English French German Spain Italian Dutch Russian Portuguese Japanese Korean Arabic Chinese Simplified

2022-05-16

محاولة إعادة الملكيه

 محاولة إعادة الملكيه : 👑

Exclusive 🔥✍️



فى الأعوام الأخيرة من حكم فاروق ؛ كان الكل متوقع النهايه بسبب سوء الأحوال و سوء إدارة البلاد ؛ كان فى مثلا وصيفة توحيده هانم يكن واللى كانت روسيه وقالتلهم أنا شفت وعشت اللى حصل للرومانوف فى روسيا ؛ و انصحكم تبيعوا كل ممتلكاتكم وتسافروا بره مصر .


و زى كمان مدام قطاوى اللى كانت وصيفة الملكه نازلى و زوجة رئيس الطائفة اليhوديه فى مصر ؛ واللى نصحت الملكه نازلى تاخد مجوهراتها و تبيع أملاكها وتسيب مصر .


و كذلك عملت الاميره فوقيه فؤاد ؛ لما باعت قصرها لأختها الاميره فايقه و اخدت مجوهراتها و اخدت قرض من البنك بضمان أرضها و سافرت بره مصر و مرجعتش .


ده غير طبعا الاميره فائزه فؤاد اللى صورت فيلم هيا و شلة الزهريه ( و دى شلة من الأمراء و النبيلات ) قصته بتدور عن حاكم بيتم تنحيته عن عرشه عن طريق الظباط . و ده اتصور قبل شهرين بس من عزل فاروق . 

( وابقوا فكرونى احكيلكم حكاية الفيلم و شلة الزهريه) 


***********

المهم .....


فى ٢٣ يوليو ١٩٥٢ كان معظم أفراد الأسرة العلويه خارج مصر بيصيفوا فى اوروبا ؛ زى الأمير محمد عبد المنعم وزوجته الاميره نسل شاه واخواتها الاميرات هنزاده وهبة الله والأمير محمد ابراهيم والأمير عمرو إبراهيم ؛ وكذلك الاميره فائقه فؤاد و زوجها فؤاد بك صادق ؛ ده حتى مصطفى باشا النحاس كان خارج مصر . 


أما الملك فاروق فكان بيصيف وقتها هو وأسرته فى قصر راس التين فى الاسكندريه ؛ 


بعد عزل الملك ؛ فى ناس من العيله فضلوا بره وناس قرروا يرجعوا ؛ رجعت الاميره فائقه و زوجها و رجعت الاميره نسل شاه و زوجها لمصر .


واتعزل الملك فاروق وتم إعلان تولية ابنه الملك أحمد فؤاد الثانى العرش واللى كان طفل رضيع عنده ٦ شهور ؛ فأتعين مجلس وصايه عليه برئاسة الأمير محمد عبد المنعم واللى هو ابن الخديوى عباس حلمي الثاني و حفيد الخديوى توفيق و زوج الاميره نسل شاه .


********


بتقول الاميره نسل شاه :

" كان زوجى الأمير محمد عبد المنعم عنده توقع للأمور السياسيه وكان شايف أن شيئا ما سوف يحدث ؛ فمن غير المنطقي أن يكون ملك البلاد طفلا رضيعا خارج البلاد ؛ وان يستمر مجلس وصايه 17 عاما حتى يبلغ الملك السن القانونيه ."


**********

فى 18 يونيو 1953 ؛ بيتم رسميا إلغاء الحكم الملكى فى مصر و إعلان الجمهوريه ؛ و بكده بيكون مجلس الوصايه ملوش اى لزمه ! 


فى الفتره دى ؛ فى أفراد كتير من الاسره العلويه كانوا بيحاولوا يخرجوا من مصر بأقل قدر ممكن من الخسائر زى الاميره فائزه فؤاد اللى قدرت تخرج من مصر سنة 1954 مع زوجها الأمير محمد على رؤوف وبجزء من مجوهراتها ؛ عن طريق السفاره التركيه عن طريق أمينه هانم توجاى .


  

وقدرت الاميره نسل شاه تهرب جزء من مجوهراتها عن طريق السفاره العراقيه فى القاهره واللى سلمتها بدورها للأمير عبد الإله واللى سلمها بنفسه للأمير عمرو إبراهيم فى الخارج .


***********



فى الوقت ده خاف الأمير محمد عبد المنعم على نفسه وعلى ابناؤه ؛ لأنهم شافوا اللى بيحصل فى باقي العائلات من تأميم ومصادرة اراضي و ممتلكات و تواصل مع أحد أقاربه هو السيد محمد حسين محمود خيري ابن الاميره قدريه بنت السلطان حسين كامل ؛ واللى كان برضه متزوج من اميره من آل عثمان اسمها فوزيه ؛ و جمعوا بعض احتياجاتهم الأساسية و سابوا القصر بتاعهم فى المعادى وانتقلوا للاقامه عند حفيد السلطان حسين كامل .


كمان وقت إقامة الاميره نسل شاه و زوجها فى مصر ؛ عرض عليها الأمير عمرو إبراهيم أنها تبعتله اولادها عشان يكونوا بعيد عن اى خطر محتمل في مصر ؛ وعاشوا معاه فعلا ٥ سنين فى أوروبا من غير والدتهم ووالدهم .


الاميره نسل شاه و الأمير محمد عبد المنعم كانوا جزء من مخطط لمحاولة إعادة الملكيه فى مصر و لتولية الأمير عمرو إبراهيم عرش مصر بعد ما يتنازل له الملك فاروق . كان معاهم فى المخطط ده الأمير ناموق و الأمير محمد حسين محمود خيري حفيد السلطان حسين كامل . 


طب الحكايه دى جت امتى وازاى ؟!


**********


#معلومه

محمد حسين محمود خيري اتولد فى 22 ديسمبر 1922 ؛ و تزوج من الاميره فوزيه عثمان اوغلو واللى اتولدت فى 6 ديسمبر 1928


معلومه : 

الأمير محمود ناموق بيكون حفيد السلطان محمد الخامس وقد ولد فى استنبول و تزوج من شهرزاد راتب وهى الاخت الغير شقيقه لل لواء اسماعيل شيرين و توفي في السجن فى 13 نوفمبر 1963


**********



تواصل الأمير محمد عبد المنعم مع أحد المحامين عشان يفهم منه هل يقدر يسافر خارج مصر مع اسرته ولا لا ؟ وهل إذا باع شي من ممتلكاته أو أخذ شي منها هل ده قانونى ولا لا .

المحامى اخد منهم فلوس على أساس أنه هيقدر يساعدهم بالسفر ؛ كانوا حوالى 162 ألف جنيه و بعد كده رفض مساعدتهم وقال إنه ميعرفش حاجه وخاف يتورط معاهم فى شئ .

وقبل اسبوع من معاد السفر ؛ وفى اليوم التالى من لقاء المحامى ؛ اتفاجئوا باقتحام المنزل ؛


ياتري ليه ؟؟؟ 


اصل المحامى طلع قائد سرب و ظابط مخابرات واسمه : عصام الدين محمود خليل 💁 


هووووب هووووب هوووووب 😂 


**********

 قالت الاميره نسل شاه بالنص :

 ‏

" ‏ لقد أخذوا كل شئ ؛ جهاز الراديو ؛ الخطابات الرسميه ؛ الجوابات الشخصيه ؛ الصور الفوتوغرافيه ؛ حتى رسومات أطفالى أخذوها ؛ كما قطعوا عنا خطوط الهاتف ؛ لقد كان شيئا مريعا . وعلمنا بعد ذلك أن ذلك المحامى الذى كان يدعى عصام الدين محمود خليل ؛ ماهو إلا قائد سرب و ظابط بالمخابرات ."


واكملت : 


" إتهمونا ب التآمر لقلب نظام الحكم و تولية ابنى الأمير عباس حلمي الحكم بالتعاون مع الأمير محمود نامق وابن الشيخ المراغى " أحمد مرتضي المراغى " و جونى بشاره و إدموند حنين . "


*********


وفى 25 ديسمبر 1957 تم وضع الأمير محمد عبد المنعم و زوجته الاميره نسل شاه تحت الاقامه الجبريه 


وكانت المحاكمه واللى استمرت من 3 مارس ل 26 ديسمبر 1958 ؛ واللى كانت تهمتها ؛ محاولة إعادة النظام الملكى و تولية الأمير الصغير عباس حلمي عرش مصر ؛ واغتيال رئيس الجمهورية و تولية رئاسة الوزراء إلى ابن المراغى .


وقت التحقيق مع الاميره نسل شاه كانت بتتكلم وترد على الاسئله بالعربي ؛ و لما خلصت وطلبوا منها تمضي على أقوالها رفضت و قالت إنها مش هتمضي غير لما زوجها الأمير محمد عبد المنعم يقرالها أقوالها ؛ قالولها انتى مش بتتكلمى عربي ؟ خلاص اقريها بنفسك .... قالت لهم أنا بعرف اتكلم عربي لكن مبعرفش اقرا عربي ؛ طب هنقرالك احنا اقوالك رفضت برضه وقالت زوجى اللى يقرالى ؛ قالولها انتى مش واثقه فينا ؟ قالت لهم اثق ازاى فى حد بيوجهلى اتهام ؟! 


( طبعا دى كانت حركة ذكيه من الاميره عشان تخلى زوجها الأمير محمد عبد المنعم يعرف أقوالها ويعرف قالت ايه و مكتوب ايه عشان يبقي كلامهم واحد ) 


*******


وجه يوم المحاكمه و كان موجود صحفيين كتير مصريين وعرب وأجانب ؛ سألت المحكمه الاميره نسل شاه تحبي تردى على الاسئله بأى لغه ؟ ( عربي ؛ انجليزى ؛ فرنسي ؛ تركى ) و عندنا مترجمين جاهزين فى المحكمه .


فكرت الاميره نسل شاه لثوانى ؛ و كانت هتتكلم عربي لكن لما لقت صحفيين أجانب اختارت أنها تتكلم انجليزى عشان يقدروا يفهموها ويفهموا هيا بتقول ايه و يكتبوا كده فى الصحف والمجلات العالميه بدل ما يكون كلامها مترجم بالنسبه لهم و يتغير فيه من المترجمين .


طبعا اميره بالذكاء ده مكنش حد قادر يمسك عليها كلمه لا هيا ولا زوجها .


و بعد ما التحقيق انتهى ؛ وفى النهاية كان الحكم بترحيل الأمير محمد عبد المنعم والاميره نسل شاه وأسرتها ؛ ومصادرة ممتلكاتهم . و رجعوا تانى على أوروبا و انتهى حلم إعادة الملكيه .


**********



وتقول الاميره : 

"تم تفتيشنا ذاتيا قبل المحاكمه بشكل مهين ؛ وكذلك قبل السفر ؛ كان أمرا سيئا للغايه "


تقول الاميره :

 "كنت أتمنى أن أتمكن من أخذ الحصان الخاص بي على متن السفينه ؛ ولكن لم أستطع بكل أسف ولا أعلم مصيره أو مصير مجوهراتى و أين ذهبا؛ وقد قمت بعمل استشكال فى محاكم الجرد بأن مجوهراتى هى مجوهرات شخصيه لا تخص أسرة محمد على ؛ ولم اصل إلى شئ "


**********


الاميره نسل شاه فضلت تنكر طول حياتها فى الإعلام أنها كانت متورطه فى محاولة إعادة الملكيه ؛ وكانت بس بتقول أنهم كانوا عاوزين ياخدوا متعلقاتهم ويسافروا ....


لكن من فتره قريبه بس ؛ اعترف الأمير عثمان رفعت ابن الأمير عمرو إبراهيم على صفحته الرسمية أن فعلا كان فى محاولة إعادة الملكيه و تولية والدة العرش . 


واعتماد خورشيد فى مذكراتها قالت إن المملكه العربيه السعوديه كانت بتدعم إعادة الملكيه فى مصر . يعنى ممكن تكون المحاوله دى تمت بدعم من ملك السعودية .


المشتركين في المحاوله دى وارد يكون فى منهم ناس تانيه ؛ وانا أرجح تواجد الاميره فائزه فؤاد و زوجها الأمير محمد على رؤوف لأنها سافرت قابلت الملك فاروق فى نفس الوقت تقريبا ؛ و اعتقد محاولة لإعادة الملكيه لازم يكون الملك عارف بيها ؛ و يمكن تكون كمان الاميره فوزيه فؤاد كان عندها علم ؛ لانها اخت الملك وموجوده فى مصر و زوجها كان آخر وزير حربيه فى العهد الملكى و محبوب من الجيش .


 

طبعا المحاوله فشلت و اتحقق مع الاميره نسل شاه و زوجها الأمير محمد عبد المنعم و اتصادرت ممتلكاتهم ؛ و الأمير ناموق اتقبض عليه فى ٣١ اغسطس ١٩٥٨ وهو مسافر بغداد بيجهز ترتيبات زفاف الاميره فاضله بنت الاميره هنزاده على الملك فيصل الثانى ملك العراق و فضل فى السجن لحد ما مات فيه سنة ١٩٦٣ ؛ و اندفن فى مصر و تم نقل رفاته بعد كده هو والأمير عمر فاروق والد الاميره نسل شاه و اندفنوا فى نفس المقبره فى تركيا أما الامير حسين خيري اتقبض عليه ومحدش لا شافه ولا يعرف عنه حصله ايه من ساعتها. 




*********

الأمير محمود ناموق مات سنة ١٩٦٣

الملك فاروق مات سنة ١٩٦٥

الأمير عمرو إبراهيم مات سنة ١٩٧٧ 

الأمير محمد عبد المنعم مات سنة ١٩٧٩

الاميره نسل شاه ماتت ٢٠١٢ 

والامير حسين خيري محدش يعرف مات امتى 


******


حكاية الاميره نسل شاه هتلاقوها هنا بالتفصيل : 

https://m.facebook.com/story.php?story_fbid=10221090298782140&id=1083771090


حكاية الاميره فوزيه عثمان والامير حسين خيري هتلاقوها هنا بالتفصيل : 

https://m.facebook.com/story.php?story_fbid=10223216608698559&id=1083771090


**********

 💁 


اخواتنا الحلوين اللى بيحبوا يسألوا جايبه الكلام ده منين احب اقولهم نبذه عن المصادر : 


١- كتاب الاميره نسل شاه ل ( مراد برداقشي ) .

٢- أرشيف جريدة الأهرام سنة ١٩٥٨ .

٣- لقاء بالتليفزيون التركى للاميره نسل شاه .


#إيمان_الشرقاوى

2022-05-14

الاميره نسل شاه و الأمير عمرو إبراهيم

 الاميره نسل شاه و الأمير عمرو إبراهيم 👑




#قصه_لم_تكتمل 💔 


*************


بعد نفي أفراد أسرة آل عثمان خارج تركيا بعد إنقلاب أتاتورك ؛ معظمهم إن مكنش كلهم إتجهوا لدول أوروبا ؛ و أسرة الأمير عمر فاروق كلهم راحوا مارسيليا وبعدها نيس فى فرنسا .


أسرة الأمير عمر فاروق كانت بتتكون من : 

الأمير و زوجته الاميره رقيه صبيحه و بناتهم الاميرات الثلاث ؛ نسل شاه ؛ هنزاده ؛ هبة الله

وكمان كان معاهم الخليفه عبد المجيد الثانى والد الأمير عمر فاروق و كان معاهم الاميره در الشهوار اخت الأمير عمر فاروق... و أفراد كتير من الاسره انضموا ليهم فى نفس البيت زى مثلا بعد كده السلطانه سنيحه.


**********


فى المنفي كانت الحياه بائسه لمعظم فروع الاسره ماعدا فرع الخليفه عبد المجيد الثانى ؛ واللى كان بيستقبل أموال من بعض رؤوساء وملوك الدول الإسلامية باعتباره لايزال الخليفة بالنسبه لهم . 

وكمان زواج الاميره در الشهوار و زواج الاميره نيلوفر من أمراء حيدر أباد ؛ فكان الخليفه عبد المجيد بياخد مبلغ شهري ثابت من نسايبه اللى كانوا أغنى أمراء فى العالم وقتها .


المهم ؛ من هنا جت فكرة أن اميرات آل عثمان يتجوزوا من أمراء لدول تانيه عشان ينتشلوهم من حياة البؤس و يضمنوا ليهم و لأهلهم حياة كريمه .


************* 


الأمير عمر فاروق كان صديق شخصي للأمير عمرو إبراهيم ؛ الفرق بينهم كان حوالى ٥ سنين ؛ والأمير عمرو إبراهيم من سلالة الأمير أحمد رفعت ابن ابراهيم باشا ابن محمد على .


الأمير عمرو إبراهيم كان ارمل وعنده ٣ بنات فى الوقت ده ؛ و عرض على الأمير عمر فاروق أنه يتزوج من بنته الكبيره الاميره نسل شاه ؛ و وافق فعلا الأمير ووافقت الاميره نسل شاه و كانوا فى حكم المخطوبين فعلا ؛ و إستاذن بس الأمير عمرو إبراهيم من الأمير عمر فاروق أنه يرجع مصر ياخد موافقة الملك فاروق على الزواج و يبدأ يجهز القصر اللى هيعيشوا فيه .


ومن تدابير القدر أن الأمير عمرو إبراهيم لما رجع مصر عمل حادثه كبيره ؛ وكان قعيد لفتره ومحتاج علاج طبيعي ؛ و بعدها بعت رساله للاميره نسل شاه قالها أنه ميرضاش ليها أنها تعيش حياتها وشبابها مع شخص عاجز و اعتذر عن إتمام الزواج ... وتم الفراق بين الثنائي .


***********


مرت السنين و جه الأمير عمر فاروق و عيلته مصر ؛ و اتقدم الأمير حسن طوسون امير الاسكندريه للزواج من الاميره نسل شاه ؛ وفعلا تمت خطوبتهم ؛ و بتقول عنه الاميره أنه كان بإمكانها شم ريحة الخمره من اول ما يدخل البيت ؛ وأنه كان بيشرب كتير و أنه كانت بشرته وايده مليانين بالبثور والقروح على حسب كلامها .

و بتقول أنه حاول مره يقرب منها و ساعتها هيا زقته ووقعته على الأرض من شدة كرهها ليه .


اللى وقف جنبها فى فسخ الخطوبه هو الأمير ناموق واللى كان متجوز من شهرزاد راتب اخت اللواء إسماعيل شيرين . ( وهاحكى حكاية الأمير ناموق بعدين ) 


***********


بعد كده اتقدم للزواج من الاميره نسل شاه الأمير محمد عبد المنعم ابن الخديوى عباس حلمي الثاني ؛ وهو كان من أغنى أمراء مصر وقتها ؛ ولم ينجب أو يتزوج قبل كده ؛ كان خاطب بس الاميره روحيه زوجو اخت ملك البانيا و الخطوبه مكملتش .


الامير عمر فاروق وافق على الخطوبه لكن الاميره نسل شاه رفضت ؛ وقالت لوالدها ده لابس نضاره و تخين و اكبر منى فى السن بكتير ؛ وانا عاوزه حد من سنى يفهمنى و أفهمه .

فضل الأمير عمر فاروق يزهق فى بنته عشان توافق ؛ ٣ شهور بيزعقلها و بيزعق فى أخواتها و والدتها ؛ لحد ما جه يوم و زعق لحماته الست الكبيره ( السلطانه نازك آدا ) ؛ هنا مقدرتش نسل شاه تستحمل أن والدها ينفعل على جدتها و قالت له أنا موافقه اتجوز من الأمير محمد عبد المنعم .


طلب الأمير محمد عبد المنعم موافقه الملك فاروق؛ و طلب موافقة والده الخديوى عباس حلمي الثاني واللى كان فى المنفي وقتها ؛ و برقية الموافقه اتاخرت بسبب ظروف الحرب العالمية الثانية ؛ وفى نفس الوقت ده اتقدم الأمير محمد على ابراهيم للاميره هنزاده ووافقت ( و ده يبقي اخو الأمير عمرو إبراهيم ) ؛ وساعتها اختها الاميره نسل شاه قالت لها أنا باضحى بنفسي علشانكم متتجوزيش حد اكبر منك ومش بتحبيه ؛ فردت عليها الاميره هنزاده وقالت : ( انا زهقت من ترقيع هدومى ؛ أنا عاوزه اعيش الحياه اللى كنا فيها فى قصور وعندنا خدم ) 


*********


اتجوزت الاميره نسل شاه ؛ واتجوزت الاميره هنزاده ؛ و المفاجاه أن الأمير عمرو إبراهيم هيتعالج و هيخف و جس واات .... هيتجوز من اخت نسل شاه الصغيره الاميره نجلاء هبة الله . وهيخلف منها ابن وحيد هو الأمير عثمان رفعت 


و الغريب أن قصة زواجهم مش مذكوره نهائي فى كتاب الاميره نسل شاه؛ مش مكتوب الجواز حصل ازاى ولا حتى ليهم صورة زفاف لا فى الكتاب ولا عالنت عموما .

أما عن زفاف الاميره نسل شاه فكان فى قصر المنيل و قالت إنها كانت بتعيط طول اليوم وأنه كان أسوأ يوم فى عمرها .


فضل الأمير عمرو إبراهيم مقرب جدا من أسرة الأمير عمر فاروق ؛ وهو اللى كان صاحب اقتراح أنهم يختاروا حد يكون كبير اسرة آل عثمان بعد وفاة الخليفه عبد المجيد الثانى يكون مسئول عن شئون أفراد الأسرة و يهتم بكل فرد لو محتاج اى حاجة .


كمان كان الأمير عمرو إبراهيم كان مخطط لتجديد مقبرة السلطان محمد وحيد الدين ( والد الاميره رقيه صبيحه ) بحيث تكون مقبرة تليق بأخر سلاطين آل عثمان . لكن انتهاء الحكم الملكى فى مصر وقف المشروع .


فى ٢٣ يوليو ١٩٥٢ كان معظم أفراد الأسرة خارج مصر بيصيفوا فى اوروبا ؛ رجعت الاميره نسل شاه و زوجها و اولادها مصر ؛ وفضلوا أخواتها البنات في الخارج .

قدرت الاميره نسل شاه تهرب جزء من مجوهراتها عن طريق السفاره العراقيه فى القاهره واللى سلمتها بدورها للأمير عبد الإله واللى سلمها بنفسه للأمير عمرو إبراهيم فى الخارج .


كمان وقت إقامة الاميره نسل شاه و زوجها فى مصر ؛ عرض عليها الأمير عمرو إبراهيم أنها تبعتله اولادها عشان يكونوا بعيد عن اى خطر محتمل في مصر ؛ وعاشوا معاه فعلا ٥ سنين فى أوروبا من غير والدتهم ووالدهم .


الاميره نسل شاه و الأمير محمد عبد المنعم كانوا جزء من مخطط لمحاولة إعادة الملكيه فى مصر و لتولية الأمير عمرو إبراهيم عرش مصر بعد ما يتنازل له الملك فاروق . كان معاهم فى المخطط ده الأمير ناموق و الأمير محمد حسين محمود خيري حفيد السلطان حسين كامل .


طبعا المحاوله فشلت و اتحقق مع الاميره نسل شاه و زوجها الأمير محمد عبد المنعم ؛ و الأمير ناموق اتقبض عليه و مات في السجن ؛ و الامير حسين خيري اتقبض عليه ومحدش لا شافه ولا يعرف عنه حصله ايه من ساعتها. 

والاميره نسل شاه و زوجها بعد ما التحقيق انتهى معاهم رجعوا تانى على أوروبا و انتهى حلم إعادة الملكيه .


الأمير عمرو إبراهيم مات سنة ١٩٧٧ 

الاميره نسل شاه ماتت ٢٠١٢ 


*************


#إيمان_الشرقاوى

2022-05-12

معلومات خاطئه

 معلومات غلط ⛔



١- أحمد عرابي قال " لقد خلقنا الله أحرارا ولم يخلقنا تراثا أو عقارا " .... ❌


# الجمله دى متقالتش ؛ مش بانكر أن احمد عرابي والخديوى توفيق قابلوا بعض اكتر من مره ؛ لكن الواقعه دى محصلتش بالشكل اللى احنا درسناه فى المدارس .✅


***********


٢- الملك فاروق تزوج من الملكه فريده في المنفى ... ❌ 


# الملكه فريده قابلت الملك فاروق فى المنفي لكن لم يحدث بينهم زواج للمره الثانيه .✅


************


٣- الاميره نسل شاه تزوجت عام ١٩٧٠ و انجبت الأمير داوود .... ❌ 


# الاميره نسل شاه لم تتزوج بعد وفاة زوجها الوحيد الأمير محمد عبد المنعم واللى انجبت منه ابنائها الأمراء عباس حلمي و إقبال ؛ و الاميره نسل شاه عام ١٩٧٠ كان عندها ٥٠ سنه لانها من مواليد ١٩٢٠ ؛ يعنى مش ممكن تتجوز و تخلف ✅ 


*************


٤- الملك فاروق كان عاوز فتوى من المراغى أن الملكه فريده متتجوزش بعده ... ❌ 


# الامام المراغى مات سنة ١٩٤٥ و طلاق فاروق وفريده تم سنة ١٩٤٨ ✅ 


**********


٥- الملكه ناريمان تخلت عن إبنها وسابته عشان تتجوز ... ❌ 


# الاميره فوزيه فؤاد اتطلقت و سابت بنتها فى إيران واتمنعت من رؤيتها و التواصل معاها لسنين طويلة و اتجوزت من اللواء إسماعيل شيرين وخلفت ناديه و حسين ؛ الملكه دينا اتطلقت و سابت بنتها فى الأردن واتمنعت من رؤيتها لسنين طويلة .... بلاش تحامل على المرأه بسبب عناد الرجل ✅ 


