الأميرة فتحيه فؤاد

 يا زهرة في خيالي رعيتها في فؤادي

جنت عليها الليالي وأذبلتها الأيادي

و شغلتها العيون فمات ســحر الجفون

          ***********

الأميرة فتحيه فؤاد 👑⁦🇪🇬⁩⁦♥️⁩ 

 لما إتولدت ؛ زعل والدها الملك فؤاد أنها مش ولد ؛ لأنه كان نفسه فى أخ لإبنه الملك فاروق لتأمين مسار العرش وولاية العهد .....

كتب امير الشعراء احمد شوقي قصيده بمناسبة مولدها وقال : 

فَتحِيَّةٌ دُنيا تَدومُ وَصِحَّةٌ

تَبقى وَبَهجَةُ أُمَّةٍ وَحَياةُ

مَولايَ إِنَّ الشَمسَ في عَليائِها

أُنثى وَكُلُّ الطَيِّباتِ بَناتُ

كان فى نميمه وصلت لمسامع الملك فؤاد أنها ليست إبنته ( الكلام على لسان الصحفي عادل حموده )

جربت حياة القصور ؛ أو السجن الذهبي زى ما كانوا بيسموه ؛ إتعلمت جوه القصر لغات كتير زى العربي والإنجليزية والفرنسية و التركى والإيطالية ؛ واتعلمت العزف على الكمان و اصول الاتيكيت والبروتوكول الملكى 

سافرت مع والدتها الملكه نازلى لما كانت عندها مشاكل في الكليتين ؛ وهناك خرجت لاول مره في حياتها من غير حراسه ومن غير يشمك ومن غير عيون صحافه ؛ تقدر تدخل تأكل فى مطعم زيها زى أى حد عادى ؛ وتركب تاكسي و تدخل محل تشتري هدوم ( طبعا قبل كده كانت الفساتين بتتصمم لها مخصوص ) ...

تقدر تقول عجبتها الحياه دى ؛ بعيد عن دسائس و وشايا ومشاكل القصر ( اللى وقتها فعلا كان بيلفظ أنفاسه الأخيرة ) 

إتعرفت على شاب مصري قبطى اسمه " رياض غالى " ؛ وتحول التعارف الى صداقه والصداقه إلى حب ... ولما قرروا يحولوا الحب إلى زواج ...  الملك رفض تماما ! 

أسباب الرفض كانت لسوء سمعة رياض ( كان مشهور عنه أنه له علاقات نسائيه وأنه واد حلنجى نصاب ) ؛ وطبعا لاختلاف المستوى الاجتماعى و الدينى وأن الاميره لازم تتجوز بموافقة ولى أمرها الملك والا تكون الزيجه باطله .

طلب الملك فاروق من أخته العوده فورا إلى مصر ورفضت وعاندت الملك واتجوزوا سنه ١٩٥٠ على ايد مأذون باكستانى بعد أن تحول رياض غالى للإسلام . و بسبب الزواج ده الملك جردهم من كل ألقابهم الملكيه و سحب ممتلكاتهم فى مصر 

وبسببهم خرج الناس فى الشوارع يقولوا :

" يا فاروق يا أنتيكا هات أمك من أمريكا "

 وخلف الثنائى ده ( رفيق ؛ رائد ؛ رانيا ) .....

عاشوا حياه مستقره نوعا ما لان وقت ما خرجوا من مصر كان معاهم كامل مجوهراتهم و أموالهم ( لانهم خرجوا قبل ١٩٥٢ )  ؛ عايشين فى مستوى ممتاز ؛ وبقي ليهم اصدقاء فى الولايات المتحدة الأمريكية .

لحد يوم ضارب فيه رياض غالى بأموال الاميره فتحيه و الملكه نازلى صبري فى البورصه وخسرها كلها ؛ وبقوا فى يوم وليله مديونين ومش معاهم فلوس تكفي ؛ وتم الحجز على فيلتهم و اتباعت مجوهراتهم فى مزاد علنى ...

