القرع السلطانى

" القرع السلطانى " 

الملك فاروق كان فى شئ محير فى حياته وهو أنه مكنش بيكمل اى حاجة ابدا ! 

• مكملش فترة حكمه وتم عزله عن العرش و نفيه خارج البلاد ؛ بعكس مثلا والده واللى فضل فى الحكم حتى وفاته .

• مكملش زيجاته ؛ لان الزيجه الاولى من الملكه فريده انتهت بالطلاق عام ١٩٤٨ و الزيجه التانيه من الملكه ناريمان انتهت بالطلاق عام ١٩٥٤ .

• مكملش فترة تعليمه و رجع من إنجلترا بسبب وفاة والده الملك فؤاد عشان يستلم العرش وهو كان لسه ١٦ سنه .

•  مكملش فترة الحمل داخل رحم والدته الملكه نازلى ؛ واتولد بعد حوالى ثمانى اشهر من زواج والدته الملكه نازلى و والده الملك فؤاد .

و بسبب ميلاده قبل الموعد ؛ فى شاعر كبير وقتها كتب قصيده بيتريق فيها على ميلاده المبكر و بيشكك في نسب  فاروق إلى والده فؤاد ؛ و لما الملك فؤاد سمع القصيده أصدر قرار بنفي الشاعر إلى تونس؛  و الشاعر ده يبقي 

" بيرم التونسي " 

اسمع حكاية وبعدها هأهأ.. زهر الملوك فى الولد أهو طأطا

مالناش قرون كنا نقول مأمأ.. وناكل البرسيم بالقفة

*****

ملحوظه صغننه : 

فى ناس بتردد أن قصيدة " القرع السلطانى " المشهوره إتكتبت للأميرة فوقيه إبنة الملك فؤاد ؛ والقصيدة بتلقح كلام أن الاميره فوقيه كانت على علاقه عاطفيه ب حسين فخري باشا محافظ القاهرة ؛ و بعد ذلك تزوجت شقيقه محمود فخري باشا 

والقصيدة بتقول : 

البنت ماشية من زمان تتمخطَر

والغفلة زارعَة في الديوان قرع أخضر

تشوف حبيبها في الجاكتّة الكاكي 

والستّة خِيل والقمشَجِي الملاّكي

تسمع قولتها آه يا وراكي 

والعافية هبلة والجدع متشطَّر

الوِزّة من قبل الفرح مدبوحة 

والعطفَة من قبل النظام مفتوحة

والديك بيدّن، والهانم مسطوحة

تقرا الحوادث في جريدة كتَّر

يا راكب الفايتون وقلبك حامي 

حوِّد على القُّبة وسُوق قدّامي

تلقى العروسة شِبه مَحمَل شامي 

وابوها يشبه في الشوارب عنتر

وُحطّ زهر الفُل فوقها وفوقك 

وجِيب لها شِبشِب يكون على ذُوقَك

ونزل النونو القديم من طوقك 

ينزل في طوعَك لا الولَد يتكبَّر

دا ياما مزَّع كل بدلة وبدلة

وياما شمَّع بالقطان والفتلة

ولما جه الأمر الكريم بالدُخلة

قلنا اسكتوا ..خَلّوا البنات تتستَّر

نهايتُه ، يمكن ربّنا يوفّقكم

ما دام حفيظة الماشْطة بتزّوقكًم

دي سَكرة مَالطِي .داهية ما تفوّقكم

بس ابقى سيبك م اللي فات دا مقَدّر

مرمر زماني يازماني مرمر

*********

بعد كده حاول بيرم التونسي يدخل وسطاء عشان يجيبوا له عفو ملكى من الملك فاروق ؛ و كتب اغنية للاميره فريال فاروق إسمها " ورد فريال " ؛ غنتها الطفله نجاة الصغيرة فى حفل افتتاح مبرة الاميره فريال ؛ وطبعا بعدها عفا الملك فاروق عن بيرم التونسي .....

********

قصة حياة الأميرة فوقيه فؤاد هتلاقوها هنا : 

https://www.facebook.com/1083771090/posts/10220081053871648/

*********

#إيمان

Tweet