اللحن الأخير

 اللحن الأخير💔🎤.

فنانين الزمن الجميل كانوا مخلصين جدا لفنهم ؛ وكانوا بيتقمصوا الشخصيات اللى بيمثلوها جدا او بيعيشوا الاغنيه اللى بيغنوها بروحهم وكل مشاعرهم .

ولكل فنان عمل فنى محدد فى حياته ؛ غالبا كان أخر تواصل بينه وبين جمهوره ؛ و العجيب بقي أن بيكون جواه حكمه بنفهمها بعدين ...

يعنى إيه الكلام ده ؟! .... تعالوا نشوف : 😊 

*******

أم كلثوم 

فضلت طول حياتها تغنى للحب ؛ حب الحبيب ؛ حب الوطن ؛ حب الحاكم .... وهكذا 

سنين طويله ؛ كان الخميس الاول من كل شهر هو الخميس المنتظر من المحيط للخليج ؛ وكانت آخر اغنية ( جديده ) لام كلثوم هى " حكم علينا الهوى " 

وآه يا ليلي آه ع الوعد والمقسوم

يا ليل يا عيني آه ع الوعد والمقسوم

لا تحوشه لا ولا آه ما بين عيون و قلوب

حكم علينا الهوى نعشق سوا وندوب

صدق اللى قال الهوى فوق الجبين مكتوب

و وقفت الحفلات و ماتت ام كلثوم بس قبل ما تموت كانت أغنيتها فى حفلتها الاخيره واللى تعبت وهى بتغنيها وكانت هى آخر اغنية تغنيها على المسرح وكانت بتقول فيها أن اللى بيصدقوا فى حبهم قليلين اوى ؛ ولو الحب عاش فبيكون يوم او يومين ؛ لكن الحب الحقيقي هو اللى مفيش فيه عتاب أو لوم ؛ الحب هو للى دايم وصاله .... " الحب الإلهي " وكأنها بتقول كل اللى غنيته كوم والأغنية دى كوم تانى لوحدها !

القلب يعشق كل جميل وياما شفتِ جمال يا عين

واللي صدق في الحب قليل وإن دام يدوم يوم ولا يومين

واللي هويته اليوم دايم وصاله دوم

لا يعاتب اللي يتوب ولا بطبعه اللوم

واحد مافيش غيره ملا الوجود نوره

دعاني لبيته لحد باب بيته

ولما تجلى لي بالدمع ناجيته

******

عبد الحليم حافظ 

العندليب الاسمر ؛ ذلك الشاب القروى النحيف الذى أسر قلوب فتيات الوطن العربي ؛ كان هو يغنى للحب ومن اجل الحب ؛ صار هو معشوق الفتيات وتتمنى كل فتاه أن تكون هى حبيبة العندليب ؛ ولكنه كان على المستوى الشخصي عايش قصة حب حزينه مع ذات العيون الزرقاء التى غنى من أجلها اغنية ( فى يوم فى شهر فى سنه ) والتى خطفها الموت فى ريعان الشباب ؛ و ايضا تردد بعد ذلك عن قصة حبه و زواجه وطلاقه من السندريلا سعاد حسني ؛ فكان يغنى للحب و يلهم العشاق ... وهو نفسه محروم من سعادة العشق ؛ فجاءت اخر أغانيه لتخبرنا أن الحب عليه هو المكتوب ؛ وأنه سيبحث عن حبيبته المجهوله فى عدة بلدان وسوف يعود مهزوما بعد رحيل العمر ... ! ( ومن المعروف أن العندليب توفي فى لندن وعاد بعدها إلى مصر بعد فشل التدخل الجراحى )

جلسَت والخوف بعينيها تتأمل فنجاني المقلوب

قالت يا ولدي لا تحزن فالحب عليك هو المكتوب

يا ولدي قد مات شهيداً من مات فداءاً للمحبوب

ستفتِّش عنها يا ولدي في كل مكان

وستَسأل عنها موج البحر وتسأل فيروز الشطآن

وتجوب بحاراً وبحاراً، وتفيض دموعك أنهاراً

وسيكبر حزنك حتى يصبح أشجاراً أشجارا

وسترجع يوماً يا ولدي مهزوماً مكسور الوجدان

وستعرف بعد رحيل العمر بأنك كنت تطارد خيط دخان

فحبيبةُ قلبك ليس لها أرض أو وطن أو عنوان

ما أصعب أن تهوى امرأةً يا ولدي ليس لها عنوان

**********

شاديه 

لما إتسألت ام كلثوم مين الصوت اللى بيطربك فى النساء قالت فورا : " شاديه "

صوت جميل نقى ؛ كانت محبوبه الكل ؛ مين اللى ميحبش شاديه ؟! 

وقفت شاديه فى حفل الليله المحمديه ( ليلة المولد الشريف ) سنة ١٩٨٦ تغنى اغنيه تناجى فيها الرسول الكريم وتطلب منه مساعدتها و أن يأخذ بيدها ؛وبعد إسدال الستار انفجرت شادية في البكاء، وبعد الحفله بأيام تعلن شاديه إعتزالها وهى فى قمة نجاحها و تألقها ؛ و مش بس كده ؛ بعد 31 عامًا من غناء تلك الأغنية ذهبت شادية للقاء الله فعلا وماتت فى ليلة المولد الشريف .

جه حبيبي وخد بأيدي...قلت له أمرك ياسيدي

جه وعرفني طريقي وسكتي...وفهداه وفنوره مشيت خطوتي

وفحماه هلت بشاير فرحتي...والآمان فرد الجناح على دنيتي...

قلت ياشموع الفرح حواليه قيدي...جه حبيبي وخد بأيدي...

قلت له أمرك ياسيدي...أمرك ياسيدي

وآدي حالي وحال جميع المؤمنين..

.اللي آمنوا بالنبي الهادي الآمين

اللي جه رحمه لكل العالمين.

..يانبينا ياختام المرسلين

خد بأيدي...خد بأيدي...خد بأيدي...

***********

أسمهان 

صوت كريستالى جميل ؛ وحياه مليانه تفاصيل ؛ معروف عنها انها تورطت بالعمل كجاسوسه و ده اللى خلى المخابرات الانجليزيه تخطط لإغتيالها بطريقتهم المشهوره في الوقت ده ( حادث عربيه ) . وبتموت اسمهان فى الماء زى ما إتولدت بالماء وهى بتصور فيلم مع يوسف وهبي و انور وجدى ؛ واللى لو لقينا إسم لقصة حياتها مش هنلاقي افضل من " غرام و انتقام " .... و كانت اخر اغنيه ليها بالفيلم وهى بتقول انها تستاهل اللى يجرالها 

الفرحه اهي باتت في قلب عزالى

انا اللي استاهل كل اللي يجرى لي

الغالي بعته رخيص ولا احسبوش غالي

********

مديحه كامل 

فى ١٩٨٧ ؛ كان آخر مسلسل ( مصري ) تقدمه مديحه كامل على الشاشه الصغيره هو مسلسل البشاير واللى بيحكى عن فنانه مشهوره عاوزه تنفصل عن حياة الاضواء و الشهره و ترجع تعيش حياه بسيطه ؛ و بعد سنوات معدوده بتعتزل مديحه كامل الفن ؛ وفى الحلقه الرابعه من مسلسل البشاير دار الحوار ده بينها وبين أحمد راتب : 

- أنا كنت فاكرك غير كده خالص .

- ‏الناس فاكرينى ملفوفه فى ورق سوليفان زى الورد الصناعى ؛ شكله جميل لكن مفيهوش حياه ؛ مفيهوش ريحه حلوه . نفسي ارجع اعيش تانى حياتى البسيطه اللى كنت عايشاها قبل كده .

- يعنى إنتى مش مبسوطه من حياة النجوميه والفخفخه والشهره ؟

- ‏كل دول ميسوش اى حاجة جمب راحة البال ؛ وراحة البال عمرها ما هتيجى الا إذا كان عندك حلم عاوز تحلمه وهدف نفسك تحققه .

- ايوا بس انتى نجمة النجوم ؟!

- ‏يا عبيط ؛ أنا ست ؛ عارف يعنى ايه ست ؛ إتولدت ست وهعيش ست وهموت ست ؛ النجوميه جت فجأه ومن غير معاد وممكن كمان تروح فجأة ومن غير معاد ...

