لمقبرة توت عنخ امون و كانوا بيتكلموا عن الحضاره المصريه القديمه.
نيفين كانت مولوده بثقب فى القلب فكانت محرومه من ممارسة أي رياضه و كانوا بيشيلوها يطلعوها السلم ؛ وكانت احيانا بتلعب هوكى من ورا مامتها .
بعد ٣ سنين من ميلاد نيفين جت اختها علويه الفت ؛ و بعد سنتين كمان جه اخوهم محمد على .
علويه كانت المفضله عند عباس حليم
و محمد على كان المفضل عند توحيده
و نيفين كانت المفضله عند جدتها والدة والدها
**********
"كنا عايشين فى قصر والدتى فى جاردن سيتى كان بيت كبير.. كنت عايشه فيه مع والدي ووالدتي وإخواتي ، كان البيت فيه عشر حجرات في الدور العلوي وكان صالون تحت ، لكن والدتي باعت بيت جاردن سيتي قبل ما تسافر أمريكا قبل يوليو ١٩٥٢ لأن الأجواء في البلد كانت سيئة ومحدش عارف هيحصل إيه ، واشترينا قصر شدس في إسكندرية سنة 1943 وأمي كتبته باسم والدي وسافرت ."
**********
نيفين حليم و أخواتها كانوا بيتعلموا فى القصر زى عادة أبناء الاسره فى الوقت ده ؛ كانوا بياخدوا دروس فى العربي و الانجليزى و الفرنسي و التركى و المانى و البيانو و الرسم.
و جدتهم ( مامت باباهم ) هيا اللى كانت بتعلمهم دروس في الدين وكمان كانت بتخليهم يزوروا مساجد القاهره و المتاحف و اهرامات الجيزه و منطقة سقاره .
اتعلمت النبيله نيفين فى البيت لحد ما وصلت ١٥ سنه ؛كانت بتصحى الساعه ٥:٣٠ فجرا عشان تقدر تذاكر و تخلص الواجبات المنزلية الكتيره . وبعد كده راحت مدرسة فى هوليوبوليس وكان بيوصلها هيا واخواتها سامبو السواق ؛ و بتقول نيفين أنها كانت بتكره المدرسه و العلوم و الرياضيات رغم أنها كانت شاطره فيها ؛ وكانت بتحب تدرس التاريخ والأدب الفرنسي و الفلسفه وعلم الاجتماع.
وكانت بتعزف بيانو لكن كانت بتقرا النوته الموسيقية بصعوبه وكانت بتكره الصولفيج.
وبتقول النبيله أن كان لازم كل سنه فى المدرسه بيبقي فيه رحله مدرسيه للبرلمان . وأنها كانت بتحب الرحله دى اوى لأنها كانت بتشوف مكان عظيم و عريق زى البرلمان .
النانى بتاعتهم كانت مسمياهم:
نيفين : بوسي ..... علويه : باتس .... على : بيتر
وعلى حسب الكتاب أن النانى بتاعتهم كانت بتتغير كل شويه ؛ مره واحده قالت كلام نميمه بشكل مش لطيف عن توحيده هانم ؛ وواحده تانيه اكتشفوا أنها جاسوسه للمحور ؛ و تالته كانت بتعلمهم بطريقة غلط .
********
"من وأنا صغيرة كنت لا أتحدث العربية ، كنت بتكلم إنجليزي جوا البيت ، وكانت الدادة بتاعتي إنجليزية ، وكان عندي مدرسين بيعلموني كل يوم الإنجليزية والفرنسية والتركية والألمانية ، ولم أتعلم العربية سوي من المدرسة ولم أذهب إليها إلا عندما بلغت 15 سنة ، لأنني كنت عايزة أدخل الجامعة وكان ده بيشترط حصولي علي شهادة من المدرسة ، فاضطريت أروح المدرسة ، ذهبت وقتها للمدرسة الإنجليزية في مصر الجديدة ، وبعدين دخلت الجامعة الأمريكية ."
