السلطانه فاطمه نعيمه

 السلطانه فاطمه نعيمه 👑 

هى بنت السلطان عبد الحميد الثانى من زوجته بيدار قادين ؛ إتولدت فى ٣ سبتمبر ١٨٧٦ فى قصر دولماباهتشي فى إسطنبول بعد ٤ ايام بس من تولى والدها عرش الدوله العثمانيه .

هيا كانت أكبر بنات والدتها بيدار قادين ؛ و ثالث بنات والدها السلطان عبد الحميد الثانى ؛ و لها اخ شقيق واحد هو الأمير محمد عبد القادر وكان اصغر منها بسنتين. 

والدها كان دايما بيقولها : " My accession daughter" 

*********

عاشت السلطانه نعيمه فى قصر يلديز ( و يلديز يعنى نجوم بالتركى ) ؛ وكانت بتحب تعزف على البيانو ؛ ولما كبرت إتقدم الخديوى عباس حلمي الثاني لطلب الزواج منها لكن السلطان عبد الحميد الثانى رفض . والمعلومه دى لم يتم ذكرها فى كتاب عهدى واللى هو مذكرات الخديوى عباس حلمي الثاني .

**********

فى ١٧ مارس ١٨٩٨ ؛ إتجوزت السلطانه نعيمه من كمال الدين باشا . و كانت أول عروس عثمانيه تلبس فستان زفاف أبيض زى التقليد الأوروبي ؛ فكان كل الاميرات قبل كده فستان زفافهم باللون الاحمر . 

خلف الثنائى : 

 محمد جاهد ؛ واللى إتولد فى يناير ١٨٩٩ 

 ‏عديله هانم ؛ واللى إتولدت فى ١٢ نوفمبر ١٩٠٠ 

**********

السلطان عبد الحميد الثانى كان له أخ هو السلطان مراد ؛ وهو ده نفسه اللى تم عزله و إتحط فى إقامه جبريه و هو نفسه اللى كانت السلطانه سنيحه و زوجها عاوزه ترجعه للعرش بمؤامرة زى ما حكيت قبل كده في المقال الخاص بيها هنا : 

https://m.facebook.com/story.php?story_fbid=10222874020134059&id=1083771090

المهم ....

السلطان مراد كان عنده بنت من بناته هى السلطانه خديجه ؛ واللى قرر السلطان عبد الحميد الثانى أنها تفضل فى الاقامه الجبريه هى واختها مع والدها و كمان متتجوزش غير لما توصل ٣٠ سنه و خلاها كمان تتجوز بالغصب من شخص مش بتحبه ولا عاوزاه ؛ قررت السلطانه خديجه الانتقام بطريقتها من السلطان عبد الحميد الثانى و اختارت أنها توجعه فى قلب بنته .

 و إرتبطت بقصة حب مع كمال الدين باشا زوج السلطانه نعيمه ... 

 و خديجه كمان هتطلب من كمال الدين أنه يقتل السلطانه نعيمه ( بنت عمها ) عشان يقدروا يتجوزوا هما الاتنين و ده كان فى ١٩٠٤ ؛ وكانوا بيكتبوا لبعض رسائل و بيستلموها من بعض فى حديقة القصر ؛ ومن حظهم أن الجوابات دى وقعت في ايد السلطان عبد الحميد الثانى ؛ واللى هيواجه كمال الدين بيها واللى بدوره هيعترف أنه مش بيحب السلطانه نعيمه وأنه يحب يعيش مع السلطانه خديجه .

و زيادة فى العك ؛ فالشخص اللى كشف جوابات و خطابات الغرام و الحب بين الاتنين للسلطان هو زوج السلطانه خديجه نفسه عشان ينتقم منهم هما الإتنين 🤷

 ‏

وهيتم الطلاق بين كمال الدين و السلطانه نعيمه و هيتم نفيه ل بورصة وتجريده من رتبه العسكرية و إتطلقت السلطانه خديجه من زوجها ؛ ولما والدها السلطان مراد هيعرف بالقصه دى ( وهو كان مريض سكر ) هيموت بعدها بأيام .... 

طب هل السلطانه خديجه إتجوزت من كمال الدين باشا ؟ 

• الإجابة : لا 😀 

************ 

نرجع للسلطانه نعيمه : 

هتتجوز للمره الثانيه من الأشقودرى جلال الدين باشا فى ١١ يوليو ١٩٠٧ ؛ و هتفضل الحياه بينهم لحد ما يتم نفي آل عثمان كلهم فى ١٩٢٤ ؛ وهيعيشوا نفس السيناريو البائس من الفقر زى كل أفراد آل عثمان و هيسافروا الاول فرنسا وبعدين إيطاليا و منها ل ألبانيا و اللى هيموت فيها زوجها فى ١٩٤٤ .

وفى ١٩٤٥ هتموت السلطانه نعيمه في إحدى المخيمات النازية خلال الحرب العالمية الثانية وهتدفن فى ألبانيا نقلا عن المؤرخ التركي الشهير أولوچاي في كتابه حول نساء وبنات السلاطين.. وقبل وفاتها ب ٧ سنين .... ماتت السلطانه خديجه فى المنفي برضه و هحكيلكم حكايتها المره الجايه 😀 .

ى

*********

ملحوظه صغننه : 

فى مسلسل السلطان عبد الحميد الثانى ؛ قالوا إن السلطانه خديجه هيا و كمال الدين كانوا بيحبوا بعض قبل ما يتجوز من السلطانه نعيمه ؛ و قالوا كمان أن كمال الدين إتجوز من خديجه بعد الطلاق من نعيمه ؛ و قالوا أن السلطانه نعيمه إكتشفت بعد طلاقها من كمال الدين أنها حامل و عملت إجهاض عشان مفيش حاجه تفكرها بيه .... و طبعا ده هري مسلسلات تركى ملناش دعوه بيه ؛ و التاريخ بيتاخد من الكتب مش المسلسلات ... 😎

#إيمان_الشرقاوى 

Tweet