***********


٦- سعيد باشا وافق على قناة السويس بسبب طبق مكرونه ❌ 


# كان فى محاولات لحفر قناة السويس من ايام المصريين القدماء ( قناة سيزوستريس ) ؛ و كان فى محاولات ايام عمرو بن العاص ؛ و كان فى محاولات ايام محمد على باشا لكن بسبب حسابات خاطئه توقف المشروع وتم إعادة المحاولات فى عهد سعيد باشا و اكتشفوا أن مستوى البحرين واحد فاتوافق على المشروع ✅


************


٧- حكام أسرة محمد على كان ولائهم للإنجليز ❌ 


# حكام الاسره العلويه كان فيهم الصالح و الطالح ؛ لكن كلهم كان ولائهم لمصر ؛ وفى منهم اللى كان بيناطح الإنجليز و إتاذى بسببهم زى الخديوى عباس حلمي الثاني و الملك فاروق .✅


**********


٨-امراء واميرات الاسره العلويه مكنوش بيتكلموا عربي وكانوا بيتكلموا بطريقة حازر أفنزم و حظرتنا ... ❌ 


# فى خطابات كتير للاميره فوزيه والملكه فريده و الملكه ناريمان و الاميره فائقه و الاميرات نسل شاه وهنزاده ونجلاء هبة الله و حوارات ليهم فى الجرائد و المجلات بالعربي ؛ حتى أن نسل شاه لما اتحقق معاها كانت بتتكلم عربي .

و الملك فاروق و الملك فؤاد كانوا بيقولوا خطابات بالعربي فى افتتاح اى مكان جديد او فى افتتاح البرلمان .

و الخديوى عباس حلمي الثاني كتب مذكراته بالعربي .

والامير عمر طوسون والأمير وحيد بسري و غالبية الأمراء كانوا بيكتبوا خطابات للملك بالعربي .

و حصة العربي كانت اكتر حصه ليها مواعيد فى جدول تعليم الاميرات والأمراء الصغار .✅


***********


٩- أسرة محمد على كانوا فى قصور عاليه بعيد عن الشعب ... ❌ 


# الامراء والاميرات كانوا مشهورين بالتبرعات والاعمال الخيريه للشعب بكل طوائفه ؛ الأمير عمر طوسون هو اللى طبع منشورات ثورة ١٩١٩ ؛ والنبيل عباس حليم كان نصير العمال والفلاحين ؛ الاميره هنزاده طلبت أنها تأكل بصاره فى يوم محدد بالاسبوع عشان تفضل فاكره الفقراء والمحتاجين بتبرعاتها ؛ و الاميره عين الحياه أسست مبرة محمد على ودى كانت بتعالج الفقراء بالمجان و ليها فروع كتير فى كل محافظات مصر و كذلك تبرعات الاميره فاطمه اسماعيل لجامعة القاهره و الأمير محمد على توفيق كانت معظم جوامع ومساجد مصر فى الوقت ده تم ترميمها أو إنشائها بفلوسه ؛ و الاميره فوزيه اتطوعت كممرضه للجنود فى حرب ٤٨ و أمينه هانم إلهامى زوجة الخديوى توفيق لقبت ب أم المحسنين غيرهم كتير ... ✅


*************


١٠- الاسلحه الفاسده سبب هزيمة الجيوش العربية فى ٤٨.... ❌


# الاسلحه الفاسده كانت قصة من تأليف إحسان عبد القدوس واللى قال كده أنور السادات في كتابه البحث عن الذات و قال إن دى كانت جزء من تهيئة الرأى العام للثوره على الملك ؛ و هزيمة الجيوش العربية ليها اسباب كتير اوى عاوزه مقالات لوحدها .✅


************


١١- الخديوى اسماعيل هو سبب ديون مصر و سبب احتلالها بعد كده ... ❌ 


# ديون مصر كانت موجوده من قبل عهد الخديوي اسماعيل ؛ و فى افكار كان بيرفضها عشان ميحملش خزينة الدولة فوق طاقتها ؛ زى مثلا قصة تمثال الحريه اللى كان هيتحط فى مصر بسبب افتتاح القناه و رفضه بسبب تكاليفه العاليه ؛ و الخديوى اسماعيل كان عارف كويس ازاى يسدد الديون بالتدريج ومكنش سامح بالتدخل الأجنبي في مصر و قافل فى وشهم كل الثغرات و كانت النتيجه أن تم عزله عن الحكم ✅


************

دول اللى افتكرتهم دلوقتى و لو افتكرت حاجه هضيفها أو ممكن انتوا تفكرونى عادى جدا 😂


#إيمان_الشرقاوى

2022-05-08

الشريفه دينا بنت عبد الحميد

 الشريفه دينا بنت عبد الحميد :

يا زينة الدنيا يا دينا ❤️👑 




******************** 


إتولدت فى ١٥ ديسمبر ١٩٢٩ ؛ فى القاهره وقت حكم الملك فؤاد الأول ؛ هى بنت الشريف عبد الحميد محمد عبد العزيز عون ( ١٨٩٨-١٩٥٥ ) ؛ و السيده فخريه براف ( توفيت عام ١٩٨٢ ) ؛ يعود نسبها إلى حسن ابن على ابن ابي طالب ؛ حفيد سيدنا محمد من السيده فاطمه الزهراء ؛ و عشان كده بتلقب ب ( الشريفه ) .


والاسره الهاشميه طبعا ليها صلة قرابه بملك المملكه الاردنيه الهاشميه و كذلك ملك العراق ( لان كل دول هاشميين ). 


ابوها عبد الحميد بك عبد العزيز حفيد عون الرفيق باشا أمير الحجاز و شريف مكة سابقا ؛ 

لما دينا وصلت للثانوية بعتها تدرس فى مدرسة داخلية فى لندن و لما خلصت الثانوية دخلت كلية جيرتون فى جامعة كامبريدج و هى كلية نسائية اتعملت علشان تمكن العائلات الكبيرة فى اوروبا و دول العالم انها تدخل بناتها الجامعة فى كلية مستقلة للبنات فقط


الشريفه دينا اتعلمت فى انجلترا و اتخصصت فى الأدب الإنجليزي و العلوم الاجتماعية. 


بعد ما رجعت من رحلتها التعليميه بالخارج وهيا معاها ماجستير و دكتوراه ؛ استلمت وظيفتها كدكتوره فى جامعة القاهره وكانت بتدرس فلسفه و ادب انجليزي .


الشريفه دينا كانت معروفه فى منطقتها بالمعادى بالجمال و الثقافه و الاناقه و نضج التفكير ؛ كانت متحرره ولكن متمسكه بالتراث العربي .


وكانت على علاقة صداقة قوية مع الاميره فاطمه نسل شاه والأمير محمد عبد المنعم واسرتهم . و الصداقه استمرت بينهم حتى بعد خسارة التاج و فضلوا على تواصل دائم .


وكانت كمان على علاقه قويه مع نجوم الفن في مصر ؛ مثلا كانت تربطها صداقه بالفنانه فاتن حمامه و اللى كانت وعدت الشريفه دينا أنها لو خلفت بنت من عمر الشريف هتسميها دينا ؛ و لما خلفت طارق عمر الشريف ؛ الشريفه دينا بعتتلها تهنئه للمولود و قالتلها اتمنى تيجى دينا الصغيره المره الجايه .


كمان كانت على اتصال بالسيده ام كلثوم وكانت بتقابلها ؛ وحتى إن السيده ام كلثوم توسطت لإقناع الشريفه دينا بأنها توافق على إجراء حوار مع مصطفى امين ؛ وكانت دايما ام كلثوم بتقابل الشريفه دينا بعد اى حفله ليها فى الأردن .


وكذلك كانت على علاقه قويه من عبد الحليم حافظ و 

على رضا و فريده فهمى 




*********

يوم 17 مارس سنة 1947 نظم الملك عبد الله الاول ملك الأردن حفل كبير للسادة الاشراف و العائلة الهاشمية فى العاصمة الاردنية عمان لاعلان تعيين ابنه الامير طلال وليا للعهد و حضر الاجتماع رموز عائلات السادة الاشراف فى كل انحاء العالم و أسرهم و كان ضمن المدعوين الشريف عبد الحميد بك عبد العزيز و اسرته و كان معاه بنته دينا و قابلها الامير حسين بن طلال ابن ولى العهد و حفيد الملك عبد الله الاول


يوم 9 سبتمبر سنة 1951 تم تعيين الامير حسين وليا للعهد و كان وقتها الامير حسين بيدرس فى لندن و بعد ما رجع لندن لاستكمال دراسته واحد من أمراء العراق يعنى يعتبر ابن عمه عمل حفلة كبيرة جمع فيها كل الهاشميين و السادة الاشراف المتواجدين فى انجلترا و كان من ضمن المدعوين دينا عبد الحميد و دى كانت تانى مرة تتقابل مع الامير فيها


فى ١٩٥٢ ؛ وقت ما كانت ٢٣ سنه ؛ قابلت ابن عمها الحسين بن طلال ملك الاردن فيما بعد فى لندن ؛ و اتقابلوا فى بيت أبناء عمهم من الاسره المالكه العراقيه ؛ وقتها كان الملك بيدرس فى المدرسه فى انجلترا وهيا وقتها كانت في الجامعه . 