**********
كانت نيفين طفله صغيره فى فرح الملك فاروق و الملكه فريده ؛ وكانت لابسه فستان قصير رغم أن كل اللى قدها كانوا لابسين فساتين طويله كاشبينات ؛ وهيا حاولت تكلم صديقتها الاميره فتحيه فؤاد أنها تحاول تخليها ضمن اشبينات الزفاف لكن الاميره قالت لها ده انا نفسي مش من الاشبينات .
من طقوس الفرح تحية الملكه نازلى ؛ فراحت نيفين و باست ايد الملكه و بتقول النبيله أن وقتها انبهرت بجمالها جدا لدرجه انها لفت ايديها حوالين رقبتها و حضنتها وباستها من خدها ... و بتقول أن الأمير حسن حسن برضه عمل نفس الشي و أن الملكه نازلى تعاملت مع الموقف بلطف رغم خوف الأهل وقتها من تهور الاطفال .
و بتقول نيفين أن لانها كانت طفله وقتها فبعتوها البيت هيا واخواتها بعد فتره بسيطه من الفرح ؛ و أنها بعد كده ما اتعزمتش على فرح الاميره فوزيه فؤاد فى السنه اللى بعدها .
**********
"لم نكن نذهب لسراية الملك إلا في المناسبات والأفراح بناء علي دعوة ، لكن غير كدة ما نقدرش نروح السراية ، ما كانش حد يقدر يقرب من الملك ، حتي لما كان بيروح لنادي السيارات كان بيقعد في مكان لوحده ومحدش يقدر يقرب منه ويسلم عليه رغم أن والدى كان رئيس نادى السيارات ، لكن حتي إحنا كان صعب نوصل له ، وأنا لم أذهب للسراية سوي مرتين في حياتي ."
************
قابلت نيفين الملك فاروق اكتر من مره بعدها و كانت بتلعب مع بناته الاميره فريال و الاميره فوزيه ؛ وفى مره من المرات طلب منها الملك فاروق تتكلم المانى اودامه .
فى فرح الملك فاروق والملكه ناريمان كانت لابسه فستان أبيض مطرز بورود بيضاء و معطف ستان ازرق مع جوانتى ابيض طويل و يشمك و حلق بأحجار الزفير و بروش و إسوره و كايب مطرز بالورود و دبابيس من اللؤلؤ.
وكانت فاكره أن التحيه الملكيه ( التمنى) حركة سهله ؛ لحد ما عملتها للملكه ناريمان يوم زفاف ووقتها استوعبت قد ايه هيا حركة صعبه .
ومن الشخصيات اللى من العيله اللى قابلتها النبيله نيفين:
الملك فاروق ؛ الملكه فريده ؛ الاميره فوزيه فؤاد ؛ الاميره فائزه فؤاد ؛ الاميره فتحيه فؤاد ؛ الاميره فائقه فؤاد ؛ الملكه نازلى ؛ الملكه ناريمان ؛ الاميره نعمت مختار ؛ الاميره شيوه كار ؛ الاميره امينه طوسون ؛ ماهيفيتش و فاطمه شيرين ؛ الأمير محمد على توفيق ؛ الأمير يوسف كمال ؛ الاميره امينه بهروز فاضل ؛ اسماعيل شيرين ؛ فؤاد صادق ؛ بولنت رؤوف ؛ الاميره نسل شاه ؛ الاميره نجلاء هبة الله ؛ الأمير محمد عبد المنعم ؛ النبيل عمرو إبراهيم ؛ السلطانه ملك ؛ شريف بك ذو الفقار ؛ الملكه جيرالدين ملكة ألبانيا ؛ يوسف رشاد ؛جورج و جاك و روبرت كينيدى ؛ اغاخان والبيجوم ؛ ريتا هيوارث و على خان
وبتقول عن على خان :
"He wasn't made for marriage!"
**********
دخلت نيفين الجامعه الامريكيه في مصر وكانت الفتاه الوحيده اللى من الاسره المالكه اللى بتدرس فى الجامعه الامريكيه. واتعلمت فى الجامعه الكتابه على الآله الكاتبه .
وكانت بتحب تروح نادى السيارات ؛ و كانت بتحب تسمع بوب عزام فى سميراميس وكانت بتحب تلعب بينج بونج و بلاك چاك و بينجو . وطبعا النبيله نيفين كانت من ضمن أعضاء شلة الزهريه ؛ و لمعلومات عنها :
https://www.facebook.com/1083771090/posts/10223598156517016/
*********
"لم أمتهن الفن أو التمثيل وإنما كنت أحب التمثيل فى المنزل مع أشقائى وأصدقائى، «يعنى لعب أطفال نعمل مسلسل أو نعمل نفسنا فنانين ونجوم، خصوصاً أن كثيراً من نجوم عصرنا كانوا أصدقاء للأسرة مثل أنور وجدى وليلى مراد وعمر الشريف وغيرهم وكانوا يترددون على منزلنا."
***********
فى وقت زواج الاميرات فتحيه وفائقه فى أمريكا و رفضهم العوده كانت نيفين وعلويه فى أمريكا بيدرسوا فى واشنطن ؛ فالملك بعت رساله شديدة اللهجه لوالدهم النبيل عباس حليم وقاله خلى البنات يرجعوا بسرعه والا هاسحب القابهم وأنه مش عاوز بقي حد يتجوز اجانب من العيله تانى .
فى ٢٤ سبتمبر ١٩٥١ مات جدها الأمير إبراهيم حليم و جنازته كانت اخر جنازة رسميه قبل حركة يوليو.
**********
تم الطلاق بين توحيده هانم و عباس حليم ؛ و حاول عباس حليم يرجعها لكن الاوان فات ؛ لان كل واحد فيهم دخل فى علاقة كارثيه ؛ فمثلا توحيده تزوجت من فرانك ريدكر بعد أن أعلن إسلامه لكن هو كان متخصص فى الضحك على الستات اللى معاهم فلوس وخلاها تخسر معظم فلوسها
و عباس حليم ارتبط بصديقه بعد الطلاق وخلته برضه يخسر فلوسه ؛ وبعد كده اتجوز فى السر من نفيه على رضا يكن .( واللى كانت متجوزه من حفيد السلطان عبد الحميد الثانى) .
************
فى يوم ؛ أمينه هانم توجاى طلبت ايد النبيله نيفين لابن اخوها فوزى مختار لكن نيفين رفضت .
اتجوزت علويه فى منزل سعيد طوسون بالزمالك من شهريار راتب فى ٧ فبراير ١٩٥٢ ؛ ويوم الفرح جالهم خبر بوفاة ملك انجلترا الملك جورج السادس ؛ وتم إعلانهم بالقصر بمنع الموسيقي والرقص .
اول حب فى حياة النبيله نيفين كان مع عضو شلة الزهريه الأمير اسماعيل حسن واللى بتقول عنه :
"I naturally never wanted anybody as much as I wanted him . He was my great love."
من غير تفاصيل كتير ؛ العلاقه بينهم مكنش ينفع تستمر بسبب غراميات الأمير وعلاقاته المتعدده .
كان فى شوية مشاعر من ناحيتها لعضو فى شلة الزهريه هو ديميتري رومانوف ؛ من أسرة رومانوف الشهيره لكن بكل تأكيد العلاقه مكنش ينفع تكمل .
الحب الثانى فى حياتها كان من نصيب رؤوف ابو السباع وقت ما كان عندها ٢١ سنه ؛ و رؤوف من أقارب والدتها ؛ لكن العلاقه فشلت بسبب اتهام والده ( صالح) فى جريمة قتل ابن عمه يكن واللى بيكون والد رقيه زوجة الهامى راتب و اللى هو ابن عم شهريار زوج اختها علويه ؛ و رؤوف اتسجن لفتره لحد ما تم إثبات براءته فيما بعد .
أما الزواج فى النهايه فكان من نصيب عضو أيضا من شلة الزهريه وهو صلاح عرابي. واللى أنقذها من البدو الاشرار فى فيلم النفط والرمال وخدها على الحصان .