رياض غالى بقي عصبي المزاج جدا وخاصه أنهم حملوه اسباب كارثة إشهار إفلاسهم ؛ ويقال إنه كان دائم الشجار معاهم وأنه فى مره ضرب الاميره فتحيه 

انفصلت عنه الاميره وطلبت الطلاق ؛ واشتغلت فى حاجات كتير عشان تقدر تصرف على نفسها وعلى والدتها الملكه و ابنائها التلاته ؛ لكن كان اصعب شي عليها لما اشتغلت عاملة نظافة فى فندق في امريكا ؛ تنظف الحمامات وتمسح الأرض وتغير الملايات .... بعد ما كانت فى يوم أميره ولها خدم وحشم ووصيفات ....

اتطلقت الاميره من رياض ؛ ( بالمناسبه هو رجع لديانته الاولى )  لكنها كانت دائما بتسأل عليه وكان كمان الأبناء بيزوروه وبينصحوه يشوف طبيب نفسي عشان يتعالج من الاكتئاب النفسي اللى حصله وتدهور الحاله النفسيه 

سنه ١٩٧٦ سمح الرئيس السادات للملكه نازلى والاميره وأبنائها أنهم يرجعوا مصر و هيديهم سكن ومعاش زى ما عمل مع الملكه فريده ....

ولما عرف رياض غالى أنهم مسافرين ؛ طلب من الاميره فتحيه أنها تعدى عليه قبل ما تسافر ؛ رفضت فى البدايه لكنه طلب منها أنها تيجى عشان حتى يودعها 

( يقال إنه قالها تعالى عشان مجهزلك شنطة هدوم تخص والدتى عاوزك ترجعيها مصر ؛ ولكن أنا شايفاها امر غير منطقي أنه يحتفظ بملابس والدته لسنين وانه كان يقدر أنه كان يتبرع بيها لأى جمعيه فى أمريكا أو حتى يبيعها .... )

المهم ....

راحت له الاميره وكان مستنيها بالمسدس اللى فرغ طلقاته على جسمها وبعدين ضرب نفسه رصاصه عشان ينتحر ...

الاميره اتوفت فى ساعتها ؛ وكانت أصغر اخواتها وأول واحده تموت فيهم ؛ و رياض تم إنقاذه و قضي بقية حياته في السجن لحد ما مات بعد ما أصيب بالعمى والشلل نتيجة الرصاصه .

الملكه نازلى رفضت ترجع مصر بعد اللى حصل و ماتت بعد بنتها بفترة قصيرة ....

الأبناء التلاته عاشوا مع خالتهم الاميره فائزه فؤاد ( اللى هى الوحيده في اخواتها اللى مخلفتش ) لحد ما ماتت أوائل التسعينيات .

رفيق الابن الأكبر انتحر يوم ما والده مات في السجن وكان عنده وقتها حوالى ٣٠ سنه 

رائد مات فى ٢٠٠٧ ( وعلى حد علمى أنه تزوج وله طفلين ) 

رانيا ( لم تنجب ) وهى بتشتغل حاليا ممرضه فى مستشفي فى الولايات المتحدة الأمريكية ؛ وهى صديقه ليا على الفيس بوك واتكلمت معاها بس هى متحفظة فى الكلام عن الماضي بكل ٱلامه  .

صدق او لا تصدق ! 

لك أن تتخيل أن ابنة الملك فؤاد عملت كعاملة نظافه يوما ما

وحفيدة الملك تعمل الٱن ممرضه !

وان ببساطه ابنة ملك وشقيقة ملك ؛ اتقتلت !

وأن كلا من الملكه نازلى والاميره فتحيه يندفنوا فى مقابر ( بسيطه )  صدقه بالولايات المتحدة 

                     ***********

هي غرامي كل شيْ ضاع مني فنزعت الحب من قلبي و روحي

ووهبت العمر اوتاري و لحني وتغنيت فداويت جــروحي

أنا طــير في ربى الفـــنّ يغنّي للطيور للزهور في الغصون

#إيمان

Tweet