محمد حسين خيري

 

حدوتة ٨

حكاية حفيد السلطان حسين كامل اللي راح ومرجعش !

السلطان حسين كامل حكم مصر بعد عزل إبن أخوه الخديو عباس حلمي الثاني ؛ واستمر حكمه من ١٩١٤ ل ١٩١٧

السلطان حسين اتجوز مرتين :

المرة الأولي كانت من الأميرة عين الحياة رفعت ابراهيم و خلف منها :

الأمير كمال الدين حسين ؛ الأمير سيف الدين حسين ؛ الأمير أحمد كاظم حسين ؛ الأمير يوسف كامل ؛ الأميرة كاظمة ؛ الأميرة كاملة حسين

المرة الثانية كانت من السلطانة ملك و خلف منها:

الأميرة قدرية ؛ الأميرة بديعه ؛ الأميرة سميحة

يعني الأميرة قدرية تبقى بنت السلطان حسين كامل والسلطانة ملك ...

وهيا دي اللي تهمنا دلوقتي ...؛

الأميرة قدرية اتجوزت مرتين ؛ من محمد جمال الدين سري و من محمود باشا خيري وخلفت منه 

  

- محمد حسين محمود خيري

- سميرة محمود خيري

********

واللي يهمنا دلوقتي هو : "محمد حسين محمود خيري"

**********

في نفس الوقت كان في اميره عثمانيه إتولدت فى ٦ ديسمبر ١٩٢٨ فى باريس فى فرنسا بعد نفي آل عثمان لأوروبا ؛ وهى حفيده مباشره للسلطان عبد المجيد الاول ؛

بعد ٣ سنين من ولادتها مات باباها و عاشت مع والدتها سنين بيواجهوا النفي لوحدهم

درست فى جامعة السوربون فى فرنسا وتخصصت فى الصحافه ؛

جت الاميره مصر مع كتير من أفراد آل عثمان ؛ و عاشت فيها لفتره ؛ و تزوجت من محمد حسين محمود خيري  وهو كان أكبر منها ب ٤ سنين ؛ مواليد ١٩٢٤ ؛ ابن الاميره قدريه حسين كامل ؛

وبالزواج ؛ بقت اميره مصريه ؛ وكان عندها وقتها ٢١ سنه ؛ و عاشت مع زوجها ٤ سنوات و بس ؛ و الزواج ما انتهاش لا بطلاق و لا بوفاة ؛

الزواج انتهى بمأساه ....!

سنة ١٩٥٦ ؛ اتقبض على زوجها بتهمة التآمر على قلب نظام الحكم و إعادة النظام الملكى ؛ ( و دى كانت محاولة بجد بالمناسبه و كان في أطراف كتير فيها وكان هدفها إعادة الملك فاروق للحكم أو تولى النبيل عمرو إبراهيم الحكم ) .

من وقت ما اتقبض على زوجها ؛ مشافتوش ....!

ولا حد شافه ؛ ولا حد كلمه ؛ ولا حد عرف هو فين ؛ ولا حد عرف حصله ايه ؛ ولا حد عرف هو عايش ولا مات ؛ ولو مات ؛ طب مات امتى واندفن فين ...  محدش عارف !!!

كانت الاميره فوزيه عندها ٢٥ سنه بس وقتها ؛ و فضلت مستنيه زوجها يرجع فى يوم من الايام ؛ و رفضت تماما أنها تنسي أنه عايش و تتزوج من جديد وتجرب حظها و تگون أسرة و أبناء .... و فضلت طول حياتها مستنياه او مستنيه اى خبر منه وعاشت حياتها على ذكري ٤ سنين عاشتهم مع زوجها .

اضطرت تسيب مصر و ترجع فرنسا ؛ و اشتغلت سنة ١٩٦٢ فى اليونسكو ؛ وفضلت تراعى والدتها وكرست حياتها ليها وبس من غير ما تفكر فى اى ارتباط أو زواج .

ماتت والدتها فى ٢٠٠١ ؛ و ماتت الاميره فوزيه فى ٧ ابريل ٢٠١٤ ؛ وكان عندها وقتها ٨٥ سنه  واندفنت جنب والدتها  ؛ فى باريس ....

أما الاميره قدرية والدته فماتت قبل القبض عليه في ١٩٥٥ ؛ أما جدته السلطانة ملك فماتت في نفس السنة اللى اتقبض عليه فيها سنة ١٩٥٦

وفي ٢٠٠٧ ؛ ماتت سميرة خيري بنت الأميرة قدرية و اخت محمد حسين خيري ؛ من غير ما تعرف هل اخوها عايش ولا ميت أو حتى لو مات مدفون فين ....

#حواديت_إيمان