الأميرة شهناز بهلوى

 الأميرة شاه ناز بهلوى ❤️ 👑 

فى البداية معنى إسم ( شاه ناز ) : 

اسم علم مؤنث فارسي، 

معناه: ملكة الدلال، مركب من "شاه: ملك، ملكة" و "ناز: الدلال". ويلفظ: شاهيناز، وشَهْناز.

**********

بنظره حول نسبها نجد التالى : 

الأب : شاه إيران محمد رضا بهلوى

الأم : الأميرة فوزيه فؤاد

الجد : شاه إيران رضا بهلوى ؛ الملك فؤاد الأول

الجده : الإمبراطوره تاج الملوك ؛ الملكه نازلى صبري

الخال : الملك فاروق الاول

الخالات : الأميرة فوقيه فؤاد ؛ الأميرة فائزه فؤاد ؛ الأميرة فائقه فؤاد ؛ الأميرة فتحيه فؤاد 

إبن الخال : الملك أحمد فؤاد الثانى

بنات الخال : الأميرات فريال ؛ فوزيه ؛ فاديه فاروق 

العمات : الأميرة همدم السلطنه ؛ الاميره شمس ؛ الأميرة أشرف ؛ الأميرة فاطمه بهلوى 

الأعمام : الأمير على رضا ؛ الأمير غلام رضا ؛ الأمير عبدول رضا ؛ الأمير أحمد رضا ؛ الأمير محمود رضا ؛ الأمير حميد رضا 

الأشقاء : الأمير رضا بهلوى ؛ الأمير على رضا بهلوى ؛ حسين إسماعيل شيرين 

الشقيقات : الأميرة فرحناز بهلوى ؛ الأميرة ليلا بهلوى ؛ ناديه اسماعيل شيرين 

************

طبعا أكيد إتلخبطتوا 😂 ؛ عندكوا حق ..   ما هيا حاجه تلخبط فعلا ! 

تعالوا نحكى الحكايه من أولها : 

يوم 27 اكتوبر 1940 ؛ إتولدت الأميرة شهناز ؛ يعنى من حوالى 80 سنه تقريبا ؛ لما إتولدت لقت أنها بنت الشاه بور ( الأمير وولى عهد إيران ) محمد رضا بهلوى ؛ و لقت أن جدها رضا بهلوى هو شاه إيران و جدتها تاج الملوك هى إمبراطورة إيران .

الأميره مش بس انها أميره فارسيه إتولدت فى طهران في إيران ؛ لا ..... دى كمان لها صلة ب أسرة محمد على فى مصر ؛ لأن والدتها هى الأميرة فوزيه فؤاد بنت الملك فؤاد ابن الخديوى اسماعيل ابن ابراهيم باشا ابن محمد على باشا .

إتولدت شاهناز لقت خالها هو الملك فاروق ملك المملكه المصريه ؛ و جدتها هى الملكه نازلى صبري الملكه الأم فى مصر . 

وبعد حوالى سنه واحده من ميلادها ؛ تم عزل جدها عن الحكم فى إيران ؛ و اصبح والدها هو شاه إيران ووالدتها ملكة إيران و فى نفس الوقت ؛ خالها ملك مصر .....

********

يمكن ك أى فرع من فروع نسل ( ولى العهد ) ؛ كانت الاسره البهلويه تتمنى أن شهناز تكون أمير و ليس أميره عشان حماية تسلسل العرش .... لكن فى الحقيقه ولى العهد هييجى فعلا لكن بعد ميلاد الأميرة شهناز ب 20 سنه بالتمام و الكمال ؛ يعنى سنة 1960 ؛ و ده هنعرفه بالتفصيل فى المقال .

********

مكنش فى الوقت ده طبعا فيه فيسبوك أو تويتر أو واتساب أو حتى إنترنت ؛ كان التواصل فى الفتره دى بالخطابات المكتوبه فقط ؛ فكانت الأميرة فوزيه فؤاد تتواصل مع أسرتها فى مصر عن طريق الخطابات  ؛ وزارت مصر مع بنتها الاميره شهناز ( على حد علمى) مره واحده ؛ وقدرت الأميرة شهناز بهلوى تقابل بنات خالها الملك فاروق و خاصة الاميره فوزيه فاروق واللى كانت فى نفس عمرها

*******

الحياه بين الأميرة فوزيه و زوجها الشاه لم تستمر طويلا ؛ و كان فى كلام عن محاولة تسميم الاميره فوزيه فؤاد ؛ أو أن طباع الزوج تغيرت بعد ما بقي الشاه ؛ و كان فى نميمه عن سيطرة الاميره اشرف بهلوى أو ( تسلطها ) الزائده عن الحد ؛ و كلام عن إصابة الأميرة فوزيه بمرض الملاريا ؛ و كلام عن أن الأميرة لم تتحمل الحياه فى إيران المختلفه تماما عن مصر فى الوقت ده ؛ و كلام عن علاقات الشاه النسائيه ؛ و كلام كتييير ؛ وفى النهايه حصل الطلاق .

 ( و احب هنا انتهز الفرصه و أقول إن الكلام اللى أتذكر فى مسلسل ملكه فى المنفي كلام بلح )

*******

كان من تداعيات الطلاق ؛ أن الأميرة شهناز تفضل فى إيران و تتربي فيها ؛ مع رجوع والدتها الاميره فوزيه إلى مصر ؛ و هتفضل البنت و الأم محرومين من بعض لحوالى 10 سنين ..... مشافوش بعض فيها ولا مره 💔 

**********

تزوج الاب مره اخري من زوجه اخري هى الأميرة ثريا سنة 1951

 واللى هتلاقوا قصتها هنا : 

https://m.facebook.com/story.php?story_fbid=10220102526568452&id=1083771090

و تزوجت الام من زوج آخر هو العقيد إسماعيل شيرين  1949؛ و تخلف منه اتنين هما ناديه و حسين . 

ولمعلومات عنهم بالتفصيل هتلاقوها هنا : 

https://m.facebook.com/story.php?story_fbid=10220143315868159&id=1083771090

https://m.facebook.com/story.php?story_fbid=10220492429235775&id=1083771090

*************

و فى 1952 ؛ وتحديدا وقت ما كان عند الاميره شهناز بهلوى 12 سنه ؛ تقرأ فى الجرائد خبر عزل خالها الملك فاروق من منصبه و نفيه إلى إيطاليا .

**********

نرجع للأميرة شهناز : 

الشاه هيقرر أنها تتعلم فى مدرسه داخليه فى سويسرا ؛ و ده يقال إنه عشان يبعدها عن الاميره فوزيه فؤاد اكتر  ؛ و يقال إن قرار المدرسه الداخليه كانت فكرة الاميره ثريا ( الزوجه الثانيه للشاه ) عشان تبعد شهناز عن القصر ( حركات ستات بقي 🤭) .... وبغض النظر عن السبب ؛ ف يهمنا فقط أننا نعرف ان الاميره فضلت فى سويسرا لفترة طويلة فى طفولتها ...  وعشان كده يمكن هترجعلها لما كبرت .... 

***********

الزوجه الثانيه للشاه ( الاميره ثريا ) مقدرتش تخلف ولى للعهد برغم مرور 7 سنين على الزواج ؛ و يقال إن الشاه حاول أنه يقنع البلاط الملكي أنه يعلن الاميره شهناز بهلوى وليه للعهد ولكن طلبه قوبل بالرفض ؛ و يقال برضه انها كانت مجرد " تلكيكه " من الشاه عشان يكسب وقت يحاول فيه يقنع الاميره ثريا أنها توافق على أن يتزوج بأخرى دون أن يطلقها هى. 

*******

فى سنة 1957 ؛ هيوافق الشاه على زواج بنته شهناز من أردشير زاهيدى ؛ وهتتجوز الاميره وهى عندها 17 سنه ( بالظبط كان نفس عمر والدتها وقت الزواج من والدها ) .

طبعا مش محتاجين أقولكم و أفكركم ؛ ان الاميره فوزيه مقدرتش تحضر فرح بنتها و اتحرمت الاميره شهناز من تواجد والدتها جنبها فى يوم الزفاف .

أما عن الزوج أردشير زاهيدى ؛ ف كان شاب وسيم ؛ سفير إيران في الولايات المتحدة الأمريكية و المملكه المتحده ؛ وهو نفسه ابن الجنرال فضل الله زاهيدى ؛ اللى قدر يرجع شاه إيران محمد رضا بهلوى للحكم بعد إنقلاب عسكري دبره للإطاحه ب محمد مصدق ؛ فى عملية مخابراتية أمريكية إسمها ( أجاكس ) .

لو عاوز تعرف معلومات أكثر عنها ؛ تقدر تقرأ من هنا : 

https://m.facebook.com/story.php?story_fbid=10207303722166341&id=1083771090

https://m.facebook.com/story.php?story_fbid=3865864690118397&id=112522095452694

**********

هتخلف الاميره شهناز بنت هى ( زهره مهناز زاهيدى ) فى 2 ديسمبر 1958 واللى هتاخد لقب أميره بعد كده من جدها الشاه .