الملك حسين قال فى لقاء صحفى انه فى اللقاء ده قرر ان دينا هاتكون مراته بعد ما يخلص دراسته

بعد كده دينا انهت دراستها و دخلت كلية بيدفورد للدراسات العليا فى لندن و حصلت على دكتوراه فى العلوم الاجتماعية و بعد ما خلصت رجعت مصر و اشتغلت دكتور للأدب الانجليزى فى كلية الآداب جامعة القاهرة وبعد كده تكررت زيارة ابن عمها ليها فى بيتها فى المعادى .


يوم 11 اغسطس سنة 1952 تولى الملك حسين حكم الاردن و فى اول اجازة خدها الملك حسين بعد ما بقى ملك كان فى صيف 1953 راح لوزان فى سويسرا و كانت دينا و ابوها و الاسرة كلها بيصيفوا هناك و طبعا راحوا يسلموا على الملك فى لوزان كما هى عادة الهاشميين فى كل مكان فى المرة دى الملك الحسين قرر انه لازم يتجوز دينا .


 فى يناير ١٩٥٤ خد الملك الحسين اقرب رجاله و راح على مصر و اتصلت السفارة الاردنية بعبد الحميد بيه عبد العزيز و نسقوا معاه زيارة الملك حسين لبيته

و لما راح الملك حسين خطب دينا و اعلن رسميا خطوبته على الشريفة الدكتورة دينا بنت الشريف عبد الحميد بك عبد العزيز فى فيلا عبد الحميد بك فى المعادى


الزواج كان فى البدايه بدعم والدته الملكه زين الشرف لأنها كانت عايزة واحدة هاشمية ومتعلمة برا و مثقفه وواجهة للبلد الجديد اللى كان عمرها الملكى ١٠ سنين تقريبا 


 


*************

ساعدت الشريفه دينا في تزويد المقاومين الجزائريين بالسلاح سنة 1955. 


فالأميرة دينا عبدالحميد كانت صاحبة اليخت الذي نقل أول شحنة أسلحة من مصر إلى الثورة الجزائرية في عام 1955.

 وعلى متنها سبعة من شباب الجزائر الذين التحقوا بالثورة: بوخروبة محمد (هواري بومدين) عرفاوي محمد ، البخاري علي، عبد العزيز مشري، عبد الرحمن محمد، حسين محمد وشنوط أحمد.


اليخت أهداه الملك حسين للأميرة قبيل زواجهما في أبريل من العام نفسه وصار وسيلة نقل سلاح للثوار، تم نقلها من الاسكندرية إلى الناظور في "يخت دينا".


 كانت تتكون من 300 بندقية من عيار 30,3 ملم و 30 مسدسا رشاشا من نوع بيرن و 100 بندقية رشاش من نوع طومي ودخيرة متنوعة.وكان عندها يخت باسمها نقلت عليه عدد من الطلبه الثوار إلى الجزائر وكان على رأسهم هوارى بومدين واللى هيبقي بعد كده رئيس الجمهورية الجزائرية.


 ‏

**********


تم الزواج بين الملك الحسين والشريفه دينا فى قصر رغدان فى ١٩ ابريل ١٩٥٥ ؛ و كان الملك وقتها ١٩ سنه و كانت الشريفه دينا ٢٥ سنه . واللى بقت من وقتها ( الملكه دينا ) .


مصمم الأزياء الإيطالي #Emilio_Schuberth

قام بتصميم فستان زفاف الملكة دينا الزوجة الأولى للملك الحسين بن طلال ملك الأردن.

الصورة لإيميليو شوبير يتحدث مع الشريفة دينا في منزلها في المعادي بتاريخ الثاني من أبريل 1955


أحيي حفل الزفاف الفنان فريد الاطرش وغنى اغنية مخصوص لجلالة الملكه من كلمات صالح جودت كانت بتقول : 


يا اغلى من امانينا واحلى من اغانينا

يا زينة الدنيا يا دينا

يا دره في بلد حره وتاج عالي وشعب اصيل

تعالى هاتف البشرى وجينا من ضفاف النيل

باسم الشعب والثورة نقدم لك تهانينا


****************

يا نسمه في ربى عمان ونجمه في سما رغدان

وبسمه كلها ايمان يزيدك حسن والاحسان

مليكك ع القلوب سلطان وتاجه ضي في عينينا


****************

يا فرحتين للعرب زانوا ليالينا

الاولى يوم ما جيت شرفت وادينا

والثانية فرحة قلوبنا يوم فرح دينا

وانت حبيبنا وايدك في ايادنا

يا فرحت احبابنا ويا حسرة اعادينا

يا اغلى من امانينا واحلى من اغانينا

يا زينة الدنيا يا دينا


****************


للإستماع إلى الحفل : 


https://youtu.be/ackFmyIX75c


**********



الزواج تم بدعم كبير من جمال عبد الناصر ؛ وتم تسمية شارع فى القاهره باسمها؛ و دينا كانت واجهه جميله جدا للمملكه الاردنيه ؛ لكن الملك كان عاوز يقيد حريتها و حركتها ؛ ومنع أن يكون ليها اى دور في المملكه و ده كان بإيعاز من والدته الملكه زين الشرف ؛ لأنهم كانوا خايفين من شخصية دينا القويه و ازدياد شعبيتها .


***********


فى ١٣ فبراير ١٩٥٦ يعنى بعد حوالى ١٠ شهور من الزواج ؛ إتولدت اكبر أبناء الملك الحسين ؛ الاميره عاليه ؛ واتسمت على اسم الملكة عالية ملكة العراق ام الملك فيصل

( طبعا لو كانت امير كان زمانه هو ملك الاردن الحالى ) ؛ بس حتى إنجاب طفل يجمعهم مقدرش أنه يجمع شملهم. 


طبعا الملكة زين والدة الملك حسين معجبهاش بقى ان زوجة ابنها تبقى ليها شخصية ومتعلمة ومثقفة فكانت عايزاها تبقى وراها وتفضل هي رقم واحد؛ كانت بتخليها مثلا تلبس بالاجبار طرحة بيضا كدة في كل المناسبات الرسمية جوه الاردن ؛ معجبش دينا طبعا الكلام ده وهي كانت دماغها ناشفة؛ و مابطلتش الملكه زين مكايد علشان يحصل الطلاق .


بعد ميلاد الاميره عاليه بشهور ؛ كانت الملكه دينا فى مصر بتقضي إجازتها عند أسرتها ؛ ويمكن كانت جايه عشان تحس بالهدوء والسكينة بعيداً عن ضوضاء ومشاحنات القصر ؛ ووقت إقامتها في مصر بلغها الملك عن رغبته في الطلاق ؛ وتم الطلاق بينهم فى ٢٤ يونيو ١٩٥٧ تنفيذا لرغبة الملكه زين الشرف واللى كانت علاقتها بالملكه دينا مش تمام . و منعتها الملكة زين فترة كبيرة من رؤية بنتها الاميرة عالية فكان لازم ترجع الملكة دينا و تعيش فى عمان علشان تحل المشكلة دى و تقدر تشوف بنتها و تعيش معاها .

وعاشت الملكة السابقة دينا فى عمان و كانت بتسافر الى القاهرة و لندن باستمرار و اختاروها الرئيسة الشرفية لرابطة المرأة المسلمة فى انجلترا و حوالى سنة 1960 وافق الملك حسين ان دينا تشوف بنتها و تقيم معاها بعض الايام

ومش هتشوفها غير فى لندن فى ١٩٦٣ 



*********


 فضلت الشريفه دينا ترفض اى ارتباط لسنين طويله ؛

و فى سنة ١٩٧٠ كانت دينا فى لندن و قابلت اسعد سليمان حسن عبد القادر سليمان ( وهو مولود فى بيت لحم فى ٢٧ اكتوبر ١٩٤٢ ) يعنى هيا كانت أكبر منه ب ١٣سنه و الشهير ب صلاح التعمرى وهو قيادى فى منظمة التhرير الفلسtينية و اتفقوا على الجواز و لما رجعوا عمان تم الزواج يوم ٧ اكتوبر ١٩٧٠ يعنى بعد طلاقها ب ١٣ سنه ؛ و حضرت دينا و صديقاتها و صلاح و قرايبه و اصدقائه و لما جه المأذون عرف ان العروسة هى الملكة السابقة طلع يجرى و هرب من الفرح


فجابوا مأذون تانى و اول ما عرف هرب برضه و لما جه المأذون التالت و عرف كان هايهرب برضه لكن الحاج اسماعيل جبر و اخوه و دول اصدقاء العريس طلعوا مسدساتهم و حطوها على راس المأذون و قالوله لو ما كتبتش الكتاب هانقتلك راح كاتب الكتاب بعد ما خلاهم وعدوه انهم مش هايجيبوا سيرته و لا هايقولوا على اسمه لاى حد


استمر جواز دينا و صلاح لسنين و فى سنة ١٩٨٢ تم احتلال لبنان وشارك صلاح فى العمليات العسكرية بصفته قيادى فى منظمة التhرير و لكن تم أسره .


فأدارت دينا مفاوضات مع الصليب الاحمر للافراج عن جوزها و تواصلت مع الجبهة الشعبية لتحرير فلسtين و قدرت يوم 23 نوقمبر 1983 انها تتوصل للافراج عن جوزها و 4700 أسير فلسtينى و لبنانى فى سجون اللى ما يتسموا مقابل 6 من الاسرى بتوعهم عند منظمة التhرير الفلسtينية


  و دى كانت من أكبر عمليات تبادل الأسري فى التاريخ .


وعاشوا سوا فى لبنان وبعدين انتقلوا للأردن وبعد اعلان استقلال فلسtين اتنقل صلاح لوحده من غير دينا لفلسtين و عاشت دينا فى قصر الاميرة عالية فى عمان مع استمرار زواجهم و لكن بدون ما يعيشوا مع بعض و اشتغل صلاح التعمرى قيادى فى الجيش الفلسtينى و وصل لرتبة لواء و فى سنة 1996 بعد انشاء المجلس التشريعى الفلسtينى تم انتخابه فى اول مجلس و فى 2 نوفمبر 2003 اتعين صلاح وزير للشباب و الرياضة و فى 7 نوفمبر 2005 بقى محافظ بيت لحم ومستشار محمود عباس .



********* 


مات الملك الحسين فى ٧ فبراير ١٩٩٩ ؛ و تزوج بعد الشريفه دينا ثلاث مرات ؛ و انجب بعد الاميره عاليه ١١ ابن و ابنه ؛ و اتبنى طفله واحده هى عبير محيسن 


وماتت الملكه دينا يوم الاربعاء ٢١ اغسطس ٢٠٢١ فى عمان فى قصر بنتها الاميره عاليه ؛ واتعمل لها جنازة رسميه حضرها ملك الاردن بنفسه الملك عبد الله بن الحسين ؛ هو و معظم أفراد الأسرة الهاشميه واندفنت بالمقابر الملكيه فى عمان .


وتوفي السيد صلاح التعمري فى ٢١ ابريل ٢٠٢٢ بعد ان رحله طويله مع المرض السكري من الدرجة الثالثه 


***********

أما عن ڤيلا الملكه دينا بالمعادى ؛ فكانت استديو تصوير لاغلب افلام الابيض والاسود منها اغنيه حليم على قد الشوق ؛ و فيلم لحظه ضعف للفنان صلاح ذو الفقار وحسين فهمي والفنانه نيللي عام 1981م


ومن اكتر من ١٠ سنين تم تعلية السور وتغيير البوابة واخفاء القصر تماما عن الماره من قبل شركة بترول قامت بتأجير القصر.


بنتها عالية مرة حد سألها اذا كانت قابلت فضيلة خطيبة الفيصل قالت اه وانها ست لطيفة جدا وان والدتها هانزاده كانت صديقة والدتها




***********

المصادر :

1 - أسرار و قرارات و مواقف الملك حسين - عبد المنعم حمزة

2 - حول العالم مع ايزيس - ايزيس فهمى

3 - أسد الاردن - آفى شلايم


#إيمان_الشرقاوى

2022-04-26

حوار مع أحد جيران الاميره فوزيه فؤاد

 ( حوار حصري مع أحد جيران الاميره فوزيه فؤاد فى الاسكندرية لأكثر من ٥٠ عاما ) 👑♥️





* الاميرة فوزية كنت أراها تقريبا يوميا لأكثر من الاربعين عاما وهي تقضي نهارها في حديقة فيلتها مع قططها التي تفوق في العدد العشرين!!! وكانت رحمها الله لا تختلط ولا تتواصل مع الجيران ولكن بكل ادب وذوق عكس البرنس إسماعيل كان يصلي الجمعة والعيد بالمسجد وكنا نسلم عليه باليد وكان ودودا مع الجيران حتي إنه حضر عزاء والدي رحمه الله وكان متواضع بشكل مذهل مع البسطاء مثل سائقه الخاص او الجنايني .


* الاميرة فوزية وإسماعيل بك شيرين لم يرحبوا بزواج ابنتهم نادية من يوسف شعبان و بعد ولادتها لابنتهم سياناي كان يوسف شعبان ممنوع من دخول الفيللا ويقف بسيارته امام الباب ليأتوا بإبنته ليراها لبضع دقائق إلا أن العلاقة بين يوسف وأهل طليقته تحسنت مع تقدم ابنته في العمر وفعلا نادية رحمها الله كانت تعاني من أمراض نفسية وعصبية وكانت تعالج في سويسرا .... 


* ناديه وحسين كانت تربيتهم اقرب بأطفال العيلة المالكة البريطانية عزلة وعدم اختلاط بأصدقاء و ده خلاهم غير متقبلين او متفهمين للواقع والمجتمع خارج أسوار الفيللا وكان سهل ينخدعوا في الناس !!!


* نادية الله يرحمها تعبت نفسيا من زيجاتها الاتنين وعرفنا وقتها منهم أن الزواج الثاني كان علي غير المتوقع به أيضا مشاكل و تعقيدات وعدم تفاهم و انها سافرت لتعالج في سويسرا بأحد المصحات النفسية بعد تدهور حالتها واما حسين فلم يتزوج علي الاطلاق وكان له طقوسه الخاصة جدا وعزلة متفردة!!! تقريبا لحرصه علي عدم الاختلاط بالمجتمع نهائي انما شهادة لله ناس في قمة الأخلاق والرقي والأدب و زوق في التعامل الله يرحمهم جميعا.


* حسين شيرين الله يرحمه كان نسخة طبق الأصل و بدون أي مبالغة من شخصية احمد مظهر في الأيدي الناعمة رغم معرفته العربية إلا أنه كان كثيرا يتعمد الكلام بها بشكل مكسر وإضافة كلمات تركية في حديثه ويبدو أنه كان متأثرا كثيرا بتراث اسرته العلوية وكان ذلك واضح حتي في مظهره من الذقن الخديوية ولبس ملابس الفروسية تقريبا بشكل دائم و حمل الكرباج بيده وعدم التعامل مع الجيران والمكوث في البيت لأوقات طويلة والاكتفاء بالتنزه داخل حديقة الفيللا و الاشراف علي اعمال الجنايني عكس والده البرنس إسماعيل رحمه الله كان ودودا مع كل الناس ونشيط ويخرج كثيرا وله أصدقاء. حسين كانت امه كل دنياه يرافقها دائما وحين يخرج للسهر يسهر وحيدا كما رأيته عدة مرات بشيراتون المنتزه .....اما نادية رحمها الله فقد توفت وفاة طبيعية بعد سنين من الصراع مع المرض النفسي اما مكان الوفاة غير مؤكد قد يكون بسويسرا وقد يكون بمصر .


* اما بخصوص المد العمراني.....


في يوم قرر عضو لجنة السياسات السابق ثم بعد ذلك وزير التجارة ( م . ر ) توسيع فيللا حماه اللواء محمود فهمي رحمه الله قائد القوات البحرية ٦٩-٧٢ والملاصقة لفيللا الأميرة وقاموا بالبناء مباشرة علي سور فيللا الأميرة دون ترك المسافة التي ينص عليها قانون البناء بين الجار وفي يوم وليلة حجبت الشمس والهواء و الرؤية عن جانب الفيللا بالكامل وهنا خرج السيد حسين رحمه الله بلبس الفروسية والقفاز الشمواه يعترض ويستاء من هذا الاعتداء .


 وفي صباح اليوم التالي جاءه أسطول من سيارات البلدية و مهندسين الحي وخرج لهم معتقدا انهم جاءوا لانصافه إلا أنهم كانوا يطالبونه بغرامات نظير نمو شجر الفيللا العتيق وخروج فروعه واوراقه للشارع وطالبوه بقص هذه الفروع وتهذيبها فورا 


 ‏فهم طبعا السيد حسين الرسالة ودخل فيلته محبطا مستسلما وتم استكمال توسعات فيللا اللواء ووضع سلاسل حديد بعرض نصف الشارع لمنع وقوف السيارات امام الفيللا ...


************


( حوار مع شخصية أخري مقربه من السيد حسين شيرين )


" حسين اسماعيل شيرين كان صديق زوجى ؛ كان خريج كلية الاداب ؛ وكانوا دفعه واحده فى مدرسة ڤكتوريا ؛ وكان يقيم سنويا مأدبة إفطار رمضانيه لزملائه بالمدرسه و زوجاتهم بكل كرم ضيافه وحفاوة و بيتم بعدها صلاة جماعه فى فيلا سموحه .


حسين شيرين كان فى منتهى الادب والكرم ؛ كان بيقدم الطعام بنفسه لضيوفه فى اطباقهم ؛ وكانت ثقافته الدينيه قويه جدا ؛ وكل ساعه كان يتركنا للصعود إلى الطابق العلوى من الڤيلا للاطمئنان على والدته الاميره فوزيه والتى لم تكن تتناول الطعام معنا بل كانت تكتفي بتحيتنا من الشباك . "

2022-03-30

الاميره فوزيه عثمان أوغلو

 الاميره فوزيه عثمان أوغلو 👑




اميره عثمانيه إتولدت فى ٦ ديسمبر ١٩٢٨ فى باريس فى فرنسا بعد نفي آل عثمان لأوروبا ؛ وهى حفيده مباشره للسلطان عبد المجيد الاول ؛ 


بعد ٣ سنين من ولادتها مات باباها و عاشت مع والدتها سنين بيواجهوا النفي لوحدهم 


درست فى جامعة السوربون فى فرنسا وتخصصت فى الصحافه ؛ 


جت الاميره مصر مع كتير من أفراد آل عثمان ؛ و عاشت فيها لفتره ؛ و تزوجت من محمد حسين محمود خيري وهو كان أكبر منها ب ٤ سنين ؛ مواليد ١٩٢٤ ؛ وهو ابن الاميره قدريه حسين كامل ؛ 


يعنى أن زوج الاميره فوزيه هو الحفيد المباشر للسلطان حسين كامل .


وبالزواج ؛ بقت اميره مصريه ؛ وكان عندها وقتها ٢١ سنه ؛ و عاشت مع زوجها ٤ سنوات و بس ؛ و الزواج ما انتهاش لا بطلاق و لا بوفاة ؛ الزواج انتهى بمأساه ....




سنة ١٩٥٦ ؛ اتقبض على زوجها بتهمة التآمر على قلب نظام الحكم و إعادة النظام الملكى ؛ ( و دى كانت محاولة بجد بالمناسبه و كان في أطراف كتير فيها وكان هدفها إعادة الملك فاروق للحكم أو تولى النبيل 

عمرو إبراهيم الحكم ) .


من وقت ما اتقبض على زوجها ؛ مشافتوش ....! 

ولا حد شافه ؛ ولا حد كلمه ؛ ولا حد عرف هو فين ؛ ولا حد عرف حصله ايه ؛ ولا حد عرف هو عايش ولا مات ؛ ولو مات ؛ طب مات امتى واندفن فين ... محدش عارف !!!


كانت الاميره فوزيه عندها ٢٥ سنه بس وقتها ؛ و فضلت مستنيه زوجها يرجع فى يوم من الايام ؛ و رفضت تماما أنها تنسي أنه عايش و تتزوج من جديد وتجرب حظها و تگون أسرة و أبناء .... و فضلت طول حياتها مستنياه او مستنيه اى خبر منه وعاشت حياتها على ذكري ٤ سنين عاشتهم مع زوجها .



اضطرت تسيب مصر و ترجع فرنسا ؛ و اشتغلت سنة ١٩٦٢ فى اليونسكو ؛ وفضلت تراعى والدتها وكرست حياتها ليها وبس من غير ما تفكر فى اى ارتباط أو زواج . 


ماتت والدتها فى ٢٠٠١ ؛ و ماتت الاميره فوزيه فى ٧ ابريل ٢٠١٤ ؛ وكان عندها وقتها ٨٥ سنه واندفنت جنب والدتها ؛ فى باريس ....

2022-01-28

الاميره نيلوفر




 الاميره نيلوفر ❤️ 


 اسم نيلوفر ؛ هو اسم تركى فارسي ؛ و معناه نبات أوراقه عطريه ينمو على أجنحة النيل ؛ والمقصود هو نبات اللوتس 🥀


********


إتولدت ٤ يناير ١٩١٦ ؛ فى إسطنبول ؛ وقتها كان لسه آل عثمان فى الحكم ؛ والدتها هى عديله سلطان حفيدة السلطان مراد الخامس و اخت الخليفه عبد المجيد الثاني ووالدها هو صلاح الدين على بك. 


( يعنى الاميره نيلوفر تبقي بنت عمة الاميره در الشهوار ) 


وحكاية الاميره در الشهوار هتلاقوها هنا : 


https://www.facebook.com/1083771090/posts/10220087390670064/


*********

بعد ميلاد الاميره نيلوفر بسنتين بس ؛ توفي والدها سنة ١٩١٨ ؛ ولما بقي عندها ٨ سنين لقت نفسها ماشيه من بلدها اللى إتولدت فيها لمنفي فى نيس فى فرنسا مع والدتها و ده كان سنة ١٩٢٤ .


********


إمارة حيدر اباد فى الهند كانت على علاقة كويسة جدا ب آل عثمان ؛ و نظام خان حاكم الاماره كان دايما بيخاطب السلطان العثمانى ب : Caliph of the Prophet Of God 


ولما سقطت الخلافه و تم نفي افراد الاسره سنة ١٩٢٤ ؛ كان امير حيدر اباد اول شخص يقدم دعم للخليفه وكان بيبعتله شهريا ٣٠٠ جنيه استرلينى . ووقتها كمان عرض على الخليفه أنه يجوز بنته الصغيره الجميله در الشهوار واللى كانت وقتها ١٠ سنين من ابنه عزام جاه ؛ و الخليفه وافق لكن طلب تأجيل الزواج لحد ما الاميره تكبر شويه ؛ يعنى الاميره در الشهوار كانت مخطوبه وهيا عندها ١٠ سنين .


فى ١١ نوفمبر ١٩٣١ ؛ و بعد ٧ سنين من الخطوبه ؛ وصل العريس المنتظر عزام جاه مع اخوه معظم جاه واللى كان كمان هيتجوز من ماهيبيكير بنت أنور باشا .


فى الوقت ده ؛ قرر خال الاميره نيلوفر فؤاد واللى كان متجوز من الاميره كريمه وهى من أسرة محمد على ؛ أن معظم جاه يتجوز من نيلوفر مش من ماهيبيكر ....


و كانت الخطه أنهم يزينوا نيلوفر واللى كانت وقتها ١٥ سنه باجمل فستان متاح مع بعض الرتوش الجماليه من ماكياج و تسريحة شعر ؛ و خلوها تقابل الأمير معظم جاه وهيا فى منتهى السحر والجاذبية و ساعتها ....


" When the prince saw her he was breathless . He immediately forgot about Mahpeyker and said : this is the one i want " 


***********


عرض الأمير الموضوع على الخليفه واللى بدوره اندهش و مبقاش عارف يقول ايه ؛ و بعت الأمير برقيه لوالده فى الهند قاله : 

" There is a much prettier girl here . Can i have her ? "


و رد عليه والده بكل أريحية وقاله : 

" Take her 🤷 "


***********




كانت خطوبة الاميره نيلوفر يوم واحد بس واللى كان ١١ نوفمبر ١٩٣١ ؛ و الجواز كان فى اليوم التالى ١٢ نوفمبر فى فيلا الخليفه عبد المجيد الثاني ؛ ووصل الاتنين أمراء فى عربيتين مرسيدس لونهم اصفر متغطيين بالورود ؛ وكان اودام كل عربيه أبواق للاحتفال . 


الأمراء الاتنين كانوا لابسين بدل بيضاء مع الزى الرسمى الهندى ( القميز ) ؛ مع العمه الهنديه و عقود من الورد . 


طبعا كل أفراد آل عثمان كانوا مبسوطين بالفرح والزينه و الاحتفال ماعدا شخص واحد هيا : ماهيبيكر ؛ واللى كانت فى منتهى البؤس و كانت بتبكى بشكل موجع و مؤثر .


مشاهد من الزفاف : 


https://m.facebook.com/story.php?story_fbid=1885633431681612&id=1458217324423227


*********


الشائعات الهنديه كانت بتقول أن الخليفه عبد المجيد الثاني طلب مهر كبير للاميره در الشهوار و لما نظام خان لقي أن الطلبات عاليه فالخليفه قاله خلاص اختار عروسه كمان لابنك الصغير ....


