English French German Spain Italian Dutch Russian Portuguese Japanese Korean Arabic Chinese Simplified

2021-08-22

أبو السعود الإبيارى

 أبو السعود الإبيارى 🎤☀️  

( النجف البنور ) 




***********


" الدنيا جنينه واحنا ازهارها

فتحنا عنينا على همس طيورها " 


اجمل اغنية لست الكل ليلي مراد ؛ والسطرين دول تحديدا كتبتهم فى بداية فصل من فصول روايتى ( بيت العز ) ؛ طب ياتري مين المؤلف الجميل اللى كتبهم ؟


 أبو السعود أحمد خليل الإبياري ؛ هو كاتب السيناريو ومؤلف الأغاني والصحفي و الممثل و الكاتب المسرحى الرائع ؛ إتولد فى ١٩١٠ فى حى باب الشعريه ؛ من وهو صغير كان نفسه يبقي زى بديع خيري ؛ والحقيقه لما كبر بقي زى بديع خيري ويمكن تفوق عليه كمان.....

 ‏

يا نجف بنور يا سيد العرسان

يا قمر ومنور ع الخلان

يا نجف .. آه يا نجف .. حلو يا نجف آه


**********


" موليير الشرق ؛ الجبل الضاحك ؛ النهر المتدفق ؛ چوكر الأفلام ؛ منجم الذهب " 


دى كلها ألقاب أطلقها النقاد و الفنانين على الجميل ابو السعود الإبيارى 👌 


**********


كان بيكتب ازجال من وهو لسه طفل فى مجله كان اسمها ( الأولاد ) .


إشتغل أبو السعود الإبياري بالصحافة في الخمسينيات فكان بيكتب بمجلة "الكواكب" أسبوعياً ومجلة "أهل الفن" تحت عنوان : "يوميات أبو السعود الإبياري".


كان أول مونولوج يكتبه أبو السعود الإبياري هو (بوريه من الستات) للمونولوجست سيد سليمان ؛ و بعد النجاح الكبير للمنولوج ؛ بقي يكتب اسكتشات فكاهيه لفرقة بديعه مصابنى .


كتب للسينما افلام لنجوم الفتره دى زى بشاره واكيم و فريد الاطرش و اسماعيل يس و محمد فوزى و فاتن حمامه و عادل امام .


**********


قالو لي كلام وقالو له كلام

وكان بيني وبينه خصام

كلامهم زاد غرامي غرام

وفاض به الشوق بعت لي سلام

وسلامه فرحت له وقابلني ضحكت له

وقال لي وقلت له ومال لي وملت له

يا عوازل فلفلوا


*******


كان شريك أساسي فى نجاح سلسلة أفلام ( اسماعيل يس فى ال ...... ) ؛ لأنه كان هو المؤلف لغالبية أفلام اسماعيل يس و كمان كون معاه فرقه مسرحيه هى ( فرقه اسماعيل يس ) و ألف حوالى ٦٥ مسرحيه لإسماعيل لكن وبكل أسف رغم أن كل المسرحيات دى اتسجلت التليفزيون إلا أن مفيش منهم ولا مسرحيه موجوده لان كل شرائط المسرحيات إتمسحت بسبب موظف ما فى ماسبيرو . 


*********

يلا نجيب لحمه وخضار...

يلا نجيب عربية بكار....

نجيب ممبار نجيب كفيار....

وخس و اوطه وحمل خيار....

معانا ريال معانا ريال....


**********


أبو السعود الإبياري هو أكبر مؤلف له عدد من أفلام السينما المصرية، لأنه ألف أكثر من 500 فيلم يعنى تقريبا 17% من تاريخ السينما المصرية.


