مذكرات النبيله نيفين حليم

 ريفيو كتاب مذكرات أميره مصريه 💁🥳: 

و اخيرااااا

وبعد طول انتظاااااار 

الريڤيو اللى طلبتوه 🤞

( مذكرات أميره مصريه - النبيله نيفين عباس حليم ) 

**********

تنويه ؛ هذا الريڤيو هزلى و ساخر 🤚

*******

١- من المعلومات الحلوه اللى فى الكتاب أن توحيده هانم والدة النبيله اتسمت على اسم جدتها الاميره توحيده اسماعيل ؛ و أن سواء الاميره توحيده اسماعيل و بنتها وحيده هانم ماتوا فى عز شبابهم ؛ وبالمناسبة زوج الاميره توحيده اسماعيل ؛ يحيي منصور باشا يكن بعد وفاتها حبس نفسه فى اوضتها ٧ سنين مبيشوفش حد ولا بيكلم حد بعدها ... لحد ما مات هو كمان من حزنه عليه ؛ و ده نموذج للذكر الشرقي المنقرض ملناش دعوه بيه 💁

٢- قالت النبيله عن باباها النبيل عباس حليم ( he could charm a Snake on a tree ) .... والحقيقه ان ده اجمل وصف ممكن يتقال عن عباس حليم ؛ وهتلاقوا صورته فى التعليقات بس اوعى السحر يعضك 😀

٣- بتقول أنها من وهيا صغيره كانت بتبوس ايد عماتها و جدتها ؛ ولما جدها قالها تبوس أيده رفضت وقالت أنا معنديش اى نيه انى ابوس ايد اى راجل طول حياتى .( استرونج اندبنت برينسس 💁 ) 

٤- فى حفل زفاف النبيله علويه على شهريار راتب جالهم خبر وفاة ملك المملكه المتحده الملك جورج السادس ؛ و جالهم تعليمات بمنع الموسيقي والرقص فى الفرح ؛ والحقيقه أنا عندى شغف وفضول اعرف حفل الزفاف استمر ازاى بعد منع الموسيقي والرقص ؛ و جس واات الجوازه انتهت بالطلاق ومن غير إنجاب ؛ و ده يعلمنا ايه ؟! أن الجوازه السوده بتبان من اولها 😂 ف متستهونوش بالعلامات 🤚

٥- بتقول أن زوجها صلاح عرابي كان بيلعب تنس حلو اوى وأنه He was a good tennis player and sometimes sent me some balls that nearly killed me ! 

من الحب ما قتل 💁😏

٦- النبيله نيفين بتقول أن اجمل حاجه عملهالها زوجها صلاح عرابي هو أنه خلاها تخس ١٠ كيلو بسبب الطريقه اللى كان بيعمل بيها اللحمه و السلطه ؛ الجوازه مكملتش و اتطلقوا لكن خرجت خاسه ١٠ كيلو وده المهم 👍 ؛ الرجاله بتروح وتيجى لكن الدايت مبيجيش اساسا 😂 

طبعا ده بغض النظر أن ( هو ) اللى كان بيعمل اللحمه والسلطه ؛ مش ( هيا ) ... وده موضوع تانى لوحده ملناش دعوه بيه 😂

٧- قالت إن المصادره اخدت منهم كل حاجه ؛ لدرجة أنهم استلفوا فلوس من ابن السواق بتاعهم ومكنش معاهم يدفعوا للخدم مرتباتهم ؛ و فى نفس الوقت قالت إنها سنة ١٩٦١ ؛ باعت خاتم عشان تدبر فلوس عملية القلب اللى هتعملها ؛ طب منين كل حاجه اتصادرت و كنتوا بتستلفوا ومنين كان معاكى خاتم بعد ٩ سنين من المصادرة ! ؛ هل حصل مثلا وقدرت تحتفظ بجزء من المجوهرات ؟ طب هل الخاتم ده كان هديه مثلا ؟ .. Error 🤔

٨- بصراحه اكتر حاجه وقفت عندها فى الكتاب هيا الصراحه المتناهية ... صراحه أوڤر دوز .... أه وربنا زمبؤلك كده ؛

 أنا فى حاجات أتصدمت حرفيا وانا بقراها و تنحت وهبطت و دماغى لفت و خبطت كف على كف وبقيت مش عارفه هيا ليه النبيله ذكرت حاجات زى كده ....

مثلا ... 💁

• ذكرت إسم شخص ( ما ) من أفراد أسرتها إنه كان" .... " والحقيقه أنا استغربت جدا ايه فائده ذكر معلومه زى دى ؛ وهيا نفسها قالت إنها مشافتش ما يثبت ... يبقي ايه لازمتها المعلومه الخطيره دى ؟! 🤔 

• قالت إن الملك كان معجب بأختها علويه ؛ وأنه فى سهره من السهرات كان بيستغل اى وقت النبيل عباس حليم ينشغل فيه ويعاكسها و ذكرت تفاصيل مش هقدر احكيها ( والنبي ليها حق فريده تخلع 😏 ) 

• من الحاجات اللى استغربتها جدا ؛ أن النبيله نيفين فى فرح الملك على فريده كانت طفله صغيره ومكملتش الفرح كله ومع ذلك ذكرت انها شافت أن الملكه فريده اتعرضت للى بيحصل فى الافراح الشعبيه ؛ لكن رغم أن النبيله كانت شابه فى فرح ناريمان إلا أنها مذكرتش إذا كان ده حصل لناريمان أو لا ... 🤨

• كلام كتير جدا جدا +18 عن الأمير اسماعيل حسن ؛ لا هقدر اقوله ولا احكيه ؛ وفى نفس الوقت بتقول أنه كان حب حياتها ؛ وحقيقي دماغى عملت Error ؛ ازاى بتحبيه وازاى كاتبه عنه الكلام ده 🤨

• بتهاجم الملك فاروق فى نهاية حكمه وبتعترف أن العيله اتصرفت غلط بأنهم يخرجوا الملك من اكتئاب ما بعد حادث فبراير بالحفلات ؛ وقالت إنه كان له رفيقه سوريه وأنه كان بيسهر فى كازينوهات و يلعب بوكر و يرقص مع الاميرات ويلعب معاهم لعبة الكراسي الموسيقية ؛ لكن فى نفس الوقت حملت فريده السبب فى انهياره وانهيار الاسره ( و كأن فريده كانت سوبر وومان هتحارب فى كل الجبهات ؛ فريده فاضلها تكه وتطلع من تربتها تقول ارحمونى 🥲 ) 

متى ترعرع فى وادينا كل هذه الصراحه 🙄

٩- النبيله نيفين كانت مولوده بثقب فى القلب فكانت محرومه من ممارسة أي رياضه و كانوا بيشيلوها يطلعوها السلم ؛ وعملت عمليه خطيره في القلب فى شبابها ؛ واهو ربنا أراد أن النبيله تكون حاليا اكبر أفراد أسرة محمد على سنا و تجاوز عمرها ال ٩٠ حاليا ؛ سبحان الله 

و إلى اللقاء فى ريڤيوهات قادمه 🏃🏃🏃

ومتنسوش تاخدوا لفة فى التعليقات 🤷😃

Tweet