إبراهيم باشا

 " سلام على إبراهيم " 

أسرة محمد على حكمت لمدة ١٥٠ سنه تقريبا ؛ كان فيهم ايام حلوه وايام صعبه ؛ كان فيهم انتصارات وبرضه كان فى هزائم ؛ مكنتش ايام حكمهم سودا ولا ورديه ؛ كان فى مميزات وكان فى عيوب ؛ 

الفكره بس أننا مدرسناش غير العيوب ؛ فمن الطبيعي أن المميزات تكون مجهوله لناس كتير ..

مثلا هنتكلم النهارده عن قائد عظيم ؛ بيتم تصنيفه أنه أفضل من ( نابليون بونابرت ) فخر الصناعه الفرنسيه ! 

فهل ينفع يكون عندنا قائد عسكرى أعظم من نابليون ونكون منعرفش عنه حاجه ؟! .

**************

 " سلام علي ابراهيم قاد جيش مصر من نصر إلى نصر " 

إبراهيم هو إبن محمد على باشا ؛ إتولد فى قونيه باليونان ولما محمد على تقلد الحكم في مصر ارسل لزوجته وابناؤه يطلب منهم ييجوا مصر .

التحق بالجيش وهو ١٨ سنه وفضل يترقى لحد ما بقي قائد فرقه ؛ وكان بيتكلم عربي وفارسي وتركى .

ابراهيم باشا كان بارع في الأمور العسكرية ؛ مفيش معركه أو حرب دخلها وخسرها ؛ كسب كل الحروب اللى خاضها وبهزيمه ساحقه .

حارب الحركه الوهابيه فى الحجاز وانتصر عليها ؛ وأنشأ التكيه المصريه فى الحجاز .

انتصر فى حرب الموره ( اليونان ) و حمص ودمشق ويافا و حيفا و بيلان و قونيه واللى حارب فيها الجيش العثمانى و أسر القائد بتاعهم ؛ و كوتاهيه ( وكان فاضله تكه ويدخل اسطنبول عاصمة الخلافه ويستولى عليها ) .

فتح مدينة عكا واللى مقدرش نابليون عليها ؛ عشان كده بيتم تصنيف ابراهيم باشا أنه أعظم من نابليون .

*********

وإتسأل فى مره كيف يطعن في الأتراك ويكرههم وهو منهم فأجاب:

 (أنا لست تركياً فإني جئت إلى مصر صبياً، ومن ذلك الحين مصرتني شمسها وغيرت من دمي وجعلته دماً عربياً)،

" معلومة مهداه للناس اللى بتقول الملك فاروق مش مصري " 

*******

طبعا أعداء ابراهيم باشا كتروا واولهم الباب العالى ؛ و حبوا يشغلوا إبراهيم باشا عنهم بشوية فتن واضطرابات داخليه ؛ لكنه نجح في القضاء عليها .

**********

تزوج من : 

١- هوشيار هانم ( الوالده باشا ) 

أنجب منها الخديوى اسماعيل 

٢- شيوه كار هانم قادين

أنجب منها الأمير أحمد رفعت إبراهيم 

٣- ألفت هانم 

أنجب منها الأمير فاضل مصطفى بهجت إبراهيم 

٤- خديجه هانم 

أنجب منها الأمير محمد ابراهيم ؛ الاميره فاطمه ابراهيم ؛ الاميره أمينه ابراهيم 

أنجب كمان ( محمد أغا ) لكن المصادر لم تذكر اسم والدته ؛ وبعض المصادره بتقول أنه تزوج من اتنين كمان هما كلزاه قادين و ساره قادين .

********

بعد إصابة محمد على باشا بالخرف وأمراض الشيخوخه ؛ تولى ابراهيم باشا حكم مصر ؛ ولكنه حكم لفتره محدوده بس ؛ لانه مات بعد ١١ شهر من تولى الحكم و قبل وفاة والده محمد على باشا ؛ وكان عنده وقتها ٥٩ سنه .

الشئ اللى دايما باستغربه أن ٥٩ سنه سن صغير نسبيا ؛ و مش ممكن تكون ملامحه كبيره زى الصور ؛ ولا دقنه كلها بيضا بالشكل ده ؛ بس يمكن ويلات الحروب ومشاهد القتل و المسؤوليه بتكبر الإنسان فوق عمره .

وفاته بعض المصادر بتقول انها كانت بسبب معاناته مع مرض السل ؛ ومصادر تانيه بتقول انه مات بالسم .

**********

بعد وفاته حكم بعده طبقا لقانون الأرشد فى تولى الحكم ( عباس حلمي الاول ) واللى مكنش الأرشد ولا حاجه 😄 ؛ وهنبقي نتكلم عنه قريب .

************

وزى ما اتعودتم منى انى بعرض لكم الرأى و الرأى الأخر ففى آراء بتقول أن ابراهيم باشا مش ابن محمد على ؛ ولكن ابن زوجته ( أمينه هانم على شيهيرلى قادين ) ؛ ومحدش عنده معلومه حاسمه للموضوع ؛ ومعنديش اى حاجة أقولها افضل من جمله قالها أستاذ ماجد فرج ( مؤرخ الاسره العلويه ) ؛ أن مقبرة ابراهيم باشا موجوده فى مقابر حوش الباشا ب الشافعى ؛ ومقبرة محمد على باشا موجوده فى جامع محمد على ؛ واللى عاوز يتأكد اذا كان ابراهيم باشا إبن محمد على ولا لا ؛ يروح يعمل تحليل DNA من الجثمانين ....

#إيمان_الشرقاوى

Tweet