برج الفتاة Kız Külesi

 

برج الفتاه - kız külesi

اغلب الناس اللى اتفرجت على مسلسلات تركيه لاحظوا فى فواصل المشاهد صورة اماكن سياحيه ؛ ومنها برج عتيق فى وسط الميه

 البرج ده من ٦ ادوار و اتبنى بعد ردم جزء من مضيق البوسفور لسبب عجيب جدا ...

الحكايه أن كان فى سلطان خلف بنت وكان بيحبها جدا ؛ وجاب لها عراف يقرالها الطالع ؛ و قاله أنها هتموت نتيجة لدغة ثعبان ؛ كلام العراف شغل السلطان وبقي يحلم كتير أن بنته بتموت نتيجة لدغة ثعبان ؛ وفضل يفكر يعمل ايه عشان يتخلص من القلق ده ... فقرر أنه يردم جزء من مضيق البوسفور ويبنى لبنته برج فى وسط الميه بعيد عن الثعابين ؛ و فضلت البنت عايشه فى البرج ممنوع عنها انها تطلع منه ؛ و كان الاكل واللبس والشرب بيتبعت لها كل يوم ؛ وفى عيد ميلادها ال ١٨ جالها هدية عبارة عن سلة مليانه فاكهه لكن كان جوه السله ثعبان مستخبي ؛ و لدغ البنت فعلا وماتت ... ومن ساعتها اتسمى البرج برج الفتاه .

مكان دفن البنت او اسمها او اسم والدها السلطان غير معروفين ؛ وفضل البرج موجود و دارت حواليه قصص تانيه كتير ؛ زى أنه كان عايش فيه فتاه بتستقبل حبيبها كل يوم بعد ما يعوم البحر عشانها يوميا .

وفضل البرج مهجور سنين طويله ؛ وفى سنة ١١١٠ اتعمل كمحطه مخصصه للسفن اللى جايه من البحر الأسود 

ووقت فتح القسطنطينية سنة 1453م استُخْدِم كبرج مراقبة لحد ما حصل زلزال عام 1509م و دمر اجزاء كبيره من البرج .

وبعد ترميمه ، استُخْدِم كمنارةٍ لحد  1829م، ومن بعدها بقي حَجْرٍ صحِّي.

وفى 1832م رُمِّمه السلطان محمود الثاني، وعمله حماية ضد الزلازل

وحاليًّا، البرج بقي مزارٍ سياحيٍّ ومن جوه عباره عن مطعم و كافيه.

وصورة برج الفتاه كانت على ورقة ال ١٠ ليره التركيه من ١٩٦٦ : ١٩٨١

طبعا البرج ظهر فى معظم المسلسلات التركيه و إن كان أشهرهم ( فاطمه ) ؛ و كمان ظهر فى فيلم جيمس بوند و فيلم Hitman 

Tweet