English French German Spain Italian Dutch Russian Portuguese Japanese Korean Arabic Chinese Simplified

2021-09-28

أحمد عرابي

 بص معايا هنا ... ⬇️

بتشبه على الصوره دى صح ... ؟ 

ايوا مظبوط فعلا ؛ كانت فى كتاب التاريخ 




لما احمد عرابي باشا دخل قصر عابدين على حصانه ومعاه الجماهير الغفيره ؛ و طلع له الخديوى توفيق وعلى يمينه قنصل فرنسا وعلى شماله قنصل إنجلترا ؛ والخديوى توفيق ساعتها قال : " ما أنتم إلا عبيد إحساننا " 

ف احمد عرابي رد عليه و قاله : " لقد خلقنا الله أحرارا ولم يخلقنا تراثا أو عقارا ؛ ف والله الذى لا اله الا هو إننا لن نورث ولن نستعبد بعد اليوم " 


مظبوط فعلا ده اللى إحنا درسناه ... 

بس للأسف الشديد ... 

لا أحمد عرابي شاف الخديوى توفيق ولا قابله ولا دخل قصر عابدين بالشكل ده ابدا .... ! 


إتفاجئت ؟ 

معلش ؛ هو بيبقي صعب جدا على الإنسان أنه ينسف قناعاته القديمه ...

تعالا نتكلم واحده واحده بالمنطق ....


١- هل معقول أن قنصل فرنسا وقنصل انجلترا يكونوا هما الاتنين موجودين فى نفس الوقت مع الخديوى ؟


٢- هل معقول أن عرابي يدخل قصر عابدين بمنتهى الأريحيه و ابواب القصر تتفتح اودامه كده سداح مداح هو والجماهير الغفيره اللى معاه ؛ من غير ما حد يمنعه ولا حد يقوله انت رايح فين يا أخينا انت والناس اللى معاك ؟ من غير ما حد يكح فى وشه حتى ؟ 


٣- هو عرابي كان بيركب حصان ويمشي بيه فى الشارع عادى كده ؟ وكمان وسط ناس كتير حواليه كده ؟


٤- افترضنا عرابي دخل القصر ومعاه ناس كتير ؛ الخديوى هينزل بنفسه اودامهم ( الخديوى ده عجيب جدا 😃) 


٥- شوف حكمة ربنا يا مؤمن ؛ الخديوى كان عنده ضيف فرنساوى وضيف انجليزى ؛ لقوا الخديوى فى موقف مش لطيف و باينها ثوره ؛ فقالوا لا إحنا لازم نوجب مع الخديوى و منسيبوش لوحده ؛ احنا ننزل نقف جمبه كده كل واحد مننا على جنب ؛ بس متضحكش يا خديوى عشان لما تطلع صورتنا فى كتب التاريخ يقولوا علينا ناس محترمين 😂 . 

( بجد يعنى ؛ هل هيكون فى ثوره داخله القصر و اتنين اجانب هينزلوا اودامهم عادى كده ؟! ) 


٦- مقولة ( لقد خلقنا الله أحرارا ) فى الاصل هى من عمر ل عمرو ؛ من عمر بن الخطاب لعمرو بن العاص ؛ " يا عمرو ؛ متى إستعبدتم الناس وقد ولدتهم أمهاتهم أحرارا ؟! " . 


٧- اصلا بقي ؛ لو كل ده حصل ؛ وأحمد عرابي دخل القصر مع الناس ؛ والخديوى نزل يقابله على رجليه ويقابل الناس ؛ وعرابي قاله الكلمتين إياهم و خرج مع الناس تانى ف دى حاجه تحسب للخديوى وليس ضده ؛ دليل يسر وليس عسر ، معنى كده أن الخديوى توفيق كان راجل مجدع و لا ضرب ولا قتل ولا سجن اى حد من اللى اقتحم عليه القصر ( يا راجل ده الدين بيقول استأذنوا قبل ما تدخلوا اى بيت ؛ فما بالك بيت الحاكم ! ) .




امال الحكايه دى جت منين ؟! 

اقولك أنا ...


عرابي بعد ما كبر فى السن و صحته بقت فى النازل ؛ قرر أنه يكتب مذكراته ؛ بس هو فى أيامه الأخيرة كان مريض جدا و حتى المرض أثر عليه وفقد بصره ؛ و كمان عانى مع مرض السرطان و كان بيدخل فى غيبوبه ؛ فكان بيملى الكلام لواحد يكتبه ؛ الكلام اللى خارج من شخص غير سوى جسديا وكمان كبير في السن ؛ فذكر حادثة مواجهة الخديوى فى مذكراته فقط واللى لو دورت عليها في اى كتاب تانى مش هتلاقي حد يقول انها حصلت ؛ وحتى محمود سامى الباردوى رفيق عرابي لم يذكر ابدا تلك الحادثه بأى شكل من الأشكال ! 

( بالمناسبه كمان ؛ مذكرات احمد عرابي اسمها كشف الستار عن سر الأسرار و إتنشرت سنة ١٩٨٣ ؛ وعرابي مات سنة ١٩١١ ؛ يعنى بعد ٧٢ سنه من كتابتها ؛ اللى هو حاجه أخر ياااااه يا عبد الصمد خالص ! ) .


طب خد الكبيره بقي ....





احمد عرابي رجع من المنفي لمصر ؛ ومات فى ٢١ سبتمبر ١٩١١ ؛ و إندفن فين ياتري ؟ 😃 

مقبرة أسرته فى الشرقيه ؟ .... تؤ تؤ 

ضريح خاص بيه لوحده فى مقبره كان عاملها قبل ما يموت  ؟ ... تؤ تؤ 


إندفن مع مقابر بعض أفراد الاسره العلويه " الشافعى " ! 


ومعروف أن أفراد الأسرة العلويه فى منهم مدفون بالشافعى وفى منهم مدفون في الرفاعى ؛ وفى منهم مدفون فى أماكن متفرقة تانيه .


طب تعالوا كده نشوف مين كان بيحكم مصر سنة ١٩١١ و اللى سمح بدفن عرابي باشا فى مقابر أسرة محمد على ؛ 


اللى كان بيحكم مين بقي ؟ 

- الخديوى عباس حلمي الثاني 


اللى هو يبقي مين بقي ؟ 

- اللى هو يبقي إبن الخديوى توفيق 


ايه ده بجد ؟ 

- اه والله زمبؤلك كده 😃


يعنى معقول تكون الحادثه دى تحصل بجد ؛ و إبن الخديوى توفيق يسمح بدفن عرابي فى مقابر الاسره ؟ 


#إيمان_الشرقاوى 


0 اكتب تعليقك قبل ما تمشي: