الملك فاروق الذي غدر به الجميع

 ريفيو كتاب عادل ثابت : 🥳

مبدئيا الكتاب ده من اجمل كتب التاريخ اللى ممكن تقرأها ؛ واحلى حاجه فيه أنه حيادى و قايل عيوب ومميزات الفتره دى بكل صراحه ؛ الكتاب صدر منه نسخه عربي و انجليزي ؛ و الريفيو ده هيكون مشكل جد على هزار 🤚💁

*********

١- لان عادل ثابت من أقارب الملكه نازلى ؛ فاتكلم شويه عن نازلى وعن صلة قرابته بيها وعن جده ؛ واكتر جمله عجبتنى فى الكتاب عن نازلى هيا دى : 👇

" Queen Nazli is rather like the Swan Queen in your grey fairy book .." 

**********

٢- عادل ثابت بيقول أن المكتب الملكى كان مجهز بباب سحري على الكرسي الضيف المواجه لكرسي الملك فاروق ؛ وفى زرار على المكتب اودام الملك ؛ ولما يزهق الملك من المقابله أو ميعجبوش الضيف كان يضغط على الزرار و الضيف يلاقي نفسه فجأه فى البدروم ! 

*******

٣- كمان قال إن الملك كان دايما بيعمل مواقف مضحكه وتريقه على الباشاوات اللى معاه ؛ لدرجه انه فى يوم كان الملك عازم رئيس الوزراء مع الوزراء ورجال الدوله ؛ قام الملك نشن على طرابيشهم بالطماطم والخيار ؛ وفضل يحدف عليهم واحد واحد ؛ وكل واحد بقي بيدور على طربوشه من طربوش التانى .

**********

٤- عادل ثابت بيقول أن الشيخ شندى كان بيديله دروس فى الدين من وهو صغير ؛ ساعه الظهر كل يوم خميس ؛ وده كان بعد معاد الغدا بالنسبه لهم في الوقت ده ؛ فكان الشيخ يوزع عليهم حلويات فى بداية الحصه وبعد كده يطلب منهم يرددوا وراه ؛ وان احيانا كان الشيخ بينام فى الحصه من التعب معاهم .

***********

٥- بيقول عادل ثابت عن الأمير محمد على توفيق :

" كان رجلا قصيرا هشا ؛ يتباهى بلحيه انيقه على غرار فان ديك ومن الممكن أن يظنه من يراه أنه نسخه من مسرحية تشارلز الاول ؛ وكان يضع على رأسه طربوشا ؛ ويرتدى رباط رقبه عريضا ؛ وسترة صباح سوداء وبنطلونا اسود مخططا وحذاء اسود اللون مدببا ومصقولا بينما تبدو بعض مظاهر الحزن عليه ."

***********

٦- بيقول أن الملك فاروق مكنش عجبه تحكمات عزيز المصري وصرامته معاه وقت دراسته في انجلترا ؛ وقاله ( أنا مابعدتش عن مسز نايلور وجيت انجلترا عشان الاقي مربيه زيها هنا ) ... طبعا بعدها عزيز المصري قدم استقالته وبعت جواب للملك فؤاد بيشرحله فيها اللى حصل. 

*********

٧- من اجمل الجمل اللى قريتها فى الكتاب عن تربية الأمراء ؛ هيا الجمله اللى قالها والد عادل ثابت له فى يوم من الايام ( والده كان رئيس البروتوكول فى وزارة الخارجية) وهيا :

" عليك أن تتأنق يوميا فى ملبسك وتضع طربوشا على رأسك ؛ وترتدى سترة صباح وبنطلونا مخططا وحذاءا نظيفا "

***********

٨- بيحكى عن اول مره يشوف فيها الاميرات فوزيه و فايزه و فائقه وفتحيه ويلعب معاهم وقال بالحرف : 

" اربع فتيات جميلات كالعرائس ؛ لو أن بعض السحره قد القوا بنا فجاه فوق أحد الجزر الرمليه لأفروديت واقترب منا سكانها الأصليين لكان الأثر الذى نشعر به مماثلا لما حدث لنا على الأرجح ؛ كان الاميرات ينتمين إلى عالم آخر ؛ نماذج للبراءه ؛ تحوطهن حمايه مفرطه وكأنهن ملفوفات فى السلوفان ؛ كالهدايا المغلفه ؛ بنات صغيرات من نوع قل أن يوجد في اى مكان خارج أغطية علب الشوكلاتة " 

************

٩- بيرجع تانى عادل ثابت للملك فاروق ويقول عن طفولته مع مسز نايلور المربيه وأنه مكنش بيحبها بسبب صرامتها الشديده ؛ وكان كهربائي القصر بوللى عمل نسخه من المفاتيح لفاروق ؛ وكان أول ما مسز نايلور تنام كان بيتسلل بره اوضته واحيانا كتير كان يخرج بره القصر ويسهر ؛ وكان اى حاجه بتمنعها عنه مسز نايلور زى الحلويات مثلا كان بيجيبها للملك بولى أو جارو الحلاق أو جافتسى حارس الكلاب أو حلمى السواق 

و كل دول لما فاروق بقي الملك بقوا هما الحاشيه الفاسده إياها اللى طوب الارض مكنش طايقهم .

