English French German Spain Italian Dutch Russian Portuguese Japanese Korean Arabic Chinese Simplified

2024-03-18

وفاة ملك

 حدوتة ٨ 





"وفاة ملك" 

 

" ملوك العالم لن يبقى منهم سوى ملوك ورق الكوتشينة الأربعة وملك بريطانيا " ( فاروق الاول ) .


*******


يوم ١٧ مارس ١٩٦٥؛  ايرما كابيتشي ( صديقة الملك ) كانت في مونت كارلو واخر مره كلمها فاروق كانت الساعه ٨ ونص بالليل ؛ وكان بيقولها أنه هيجيلها على مونت كارلو . 


راح الملك يتعشي فى مطعم ( إيل دى فرانس ) فى قاعة ( سانت ترويز ) فى روما ؛ 

وكانت معاه اليوم ده كوافيره عندها ٢٢ سنه اسمها آن ماريا جاتى .


طلب الملك فاروق و رفيقته يومها قطعة لحم من نوع مميز اسمه «فوليرانتينا» وهو يعد من أحسن أنواع اللحوم ويحضرونه خصيصاً من فلورنسا، وهو عباره عن شريحتين من لحم العجل ومعها بطاطس محمره .


و  «سلطانية اسباجتى كبيرة عليها دسته من المحار وجراد البحر ، وهو طبق معروف فى إيطاليا اسمه اسباجيتى الأجاندولا .


و الحلوى كانت كعك بالمربي .


وبعد ما كل فاروق من طبق المحار ولع السيجار بتاعه لكن ملحقش ياخد منه اى نفس و وقع على الأرض ووشه احمر هو حاطط ايده فى بؤه بيحاول ياخد نفسه ؛ و ساعتها جري عليه البارمان وحاول يعمله تنفس صناعي على كنبه موجوده في المطعم لحد وصول الإسعاف ؛ ووصل الدكتور نيقولا ماسي فى عربية الإسعاف وحاول ينعش قلب الملك لكن هو كان للاسف الشديد توفي بالفعل.  


وحملته سيارة الإسعاف إلى مستشفى سان كاميللو وقرر الأطباء الإيطاليون بأن رجلًا بدينًا مثله يعاني ضغط الدم المرتفع وضيق الشرايين لا بد أن يقتله الطعام.


و البوليس وقتها قال إن الوفاه نتيجة التخمه ؛ و أنهم لقوا فى جيب فاروق مسدس و ساعة ذهبيه وخاتم زواج و مبلغ ٩٧ الف ليره ( من عجائب التقرير أن الملك ازاى كان شايل المبلغ ده كله فى جيبه مثلا 😂) 


**********



وتم إعلان وفاة الملك فاروق في إيطاليا يوم الخميس 18 مارس 1965 الموافق 16 ذو القعدة سنة 1384. في الساعة الواحدة والنصف صباحًا،


وبكرة نتكلم عن ال ٣ جنازات اللي اتعملوا للملك فاروق 


*******


لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/


#حواديت_إيمان

2024-03-17

٧ سطور و ٧ سنين

 حدوتة ٧


" ٧ سطور ب ٧ سنين " 





الأميرة فوزية فؤاد اتقدم لها في يوم من الايام أمير من إيران  من عيلة بهلوي هو الأمير محمد رضا بهلوي إبن الحاكم وولي عهده..

اتجوزت الأميرة من الأمير وسافرت معاه إيران؛ ولأن الجوازة كانت جوازة ملكية فجالهم هدايا كتير؛ من ضمنها هدية جميلة وغريبة في نفس الوقت...

الهدية كانت رسالة بالذهب ومكتوب فيها الأرقام من ١ ل ٧؛ وتحتها ٧ سطور فاضية؛ وبعدين أمنية للعروسين بالسعادة.

الهدية كانت من شاب ظابط وسيم إسمه "إسماعيل شيرين"

كان من عيلة الأميرة فوزية.



طب ايه حكاية رقم ٧؟


الحكاية إن الأميرة فوزية اتجوزت في ١٩٣٩ ورجعت مصر لطلب الطلاق في ١٩٤٥ 

يعني مفاتش ٧ سنين ...


طب وايه يعني؟ 


الحكاية إن إسماعيل شيرين في خلال ال ٧ سنين دول متجوزش أو ارتبط رغم إنه وصل للتلاتين وده عمر كبير نسبيا في الوقت ده إنه يستني من غير جواز.


طب برضه وايه يعني؟ 


الحكاية إن الأميرة بعد طلاقها من زوجها الشاه سنة ١٩٤٨؛ اتجوزت بعد انتهاء شهور العدة مباشرة  من اسماعيل شيرين في مارس ١٩٤٩.


طب وده معناه ايه الكلام ده؟! 


معناه "في رأيي" إن ال ٧ سطور الفاضيين هي ٧ سنين فاضية من عمر اسماعيل شيرين؛ وإنه بالهدية اللي على شكل رسالة؛ بيقول للأميرة إن رسالته ليها إنه هيستناها ٧ سنين؛ ولو عدت ٧ سنين وهيا سعيدة مع زوجها الشاه يبقى هيتمنالهم السعادة ويشوف حياته.

ومعناه إن ممكن يكون اسماعيل شيرين كان بيحب الأميرة فوزية قبل زواجها من الشاه وإنه انسحب من المشهد لما لقى أمير بينافسه على قلبها. 

بدليل إن لما الملك فاروق لما حب يعمل حفلة لشم النسيم ويرفه بيها عن أخته فوزية بعد رجوعها من إيران حزينة؛ طلب من إسماعيل شيرين الحضور.. ؛ وكل كتب التاريخ بتقول إن الملك فاروق إختار اسماعيل شيرين تحديدا عشان كان مخلص له؛ بس هو اسماعيل شيرين كان المخلص الوحيد للملك؟! 

اظن إن الملك كان عارف إنه بيحب الأميرة ويمكن الأميرة كمان كان جواها مشاعر ناحيته.


وأنا اتكلمت عن التحليل ده في لقائي مع منى الشاذلي في اللينك ده:


https://vm.tiktok.com/ZMMMTe5eo/


وكمان في كتاب صاحبات السمو الملكي؛ واللي تقدروا تطلبوه أونلاين من هنا: 


https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/


#حواديت_إيمان 

2024-03-16

يا بخت مملكتين بفرحكم الاتنين

 حدوتة ٦





" يا بخت مملكتين بفرحكم الاتنين" 


زي اليومين دول سنة ١٩٣٩؛ كانت مصر بتحتفل بزفاف ضخم جدا وعظيم جدا جدا ؛ هو زفاف الأميرة فوزية فؤاد أخت الملك فاروق وبنت الملك فؤاد وحفيدة الخديو إسماعيل على الأمير الإيراني محمد رضا بهلوي إبن شاه إيران رضا بهلوي وولي عهده من بعده.


 الاحتفالات بالزفاف كانت فخمة جدا جدا؛ وكانت الملكة نازلي بتتعمد إظهار فخامة أسرة محمد علي أودام أسرة آل بهلوي؛ وكان النبيل عباس حليم بيقول عنهم إنهم ( محدثو نعمة Novo Rich ).


الحقيقة الزفاف كان عظيم جدا جدا وشارك فيه عدد كبير من الفنانين زي بديعه مصابني وببا عز الدين ومحمد عبد الوهاب وأم كلثوم واللي غنت اغنية (مبروك على سموك وسموه) .. وفي مقطع من الأغنية بتقول( يابخت مملكتين بفرحكم الاتنين)..


 بس هل ياترى المملكتين فعلا كان حظهم كويس بالجوازة؟!


بعد أقل من ٧ سنين من الزفاف رجعت الأميرة فوزية فؤاد لمصر وطلبت الطلاق واستمرت مفاوضات الطلاق ٣ سنين لحد ما اتطلقت فعلا سنة ١٩٤٨ وحصل وقتها أزمة دبلوماسية بين مصر وإيران وقطيعة سياسية فضلت لسنوات.


والأميرة فوزية إتجوزت من إسماعيل شيرين

والشاه إتجوز من الأميرة ثريا بختياري.

والمملكتين إنهاروا وإنتهى حكمهم.

وأهي دنيا...




لطلب كتاب صاحبات السمو الملكي:

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/


#حواديت_إيمان

2024-03-15

المونوجرامات الملكية

 حدوتة ٥ 

"المونوجرامات الملكية" 





المونوجرام هو توقيع شخصي للملك وشعار الرسمي وعادة بيكون الحروف الأولى من إسم الشخصية بخط معين وبطريقة معينة ومعاه التاج الملكي؛ وبيتم إستخدامه في الأوراق الرسمية والمراسلات في كل المناسبات الرسمية أو على جدران القصور..


دايما شخصيات أسرة محمد علي وخاصة الحكام كان لهم "مونوجرام" ومن أشهر منفذي المونوجرامات الملكية كان مصطفى غزلان بك ومن بعده تلميذه الأستاذ محمد عبد القادر عبد الله وأنجب إبن سماه غزلان على اسم أستاذه ولكنه أستشهد في حرب ٧٣

وتوفي غزلان بك في عام 1939




ومن الحواديت المشهورة عن المونوجرامات؛ إن في يوم من الأيام قررت الأميرة ماهوش شيرين انها تروح تزور الفنانة مها صبري في بيتها بإعتبارها فنانة ومرهفة الحس؛ عشان تطلب منها رجاء خاص وهو إنها تقنع زوجها الظابط الشهير إنه يرجعلها جزء من ممتلكاتها اللي صادروها.

راحت فعلا الأميرة لمها صبري؛ وإستقبلها السفرجي ودخلها الصالون وقدم لها الشاي والكيك في انتظار مقابلة مها صبري؛ لكن لما شافت الأميرة أطقم الصيني اللي اتقدمتلها انسحبت بهدوء من المنزل من غير ما تقابل مها صبري؛ لأن طقم الصيني كان مكتوب عليه المونوجرام الخاص بالأميرة ماهوش أصلا 😀








لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/


#حواديت_إيمان

2024-03-14

قلادة الأميرات

حدوتة ٤ 



"قلادة الأميرات" 


قطعة مجوهرات كانت تخص الملكة نازلي؛ ولكن أهدتها.لبناتها في مناسبات خاصة؛


القطعة سافرت من مصر واستقرت في امريكا مع الملكة نازلي وكمان لبستها الأميرة فتحية يوم فرحها على رياض غالي في أمريكا.


بيقال إن القطعة كانت منحوسة؛ وكل الأميرات اللي لبسوا القطعة إطلقوا من أزواجهم؛ وحتى نازلي كانت تعيسة مع زوجها؛ والأميرة اللي لبستها يوم فرحها اتق.تلت من زوجها.





القطعة اتباعت في النهاية في مزاد مجوهرات الملكة بمبلغ ٧٧٥٠ دولار؛ ومعنديش أي فكرة عن تواجدها حاليا أو مين مالكها



لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/


#حواديت_إيمان 



2024-03-13

صادق الوعد

 حدوتة ٣ 





"صادق الوعد" 


في يوم من الأيام قرر الخديو اسماعيل أنه يعمل مدرسة ابتدائية لتعليم البنات وخصوصا الأميرات من العيلة؛ وكان في طفلة أميرة اسمها الأميرة خديجة ابنة محمد علي الصغير ( ابن محمد علي الكبير) واتكلمت عنه قبل كده هنا: 


https://www.facebook.com/share/p/NVQ51Aa8kwtyKX24/?mibextid=Nif5oz


؛ طلبت الأميرة من الخديو انها تدخل المدرسة فوعدها إنها لو ذاكرت كويس واجتهدت هيجوزها ابنه.


وفعلا دخلت الأميرة المدرسة؛ وفي يوم قرر الخديو إنه يعمل زيارة للمدرسة وهناك دخل الفصل اللي فيه الأميرة خديجة وسألها: " وصلتي لحد فين في القرآن يا خديجة؟"

فردت عليه وقالتله: 

"واذكر في الكتاب إسماعيل إنه كان صادق الوعد.."


فإبتسم الخديو عشان ذكائها وردها السريع؛ وقالها متخافيش انا لسه عند وعدي.

وبعد ٥ سنين؛ وفى الخديو بوعده وفعلا جوزها ابنه الأمير حسن؛ وخلفوا ذرية من الأبناء والاحفاد؛؛ ويمكن اشهر حفيد مباشر لها هو الأمير حسن حسن صاحب كتاب in the house of Mohamed Ali

واتنشرت حكاية الأميرة خديجة مع الخديو في مجلة الهلال؛ وانا بحكيهالكم دلوقتي ❤️


لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/



#حواديت_إيمان 



2024-03-12

إستراحة الملك

 حدوتة ٢ 





"إستراحة الملك" 


كان حكام أسرة محمد علي بيعتزوا بتاريخ مصر جدا؛ وكانوا دايما بيزوروا الأهرامات..