وكان اتفاق الزواج بين الاتنين أن فى حالة طلاق الاميره در الشهوار أو وفاة زوجها هتاخد ٢٠٠ الف دولار ؛ وكذلك الاميره نيلوفر كانت هتاخد ٧٥ الف دولار .


وبعد زواج الاميرتين كان نظام خان بيبعت للخليفه شهريا ٣١ الف جنيه ؛ وكان بيبعت لوالد الاميره نيلوفر الأمير فؤاد ٢٥ الف جنيه شهريا لحد ١٩٥٢ . 


*********

طبعا بعد كده سافرت نيلوفر مع بنت خالها در الشهوار للهند ؛ ووقتها كان الخليفه عبد المجيد متعلق بيهم جدا و ساعتها طلب من إبنه الأمير عمر فاروق أنه يخلى بناته الاميرات التلاته ييجوا يعيشوا معاه و ساعتها عمر فاروق قاله : 


" I shall send you the little ones . Sir . The little ones can stay with you , but i cannot give you Neslishah , She is mine " 


********




لما سافرت نيلوفر و در الشهوار للهند ؛ بعت الخليفه عبد المجيد الثاني سكرتير خاص سري للهند عشان ينقله اخبارهم  هو حسين نقيب بك ؛ لكن نظام خان قدر أنه يكشفه وفى يوم إنجرح حسين فى كعب رجله و كانت حالته بتسوء يوم عن التانى و مكنش فيه اى علاج فى الهند لحد ما نظام خان قاله : 


" Take this as a warning . You have been poisoned. They will give you the antidote the moment you decide to go back . Only then will you heal . On the other hand . If you decide to stay here you will die " 


طبعا حسين بك مكنش اودامه اى حل غير أنه ياخد الترياق و يرجع للخليفه على نيس و ميرجعش الهند تانى ابدااااا .


*******


بتقول الاميره نيلوفر عن زوجها : 


" My mother was ill . But we didn't have the money for a doctor . The son of nizam of Hyderabad was extremely wealthy . And he could save my mother and me from the situation we were in " 


وبتقول كمان : 


" When i first saw him . He looked at me as if he were inspecting a racehorse . He eyed me from head to toe " 


 و كمان : 


" To escape poverty i married him . I went to Hyderabad with just a small copy of the Qur'an clutched to my chest and then i lived  as if i were living in the middle ages . Hyderabad was like a prison . The Nizam called us ( big ) and ( small ) and also we were forbidden to speak . All we were allowed to reply was : yes father ... Or , no father ,..... I never heard the nizam speak softly , he always screamed at the top of his voice " 


**********


فى يوم قرر نظام خان أن در الشهوار و نيلوفر لازم يركبوا حلق فى الأنف زى التقاليد والعادات الهنديه ؛ و بعتت نيلوفر رساله لوالدتها بتشكيلها فوالدتها ردت عليها انها لو عملت كده هتتبرأ منها . 

و فى يوم اخدهم نظام خان للمكان المخصص لثقب الانف عند سيده هنديه عتيقه ؛ و قالهم يلا ؛ لكن الاتنين رفضوا تماما و فضل يصرخ بأعلى صوته عليهم اودام الموجودين و عرض عليهم يغطيهم بالمجوهرات و يديلهم وزنهم ألماس .... لكن ده مقدرش يغير رأيهم و تمسكوا بالرفض القاطع .


***********


كانت حياة الاميره نيلوفر فى الهند عبارة عن كابوس ؛ عايشه ورا ستاره و حواليها جواسيس بينقلوا كل كلمه او حركه لنظام خان ؛ و كان الخدم بينقلوا كلامها حتى مع زوجها 


*********


وقت الحرب العالمية كانت الحياه في الهند صعبه و بيتنقلوا من قريه لقريه و من مكان لمكان ؛ وفى الوقت اتصابت نيلوفر بالتيفويد ؛ وفى الوقت ده كان العلاج في الهند بيكون عن طريق الوصفات الشعبيه وهنا بتقول الاميره ... 

" They tried to make me swallow crushed pearls . Thank god i didn't take any of that " 


********




بعد سنين من الزواج لم تستطع الاميرة نيلوفر الإنجاب ونتيجة لعدم وجود رعاية طبية جيدة في حيدر أباد اضطرت أنها تسافر لاوروبا للعلاج ، وفى الوقت ده  وصيفتها ماتت اثناء الولادة أيضا نتيجة لعدم وجود رعاية صحية في الهند.


وبسبب كده طلبت الاميرة نيلوفر من حماها أنه يبنى مستشفي متخصصة للنساء والتوليد والأطفال في حيدر أباد وفعلا قدرت تقنعه  وجمعت ٢٥٠ الف جنيه لبناء المستشفي 

والمستشفي بقى اسمها : 


 "مستشفي الاميرة نيلوفر"

 ‏  وكانت بتشرف عليها الاميره بنفسها و بتتابع علاج الحالات الفقيره .

 ‏

ولحد الان المستشفي موجوده فى حيدر اباد وتعتبر من احسن المستشفيات في المنطقه ؛ و كمان لسه اسمها زى ما هو ( مستشفي الاميره نيلوفر ) . 


فيديو عن المستشفى : 


https://www.facebook.com/100001088563140/posts/3002511089795147/


 **********


 كانت الاميرة نيلوفر متمردة علي تقاليد عائلتيها سواء العثمانية أو الهندية بالبقاء في الظل.

فقد كانت تعشق الخروج والاحتفالات مع الطبقة الأرستقراطية للنساء في حيدر أباد.


و أصبحت تعتبر من رموز خروج المرأة للحياة العامة ، وظهرت علي أغلفة الصحف والمجلات التي اعتبرتها واحدة من أجمل عشر أميرات في العالم وقتها، حتي أنه عرض عليها أن تمثل في بعض الأفلام!


الطابع المتحرر لشخصية الاميرة نيلوفر لم يكن يحظي بترحيب من عائلة نظام في حيدراباد ، وخصوصا حماها الذي حاول أن يشجعها علي الانخراط في العمل الخيري كبناء المستشفيات وعلاج الجرحي علي أمل أن تقلل من صخب حياتها الاجتماعية.

لذلك أثناء الحرب العالمية الثانية، بدأت في العمل كممرضة لعلاج الجنود الهنود الذين شاركوا في الحرب .


**********


 وبعد ١٧ عاما من الزواج ومن محاولات علاج الاميره عشان تقدر تنجب ،  تزوج زوجها الامير معظم جاه من سيدة من الطبقة الأرستقراطية في حيدراباد و خلف ثلاث بنات.


قررت الاميره نيلوفر أنها تطلب الطلاق ؛ وكتبت رساله فعلا لرئيس الوزراء الهندى نهرو طلبت منه أنه يتكلم مع نظام خان أنه يوافق على الطلاق . 

نظام خان قال إنه مش هيقدر يقف بين ابنه و زوجته وأنهم لو عاوزين يكملوا يكملوا ولو عاوزين يتطلقوا يتطلقوا .

حاول الزوج أنه يقنع زوجته أنه تغير رأيها و تتراجع عن طلب الطلاق لكن كان قرارها نهائي ؛ وتم الطلاق بس بدون اى مستحقات مالية للاميره و تم وقف النفقه اللى كانت بتتبعت لأسرتها و اتسحبت منها الألقاب اللى اخدتها بالزواج من الأمير . 


في  ١٩٥٢ بعد ٢١ سنه من الزواج ؛ تم الطلاق بين الاميره نيلوفر و الأمير معظم جاه ؛و سابت نيلوفر الهند ورجعت للحياة مع باقي آل عثمان في نيس جنوب فرنسا. 


 وطبعا توقفت مع الطلاق اى نفقة كان بيبعتها لأسرتها .

ووقت الطلاق كان عندها ٣٦ سنه .



********




فى ٢١ فبراير ١٩٦٣ ؛ إتجوزت نيلوفر من إدوارد لويس بوب  فى باريس فى فرنسا ؛ وهو كان رجل اعمال و كاتب سيناريو و منتج . 

وسلمت له كل أوراقها ومستنداتها وصورها الشخصيه لانه كان مخطط يعمل فيلم عن قصة حياتها .


ماتت نيلوفر الجميله فى ١٢ يونيو ١٩٨٩ ؛ و إندفنت فى فرنسا ؛ وبعد وفاتها سافر زوجها ل واشنطن وهناك اتجوز سنة ١٩٩٠ من إيفلين مادوكس بوب . 


إدوارد مات سنة ١٩٩٥ ؛ وبالتالى متعلقات الاميره نيلوفر بقت فى عهدة زوجته إيفلين واللى عملت تكريم لإرث الأميرة نيلوفر من خلال التبرعات والمعارض المتحفية 

من مجموعاتها.




***********


#إيمان_الشرقاوى