وبعد حوالى 7 سنين ؛ بيحصل الطلاق بين الأميرة شهناز و أردشير زاهيدى ؛ الطلاق اللى مكنش الشاه راضي و موافق عليه بسبب حبه لاردشير ؛ و كان فى كلام عن علاقات ل أردشير زاهيدى كانت هى سبب الطلاق . ( من اشهر علاقات زاهيدى هى علاقته بالممثلة الأمريكية إليزابيث تايلور ) .

  ( و الأميرة زهره مهناز لم تتزوج و تعيش حاليا برفقة والدها فى سويسرا )

************

بعد زواج شهناز و أردشير بحوالى عام ونصف ؛ يتزوج والدها للمره الثالثه من الشهبانو فرح بهلوى ( واللى كانت أكبر من شهناز ب سنتين فقط ) 

و اخيرا يخلف الشاه ولى العهد الأمير رضا بهلوى سنة 1960 

والاميره فرحناز سنة 1963 

والأمير على رضا سنة 1966

والاميره ليلا سنة 1970

***********

سنة 1965 ؛ يموت الملك فاروق الاول فى المنفي ؛ ووقتها كانت الاميره شهناز 25 سنه ؛ و كذلك مقدرتش تحضر جنازته .

**********

فى 1959؛ كان اللقاء الأول بين الأميرة شهناز بهلوى و الأميرة فوزيه فؤاد ؛ بعد سنين طويلة من الفراق ؛ هسيبكوا تشوفوا صورة لقائهم فى الصور عشان تحاولوا تتخيلوا اللحظه دى ...  ❤️ 

و من وقتها ؛ فضلت الام و البنت يشوفوا بعض كل سنه ؛ لأن الأميرة فوزيه اشترت بيت فى سويسرا و كانت بتسافر كل سنه لمدة 30 يوم فى فصل الصيف عشان تشوف بنتها ؛ و الاميره شهناز سمت بنتها التانيه على اسم والدتها ( فوزيه ) ؛ و فضلت الاتصالات الهاتفيه ما بينهم طول السنه ؛ و مفيش اى معلومه عندى تؤكد أو تنفي زيارة الاميره شهناز ل والدتها فى مصر ؛ لكن اللى متاكده منه أن الاميره شهناز مقدرتش تحضر جنازة والدتها و ده بسبب ظروف البلد وقتها ؛ لأن الجنازه كانت فى 2 يوليو 2013 .

***********

سنة 1971 ؛ هتتجوز الأميرة شهناز بهلوى من ( خوسرو جاهنبانى ) وهو فنان تصوير ؛ و تم الزواج فى السفاره الايرانيه في باريس ؛ بسبب عدم موافقة الشاه على الزواج ( لأن خوسرو كان يختلف كثيرا فى الطباع و العادات ؛ كما أنه مدخن للحشيش )   ؛ و ساءت العلاقة بين الأميرة شهناز ووالدها بعد إتمام الزيجة ؛ و بعد فتره عادت العلاقات تدريجيا ؛ و ظهرت الأميرة شهناز فى بعض الصور العائليه التى جمعت ٱل بهلوى مع زوجها . ؛ ولكن ظلت علاقتها فى توتر مع والدها ؛ حتى أنها لم تزوره فى مصر فى أثناء مرضه بعد أن استضافه السادات بعد عزله من منصبه عن طريق الثوره الاسلاميه في ايران ؛ بل حتى لم تحضر جنازته ؛ و لم تشاهدها أعين المصورين فى أى ذكري لوفاة الشاه على قبره مثلما نشاهد زوجته الثالثه ( فرح بهلوى ) .

و أنجبت شهناز من زوجها الثانى ؛ فوزيه ؛ كيخوسرو 

فوزيه  1973 .... تزوجت مرتان ولها طفلتان 

كيخوسرو 20 نوفمبر 1971 ... ( بعض المواقع ذكرت أن له طفلين و لكن على الأغلب فى معظم المواقع أنه لم يتزوج و لم ينجب حتى الآن  ) 

و توفى الزوج خوسرو جاهنبانى فى 16 ابريل 2014 ؛ بعد معاناه مع مرض السرطان. 

*********

تزوجت ناديه اسماعيل شيرين ( اخت الاميره شهناز ) من الفنان المصري يوسف شعبان ؛ و ذكر الفنان فى إحدى لقاءاته التليفزيونيه أن زوجته ناديه قد سافرت إلى سويسرا لزيارة شقيقتها الاميره شهناز و حينما عادت وجدها تطلب الطلاق ؛ فى إشارة منه لتحميله الاميره شهناز مسؤولية الطلاق لانه ( فنان ) و هى ابنة شاه إيران ؛ ولا يمكن أن تتزوج شقيقتها من ممثل !.....