وكالعادة كان في حاجة اسمها "استراحة" ودي للحاكم أو لبعض الأميرات وبتكون عشان يرتاحوا فيها شوية بعد أي رحلة أو زيارة.

وكان موجود عند الأهرامات إستراحة؛ أعتقد إنها بترجع لعهد الخديو اسماعيل؛ وزارها الملك فؤاد مع أبنائه وهما أطفال؛ وفي عهد الملك فاروق تم ترميم الإستراحة.


لحد هنا تمام.. أما السسبنس بقى؛ إن من ضمن العمال اللي اشتغلوا في الترميم؛ عامل أسمراني نحيل كان بيشيل الرخام على كتفه تحت الشمس؛ كان اصلا ظابط جيش وتم تسريحه واضطر يشتغل أي حاجه عشان يقدر يصرف على مراته وولاده.


عرفتوا هو مين؟!

هو الرئيس محمد أنور السادات 


ومرت الأيام وبقى السادات مكان فاروق.. وأهي دنيا!

وسبحانه يؤتي الملك من يشاء وينزع الملك ممن يشاء.



لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/



#حواديت_إيمان 




2024-03-11

حدوتة الأمير مع الشيخ

 حدوتة ١ 




"حدوتة الأمير مع الشيخ"


كان ياما كان .. كان في أمير وسيم إسمه يوسف كمال، عمل كلية الفنون الجميلة وكان كل طالب بيدرس فيها بياخد أدوات الكلية ببلاش على حساب الأمير وكمان محددش أي سن لدخول الكلية.


كان عنده قصر جميل في المطرية؛ وقدمه هدية للدولة سنة ١٩٥٠ عشان يبقى معهد لبحوث الصحراء؛ لكن من بخت الأمير إن القصر اتصور فيه فيلم عن واحد جنايني وولاده علي وحسين؛ ولازم نفتكر سوا جملة حسين الشهيرة في الفيلم "هنخربها ونقعد على تلها" في المشهد ده👇 


https://www.facebook.com/share/v/Gb7cTKp13ueqmuDF/?mibextid=oFDknk 

******


قالت عنه النبيلة نيفين حليم في مذكراتها: 

"كان الأمير يوسف كمال شخصًا ثريًا شعر أنه من واجبه رعاية شعبه وبلده والمساهمة في رفاهيتهم وبعد الثورة، قام بإعادة الأموال التي كان يضعها في أوروبا، و كوفئ بخسارة جميع املاكه."


ترجم عدد من المؤلفات الأجنبية ؛ منهم كتاب عن تاريخ مصر فى القرن التاسع عشر لإدوارد جون ؛ وفتح السودان ل سليم قبطان ؛ وقد شارك الأمير التعريب المؤلف محمد مسعود .

كما قام بتعريب كتاب لمحه عامه عن مصر ل كلود بك و هو عن جزئين و يتناول تاريخ مصر من العهد الفرعونى وحتى عهد أسرة محمد على وهو حوالى ٨٤٩ ألف صفحه.


******

 وفي ليلة من الليالي؛ كان الأمير في رحلة استكشافية؛ فوالدته حلمت إن في أسد بيهجم عليه؛ لكن ظهر شيخ اسمه الشيخ عمران وانقذه؛ ولما حكت الحلم ده لإبنها الأمير قالها إن فعلا كان في أسد هيهاجمه لكن ظهر شيخ فجأه وأنقذه واختفى وميعرفش راح فين

والدته بعد كده قالتله لازم نرمم ضريح الشيخ عمران في نجع حمادي؛ وفعلا الأمير رمم الضريح وعمل جنينة للضريح وضم الجنينة لقصر وبقى القصر هو قصر الأمير يوسف كمال في نجع حمادي...