صلاح عرابي ؛ كان من ضمن أعضاء شلة الزهريه و كانوا اصدقاء و كان لاعب تنس شاطر اوى و كانوا بيلعبوا سوا كتير وبتقول عنه نيفين :
He was a good tennis player and sometimes sent me some balls that nearly killed me !
؛ كان متجوز قبل نيفين و كان عنده ابن اسمه اشرف لكن مات بسبب تطعيم الدفتيريا واللى قلبه مستحملوش .كان عنده شوية فلوس وشوية فدادين لكن لما اتجوز نيفين كانوا عايشين فى بيت ايجار فى المعادى .
و اتجوزت نيفين فى أغسطس ١٩٥٢ من صلاح عرابي و شهود الفرح كانوا بولنت رؤوف و الأمير حسن حسن.
وبتقول أن اجمل حاجه عملهالها صلاح هو أنه خلاها تخس ١٠ كيلو بسبب الطريقه اللى كانت بيعمل بيها اللحمه و السلطه .
عاشت هيا وصلاح فى منطقة المعادى و كان بيصحى الصبح يروح يلعب تنس فى نادى المعادى و يتغدوا سوا فى نادى الجزيره . وكانت الحاجه الوحيده اللى بتعرف تطبخها ال scrambled eggs
وكان صلاح دايما بيناديها : my Goddess
لكن الزواج انتهى بسبب الغيره فى سبتمبر ١٩٥٨
*********
و النبيله نيفين " زى معظم أفراد الأسرة العلويه " ؛ كانت شايفه أن الملك فاروق كان جيد فى بداية حكمه لكن فى أواخر سنوات حكمه كان سئ بشكل صارخ .
واعلنت عدم حبها لمصطفى باشا النحاس ؛ وعن ميل الأسره العلويه لدول المحور فى الحرب العالمية الثانية
بتقول أن بعد حريق القاهره طالب والدها الأحزاب بتأليف جبهة موحدة لعلاج الموقف ولف على جميع رؤساء الأحزاب حتى المرشد العام للإخوان المسلمين، لكن دون جدوى
وبتقول أن والدها حاول كتير يتكلم مع فاروق فى تغيير سياساته لكن كل مره كان بيرجع البيت بعد لقاء فاروق كان بيكون عصبي جدا وحاسس بخيبة أمل كبيره و بيقول ( مفيش فايده ) ...
The king let everything go . He did nothing!
وحتى بعد ما طلبوا من الملك التنازل عن العرش ؛ راح النبيل عباس حليم يقابل الملك ويقنعه ميمضيش وقاله أنه مستعد ينزل حزب العمال والفلاحين فى الشوارع لتاييده لكن الملك رفض ... ( النبيل عباس حليم كان نصير العمال والفلاحين و كانوا بيحبوه جدا ) .
عاشت النبيله بعد إلغاء الملكيه مابين مصر و اوروبا ؛ ومعظم الخدم اللى كانوا عندهم رفضوا تماما أنهم يتخلوا عنهم ؛ لدرجة أن النبيله نيفين حليم ذكرت في مذكراتها اللى نشرتها سنة ٢٠١٠ أنهم وصل بيهم الحال أنهم إستلفوا فلوس من إبن السائق الخاص بوالدها واللى كان إسمه ( سامبو ) .
اتسمح لهم فقط ببيت واحد و عربيه واحده والباقي تمت مصادرته ؛ و اتمنع عنهم اى اراضي أو مبانى أو مجوهرات أو أموال ؛ واتسمح لهم فقط بالاقامه في القصر مع عدم تبديد محتوياته . و اتعمل لوالدها معاش شهري كان ٢٥ جنيه ؛ الأمير حسن حسن كان المعاش بتاعه ٢٨ جنيه ؛ و اخوه الأمير اسماعيل حسن كان معاشه ٧٥ جنيه لانه كان ظابط طيار في حرب ١٩٤٨ .
ذكرت النبيله فى مذكراتها بمنتهى الاريحيه أن الملك فاروق تم قتله ؛ و ذكرت بالنص أن وفاة احمد حسنين باشا كانت وفاة تحوم حولها الشبهات .
