لعنة زمردات أوجيني

 حدوتة ٣

(لعنة زمردات أوجيني)  👑

زمردات إتنقلت ملكيتهم ل ٣ دول ملكية ؛ وكلهم كان ليهم نفس المصير ! 

تعالوا نشوف 👀

الكونتيسة الإسبانية أوجيني ؛ اتجوزت نابليون الثالث حاكم الامبراطورية الفرنسية الثانية. فبقت إمبراطورة فرنسا .

جالها في يوم زفافها هدية عبارة عن تسع زمردات وزنها حوالي 196 قيراط. و طلبت من مصمم مجوهرات فرنسي اسمه فونتناي يحطها في تاج عشان يكون ليها .

فونتناي عمل التاج فعلا و كان من القطع المفضلة لأوجيني و لبسته في أكتر من مناسبة .

في سنة ١٨٧١ تم عزل الامبراطور نابليون الثالث و تم إجباره هو و زوجته على النفي خارج البلاد وتحديدا إنجلترا .

خدت أوجيني معاها التاج في المنفى ؛ ولبسته تاني كتير وبعد فترة توفى ابنها الوحيد لوي نابليون ؛ وبعد وفاته رفضت تلبس أي قطعة مجوهرات و باعت أغلب القطع و احتفظت بجزء بسيط ومنهم التاج ؛ لكن فكت الزمردات منه .

وقتها كانت ( اينا) حفيدة الملكة فكتوريا ملكة انجلترا هتتجوز من الملك الفونسو التالت عشر ملك إسبانيا وهتبقى ملكة أسبانيا ؛ وبما أن الامبراطوره أوجيني كانت عايشه في المنفى فى انجلترا وكانت علاقتها كويسه جدا مع ملكة انجلترا 

ف اللى حصل أن أوجيني أدت ل ( اينا) هدية زفافها .. مجوهرات التاج إياه ...

طلبت الملكة اينا من مصمم المجوهرات الاسباني سانز تصميم قلادة بالزمردات ...

وفي سنة ١٩٣١ ...

وطبق الأصل العلقة اللى فاتت ! 

لا قلم زاد ولا قلم نقص 🙂

تم إجبار الأسرة المالكه في إسبانيا على حياة المنفى ..

وبمرور الوقت باعت إينا جزء من مجوهراتها ؛ و إتباعت الزمردات إياها سنة ١٩٦١ في مزاد وكان المشترى هو دار كارتييه الفرنسية واللي بدورها شكلت الزمردات في قلادة 

و تاج و اشتراهم وقتها شاه ايران محمد رضا بهلوي عشان يديهم هدية لزوجته الشهبانو فرح بهلوي عشان خلفت ولي العهد ...

فرح بهلوي لبست التاج والقلادة أكتر من مره و زي ما احنا عارفين تم عزل الشاه من منصبه و إجباره هو وأسرته على المنفى و كمان توفى الشاه بعد فترة قصيرة و فقدت فرح اصغر بناتها ليلا بهلوي و بعدها ابنها علي بهلوي ..

أما الزمردات .. ؛ 

فرح بهلوي لما مشيت من إيران اخدت جزء من مجوهراتها معاها وسابت الباقى فى إيران ؛ فأخدت القلادة و سابت التاج في إيران ..

التاج معروض للجمهور في البنك المركزي الإيراني ؛ أما القلادة فتم على الأغلب بيعها لأنها ظهرت في رقبة زوجة رجل اعمال لبناني 

#حواديت_إيمان 

Tweet