وفاة ملك

 حدوتة ٩ 

" ٣ جنازات للملك فاروق" 

*****

الجنازة الأولى كانت فى إيطاليا بعد وفاته مباشرة ؛ و دى تم لف جثمانه بعلم الملكيه الاخضر و كانت جنازة دون دفن ؛ مشيت فيها الملكه نازلى ( اللى كانت أول مرة فى حياتها تشوف حفيدها احمد فؤاد الثانى ) وكانت وقتها عندها ٧١ سنه ؛ و تحملت رحلة ٢٠ ساعه من لوس انجلوس لروما و الاميره فائقه أخته و زوجها فؤاد صادق و أخته الاميره فوزيه و زوجها اسماعيل شيرين والاميره فايزه و بناته الاميرات الثلاث و زوج بنته فاديه  بيير سعيد اورلوف ؛ وابنه الملك أحمد فؤاد الثانى و النبيل عمرو إبراهيم والنبيله نيفين حليم و الملكه فريده و إيرما ...

و دى كانت جنازة فقط ؛ وتم حفظ الجثمان لحد ما تتم إجراءات السفر والدفن فى مصر حسب وصيته .

عرض ملك المملكه العربيه السعوديه الملك فيصل استقبال جثمان الملك فاروق و دفنه في الاراضي السعوديه لكن أسرته كانت حابه أنه يندفن فى المكان اللى وصي بيه فاروق . 

********

كان الملك فاروق أوصي بدفنه بجوار والده في مقابر أسرة محمد علي بالرفاعى ؛ ولكن السلطات المصرية وقت وفاته رفضت تماما تنفيذ الوصيه .

ووصل الجثمان على متن شركة طيران العربيه المتحده يوم ٢٧ مارس  داخل تابوت خاص على الطائره وكان مرافق للجثمان أخته الاميره فائقة فؤاد و زوجها فؤاد صادق اللى سافروا قبلها باسبوع وقت ما عرفوا خبر الوفاه وحضروا الجنازة هناك وكان فى استقبالهم فى المطار الاميره فوزيه فؤاد و زوجها اسماعيل شيرين واللى كانوا هما كمان مسافرين يحضروا الجنازه فى ايطاليا و رجعوا قبل موعد رجوع الجثمان بيوم واحد لتجهيز مكان دفن الملك و انهاء الإجراءات فى مصر. 

وهنا كانت الجنازة التانيه للملك و دفنه في مقابر أسرة اسماعيل شيرين بالشافعي . واللى كانت ٣ عربيات فقط ؛ 

١ - العربيه اللى فيها جثمان الملك

٢- العربيه اللى فيها الاميره فوزيه و زوجها و الملكه فريده والأميرة فائقة وزوجها

٣- العربيه اللى فيها مدير المباحث العامه ومدير أمن القاهرة اللواء حسن كامل والعقيد أحمد صالح مفتش المباحث بالقاهره .

وكان فى عربيتين ماشيين ورا الموكب من دار اخبار اليوم فيها صحفيين ومصورين ؛ لكن تم توقيفها و تفريغ اطارات السياره لمنعهم من الحضور .

جنازة الملك كانت الساعه ٢ ونص بالليل على ضوء القناديل ؛ وحضرها اخواته فائقه و فوزيه و فؤاد صادق وإسماعيل شيرين و بناته الاميرات والملكه فريده .

وتم إتباع تقليد فرش المقبره بالحناء كما إعتاد أفراد الأسرة ؛ فرش المقابر بالحناء..    

وهو تقليد قديم لحكام وأفراد الأسره العلويه فى مصر ؛ حيث إعتاد ملوك الاسره على فرش المقبره بالحناء ؛ حيث أوصي الكثير منهم بذلك قبل وفاته ؛ 

والحناء؛ تجعل رائحة القبر طيبه و تساعد على تحلل الجثمان سريعا 

إتبع هذا التقليد كثير من أفراد الأسرة؛ مثل محمد على باشا و إبراهيم باشا و الخديوى إسماعيل وملوك الأسره وحتى الاميره فريال فاروق ووالدتها الملكه فريده 

وكثير من العائلات الأرستقراطيه أيضا قاموا بإتباع هذا التقليد ؛ مثل العائله الأباظيه؛ حيث أوصي الفنان رشدى اباظة بذلك قبل وفاته

إلا أن التاريخ الذي كتب أولا على لوحة القبر أشار إلى تاريخ خاطىء هو 18 إبريل 1965 الموافق 15 ذو الحجة 1384.

تم تصحيح التاريخ الميلادي ليصبح 18 مارس وتبدو آثار التصحيح واضحة لمن يدقق في اللوحة، بينما لم يتم تصحيح التاريخ الهجري فظل كما هو 15 ذو الحجة.

*****

وفى عهد السادات ؛ طلبت الملكه فريده من السادات تنفيذ وصية الملك فاروق بدفنه بجوار والده وجده فى الرفاعى وفعلا وافق السادات ؛ و بدأت عملية نقل رفات الملك فى حضور الاميره فريال ( واللى قالت إن ده كان اصعب يوم فى حياتها انها تشوف هيكل والدها بعد سنوات ) ؛ و الاميره فوزيه فؤاد وزوجها اسماعيل شيرين ؛ و أفراد الأسرة وبعض باشاوات الزمن ده ؛ ولما نزل التربي للمقبره لنقل الرفات ؛ لقي أنه لو شال هيكل الملك هيتفتت فى ايده وهو طالع وهيكون شكل مش لطيف اودام الناس الموجوده ؛ و كانت النتيجه أن تم لف هيكل الملك ب حصيره و ربطها كويس وخروجها للدفن والنقل للرفاعى ؛ وهنا تستعجب على حال الدنيا لما تشوف ملك أغنى دولة في الشرق وأفريقيا و اخرتها متر فى متر و لفه في حصيره ...

وهنا كانت الجنازة التالته للملك من الشافعى للرفاعى ؛ و كمان لاول مره فى مصر يتعمل سرادق عزاء للملك يحضره أفراد الأسرة لتلقي العزاء في وفاة اخر حكام الاسره العلويه . 

*****

"أنا اعلم أن قصتي كما سأكتبها ستكون ممنوعة من مصر ، و سوف تؤخذ منها جمل مشوهة ، و لكني أعلم أن نسخة كاملة سوف تصل بطريقة أو أخرى ."

******

لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/

#حواديت_إيمان

Tweet