كان أبو السعود الإبيارى معروف عنه أنه بيختار اسامى غريبه للأبطال و للعمل ككل زى مثلا ( حبيبي كوكو ) ؛ ( عفركوش إبن برطكوش ) ؛ ( عمتى فتافيت السكر ) ؛ ( عفريته هانم ) ؛ ( حماتى قنبله ذريه ) ؛ ( البحث عن فضيحه ) 


**********


اخترع أبو السعود الإبيارى لغه حواريه سهله و بسيطه وقريبه من القلب ؛ وكلمات جميله جدااا عايشه معانا لحد دلوقتى ؛ منها مثلا : 


 " يا صفايح الزبده السايحة، يا براميل القشطة النايحة " 

" ده انا جمب منك ابقي مارلين مونرو " 


*******


ابو السعود الإبيارى اكتشف طفله جميله شقيه بتعرف تقلد الفنانين و دمها خفيف فسماها ( لبلبه ) و ظهرت في فيلم من تأليفه هو فيلم ٤ بنات و ظابط وغنت كمان من كلماته فى نفس الفيلم .


المعده حلفت ما تريده 

هيصبح خرابها على أيده 

حتى المدمس بقي سيده 

العدس الليله ليلة عيده


***********


حصيلة أعماله الفنية ٣٠٠ مسرحيه ؛ ٣٢٠ اغنيه ومونولوج ؛ ٥٠٠ فيلم ؛ و ١٥٠ فيلم منهم كان مع اسماعيل يس ؛ وحتى كمان كان أبو السعود مرشح اسماعيل يس لدور ( صلاح ) فى فيلم صغيره على الحب لكن المخرج نيازى مصطفي اعترض وقتها وقال أنه مش هيكون مناسب مع سعاد حسني . 


من أشهر مؤلفاته السينمائية : 

( صغيره على الحب ؛ الزوجة رقم ١٣ ؛ إنت حبيبي ؛ قلبي دليلي ؛ الآنسه ماما ؛ الفانوس السحري ؛ دهب ؛ ياسمين ؛ ٤ بنات و ظابط ؛ سكر هانم ؛ البحث عن فضيحه ؛ صاحبة العصمه ؛ المليونير ؛ الزوجه السابعه ؛ حبيب الروح ؛ الماضي المجهول ؛ لو كنت غنى ؛ ست البيت )


"يابتاع التفاح لون تفاحك راح فى خدود ست الكل

يابتاع الياسمين مين يندهلك مين واحنا معانا الفل

يابتاع الرمان رمانك غلبان بص علينا وطل"


***********


حصل على جايزه افضل سيناريو عن فيلم ( الزوجه رقم ١٣ ) ؛ كما حصل على وسام الشرف من المجلس الأعلى للفنون والآداب عن مسرحية ( مراتى من بورسعيد ) . 


*********


كان معروف عنه حبه لتدخين الشيشه فى كازينو بديعه مصابنى .و ابو السعود الإبيارى كان متزوج وعنده ٦ أبناء : ( يسري - محمد - مجدى - أحمد - ميرڤت - ليلي ) ؛ 


**********

فستان الزفاف والطرحة عنوان الهنا والفرحة

وقلوب البنات عاشقاه

فستان الزفاف يا جماله فيه حلم الشباب واماله

وتناجي الصبايا خياله في الوحدة وتتمناه

فستان الزفاف والزفة دول تاج الشرف والعفة

والبنت اللي جوة اللفة تشتاقله وتتمناه

*********


شفنا شخصيته على الشاشه الصغيره من خلال العظيم صلاح عبد الله فى مسلسل ( اسماعيل يس ) ؛ و الحق يتقال ان الدور كان فى منتهى الروعه 


"يا ريتنى كنت وياكم

وأروح للهدى وأزوره

وأبوس من شوقى شباكه

وقلبى يتملى بنوره

وأحج وأطوف سبع مرات

وألبى واشوف منى وعرفات

واقول ربى كتبهالى

يا رايحين للنبى الغالي."


******


اخر فيلم كتبه أبو السعود الإبيارى كان الفيلم الجميل ( صغيرة على الحب ) سنة ١٩٦٦ ؛ وكتبه فى ٨ ايام بس ؛ ومش بس كده ده كمان كان بيكتبه وهو فى مستشفى المواساة فى الاسكندريه لانه كان محجوز فيها نتيجة إصابته بذبحه صدريه . 


توفي الكاتب الكبير أبو السعود الإبياري في 17 مارس 1969.


**********


"يا ناس قتيل الغرام ، مقتول وساح دمه

يا حزن أهله عليه، يا طول عياط أمه"


#نوستالجيا

#إيمان


0 اكتب تعليقك قبل ما تمشي: