زرافة محمد علي

 حدوتة ١٠

******

"زرافة محمد علي" 

تبدأ الحدوتة لما أحد البكاوات اصطاد زرافتين صغيرين من جنوب السودان أو النوبة سنة ١٨٢٦

ولما عرف قنصل فرنسا في مصر  اقترح أنهم يبعتوا واحده منهم لفرنسا لأن مفيش عندهم زرافات 😅

قنصل انجلترا كمان قال مليش دعوة انا عاوز انا كمان زرافة 😂؛ فاتعملت قرعة بين الزرافتين عشان يشوفوا مين تروح انجلترا ومين تروح فرنسا ( يابخت الزرافات 🥹) 

الزرافة اللي راحت بريطانيا كانت تعبانة وضعيفة؛ وماتت في نفس اليوم اللي وصلت فيه.

أما الزرافة اللي راحت فرنسا اتنقلت في قفص على مركب في النيل ومن الاسكندريه اتنقلت على مركب كبير في ٢٩ سبتمبر ١٨٢٦ 

واتكلفت رحلة نقل الزرافة ٤٥٠٠ فرنك فرنسي يعني حوالي ٧٥٠ دولار وده طبعا مبلغ ضخم في الوقت ده ؛ واللي تحمل التكلفة الحكومة الفرنسية 

وصلت الزرافة مرسيليا في فرنسا في ٣١ اكتوبر ١٨٢٦ وكانوا مجهزين لها بيت بتدفئة عشان برودة الشتاء

ولما جه الربيع؛ سافرت الزرافة لباريس عشان تقابل ملك فرنسا شارل العاشر ؛ وعملوا للزرافة معطف من المشمع مطرز بشريط اسود من كل الأطراف مع أحذية طويلة عشان حماية حوافرها أثناء الرحلة واللي كانت في ٢٠ مايو ١٨٢٧

ولما شافها الملك حط على رأسها تاج من الورود ومكنش عارف ينطق اسمها بالعربي Zarafa فسموها 

 "La girafe " فكان يناديها ب "la belle égyptienne" 

يعني المصرية الجميلة؛ وفضل يزورها كل يوم وكل اسبوع واداها كمان الجنسية الفرنسية ( وللزرافات حظوظ) 😂

و في 12 يوليو 1827 سمحوا للعامة ييجوا يتفرجوا على الزرافة وفي أول يوم جه ٣٠ ألف شخص عشان يشوفوها

ووصلوا لحوالي ٦٠٠ ألف شخص

واتعملت كوبايات وفناجين وأطباق وأوراق ومراوح وأدوات تدخين عليها صورة الزرافة؛ واتسمى شوارع في فرنسا باسم الزرافة واتعملت حلويات للاطفال على شكل الزرافة

وكمان ظهرت تسريحة الزرافة للفرنسيات وكمان فستان الزرافة وعقد الزرافة وشنطة الزرافة وتوكة الزرافة وكرافتات الزرافة؛ واتكتب مسرحيات واغاني عن الزرافة وحتى الكاتب الفرنسي بلزاك نشر قصة خيالية عن زرافة بتقول خطاب اودام ملك فرنسا 

و في 12 يناير 1845 ماتت الزرافة الجميلة بسبب مرض السل البقري بعد ما عاشت في فرنسا ١٨ سنة؛ وتم تحنيطها وعرضها في متحف التاريخ الطبيعي في فرنسا.

*******

#حواديت_إيمان 

لطلب كتاب سلطانة وثلاث ملكات: 

https://www.thebookhome.com/product/index/72093/%D8%B3%D9%84%D8%B7%D8%A7%D9%86%D8%A9-%D9%88%D8%AB%D9%84%D8%A7%D8%AB-%D9%85%D9%84%D9%83%D8%A7%D8%AA?srsltid=AfmBOoq3cJtkjtZW3m4gs5VtgNN-xzPPN5bb90xeLxWQrzboXbdPaCOg

Tweet