English French German Spain Italian Dutch Russian Portuguese Japanese Korean Arabic Chinese Simplified

2022-11-24

قاعة العرش

 قاعة العرش 👑❤️



كتير مننا يعرف أن فى قاعة إسمها قاعة العرش فى قصر المنيل ( قصر الأمير محمد على توفيق ) وناس كتير فاكره أنه كان عامل العرش ده على إعتبار أنه كان ولى العهد ومستنى العرش أو أنه كان قصده يقول أنه الأحق بعرش مصر من فاروق .


لكن للأسف المعلومه دى غلط تماما ! ❌


الأمير محمد علي توفيق هو إبن الخديوى محمد توفيق باشا ؛ و شقيق الخديوى عباس حلمي الثاني ؛ و إبن عم الملك فاروق الأول .


كان ولى عهد عرش مصر مرتين : 


 مرة وقت حكم الملك فؤاد الأول وقبل ما يتولد الملك فاروق الأول .

ومرة تانيه وقت حكم الملك فاروق الأول وقبل ما يتولد الملك أحمد فؤاد الثاني .


*********


طب إيه سبب تواجد القاعه فى قصر المنيل ؟ ومين اللى عملها ؟


تعالوا نشوف 😎


الأمير محمد علي توفيق و الخديوى عباس باشا يبقوا أبناء أمينة هانم إلهامي " الوالدة باشا " ( أم المحسنين) 



إلهامي باشا والد " الوالدة باشا " درس العسكرية في فرنسا ولما رجع مصر اتعين ناظر الجهادية = رئيس أركان


 

في الوقت ده كان الوالى عباس الأول و سعيد باشا كانوا عمالين يكبروا في الجيش المصري فى السر بعد الإتفاقية إللي مضاها محمد علي .


وبعدين....

 الدولة عثمانية أعلنت الحرب على روسيا واللى هيا " حرب القرم " وقالت لكل الجيوش التابعة للدولة العثمانية يبعتولها مساعدات .


بعتت مصر جيش كبير بقيادة ال سر عسكر : إلهامي باشا واللى كان هو الوحيد وسط الباشوات العثمانيين في الأستانة اللى كان بيتكلم انجليزى وفرنسي و تركى طبعا. 


فكان إلهامى باشا هو وسيلة التواصل بين الأتراك وبين الإنجليز و الفرنسيين .


وبعد إنتصار الدوله العثمانيه فى الحرب بفضل إلهامى باشا أصدر السلطان العثماني عبد المجيد الاول قرار بتعيينه قائداً للقوات العثمانية .

و تزوج من أخت السلطان عبد المجيد " منيرة سلطان " 


وفى يوم ...

قال السلطان عبد المجيد لإلهامى باشا و أخته أنه عاوز يعملهم زيارة فى البيت ؛ وطبعا دى حاجه كبيرة جدا فى الوقت ده لأن السلطان العثماني مكنش بيروح لحد ؛ الناس هيا اللى كانت بتجيله .... سلطان بقي وكده 😃


اتلخبطوا جدا واحتاروا ؛ هيستقبلوا السلطان إزاى في البيت ؟! 

وجتلهم فكرة 💡


قرروا يعملوا حاجه اسمها " القاعة الذهبية " جنب البيت و يستقبلوا فيها السلطان ؛ وخصصوله مقعد عالى زى العرش عشان يكون الكرسي بتاعه ؛ ماهو ميصحش برضه السلطان يقعد على أى كرسي مستعمل 😄

وسموها ( Konak ) يعنى بيت مرتفع على جبل .



عاش " إلهامي باشا " في الأسيتانة .. وخلف بنت هيا : أمينة هانم إلهامي " واللى اتجوزت بعد كده من الخديوى توفيق وخلفت الخديوى عباس حلمي الثاني و الأمير محمد على توفيق و الأميره نازلى والأميره فخر النساء خديجة والأميره نعمت الله توفيق .



ومرت السنين ؛ وأصحاب المكان ماتوا ؛ إلهامى باشا مات وهو عنده ٢٤ سنه فى حادث إنقلاب قارب فى البسفور سنة ١٨٦٠ ؛ و منيرة هانم ماتت وهيا عندها ١٧ سنه بعد زوجها بسنتين فى ١٨٦٢ .


و بقي قصر إلهامى باشا ميراث وله ورثه ؛ و الأمير محمد على توفيق قالهم أنا هخد القاعة الذهبيه عندى فى قصري فى القاهره ؛ و شال فعلا محتوياتها ونقلها على المحروسه لقصر المنيل .




 لما نقلها الأمير محمد علي إلى قصر المنيل بالقاهرة كان عنده عنده كوريدور ممر فاضي بنى عليها القاعة ووضع فيها نفس الموبيليا الذي ورثها من بيت جده 

 ‏

الحاجة الوحيدة إللي إضافها أنه كلف الرسام التركي " هدايت " أنه يرسم صور من أول الوالي محمد علي باشا لحد اخوه الخديوى عباس حلمي الثاني .


وكان الأمير محمد علي بيستعمل قاعة العرش الذهبية في الأعياد مثلاً بحكم أنه كان يعتبر كبير العيله .

فكان أمراء العيله و الباشوات بيزوروه في الأعياد و يستقبلهم فيها .


الملك فاروق بقي عمره ما زار القاعة دى نهائي ؛ صحيح دخل قصر المنيل نفسه قبل كده ؛ منها مثلا في حفل زفاف الأمير محمد عبد المنعم و الأميره نسل شاه ؛ لكن مرضاش أبدا أنه يدخل يشوف القاعة دى وخاصة كمان أن صورته وصورة والده الملك فؤاد مكنش ليهم وجود فيها و ده خللى الملك يفهم أن ده نوع من أنواع الكراهية المستترة لفؤاد ونسله بأنه خد العرش من فرع الخديوى توفيق ونسله .


فى النهاية الملك فاروق تم عزله عن العرش فى ٢٣ يوليو ١٩٥٢ ؛ وتم إلغاء الملكيه و إنهاء حكم أسرة محمد على في ١٨ يونيو ١٩٥٣ .


ومات الأمير محمد على توفيق فى ١٨ مارس ١٩٥٥ فى المنفي فى سويسرا .


وفضلت قاعة العرش موجوده فى مصر وفضلت حكايتها ❤️👑 


#إيمان_الشرقاوى 


0 اكتب تعليقك قبل ما تمشي: