السلطان محمد الثالث

 

السلطان محمد الثالث : 👑

احنا دلوقتي فى ٢٦ مايو ١٥٦٦ ؛ وفى فترة حكم السلطان العثماني سليمان القانوني...

كان وقتها الأمير سليم هو الأمير الذكر الوحيد المتبقي من أبناء السلطان سليمان بعد وفاة الأمراء محمد و مصطفي و جبهانجير و بيازيد ....

سليم كان له زوجه اسمها ( نوربانو ) وكان مخلف منها إبن هو مراد الثالث .

مراد الثالث ده بقي واللى هو حفيد السلطان سليمان ؛ يوم ٢٦ مايو ١٥٦٦ خلف إبنه:  محمد الثالث !

**********

إتولد محمد الثالث فى قصر مانيسا و والدته كان إسمها صفيه ( كانت من ألبانيا ) ؛ و بعد ٤ شهور من ولادته مات السلطان سليمان القانوني و تولي العرش جده السلطان سليم الثاني .... وهنرجع للسلطان محمد الثالث و صفيه بعدين .

ولما بقي عنده ٨ سنين ؛ مات جده السلطان سليم الثاني و تولى العرش والده السلطان مراد الثالث ...

ولما بقي عنده ٢٨ سنه ؛ مات والده السلطان مراد الثالث و تولى محمد الثالث العرش .

********

السلطان محمد الثالث  وزي جده السلطان سليمان القانوني ق.تل إبنه الأمير محمود ؛ واللى كان محبوب جدا من الجيش الانكشاري وولي عهد زي ما الكتاب بيقول ؛ بس طبعا احنا عارفين أن السلطان العثماني بيجيله استبحس وبيفضل يعض فى بوز اللحاف لما يلاقي إبنه محبوب من الجيش ؛ وميغمضلوش عين ولا يرتاح له جفن إلا لما يخلص عليه و يق.تله احسن ينقلب عليه ولا حاجه بعد الشر ...

وطبعا زي ما احنا عارفين السيناريو اللطيف بتاع الأمير مصطفى والسلطان سليمان ؛ فالسلطان محمد الثالث وقف مستني الجلادين يقولوله Done يا ابو السلاطين ؛ ضحينا بالأمير عشان العرش يعيش...

وطبعا مش محتاجه اقولكم أن الأمير اللى كان عليه الدور فى ولاية العرش بعد ق.تل الأمير محمود كان من أم تانيه ؛ (خلاص بقى حفظناها القصة) دى وهو السلطان احمد الاول و ده اللى كان متجوز من السلطانه قوسيم.

الأمير محمود اللى مات بقى كان له أخ شقيق اصغر منه هو الأمير مصطفي وحكم بعد وفاة أخوه السلطان احمد الأول  ؛ وحكم مرتين مرة لمدة ٣ شهور بس و اتشال وحكم السلطان عثمان ابن أخوه السلطان احمد الاول.

وكان بيتقال عليه ( مصطفى المجنون ) ؛ لانه كان بيشيل ويوقع العمم بتاعة الوزراء ويشد دقنهم وبيرمي عملات معدنيه للسمك والطيور على أنهم أكل ...

وبعد كده تم ق.تل السلطان عثمان وقطع أذنه و التمثيل بجثته اودام عمه السلطان مصطفى.

ورجع السلطان مصطفي للعرش للمره الثانيه وحكم لمدة سنة ؛ وبيقال أنه كان بيمشي فى القصر يصرخ يفتح ابواب الغرف يدور على ابن أخوه السلطان عثمان ينده عليه و كان بيتهيأله أنه لسه عايش .

بعد كده تم عزله عن العرش وتولية مراد الرابع ابن قوسيم والسلطان احمد

وبيقال أن السلطان مصطفى اتق.تل على ايد السلطان مراد الرابع و بيقال أنه مات من حالة نفسيه حصلتله نتيجه لسجنه ٣٤ سنه فى ايا صوفيا.

**********

نرجع للسلطان محمد الثالث بعد اللخبطة دى  ؛

طبعا انتوا فاكرين أنه بق.تله ابنه الأكبر الأمير محمود عمل كوارث فى السلالة والعرش ....

بس دي مكنتش الكارثة الوحيده اللى عملها السلطان محمد الثالث ؛ لأن كان في حاجه أسوأ : 👇

لانه اول ما تولى العرش خد قرار بقت.ل إخواته ال ١٩ كلهم

طب ليه واشمعنى ؟

تعالوا نرجع تاني من الاول ؛

السلطان سليم ابن سليمان القانوني اتجوز من نوربانو وخلف منها مراد الثالث

لما سليم مات ؛ واتولى مراد الثالث العرش بقت نوربانو السلطانه الأم..

( معلومة على الماشي كده : مراد لما اتولى العرش ق.تل اخواته الذكور الخمسه كلهم )

المهم مراد الثالث كان عنده زوجه بيحبها إسمها صفيه ( اللى هيخلف منها محمد الثالث ) لكن

والدته مكنتش بتحبها وكانت بتتلكك لها فقالتلها مثلا أن انتى مش مأمنه العرش بعدد كافي من الذريه ( كانت مخلفه يادوب ٨ ) ف بقت تحاول تحمل كل شويه لكنها كانت بتتعرض للاجهاض أو الطفل بيموت فقررت نوربانو كنوع من كيد النسا أنها تبعت لابنها جاريتين فى جناحه لكن السلطان منجحش معاهم ؛ فإتهمت نوربانو صفيه أنها عاملاله سحر اسود ؛ وقررت نفيها هيا وبناتها و بقت تخلي الأطباء يدوا لابنها مقويات لدرجة أنه بيقال أنه خلف ١٠٠ طفل ؛ و المعروفين منهم ٣٠ بنت و ٢٥ ولد

محمد الثالث بقي كان شاهد على كل ده وحصل خلاف بينه وبين جدته نوربانو ووالده مراد ؛ لكن نوربانو لأنها كانت ذكيه فكانت بتهدي حفيدها عشان مينقلبش على ابنها ... وبعد ما ماتت نوربانو ؛ رجعت صفيه وبناتها من المنفى وقدرت ترجع مكانتها في قلب السلطان ونسيوا الزعل بينهم واللى عملته نوربانو

بس محمد الثالث منساش....

واول ما تولى العرش وقبل حتى ما يدفن أبوه قت.ل اخواته الذكور كلهم واللى كان عددهم حوالى ١٩ ؛ حتى لو كان فى جنين جوه بطن أمه كان بيق.تله ...

********

السلطان محمد الثالث كل اللى عمله ده عشان يحافظ على وجوده على العرش وحكم لمدة ٨ سنين بس ؛ ومات و هو فى عز شبابه ٣٧ سنه واندفن فى ايا صوفيا .

وسلمولي على قانون نامه 💅

*********

#إيمان_الشرقاوى

Tweet