ذكرت كمان تمسك الخدم بتواجدهم عندهم بعد انتهاء الملكيه وقالولهم مش عاوزين مرتب ؛ و كمان إضطرتهم الظروف أنهم يستلفوا فلوس من إبن سامبو ( السواق ) .
********
"كل الناس تنكروا لنا وكانوا يخافون من زيارتنا، خصوصاً الذين كانوا مقربين لنا باستثناء الخدم فى المنزل حيث كانوا يساعدوننا أحياناً لأنهم تعلقوا بنا كثيراً وكانوا يحبون أسرتى، ورفض كل من يعرفنا توفير فرصة عمل لى لأنهم كانوا يخافون من الثورة ورجال الثورة، فقررنا السفر للخارج، وحصلت على تأشيرة للعلاج وسافرت إلى أوروبا ثم إلى أمريكا"
********
ذكرت كمان أن فى ناس كانت ( بتلعق ) حذاء والدها في الملكيه ؛ و بعد الملكيه بقوا لو شافوه فى الشارع يودوا وشهم الناحيه التانيه .
إتكلمت طبعا عن التأميم ؛ و ذكرت أن متحف المجوهرات لا يحتوى على جميع مجوهرات الاسره العلويه ؛ فالمجوهرات كانت أكثر من كده بكتير ؛ و طبعا قالت إن فى قطع " مقلده " على حسب كلامها .
*******
" قالوا عننا أننا لصوص وسرقنا أموال الشعب ؛ فهل ذهبت أموالنا إلى الشعب ؟ "
*********
فى يوم اتفاجئت أن السكرتير الاول للسفاره الايرانيه جايلها مخصوص نادى الجزيره عشان يسألها عن رقم الاميره فوزيه فؤاد لان الاميره شمس بهلوى عاوزه تتواصل معاها ؛ وادتله النبيله نيفين الرقم عن طريق نازلى صبري شيرين .
********
"كنا ممنوعين من السفر بعد يوليو ١٩٥٢ ، وما سمحوش بخروجي من مصر إلا عشان أعمل عملية القلب ، ورجعت تاني و ما كانش عندي فلوس أعيش بيها في أمريكا ، ما كانش معايا غير فلوس العملية إللي أخذتها من جوزي ، فرجعت مصر بعد العملية مباشرة ، وفضلت في مصر حوالي تسع سنين لحد ما سافرت سويسرا سنة 1961 بعدما بعت الخاتم بتاعي عشان أدبر فلوس السفر ، وكنت اتطلقت وقتها ."
********
اتعرضت الاميره لحادث كسر في ذراعها ؛ و كمان عملت عمليه فى القلب و اكتشفوا وقت اجراء العمليه فى أمريكا أن حجم الثقب فى قلبها اكبر من المتوقع ؛ وأنها مش هتقدر تخلف أو تتجوز مره تانيه .
**********
"تأثرت بشدة بعد يوليو ٥٢ وأثناء خروجي من مصر وأنا في المطار ذاهبه لإجراء العمليه الجراحيه عندما فتشوا شنطي وبهدلوها ووضع أحدهم يده داخل علبة بودرة للمكياج ليتأكد أنني لم أهرب مجوهرات ، دي حاجة زعلتني أوي من مصر ، وتأثرت جداً منذ سنوات قليلة عندما اتهمتني موظفة في الشهر العقاري في إسكندرية أثناء عمل توكيل أنني مش مصرية لمجرد أن ملامحي أوروبية ، فتأثرت جداً لأنهم نزعوا عني مصريتي وأنا أميرة مصرية ، لكن أكثر لحظات حياتي حزناً كانت يوم وفاة والدي ."
**********
راحت نيفين روما فى يوم ؛ كانت رايحه تزور اختها علويه لأنها خلفت طفلتها الأولى ( نيفين ) ؛ و وقتها عرفت خبر وفاة الملك فاروق ؛ و راحت باريولى لتقديم واجب العزاء و لقت هناك بناته الاميرات وابنه و بنت خال الملك نازلى صبري و زوجها عمر شيرين ؛ الملكه فريده ؛ النبيل عمرو إبراهيم ؛ إبراهيم ممتاز ( من أقارب الملكه فريده) ؛ سعيد شعراوى .