والصورة للأمير يوسف كمال وهو لابس لبس الشيخ عمران في قصره بنجع حمادي؛  وأظن إنكم أول مرة تشوفوها 😍


لطلب كتاب صاحبات السمو الملكي 👑: 

https://alrewaqpublishing.com/product/%d8%b5%d8%a7%d8%ad%d8%a8%d8%a7%d8%aa-%d8%a7%d9%84%d8%b3%d9%85%d9%88-%d8%a7%d9%84%d9%85%d9%84%d9%83%d9%8a/


#حواديت_إيمان

2024-01-23

صاحبات السمو الملكي






 يتحدث هذا الكتاب عن الجميلات الخمسة: فوقية، فوزية، فائزة، فائقة، وفتحية، بنات الملك فؤاد الأول، وأخوات الملك فاروق. أميرات ولدن في نفس المكان، وعشن الأحداث عينها، وتلقين الدروس ذاتها، ولكن شاءت الأقدار أن يحدث بينهن الفراق، وتعيش كلٌ منهن حياة مختلفة عن الأخرى تمامًا.. فهناك من صارت ملكة، وهناك من دارت بها المقادير وأصبحت عاملة نظافة، وهناك من استطاعت تكوين أسرة وسلالة من الأبناء والأحفاد، وهناك من لم تحظَ بنعمة الإنجاب، وهناك من اتخذت من الظل مسكنًا وتوارت عن الأنظار. تستحق حكاية كل منهن أن يتم تجسيدها في فيلم هوليودي ليحصد الأوسكار ربما، حكايات من ألف ليلة وليلة لخمس أميرات جمعهن حرف الـ"فاء" وفرقت بينهن الأقدار. 

صاحبات السمو الملكي

لـ إيمان الشرقاوي

تصميم الغلاف: عبد الرحمن الصواف

انتظروا مسابقات الرواق ♥️ مفاجآت وهدايا قيمة 🎁

هنكون معاكم في قاعة 2

جناح رقم B15

في الفترة من 24 يناير وحتى 6 فبراير 

#الرواق_للنشر

#كتب_ترضي_شغفكم 

#معرض_القاهرة_الدولي_للكتاب

2023-12-22

The crown ريفيو الموسم السادس




 The crown 

حلقة ٥

"ثرثرة غير ضرورية" 

تشارلز عاوز يقابل كاميلا بس للأسف ديانا لسه حادث وفاتها مسمع فمش هيقدروا يتقابلوا بسبب "سجن الرأي العام"!


إزدواجية ويليام؛ اللي ظهر في الحلقات اللي فاتت أنه منهم اوي ومش شبه ديانا؛ وكان جثمان والدته داخل القصر وهو بيسمع ووكمان في أول ٤ حلقات من السيزون؛ لكن دلوقتي بيلوم والده على وفاتها ويقوله نصا:

"لم تقود السيارة بنفسك لكنك دفعتها إلى أحضان الأشخاص الذين قادوا السيارة ... لأنك جعلتها في غاية التعاسة"

وبيكون رد تشارلز أنه بيعترف بالهزيمة؛ فأحيانا كآباء وآمهات يجب علينا الاعتراف بالهزيمة؛ ويقوله نصا:

"للأسف نحن لا نجيد التعامل كآباء وأبناء في هذه العائلة"


عجبني المقارنة بين ويليام والقمر؛ علاقة القمر بالأرض زي علاقة ويليام بالصحافة؛ من بعيد لبعيد وبينهم جاذبية.. ولكن بقدر!


وفي النهاية اختم ريفيو الحلقة بجملة قالتها اليزابيث: 

"ويليام... واصل الإبتسام؛ الدموع ورثاء الذات ليست من الأمور الشائعة في الأسرة"


**********


حلقة ٦ 

"إن كنت تقدر حريتك فلا يمكنك أن تكون محايدا"


متلازمة رجل الدولة؛ أو الملك توني؛ لقب اتلقب ل توني بلير؛ والتمتع بالشعبية أمر رائع ؛ لكن التمتع بالنفوذ أمر مختلف تماما؛ فالشعبية تكتسب سريعا وتزول سريعا.

في الحلقة دي بيحاول بلير تطهير الألقاب وإحراق المناصب الشرفية؛ بعد ما ترددت أقاويل أن بريطانيا ناضجة بما يكفي لتعيش بدون الملكة؛ وبيطلب منها تلغي مجموعة من الوظائف اللي ملهاش لازمه من وجهة نظره زي راعي البجع وغاسل ايد الملكة وبترد عليه الملكة إن التقاليد هي مصدر قوة البلد ؛ وإن الحداثة ليست هي الحل دائما؛ التاج لا يطرح أسئلة وجودية عن نفسه والملكية ليست عادلة.


