مذكرات أميره - نيفين عباس حليم

 إنتهيت مؤخرا من قراء كتاب : Diaries of Egyptian Princess 

" Nevin Abas Halim " 

الحقيقه الكتاب له إطلاله فخمه ؛ بمجرد ما تلمس غلاف الكتاب و هتحس فجأه انك على وشك الدخول الى عالم جميل .

عجبنى جدا صورة النبيله نيفين على الغلاف و عجبنى كمان جدا وجود مونوجرام النبيله على نفس الغلاف .

كنت أتمنى أن صور ضهر الغلاف تكون شعار الملكيه المصريه ؛ أو صورة النبيله نيفين حاليا ؛ بدلا من صورة النبيل عباس حليم .

بداية الكتاب كانت بتعريف النبيله لشجرة عيلتها من الاب و الام و الأجداد ؛ مع وجود صور لأفراد الأسرة . و ذكرت بإستفاضة قصة الحب اللى جمعت بين والدها ووالدتها و ازاى تم الارتباط .

تبدأ تحكى تفاصيل البيت اللى عاشت فيه طفولتها ؛ و توصف الحديقه الجميله للبيت ؛ و ذكرت مواعيد الصحيان و النوم ومعاد الغدا ؛ و كمان قالت أسماء الخدم زى " سامبو " السواق ؛ و فى كمان المربيه بتاعتها هى واخواتها و الطباخ و غيرهم . 

لفت نظري معلومه طرد توحيده هانم يكن للمربيه بعد اكتشافها أنها تابعه للمخابرات البريطانيه ؛ و الحقيقه النبيله نيفين حليم مذكرتش هما إكتشفوا إزاى .

حكت كمان عن أنها هى و أخواتها تم تعليمهم منزليا و سردت مواعيد الحصص و اسماء المدرسين ؛ وقالت انها كانت بتصحى الساعه ٥:٣٠ فجرا عشان تقدر تذاكر و تخلص الواجبات المنزلية الكتيره . 

ذكرت النبيله نيفين أنها ولدت بثقب فى القلب ؛ و بسببه كانت ممنوعه من ممارسه اى رياضه أو مجهود و حتى لما كانت عاوزه تطلع سلالم الفيلا كان بيتم حملها عشان المجهود .

وصفت النبيله نيفين الملك فاروق و الملكه فريده أنهم الثنائي الملكى الأجمل في العالم ؛ و ذكرت أن كان نفسها جدا تبقي من أشبينات الزفاف لكن رغم أنها طلبت وساطة الأميرة فتحيه فؤاد لكن للاسف الشديد مقدرتش تساعدها . 

ارتدت النبيله نيفين فستان قصير بالزفاف لكن الاشبينات كان مخصص لهم فساتين طويله ؛ و النبيله مقدرتش تكمل الزفاف لان تم إرسالها هى واخواتها للبيت بعد بضعة فقرات من الزفاف .

ذكرت النبيله أوليفيا أنها كانت مقربه جدا لجدتها " والدة توحيده هانم " و أن أولڤيا كانت مقربه لوالدها النبيل عباس حليم و شقيقها على كان مقرب لوالدتها توحيده هانم .

حكت النبيله كمان عن الزيجات السابقه لوالدها ووالدتها و حكت كمان عن فترة تدهور علاقتهم و انفصالهم و زواج كل طرف من شخص آخر .

ذكرت النبيله نيفين أن والدها النبيل عباس حليم كان رجل عظيم جدا ؛ وكان محبوب من الجميع ؛ وله صور مع ملوك وأمراء ودبلوماسيين وفلاحين و عمال ؛ كان مهتم جدا بالرياضه و إتسجن فى عهد الملك فؤاد نتيجه لنشره خطاب فى جريدة كان موجهه للملك و بيطلب منه إصلاحات لأحوال العمال .

كمان قالت النبيله عن وقوف والدتها بجانب والدها في محنته و انها فى إحدى الزيارات انقلبت بيها العربيه فى ترعه و نجت بأعجوبة . 

كمان ذكرت النبيله نيفين عن مرض أصاب والدتها استدعى تدخل جراحي فى الفخذ وقت أن كانت ٥ سنين ؛ و كذلك ذكرت عن إصابتها بسرطان فى الرئه واللى إكتشفته لما لقت دم وهى بتكح . 

وصفت الاميره أجواء الملكيه بإستفاضه و إتكلمت عن حفلات الأميرة شيوه كار و عن توتر العلاقات بين الملك فاروق و الملكه فريده بسبب الحفلات ؛ وعن الخطأ اللى إرتكبته الملكه فريده فى التعامل مع الملك فاروق بعد أزمة الحفلات .