********
"كنت أتابع أخبار مصر باستمرار ولن أنسى أننى قضيت فيها أجمل أيام حياتى، خاصة فى الإسكندرية، صحيح مرت علينا أيام صعبة بسبب اشتغال والدى بالسياسة، ووقوفه إلى جوار العمال وتأسيسه أول حزب عمالى مصرى، لكننا كنا سعداء لأننا نعيش فى مص و
كنت أقرأ كل ما ينشر عن مصر، خصوصاً ما ينشر عن أعضاء ثورة يوليو، حتى الفنون وكل ما يتعلق بمصر، من أخبار كنت أتابعها وأقرؤها."
**********
هتقابل نيفين بولنت رؤوف فى جينيف بعد سنين طويله من فقدان الملكيه و تشتت الاسره . و قابلت كمان الاميره فائزه مرتين قبل ما تستقر في امريكا ؛ مره فى حفل فى باريس و مره في جينيف .
**********
"اشتغلت فى سويسرا سكرتيرة في شركة سجاير كانت لسه فاتحة جديد ، قريت عن الوظيفة في الجرايد ورحت قدمت ، من حسن حظي إن صاحب الشركة كان بيبحث عن سكرتيرة تجيد الألمانية والإنجليزية ، وكنت أنا أجيد الألمانية والإنجليزية والفرنسية والتركية ، فقبلت في الوظيفة ، ولم أخبرهم أني أميرة مصرية ، وأخدت دورات في أمور السكرتارية والكتابة علي الآلة الكاتبة وتدرجت في المناصب داخل الشركة وظللت أعمل بها 25 عاماً .
ولو كان أفراد الأسرة لديهم أموال كما أشيع فلماذا كانوا يبحثون عن عمل فى الخارج ولماذا نعيش عيشة صعبة؟!"
*********
سيارة النبيله نيفين عباس حليم :
1948 Talbot lago T26 convertible
(Saoutchik Coachbulding )
النسخه الوحيدة في العالم مصنعه خصيصاً للنبيله
بموتور Talbot Lago ٦سليندر بسعة ٤،٨ لتر والتصميم الخيالي للعربيه من شركة Saoutchik
تمن شرائها سنة ١٩٤٨ كان ٤ مليون فرانك فرنسي ما يعادل تمن ١٠ عربيات سيتروين تراكشن افانت وقتها!!
العربية عاشت في مصر لحد سنة ١٩٥٢ ومع الظروف اللي حصلت للبلد وقتها خوفاً على العربيه تم نقلها لفرنسا ومن هناك تم بيعها
في فرنسا اشتراها المليونير Roger Baillon وحصلت مشاكل قضائيه على العربيه ويقرر يخيفيها في مزرعته وبعدت العربيه عن الانظار لحوالي ٦٠ سنة لدرجة ان الناس اعتقدوا انها خلاص انعدم وجودها
سنة ٢٠١٥ يتم اكبر اكتشاف للعربيات الكلاسيك في القرن الحالي وسط اكتر من ٧٠ عربيه من النوادر وتكون سيارة الأميرة وسطهم وتخرج للنور مره تانيه
تم بيع السيارة في مزاد ووصل سعرها ل ٨٥٠ الف دولار
********
هل شعرت بالحسرة والحزن لأنك أميرة وتعملين سكرتيرة ؟
-أميرة مش لاقية تاكل تفيد بإيه ؟
*********
تم توجيه سؤال للواء محمد نجيب من صحفى أمريكى ( لماذا لا يتم الإفراج عن النبيل عباس حليم؟) وأجاب نجيب قائلاً: عباس حليم لازم يفضل فى السجن كى يبقى الوضع مستقراً، لأنه لو خرج من السجن سيقود العمال إلى مظاهرات للمطالبة بعودة الملك، He is a trouble maker
والدها النبيل عباس حليم أدى فى يوم من الايام لظابط مصري مطارد من البوليس مبلغ مالى كبير عشان يساعده على الهرب ؛ الظابط ده عمره مانسي الجميل للنبيل ؛ و الظابط ده هيبقي بعد كده رئيس الجمهورية انور السادات .