***********

١٠- فى جمل قالها عادل ثابت كانت واقعيه جداااا جداااا زى مثلا : 

( قد كان فاروق وحيدا ؛ تلك هى مأساته حقا ؛ كان يخاف كثيرا ؛ ويخجل للغايه ؛ وقد ظل ملكا وحيدا حتى النهايه ) 

( كان فاروق خيبة أمل كبري ) 

( لقد بدأت الثوره بعد أن ضغط فاروق الزناد بسوء معالجته للأزمه ) 

***********

١١- بيقول أن لما النبيل عباس حليم اتسجن فى عهد الملك فؤاد ؛ احتلت زوجته توحيده هانم قهوه مواجهه لشباك زنزانة زوجها ؛ وركبت مكبر للصوت وبقت تشغل عليه الحان كول بورتر و ايرفنج برلين و ايفور نوفيلو ...

( أنا شفت المشهد ده فين قبل كده ؟! فكروا كده قبل ما تبصوا على التعليقات 😂🤚)

***********

١٢- بيقول على توتر العلاقه بين الملكه فريده ونازلى ؛ وحكى أن غرفة الطعام للملكه نازلى كانت تحت جناح الملكه فريده بالظبط ؛ وكان أول ما الملكه نازلى تدخل الاوضه كانت الملكه فريده تدى أوامرها للموجودين معاها فى الاوضه أنهم يتنططوا ويدبدبوا برجليهم ويرقصوا كمان 💁🥳.

***********

١٣- " أننى أعرف أين دفن الاسكندر الاكبر ؛ ولكننى لن أخبر أحدا عنه وخاصة مصلحة الآثار وسوف يموت هذا السر معى "

دى جمله قالها هيوارد كارتر لعادل ثابت فى يوم من الايام ؛ والحقيقه أنا معرفش ازاى عادل ثابت عدى الموضوع ومقدرش يراضى كارتر بساندوتش برجر بيج ماك فى مقابل أنه يقولنا الاسكندر الاكبر مدفون فين 😂 

***********

١٤- بيقول عادل ثابت عن الشاه محمد رضا بهلوى لما شافه فى حفل زفافه على الاميره فوزيه : 

" كان شابا نحيلا نحيف القوام ؛ له وجه طويل جاد ؛ وما يبدو أن له ميل فطري كى يقطب جبينه لكل شىء ؛ كان يرتدى بدله عسكريه ايرانيه ذات رقبه عاليه لونها بغيض ؛ و قد قيل لنا أن الأمراء الإيرانيين لديهم تعليمات بأن يقطبوا فى وجه الجميع ؛ ولكن تحولت هذه الوجوه إلى نوبات من الضحك فيما بعد بسبب روح الملك فاروق المرحه " .

**********

١٥- حكى عادل ثابت عن حفل زفاف الملك فاروق والملكه فريده وعن الفنانين اللى أحيوا الحفل واتكلم تحديدا عن اتنين ؛ أم كلثوم و تحيه كاريوكا وقال : 

" Om kalsoum sang songs for the occasion. Her voice comes a cross ; remarkable in strain ; vibrating ; intensely emotional." 

" Another star of the show making her debut was Tahia Carioca ; the dancer . She was a cross between Hedy lamarr and Elizabeth Taylor with her creamy white skin and a splendid mass of silky black hair . Her figure belonged to dreams and she won the hearts of her audience . 

" These two ladies; officiates at the royal wedding; become legendary in the recent history of Egypt. Their fame ; it is certain; will live on long after the political and national events that shook Egypt in their lifetimes have pretty well faded from memory "

**********

١٦- واخيرا ؛ بيحكى عادل ثابت أن يوم رحيل الملك فاروق عن مصر ؛ كان السفير الأمريكى كافري مع الظابط أنور السادات و سأله : 

- حسنا يا قائممقام ؛ هل ستبرمون صلحا مع اsرائيل الآن ؟ 

رد السادات وقاله : 

- سوف نفعل ذلك بمجرد تطهير الفساد 

# وقد فعلها السادات بالفعل بعد حوالى ٢٥ سنه !!!

**********

إلى اللقاء فى ريفيوهات قادمه ؛ ومتنسوش تاخدوا لفة فى التعليقات 🤞😃

#إيمان_الشرقاوى

Tweet