عددت النبيله نيفين الأخطاء اللى وقع فيها الملك فاروق بداية من ١٩٤٨ ؛ و خاصة فى الظلم اللى حصل لوالدها النبيل عباس حليم فى قضية الاسلحه الفاسده . 

وصفت النبيله نيفين نمط حياتها هى و النبيله اولفيا ؛ و ذكرت ازاى كان بيتم تصميم فساتينهم و امور تصفيف الشعر و الماكياج .

اتكلمت النبيله كمان عن حياتها الخاصه و خاصة العاطفيه و عن مشاعرها فى الوقت ده .

ذكرت النبيله أنها كانت هى و أوليفيا فى الولايات المتحدة فى اجازه ؛ ووقتها ارسل الملك فاروق رساله شديدة اللهجة لوالدهم النبيل عباس حليم بيهدده أن لو البنات مرجعوش هيسحب منهم القابهم و ده كان فى عز أزمة الملك مع والدته و أخته اللى رفضوا العوده من امريكا . 

طبعا اتكلمت النبيله عن شلة الزهريه وعن جاذبية الأميرة فائزه فؤاد وعن جمال الاميره فوزيه فؤاد ؛ وعن لقاء جمعها بالسلطانه ملك فى الأقصر . 

اتكلمت عن عدم حبها لمصطفى باشا النحاس ؛ وعن ميل الأسرع العلويه لدول المحور فى الحرب العالمية الثانية

اتكلمت عن زفاف الملك فاروق من الملكه ناريمان ؛ و كمان قالت إن والدها حاول ينصح الملك فاروق كتير لكن كان بيخرج من عنده بخيبة أمل كبيرة . 

اتكلمت كمان عن سجن والدها بعد الثوره ؛ و ذكرت بمنتهى الاريحيه أن الملك فاروق تم قتله ؛ و ذكرت بالنص أن وفاة احمد حسنين باشا كانت وفاة تحوم حولها الشبهات . 

إتكلمت طبعا عن التأميم ؛ و ذكرت أن متحف المجوهرات لا يحتوى على جميع مجوهرات الاسره العلويه ؛ فالمجوهرات كانت أكثر من كده بكتير ؛ و طبعا قالت إن فى قطع " مقلده " على حسب كلامها . 

اتكلمت عن قصة زواجها و زواج أخواتها و قصة إنفصالهم ؛ وكمان إتكلمت عن حضورها جنازة الملك فاروق ؛ و أنه تم دفنه فى مقابر آل شيرين و بعد كده تم نقله إلى مقابر الرفاعى حسب وصيته . 

ذكرت أنها كانت بتكتب مذكراتها من زمان جدا ؛ ووالدتها كمان كانت بتكتب مذكراتها ؛ لكن والدها النبيل عباس حليم ملقوش اى مذكرات تخصه ؛ لكن لقوا بعض قصاصات أوراق كان كاتب فيها بعض خواطره . 

ذكرت تمسك الخدم بتواجدهم عندهم بعد انتهاء الملكيه وقالولهم مش عاوزين مرتب ؛ و كمان إضطرتهم الظروف أنهم يستلفوا فلوس من إبن سامبو ( السواق ) . 

و ذكرت كمان أن فى ناس كانت ( بتلعق ) حذاء والدها في الملكيه ؛ و بعد الملكيه بقوا لو شافوه فى الشارع يودوا وشهم الناحيه التانيه . 

فى رأيي أن الكتاب عظيم جدا ؛ أنا شخصيا أديله ٩ من ١٠ ؛ كنت أتمنى أن الكتاب يكون صادر باللغه العربيه ؛ وكمان كنت أتمنى صور ومعلومات أكثر عما حدث للاسره بعد الثوره .

مثلا ....

 هل فضلت على تواصل مع الاميره فائزه فؤاد بعد ما استقرت بأمريكا ؟ هل زارتها هناك ؟ ( ذكرت فقط أن الاميره لم تتزوج و توفيت بالسرطان عام ١٩٩٣ ) 

مثلا ...   

هل زارت الاميره فوزيه فى فيلا سموحه ؟ هل كانت بتتواصل مع الملكه فريده أو الاميره فائقه ؟ 

مثلا ....

ليه اخدت هى و أوليفيا قرار السفر الى الخارج ؛ رغم أنهم عاشوا في مصر سنين طويله جدا من بعد الثوره ؟

مثلا ....

قصة زواج النبيله أوليفيا ؛ و كيف تعرفت على زوجها الثانى ؟ 

مثلا .....

طقوس حياتها حاليا و روتينها اليومى ..

لكن فى المجمل يظل الكتاب عظيم في محتواه ؛ وطبعا فى تفاصيل كتير مش هقدر أذكرها على النت ؛ لكنى أنصح بقراءة الكتاب بشده لكل المهتمين بالتاريخ .

Tweet