السلطان سليمان القانوني

 فى يوم من الأيام كان السلطان سليمان القانوني بيتمشي فى حديقة قصر الباب العالي ( TopKapı ) ؛ و لفت نظره سرب من النمل بيهاجم شجرة من شجر القصر ؛ سأل البستاني عن النمل ده وقاله أن العلاج هيكون ب ري الشجرة بعلاج معين لكن ده هيتسبب في موت النمل ...

فما كان من السلطان سليمان إلا أنه بعت يسأل عن فتوى لق.تل النمل من أجل إنقاذ الشجرة من شيخ الإسلام ؛ واللى هيرد عليه ويقوله أنه لو ق.تل النمل فالنمل هييجي يوم القيامة يطلب حقه من سليمان .

فقرر سليمان أنه يسيب النمل براحته على الشجرة لكن الشجرة بتتعرض للأذى والنمل بيخليها مجوفة تماما ...

الشجرة بالمناسبة موجودة لحد دلوقتى فى حديقة القصر ومتحاوطه بسياج ومكتوب قصتها ولها رقم كودي ممكن تسمع قصتها باللغه اللى تختارها عن طريق جهاز ممكن تستلمه فى رحلتك جوه القصر ؛ بتختار الرقم و اللغه وتسمع القصة صوتيا ( توماتيكي توماتيكي من غير مرشد سياحي) 

المؤسف أن نفس الشخص اللى قلبه كان حنين على سرب من النمل ؛ ق.تل اتنين من أولاده هما الأمير مصطفى والأمير بيازيد ؛ وكمان قتل أحفاده الذكور منهم عشان ميكبروش ينتقموا منه؛ فالامير مصطفى مثلا كان مخلف أميرين هما محمد ٧ سنين و أحمد وكان عمره شهور؛ بيازيد كان مخلف ٧ أمراء فى اعمار متفاوته؛ أكبرهم كان ١٨ سنه واصغرهم كان عمره شهور تم قت.لهم جميعا ؛

 وكمان السلطان سليمان ق.تل صديق عمره ابراهيم باشا و زوج أخته الأميرة خديجه ؛ لا وكمان ق.تل فرحات باشا زوج أخته الأميرة بيهان و احمد باشا زوج أخته الاميره فاطمه لدرجة أن الناس كانت بتخاف تطلب ايد اخواته البنات...

وبيقال كمان أنه ق.تل جولفم ( ألفت) واللى كانت والدة إبنه الأمير مراد .

Tweet