*******

حلقة ٧


"إياك والاستهانة بنفسك وتصور انك غير مؤهل لأي شيء في هذه الدنيا ماهو مقدر لك لن يفوتك"


هاري وويليام؛ وبداية ظهور الكلاكيع! 

ويليام نجم ذهبي وهاري منبوذ

ويليام قديس وهاري آثم 

ويليام متزن وهاري ضائع


 متزمت ومكبوت وخائف وعاجز عن الغضب؛ لعنة المركز الأول والثاني.

فإخفاقات صاحب المركز الثاني تجعل صورة المركز الأول جيدة


*********

حلقة ٨ 

"تحيا قضية الحرية"


مارجريت هي رائحة الحياة؛ إمراة مبهرة تملؤها الشهوة ويمرضها الخجل؛ كانت تبتسم ولكننا لم نلاحظ هذا لسوء حظها بعد الجلطات؛ ظلت تحدق إلى أعلى إلى بقعة زرقاء صغيرة يسميها السجناء ( السماء)؛ حتى طواها عالم النسيان.

( وإن كان مرضها إتكروت بشكل مش طبيعي؛ ولم يتم ذكر عيد ميلاد الملكة الأم ال ١٠٠ واللي حضرته مارجو على كرسي متحرك؛ ومفيش أي ذكر لأولادها وحياتهم معاها)


********


حلقة ٩ 

"عائلة دراكولا الملكية البريطانية"


فتح الفايد جروح قديمة؛ وخطف سليم ضو الكاميرا في الحلقة لدرجة إني مكنتش عاوزه مشاهده تخلص.


ولا يزال هاري يعاني:

"ليس من السهل أن تكون الثاني؛ خاصة إن كنت مفعما بالحياة ؛ ليس سهلا أيضا أن تكون رقم واحد"


******

حلقة ١٠ 

"أسمعك تعزف فتزول الهموم" 


"الشهرة قذرة ووحشية وقصيرة الأمد" هكذا إعترف توني بلير؛ بعد ما ورط بلده في حرب العراق بدون داع؛ ولكنه كعادة السياسين لم يرغب في الرحيل؛ فحالما يتذوق الناس حلاوة الحياة على القمة لا يريدون المغادرة ابدا.


 

كاميلا تحب وتسعد الشخص الذي سيعتلي العرش؛ فلابد أن يكون الملك سعيدا حتى يتمكن من النجاح.


ويليام تابع مطيع؛ والنظام يحمي رقم ١ دائما؛ أما هاري يعاني من انعدام الغاية في حياته.


وبعد حلقات طويلة من التفاصيل الممتعة بالأجزاء السابقة؛ وأخص بالذكر الأول والثاني؛ تم وبشكل منفر كروتة نهاية المسلسل بشكل غريب جداااا؛ برغم وجود احداث كتيرة في حياة اليزابيث إلا إنني معرفش ليه المسلسل قفل على وفاة الملكة بعد زواج تشارلز كحدث ملكي مهم؟! طب فين الاحتفال أنها صاحبة اطول فترة حكم في تاريخ المملكة؟ وده اكبر إنجاز حققته اليزابيث؟ طب وفاة زوجها فيليب ومرضه؟ زواج ويليام وكيت؟ زواج هاري وميجان والموافقة على ميجان؟ قضية أندرو؟ احداث فيروس كورونا وعزلة الملكة الصحية؟ 

الملكة كانت قبل وفاتها بيوم كانت واقفه على رجلها وقابلت رئيسة الوزراء يعني معرفش ليه المسلسل اختزل وقص حوالي ١٧ سنة من فترة حكمها؟!

أما السيناريو والحوار فمكنش احسن حاجه؛ مثلا دار حوار بين اليزابيث وفيليب عن تصور جنازة كل واحد منهم 

طب ليه فيليب مقالهاش القسم اللي قالهولها لما خلته امير؟ أنه هيفضل جنبها في الحياة والممات؟! وكان هيبقى مشهد عظيم وهما بيفتكروا قصة حبهم بدأت إزاي


وبالمناسبة الماكياج واللبس والكادرات خلتني احس انها اليزابيث المرة دي مش دولوريس أمبريدج 😂


وكايت في المسلسل أجمل من كايت في الحقيقة.

وهاري محستوش هاري خالص.

وفي شخصيات في الجزء ده واللي قبله محستش بيهم ولا بوجودهم زي آن وآندرو وإدوارد وصوفي والملكة الأم 


اليزابيث عاشت لتكون ملكة...

فالملكية كينونة وليست فعل 

ولكن العروش ليست باقية لأحد

فحتى الملوك يجب أن يلبوا النداء! 


"النهاية"


#إيمان_الشرقاوي

2023-12-10

قارب الأميرة فائقة

 معلومة جميلة وبائسة في نفس الوقت 🥺





وقت وجود الأميرة فائقة فؤاد في فنلندا في دورة الألعاب ؛ اتلقبت أنها اجمل ضيفة في البطولة واتصمم لها قارب مخصوص ليها وللوفد المرافق عشان اي فسحة نهرية 


القارب لسه موجود ومعروض في فنلندا في متحف عشان يخلد ذكرى زيارة الأميرة المصرية فائقة ❤️



تأتي الأميرة المصرية فائقة البالغة من العمر 26 عامًا لمشاهدة دورة الألعاب الأولمبية في هلسنكي في 14 يوليو 1952. بجانبها على اليمين في الصورة يوجد إريك فون فرينكل في لجنة الاستقبال. على اليسار زوج الأميرة صادق بك. 



التقط الصورة هوغو سوندستروم. إنها تأتي من مجموعات صور وكالة المتحف. وفيما يتعلق بهذه الزيارة الأولمبية، قامت الأميرة فايقة أيضًا برحلات إلى مقاطعات فنلندا. في Kainuu، تم إنزال الأميرة إلى منحدرات Ylä-Kainuu الشهيرة في قارب المنحدرات المصمم خصيصًا لها. ولا يزال نفس القارب محفوظًا في ساحة شركة سياحة من هيرينسالمي. 



وكان شقيق الأميرة الملك فاروق على خريطة العالم في ذلك الوقت. وفي نفس وقت انعقاد الألعاب الأولمبية، تمت الإطاحة بفاروق من السلطة في 26 يوليو 1952. لقد فقد تاجه وواصل حياته في المنفى في إيطاليا توفيت الأميرة فائقة بعد صراع طويل مع المرض عام 1983.


 

2023-11-18

ريفيو الجزء السادس The Crown

 ريفيو الجزء السادس The Crown 

تحذير بحرق مشاهد وأحداث 🔥👇





"التاج يسمو فوق الأهواء"


******


بكرر إعجابي الشديد بآل فايد سواء محمد أو عماد؛ وبكرر برضه إني كنت شايفة الملكة دولوريس أمبريدج جدا..


*****



الحلقة ١

"You are clever clever 😍"


حينما تتكلم ديانا ... يصغى العالم؛ جملة اتقالت على لسان توني بلير؛ وأظنها حقيقية جدا؛ ومشكلة ديانا إنها الوجه المقابل للملكة؛ الملكة كانت أم فاشلة وزوجة ناجحة؛ لكن ديانا كانت زوجة فاشلة وأم ناجحة؛ اما بقى مشكلة العيلة إن اللي بيكون بره العيلة بيكون براها فعلا.. منبوذ؛ مطرود؛ وغير مرغوب في وجوده!


مشهد رؤية فأر في القصر كان إسقاط واضح إن في خلل في النظام؛ ولكن كان القصر دائما يردد ( لا تقاطع عدوك حين يرتكب خطئا) وكان في نظرهم إن ديانا غرقانة في مستنقع أخطاء.


عجبني جدا إستخدام المقارنة بين تعامل الأبوين ( والد ديانا ووالد الفايد) لأن ما بين هوس السيطرة والإهمال المطلق تتأرجح دوما علاقة الوالدين بأبنائهم دائما وأبدا؛ ومفيش داعي نتكلم عن الألفاظ العامية المصرية الجريئة اللي اتعودنا عليها من الموسم اللي فات 



"أنا سعيدة لانه يتضح جدا انك سعيد"

جملة على لسان اليزابيث لإبنها تشارلز 



******


حلقة ٢


العالم يريد أن تعيش ديانا في سلام والمؤسف أن ديانا هيا كمان كانت عاوزة تعيش في سلام؛ ولكن رغم إن إسمها يعني إلهة الصيد عند الرومان إلا إنها كانت أسهل فريسة على الإطلاق!


