جون رشاد كامل

 

حدوتة ٥

حدوتة الممثل الأمريكي حفيد السلطان محمد رشاد

و أخيرا حليت لغز الشخص صاحب الصورة الشهيره مع الاميره فايزه فؤاد في امريكا ومعاهم دودي حسين سري 🥳

في الاول اعتقدت أن اللى فى الصوره هما رانيا غالي و رائد غالي ابناء الاميره فتحيه ؛ بس بعد كده شفت صورة رانيا غالي و طلعت مش هيا اللي في الصوره مع الأميرة ؛ ففضلت افكر وادور ... هما مين اللي مع الاميره ؟؟؟

الاول عرفت أن اللى في الصورة هيا دودي حسين سري بنت حسين سري باشا رئيس وزراء مصر .

وفضلت ادور مين الشخص اللي في الصوره 👀

لحد ما عرفته 🥳

ممثل امريكي إسمه ( جون رشاد كامل) ؛ مثل في أفلام وأعمال فنية كتيرة و أشهرها المسلسل الشهير ستار تريك ...

مواليد ١٩٣٤ ؛ ومواليد القاهرة وكان عايش في منطقة المعادي ... طب إزاي ؟ اقولك أنا 🤷

السلطان محمد رشاد إتجوز ٥ مرات ؛ ومن ضمن زوجاته هي قمريس قادين  واللى خلف منها الأمير محمد ضياء الدين .

الأمير محمد ضياء الدين ؛ إتجوز ٥ مرات زي والده السلطان ؛ ومن ضمن زوجاته كانت واحده إسمها بيري زاد هانم واللي خلف منها الأميرة لطفيه

يعني الأميرة لطفيه هي حفيدة مباشرة السلطان محمد رشاد ( محمد الخامس ) ...

بعد نفي آل عثمان خارج تركيا ؛ خرجت أسرة الأمير محمد ضياء الدين إلى بيروت اولا وبعدين جم مدينة الإسكندرية سنة ١٩٢٤ و منها للقاهرة واستقروا في منطقة المعادي

توفي الأمير محمد ضياء الدين في اسكندريه سنة ١٩٣٨ بسبب مرض السل واندفن في مقابر الخديو توفيق .

نرجع للأميرة لطفيه ....

اتولدت في ٢٠ ابريل ١٩١٠ في قصر دولما باهتشي ؛ عاشت طبعا الاول في استنبول مع أسرتها ؛ كان ترتيبها السادسة في نسل ابيها ؛ وكانت البنت الخامسه لابوها

وكانت الطفلة الثانية لأمها لأن كان عندها اخت اكبر منها بسنتين هي الاميره خيريه .

كانت لطفية فتاة جميلة ذات شعر احمر مثل والدتها وشقيقتها ؛ وتم تعليمها منزليا على يد المربية صفية أونوڤار .

اتجوزت من حسن كمال بك في ٣ يونيو ١٩٣٢ ؛ وخلفت ٤ أبناء هما:

أحمد رشاد و اتولد في ٧ مايو ١٩٣٤وتوفي سنة ١٩٥٨ وكان عمره ٢٥ سنه

رشاد بيازيد ( وكان تؤام أحمد )  واتولد في ٧ مايو ١٩٣٤ ( هنرجعله بعدين )

بيريزاد واتولدت في ١١ يناير ١٩٣٦ وكان معاها تؤام برضه لكن توفي برضه

وفي ١٩٥٨ توفى حسن كمال ولم تتزوج الأميرة لطفيه بعده .

أما لطفيه ف ماتت في المملكه العربيه السعوديه في ١١ يونيو ١٩٩٧ ؛ وكان عمرها وقتها ٨٧ سنة واندفنت في مقبرة جدها السلطان محمد رشاد فى استنبول في منطقة أيوب.

والجدير بالذكر أن اخت الأميرة لطفيه تبقي الاميره مهرماه اللي اتجوزت الأمير نايف أمير الاردن

********

نرجع ل رشاد ( ابن الأميرة لطفية الثاني )

رشاد بيازيد أو جون رشاد ؛ اتولد واتربي في مصر ؛ ودرس في فكتوريا كوليدج وبعدها دخل الجامعة الأمريكية؛ وكان بيعرف يتكلم اكتر من لغة وكان البكالوريوس بتاعه في اللغة الإنجليزية واتخرج منها سنة ١٩٥٨

  جاء إلى الولايات المتحدة بعد إلغاء الملكيه بتأشيرة طالب وحصل على درجة الماجستير في الكتابة المسرحية من جامعة يوتا.  وفي الجامعة ، قدم أعمالًا مثل هاملت والملك لير والحرب والسلام.  كما عمل أيضًا في مسرح بارتر في أبينجدون بولاية فيرجينيا ، حيث لم يقدم عروضه على خشبة المسرح فحسب ، بل قام أيضًا بتصميم ورسم مجموعات وخلفيات الأعمال المسرحية.وتوالت أعماله حتى ظهر على خشبة مسرح برودواي وكمان عمل دور قائد في مسلسل ستار تريك.

كان صديق شخصي للأميرة فائزه فؤاد بحكم تواجدهم في أمريكا هما الاتنين ؛ وكمان كان على علاقة جيدة بأبناء النبيل عباس حليم ( نيفين ؛ الفيا ؛ محمد علي )

جون فضل عايش فى أمريكا وكان بيتنقل بين تركيا والمملكة العربية السعودية لحد ما توفي فى يناير ٢٠١٤

هنكمل بكره وبعده عن احفاد محمد علي اللي اتجهوا للفن ... إستنوني ❤️

#حواديت_إيمان

Tweet