لقاء سايناى يوسف شعبان مع لميس الحديدي

 حوار سايناى يوسف شعبان مع لميس الحديدي 

*من أول ما شفت برومو الحلقه وأنا كنت متشوقه جدا و متحمسه اشوف إطلالة سايناى الأولى على الإعلام ؛ و الحقيقه لقيت شخصيه رقيقه جدا و مهذبه و بتتكلم بصوت هادئ لطيف، إنسانه بسيطه جدا؛ إيديها تقريبا متحركتش طول الحلقه وهى بتتكلم ودى من أهم قواعد الإتيكيت؛ طريقة كلامها بتوضح أنها شخصيه راقيه و مثقفه .

*فى المجمل العام ؛ كان فى بعض المعلومات البسيطة جداا اللى عرفتها فى الحلقه ؛ و اغلب المعلومات اللى اتذكرت فى الحلقه عارفاها و حتى الصور المعروضه هى من صفحتنا و حتى فى صور كنا عملناها بتطبيق ريمينى سواء توضيح أو تلوين .

*ذكرت سايناى إن كان دايما بيحصل لخبطه فى اسمها و بيقولولها اسم تانى مكنتش بتحبه؛ ولميس سألتها بإستفزاز ايه هو ؟ ردت وقالت : مفيش داعي ومش لازم نقوله ؛ ولميس ردت قالت لها بيقولولك : سينا ؟

الحقيقه انا تنحت لوهله على إصرار لميس الحديدي أنها تذكر اسم ل ضيفتها " مبتحبوش " ؛ و الاسم مش سينا خالص لأنها ذكرت بنفسها أن الشائع هو اسم سينا؛ ده غير أنه اسم حته من ارض بلدها اللى هيا ذكرت أنها بتحبها جدا، و كمعلومه فقط؛ أنا شخصيا اعرف الاسم اللى كانت بتكرهه سايناى ومش هقوله احتراما لرغبتها .

*  لميس الحديدي كانت مصره بشكل غريب على تكرار جمل ؛ أنتى كنتى أكبر أخواتك ؟ ... انتى الكبيره ؛ اخواتك كلهم اصغر منك ....

وكررتهم اكتر من مره ؛ و ده شئ مكنش لائق ابدا فى رأيي

*  سايناى غلطت فى بعض المقاطع ؛ زى مثلا لما قالت أن خالها و مامتها اتولدوا قبل الثوره و كانوا صغيرين لما الثوره قامت ؛ و ده مش صح ؛ الصح أن والدتها بس اللى إتولدت قبل الثوره و خالها اتولد سنة ١٩٥٥

* سايناى ذكرت أن جميع مجوهرات الاميره فوزيه اللى اكتسبتها بالزواج من الشاه فضلت فى إيران تورث للاسره البهلويه ؛ و ده خطأ لأن الأميرة فوزيه احتفظت ب شبكتها و فضلت بيها فى مصر و حتى ظهرت بعقد الشبكه فى زفاف الملك فاروق والملكه ناريمان

صورة للاميرة لابسة العقد والحلق https://www.facebook.com/112522095452694/photos/a.2632421943462684/3533365116701691/?type=3 

صورة تانية https://www.facebook.com/112522095452694/photos/a.2527776920593854/2903688556336020/?type=3

صورة كمان https://www.facebook.com/112522095452694/photos/a.2632421943462684/3842752659096267/?type=3

 

* الفقره الكوميديه فى الحوار هى كانت فقرة لميس الحديدي فى متحف المركبات الملكيه وهى بتسأل شخص معرفش هو مين عن بورتريه ضخم للاميرة فوزية وبتقوله الفستان اللي لابساه  ده فستان الشبكه يقولها لا ده فستان الحنه !!!! 

والحقيقه ده ولا فستان الشبكه ولا فستان الفرح ولا فستان الحنه !!! 

دي صور الخطوبة الرسمية ومكنش فيه فستان حنة ولا غيره https://www.facebook.com/112522095452694/posts/3445745495463654/?d=n 

ده بورتريه اترسم للأميرة لما كانت في ايران غالبا أو بعد رجوعها بفترة والفنان اللي رسمها اسمه جان دينيس ميار رسم لوحات تانية للعيلة المالكة للاميرة نسل شاه والامير حسن عزيز!

و يادوبك لسه هفوق من صدمة فستان الحنه ؛ الاقي لميس الحديدي تقول التاج ده كان تاج جدتها الاميره فريال !!! 

والحقيقه ان التاج مكنش لجدتها خالص ومنعرفش جابو منين الكلام ده والاسوأ انها مكتوبة في معلومات المتحف تحت اللوحة! 

هو فى الحقيقه تاج الاميره فوزيه كان ضمن شبكتها وموجود صوره وتفاصيله واسكتشاته في ارشيف الدار  في اللينك ده https://www.vancleefarpels.com/en/the-maison/timeline/1930s.html .

لينك لمقال في المصور  عن نفس التاج https://www.facebook.com/112522095452694/photos/a.2490936934277853/4027020604002804/?type=3

جهل مسئول المتحف وفريق إعداد البرنامج والفتي كان غريب!

* لميس الحديدي حبت تحط التاتش بتاعها ب سؤال غير منطقي و ينم عن عدم علم بتاريخ الاسره العلويه ؛ لما قالت لها  الاسره العلويه كان ايه رد فعلها لما الاميره فوزيه طلبت الطلاق و ده كان شئ ممنوع فى الاسره ! 

بغض النظر أن السؤال بيظلم المرأة فى يوم المرأة ؛ وبتقوله اعلاميه ليها جمهورها ...

الا انى احب اوضح للاستاذه لميس الحديدي أن : 

١- الملك فاروق طلق الملكه فريده فى نفس توقيت طلاق أخته الاميره فوزيه 

٢- الملك فؤاد والد الاميره فوزيه كان مطلق الاميره شيوه كار 

٣- الملكه نازلى كانت مطلقه قبل ما تتجوز الملك فؤاد ( يعنى الملك فؤاد تزوج من سيده مطلقه عادى جدا ) 

٤- الخديوى عباس حلمي الثاني كان مطلق لزوجته الاولى إقبال هانم و الثانيه الاميره جويدان 

٤- الاميره شيوه كار تزوجت أكثر من مره بعد الملك فؤاد و اتطلقت حوالى ٣ مرات من أزواج مختلفين 

٥- لطفيه هانم ابنة الاميره شيوه كار اتطلقت من أحمد حسنين باشا 

٦- السلطان حسين كامل طلق مراته الاميره عين الحياه رفعت ابراهيم 

القايمه طويله اوى اوى حضرتك ؛ وكان فى طلاق عادى والله العظيم ؛ حضرتك بس كنتى اعملى بحث في جوجل !

*أنا شخصيا توقعت انى هشوف صور نادره و تعرض لأول مره ؛ لكن الحقيقه مظهرش غير صورتين بس جداد وهما اللى مع البوست .

من ضمن الحاجات اللى استغربتها ؛ أن مفيش صوره اتعرضت ل سايناى مع والدتها ناديه إسماعيل شيرين ؛ واحساسى ان تم تحاشي الحديث عنها بشكل مقصود . كما تم تحاشي الحديث عن حياة سايناى الخاصه و ده أمر بديهى و منطقي واحترام للخصوصيات ؛ و كنت أتمنى أن لميس الحديدي تقلل كمية الماكياج شويه ولو حته فى الفقره دى تحديدا ؛ لأن فى الاول وفى الأخر سايناى فى حالة حداد و الحوار اصلا اتعمل عشان وفاة والدها الفنان يوسف شعبان .

* ضمن أسئلة لميس الحديدي ؛ لما الاميره فوزيه رجعت مصر و اتطلقت كان وقتها الملك فاروق ملك ؟! 

لا حضرتك كان كتابه 😁 ! 

الملك فاروق كان ملك و اتجوز من الملكه فريده قبل زواج الاميره فوزيه والشاه ! 

* سايناى كانت متحفظه جدا فى الكلام عن سبب طلاق جدتها الاميره فوزيه من الشاه و ده بديهى جدا ؛ لان اولا دى اسرار ؛ ثانيا خالتها هى الاميره شهناز بهلوى بنت الشاه ؛ ثالثا سواء الاميره فوزيه أو الشاه فالاتنين ماتوا ؛ والحقيقه سايناى اتكلمت عنهم الاتنين بشكل محترم جدا ؛ و أثنت كمان على جدها العقيد إسماعيل شيرين واللى حقيقي مفيش حد اتعرف عليه إلا و شكر جدااااا فى أخلاقه العاليه و أنه ( جنتلمان ) ؛ سايناى كمان اتكلمت بشكل مهذب جدا عن زوجة والدها و اخواتها و ده شئ راقي اوى اوى ؛ و تحفظت فى الكلام عن مصادرة مجوهرات العيله  

*بالنسبه لى الاسئله كانت تقليديه ومفيش فيها جديد ؛ وكنت اتمنى معلومات عن هل مثلا سايناى قابلت الاميره فايزه ؛ ايه علاقتها بأختها فوزيه رشيد و بالاميره شاهناز و اخيرا أنا  استغربت سؤال لميس الحديدي عن مكان فساتين الاميره فوزيه حاليا ؛ و ربنا يستر عليهم 🙃

لمعلومات اكتر عن سيناى يوسف شعبان : 

https://m.facebook.com/story.php?story_fbid=10220113285637422&id=1083771090

Tweet