English French German Spain Italian Dutch Russian Portuguese Japanese Korean Arabic Chinese Simplified

2021-02-22

الأمير فيليب


 الأمير فيليب 🇬🇧 👑 


هو زوج الملكه اليزابيث الثانية ملكة المملكه المتحده ؛ هو ما أخدش لقب ملك خالص لأنه مش هو الحاكم ؛ اليزابيث هى الملكه بنت الملك ؛ هو أخد لقب الأمير فيليب دوق إدنبره .


اتولد فى 10 يونيو 1921 ؛ يعنى هو اصغر من الملك فاروق بحوالى سنه و 4 شهور بس ؛ و فى صوره جمعتهم سوا على العشا فى قصر عابدين فى 1950    .


الأمير فيليب اتولد فى نفس السنه مع الاميره فوزيه فؤاد و الملكه فريده و الاميره نسل شاه


اتولد فى اليونان ؛ و درس فى فرنسا و ألمانيا و إنجلترا ؛


 اول لقاء بينه وبين اليزابيث كان فى 1934 ؛ كانت اليزابيث وقتها حوالى 13 سنه 

؛ فيليب اصلا يعتبر من أحفاد الملكه فيكتوريا ؛ يعنى فى صلة قرابه بينه وبين اليزابيث الثانية .


خالة فيليب كمان هي الملكة لويز ملكة السويد كانت الزوجة التانية لجد الملك الحالي لكن مخلفتش


اتجوز من الاميره اليزابيث فى 20 نوفمبر 1947 ؛ و منحته اليزابيث لقب أمير و دوق إدنبره فى 1957 بعد حوالى 5 سنين من توليها العرش .


أنجب الثنائي : 

الأمير تشارلز ( ولى العهد حاليا ؛ واللى معروف فى عالمنا العربي بأنه اللى إتجوزته ديانا ) 

الأميره آن ( وهى أقرب أبناؤه إليه ) 

الأمير أندرو

الأمير إدوارد 

********


الاسره المالكه فى بريطانيا متشددة جدا فى ما يخص الاسره ووضعها ؛ زى مثلا " اسم " الملك أو الملكه ؛ اللى هو طبيعي بيكون " وندسور " ؛ وحاولت مع وينستون تشرشل اللى كان وقتها رئيس الوزراء ؛ اللى كان رافض تماما و ساعتها فيليب قال : أنه الراجل الوحيد فى العالم اللى مش بيدى إسمه لأولاده 

 لكن الملكه اليزابيث فى 1960 أضافت اسم زوجها إلى لقب نسل الاسره عشان يبقي اسم اى ملك من نسل الملكه اليزابيث " ماونتباتن وندسور " 


لقب ماونتباتن هو لقب والدة الأمير فيليب ؛ وحتى خال الأمير هو لورد ماونتباتن اللى هيتم اغتياله بعد كده من جيش تحرير أيرلندا و عرض الحادثه الجزء الرابع من مسلسل The Crown 

*********


الامير فيليب تقاعد عن اى واجبات ملكيه فى 2 اغسطس 2017 ؛ بسبب أنه عمل حادثه بالعربيه ؛ ورغم أنه خرج من الحادثه سليم و برغم أنه وقتها كان حوالى 96 سنه و محصلش اى ضرر سواء ليه أو لغيره ؛ الا ان الصحافه وقتها انتقدت الأمير أنه بيسوق عربيه وهو متجاوز ال 90 من العمر وممكن يعرض حياته وحياة الناس للخطر ؛ و فعلا الأمير استجاب و تقاعد عن الظهور ؛ وفى شبه عزله من فتره هو والملكه اليزابيث بسبب الكورونا

.

الأمير فيليب حاليا هو أكبر أفراد الأسرة سنا ؛ و المفروض هيكمل المئويه فى 10 يونيو القادم .


من ايام بس ؛ اتنقل الأمير فيليب لمستشفي فى لندن وكان التصريح من قصر باكنجهام أنه اتنقل بسبب 

 after feeling unwell,

 ‏او بالبلدى كده ؛ حاسس أنه مش تمام ؛ 

 ‏

 ‏وبالرغم من تأكيد القصر أن الأمير فيليب بصحه جيده ولكن تحت الملاحظه فقط ؛ وبالرغم من النفي القاطع أن تعب الأمير ملوش اى علاقه ب كوفيد 19 ... إلا أن دموع ابنه الأمير تشارلز ولى العهد وهو خارج من زيارته بتخلينا نتوقع سيناريو أخر ... 

 ‏


على اى حال ؛ العيله المالكه فى المملكه المتحده معروف عنهم أنهم عيله معمره ؛ و أعمارهم طويله نسبيا ؛ وفى حالة وفاة اى شخص بيكون وفاة جزء من التاريخ مش مجرد شخص ... 


ممكن الأمير فيليب يكون فعلا فى أيامه الأخيرة و يغادر المستشفى والدنيا وممكن نلاقي بكره خبر مغادرته للمستشفي وهو بصحه جيده ... 

كل شئ وارد 



********


واخيرا لو عجبكم المقال يبقي هتعجبكم روايتى الجديده #بيت_العز ؛ اللى ممكن توصلكم اى مكان من اللينك ده : 


ممكن تشتريها اونلاين وتوصلك للبيت من هنا : 


https://docs.google.com/forms/d/e/1FAIpQLSfkbnJuC6ZnFaeBRs2Z1uIEiKm-FYGw4fvlF78_t9Jb0cmnLQ/viewform

0 اكتب تعليقك قبل ما تمشي: