محمد وحيد الدين سليم

 حدوتة ١١

(  محمد وحيد الدين سليم ) 

لما يكون ليك من إسمك كل النصيب ! 

********

محمد وحيد الدين اتولد في ٣٠ نوفمبر ١٩١٩.. ( موقع geni بيقول أنه مواليد ١٩١٨ )  ؛ هو ابن الأميرة شيوه كار من زوجها الظابط التركي سليم بك خليل.

وهو أصغر أبناء الأميرة شويكار ....

طبعا شويكار اتجوزت كتير وخلفت كتير ؛ يعني هو كان عنده اخوات كتير حوالي ٦ بس هو كان أقرب شخصية له هيا الدادا شايستا هانم عبد الله المربية بتاعته .

مأخدش لقب أمير لكن لكونه إبن أميرة فكان لقبه ( وجيه ) وهو الحقيقه كان وجيه جدا ♥️

*********

كان تعليمه في باريس ولما رجع عاش لفترة مع والدته وزوجها إلهامي باشا في نفس القصر ؛ لكن بعد كده إشتري من الأمير يوسف كمال قصر في المطرية وعاش فيه .

الحقيقه أنه اشتري القصر ده مخصوص عشان الأميرة اللى كان متيم بيها ... الاميره فائزة فؤاد 😍

كان مجهز ديكور القصر كويس جدا و جهز  للأميرة أوضة خاصه بيها غالية الثمن جدا ...

و إتقدم للأميرة ... لكن بكل أسف إترفض !

للأسف الشديد معنديش معلومة مؤكده هل الرفض كان من الأميرة فائزه نفسها ولا من الملك فاروق ولا من الملكة نازلي ...

لكن في النهاية ما اتجوزش من حبيبته ...

قفل ساعتها الاوضة اللى كان مجهزهالها و سابها زي ما هيا .وماتجوزش ابدا ! وبيقال أنه كان بيزور الغرفه باليل ويقعد فيها لوحده بعد نوم الخدم .

***********

سنة ١٩٤٥ بدأت المآسي في حياته بزواج حبيبته من وجيه أخر هو الوجيه محمد على رؤوف وفي سنة ١٩٤٧ ماتت والدته الأميرة شويكار 

في ١٩٥٣ توفيت الدادا اللي كان متعلق بيها و كمان تم إلغاء الملكية وبعدها جاءت قرارات التأميم والمصادرة ؛ و للاسف الشديد كان الوضع المالي مؤسف لكل أفراد الأسرة بعد المصادرة والتأميم ..

*********

الوجيه وحيد الدين كان مقرب جدا من جيدة أحمد حسنين ابنة أخته لطفية يسري 

و قام بدعوتها لقصره بالمطرية و كان يحبها جدا 

و كان وحيد الدين خفيف الدم و بسيط فى تعاملاته مع الناس و ذات مشاعر خاصة تجاه الفقراء و المحتاجين

و كان يدعو أفراد العائلة المقربين و الاصدقاء مرة في العام فى حفل عشاء فى قصره و كان الشيف "عصفور" هو الذى يجهز الاصناف الرائعة من الأكل.

و كان عنده عدد كبير جدا من القطط الضالة التى كان يأويهم فى قصره من الشارع ويراعيهم في قصره وكان ذلك في تسعينات القرن الماضي 

*********

احتفظ الوجيه بقصره للإقامة فقط و اتخصص للوجية وحيد الدين معاش قليل ؛ وكان عايش على المساعدات من أفراد الأسرة اللى أحوالهم كويسة الى حد ما زي إلهامي باشا زوج والدته الأميرة شويكار ..

وصل الحال بيه في يوم من الايام أنه مكنش معاه يدفع فاتورة الكهرباء ؛ لحد ما قطعوا الكهرباء عن القصر وكان عايش فى القصر بالظلام مع ضوء شمعه خفيف ..

وفي مرة وهو في القصر ماشي على ضوء الشمعه وقع و انكسرت رجليه ...

وفضل حاله من سئ إلي أسوأ .... 

وفى ١٧ يونيو ١٩٩٤ ماتت حبيبته الاميره فايزه في امريكا و حزن عليها حزن شديد جدا و إكتئب ومات بعدها بحوالي سنة ونص

#حواديت_إيمان

Tweet