ولكنى أرجح ان لا يمكن أن تتزوج الاميره شهناز من فنان و ترفض زيجة شقيقتها من فنان ....

و لا يمكن أن تعترض الاميره ( بعد ) الزيجه و بعد حدوث إنجاب ؛ فالاولى أن يكون الاعتراض قبل الزيجه وليس بعدها 

كما أن بالاصل الاميره شهناز بهلوى تحدت أسرتها وتزوجت ؛ و كانت علاقتها فى توتر مستمر مع والدها ف بأى شكل كان يعنيها مكانة عرش الاب عن طريق زواج شقيقتها ب فنان و هى نفسها قد تزوجت من فنان و دون رضاه ؟ 

أما عن سبب طلاق يوسف شعبان و ناديه اسماعيل شيرين ؛ فقد قرأت فى إحدى المجلات القديمه خبرا يقول إن سبب الطلاق هو رغبة يوسف فى أن تلتحق زوجته بعالم السينما ؛ وهو الأمر الذى قوبل بالرفض من أسرتها 

********

سنة 1975 ؛ بيتم إشهار إفلاس الملكه نازلى صبري ( جدة الأميرة شهناز ) ؛ و بتتباع متعلقاتها و مجوهراتها فى مزاد علنى ؛ و بتحاول الاميره شهناز شراء بعض قطع المجوهرات و إعادتها ل جدتها و منها التاج الملكي . و ساعدت خالتها الأميرة فتحية فؤاد ؛ لكن للاسف مساعدتها ليهم مقدرتش تمنع الفاجعه اللى حصلت لهم ؛ اللى تقدر تعرفها من هنا : 

https://m.facebook.com/story.php?story_fbid=10220055988125020&id=1083771090

*************

فى رأيي الشخصي أن من أسباب علاقتها المتوتره دائما مع والدها : 

1_ فشله فى إحتواء الأميرة فوزيه فؤاد و عدم محاولته لمساعدتها على التأقلم مما أضر بصحتها ونفسيتها

2_ حرمانها من لقاء والدتها لسنوات طويلة

3_ وضعها في مدرسة داخليه فى بلد أوروبيه لا تعرف بها أحد لسنوات .

4_ تزويجها ك مكافاه نتيجه لما فعله فضل الله زاهيدى بزواجها من إبنه  .

5_ عدم تقديم الشاه لأية مساعدات لأسرة محمد على بالرغم من علاقاته الممتازه مع أمريكا و انجلترا. 

6_ عدم مساعدته للملك فاروق بالمنفي ؛ و للاميره فتحيه ب أمريكا ؛ الأمر الذى ترتب عليه وفاتهما فى مشهد بائس ( على الرغم أن الشاه ساعد الملكه فريده و جاب لها شقه ) .

7_ ربما لزواجه الثالث من فتاه في نفس عمرها تقريبا دورا في زيادة التوتر 

***********

بعد الثوره الاسلاميه في ايران ؛ هتقرر الاميره شهناز بهلوى أنها تعيش في سويسرا مع زوجها و أبنائها ؛ و فى الثمانينات هتقرر أنها تتحول من المذهب الشيعى للمذهب السنى و هتسمى نفسها ( عائشه ) و هتقرر إرتداء الحجاب ؛ و هتظهر فى حفل زفاف شقيقها الأمير رضا بهلوى بالحجاب سنة 1986

و هتتبرع بجزء من أموالها للمساجد و الجمعيات الخيرية الإسلامية ؛ وعشان محدش يسأل الاسئله بتاعت كانت عايشه منين وبتصرف ازاى ؛ ف ٱل بهلوى عموما خرجوا ب جزء من مجوهراتهم ؛ و الاميره شهناز كان لها استثمارات فى شركة هوندا و فى بعض الشركات الخاصه بالمنتجات الزراعيه  .

و على حد علمى أن الاميره رجعت مره اخرى لإسمها شهناز و خلعت الحجاب 

*******

الأميرة شهناز قدمت طلب للحصول على الجنسيه المصريه بحكم أن والدتها مصريه و فعلا فى 9 ديسمبر 2013 خدت الأميرة شهناز الجنسيه المصريه ؛ يعنى بعد وفاة والدتها بحوالى 5 شهور .

و لاتزال الاميره تعيش في سويسرا حتى يومنا هذا ....

و ده فيديو من تصميمي عن الأميرة على قناتي باليوتيوب هتلاقوا فيه صور للأميرة فى مراحل عمريه مختلفه  : 

https://youtu.be/hyoOJ9nJxm8

*********

#إيمان

#الشير_مش_بيكهرب

Tweet