على الرغم من إني حبيت ديانا في الجزء اللي فات؛ إلا إني في الجزء ده كنت بأفصل في مشاهد كتير وأقول لا أنا حساها مش ديانا


عماد بيحب خطيبته وهيتجوزها؛ وكان على خلافات مع والده؛ طب والورد اللي بعتهولها في الجناح؟ وطلبه إنهم يقضوا أجازة في باريس زي ماكتبلها في الكارت؟ كل ده بضغط والده؟ هو عماد كان شخشيخة للدرجة دي وشخصيته ملغية؟ ده غير بقى إظهار محمد الفايد إنه إستغل ديانا أسوأ إستغلال وهو اللي كان بيخلي الصحفيين يطاردوهم


وطبعا ويليام ظهر أنه قاسي على ديانا أكتر من أخوه هاري الكيوت الطيب



*****


حلقة ٣ 


"طلعت فايد إبن فايد"


محمد الفايد بيحتقر ابنه وعلاقتهم معقدة ما بين هوس السيطرة والإذلال ؛ والأب بيغري إبنه بالفلوس والثروة مقابل أنه يرتبط بديانا. أما الإبن فجبان وكان بيتظاهر إنه بيقول لوالده كلام في التليفون وهو منفعل لكنه كان قافل السكة اصلا وكان بس بيمثل اودام ديانا واللي كانت فاهمه الموقف وسكتت.


مشهد صيد ويليام للوعل يوحي بتورطه باللي حصل لوالدته وخاصة أن ديانا نفسها بتقوله في جملة حوارية بتقوله ( هل لطخت وجهك بدمائه؟ فقالها أنا نظفت الدماء من على وجههي جيدا! )


الوصف الأمثل لقصة حياة الأميرة ديانا قالتها في جملة حوارية: ( قصة حياتي في كلمتين: الإنطلاق السريع)


كادرات ظهور السواق إدتني إيحاء إنه متورط في اللي حصل؛ ده احساس جالي من طريقة تصويره وطريقة ظهورة لأول مرة.



******


حلقة ٤


"سيكون الأمر أسهل للجميع بعد رحيلي"


دي كانت جملة قالتها ديانا بعد ظهورها على هيئة طيف بعد وفاتها لتشارلز ودي كانت من المشاهد المؤثرة جدا؛ وأثرت فيا جملة تشارلز ( لقد خذلتها في الحياة ولن اخذلها في الموت)

وكذلك مشهد ظهورها لإليزابيث وهيا بتقولها (نجحتي أخيرا أن تقلبيني رأسا على عقب)؛ وكذلك من المشاهد المؤثرة ظهور طيف عماد لوالده محمد الفايد وعجبتني جملة قالهاله هيا:

"كلما ازدادت توقعاتك من الغرب كلما ازدادت خيبة أملك"



وفاة ديانا بحسب ما وصفها تشارلز وهو بيبكي "حدثا جللا لم نشهد له مثيل"؛ وعلى النقيض محمد الفايد بيقول "المصيبة اللي حصلت اكيد هتقربنا من بعض"؛ والحقيقة والواقع بيقول إن محمد الفايد متقربش من الأسرة المالكة بعد وفاة ابنه بل بالعكس كان بيهاجمهم وينتقدهم ولمح بتورطهم في الحادث كمان


ويليام تم إظهاره إنه منهم ومنهم أوي؛ ومن شدة بروده كان بيسمع ووكمان وحاطط السماعات في ودانه وقت دخول جثمان أمه القصر


المسلسل أظهر برود وجمود ردود فعل الملكة تجاه خبر وفاة ديانا؛ وكعادتها في المواقف الصعبة( تختبئ في برود وتباعد) وقالت الملكة نصا إن ديانا تم بترها من الأسرة بالطلاق.


أول مرة أشوف صلاة جنازة في مسجد في مسلسل أجنبي؛ وأول مرة تتقال الجملة دي صراحة في عمل أجنبي 👇


*******


الجزء الأول من الجزء السادس كله كان عن ديانا فأتوقع الجزء التاني هيتكلم عن زواج تشارلز وكاميلا ووفاة فيليب واليزابيث ومظنش أنهم هيتعرضوا لحرب العراق؛ لكن ممكن يتكلموا عن زواج كيت وويليام وهاري وميجان؛ واظن نهاية الجزء هتكون مشاهد حقيقية 

لجنازة اليزابيث أو صوت عزف المزمار الاسكتلندي في جنازتها.



إيمان_الشرقاوي