وهيكون هو ضمن الظباط اللى بيحققوا معاه بعد يوليو فى تهمة الأسلحة الفاسده ؛ و بعد كده هتستمر علاقتهم و السادات هيعزم النبيل وأسرته وأولاده على على فرح ابنه .
**********
"الرئيس السادات لم ينس لوالدى أنه ساعده ووقف إلى جواره وهو فى السجن، لأن والدى أعطاه مالاً وملابس وهو فى وقت الشدة، لذلك لم ينس السادات لوالدى وقوفه إلى جواره ورد لنا الجميل عندما أعاد لنا منزلنا الذى كنا نعيش فيه فى حى «جاردن سيتى»، كما أنه عندما حاكمت الثورة والدى بتهمة الخيانة كان الرئيس السادات فى المحاكمة فأخذ والدى حكم عشر سنوات مع إيقاف التنفيذ بفضل السادات، عليه رحمة الله."
********
فى يوم كانت والدتها كانت معزومه على عشا و لقت نفسها بتكح دم ؛ ومن هنا اكتشفت إصابتها بسرطان الرئه لحد ما ماتت في ١٩٧٣ بعد وفاة النبيل عباس حليم بسنه واحده.
و النبيله علويه حليم ماتت فى ١٦ مايو ٢٠٠٦ ؛ و النبيل محمد على حليم مات فى أمريكا فى ٢١ فبراير ٢٠١٦
************
"شاهدت مسلسل الملك فاروق بس كان فيه حاجات عجيبة عن فاروق مثل بكائه بسبب عدم إنجاب الذكور وبعض الأشياء الأخرى لكن المجمل أن المسلسل كان جيداً."
*********
كانت النبيله صديقه مقربه للاميره فريال فاروق لأنها كمان كانت عايشه في الريف السويسري ؛ وبتقول أن أسوأ حاجه حصلت هيا زواج الملك فؤاد الثاني من دومينيك بيكار !
وذكرت كمان انها كانت بتكتب مذكراتها من زمان جدا ؛ ووالدتها كمان كانت بتكتب مذكراتها ؛ لكن والدها النبيل عباس حليم ملقوش اى مذكرات تخصه ؛ لكن لقوا بعض قصاصات أوراق كان كاتب فيها بعض خواطره . ونشرت كل ده فى كتاب ( مذكرات أميره مصريه) فى ٢٠١٠
حاليا عايشه النبيله ما بين سويسرا و الاسكندريه فى قصر بمنطقة شدس ؛ و كانت النبيله نيفين بتزور الاميره فوزيه فؤاد فى فيلا سموحه بحكم انهم هما الاتنين عايشين في الاسكندريه.
*********
"أهالى الشارع اللى ساكنه فيه عارفين ، وبيقولولي دايماً ياسمو الأميرة ، لكن محدش يعرف يعني إيه أميرة ".
********
أعتقد "بعد وفاة الاميره فوزيه فؤاد"؛ إن النبيله نيفين هى أكبر أفراد الأسرة العلويه سنا الآن .... ٩٢ سنه
وهى حاليا بتقضي وقتها بالقراءه وعندها مكتبه فى حوالى ٣ آلاف كتاب .
*********
"نفسي الروماتيزم مايجيش تاني لإنه بيتعبني"
********
فيديو عن النبيله نيفين:
https://youtu.be/E2ahRzzHzHo
********
#إيمان_الشرقاوى
المصادر :
١- كتاب مذكرات أميره مصريه ؛ نيفين حليم
٢- حوار عمرو أديب مع النبيله نيفين حليم
٣- حوار الاسكندريه اليوم مع النبيله نيفين حليم
٤- حوار جريدة الدستور مع النبيله نيفين حليم
ليست هناك تعليقات:
إرسال تعليق
التعليقات :