**********

عمر خورشيد

ذكرت أسرة عمر خورشيد أنه كان يساند إحدى الفنانات نتيجة تعرضها لمضايقات من أحد المسؤولين ؛ وكان فيلمه الأخير " العرافه " يتحدث عن طالبة جامعية تتعرض للاعتقال بسبب أنشطتها السياسية ، وخلال حبسها تتعرف على عمر خورشيد اللى بيساندها حتى النهايه ؛ و ده بيكون فيلم عمر خورشيد الاخير .

********

سمير غانم و دلال عبد العزيز 

سمير غانم كان متعود دايما يطل علينا فى شهر رمضان ؛ وكانت آخر إطلالة ليه فى رمضان اللى فات فى احد الاعلانات و كأنه بيودعنا .

أما عن دلال ؛ فكانت جملتها الوداعيه "أشوفك بخير يا حبيبي» فى المشهد الأخير في مسلسل «ملوك الجدعنة» واللى كان برضه فى رمضان اللى فات .

********

صباح 

ظهورها السينمائي الاخير كان فى فيلم ( ليله بكى فيها القمر ) ؛ واللى غنت فيه اكتر اغنيه بتوصف قصة حياتها وهى بتقول : 

ساعات ساعات

احب عمري ...واعشق الحياة

احب كل الناس .. واتملي احساس

واحس جوايا بميت نغم .. ميت نغم يملي السكات

ساعات ساعات

احس اد ايه وحيده .. 

واد ايه الكلمه فى لساني مهيش جديده

واد ايه منيش سعيده .. وان النجوم .. النجوم بعيده

وتقيله خطوه الزمن .. تقيله دقة الساعات

********

الضيف أحمد 

أثناء التحضير لمسرحية ( الراجل اللى جوز مراته ) مع سمير غانم وجورج سيدهم، وكان أحد الأدوار التي يمثلها في المسرحية دور شخص متوفى، وبعد ساعات قليلة من إجراء إحدي البروفات الأخيرة للمسرحية عاد إلي منزله‏ وبدا الإرهاق جليًا علي وجهه، ثم بدأت نوبات من الاختناق تحاصره، وشعر بآلام حادة في الصدر، ونقله الجيران إلى مستشفي العجوزة، حيث فارق الحياه قبل أن يصل للمستشفى، حيث رحل في ١٦ أبريل عام ١٩٧٠ عن عمر يناهز الـ٣٤ عاما.

***********

نجيب الريحاني 

كان ساكن في نفس العمارة اللى ساكنة فيها ليلي مراد ( عمارة الإيموبيليا ) ؛ وفى مره قابلها على السلم وقالها : أنا نفسي أمثل معاكى فيلم قبل ما اموت ...

ليلي مراد قالت له ده شرف كبير ليا يا استاذ ؛ ومكدبتش خبر ؛ راحت حكت لأنور وجدى واللى بدوره كتب الفيلم فى وقت قياسي ؛ وجمع فيه كوكبة من النجوم زى محمد عبد الوهاب و يوسف بك وهبي و محمود المليجى وفريد شوقي وسليمان بك نجيب وعبد الوارث عسر وغيرهم ؛ 

فى أحد مشاهد الفيلم ؛ وتحديدا على أنغام أغنية محمد عبد الوهاب ؛ رفض نجيب الريحاني أنه يستخدم مسيلات الدموع و طلب من انور وجدى أن الدموع تكون طبيعيه ؛ وفعلا فضل يسترجع ذكرياته و آلامه و كانت النتيجه الدموع الصادقه .

فى مشهد آخر ؛ بيقول استاذ حمام للتلميذه ليلي : ( حتى الموت دلوقتى ميخوفنيش ) 

وفى مشهد تانى بيقول : ( حاسس بمصيبه جيالى ؛ مصيبه مكنتش على بالى ) 

وفى اخر مشاهد الفيلم ؛ بتنزل صورته مع التركيز على ملامحه على نغمات ( و هأعيش على ذكراه ). 

وبيموت فعلا نجيب الريحاني قبل عرض الفيلم في السينمات .

يمكن دى كلها صدف ... ويمكن عبره ؛ ويمكن لو المقال عجبك تعمله شير 🙂

#إيمان

#

Tweet