معماي شاه

 معماي شاه 

#ريفيو 

• مسلسل إيراني بيتكلم عن فترة حكم الشاه محمد رضا بهلوي ؛ إتعرضت أول حلقة فى ٢٠١٥ و أخر حلقة فى ٢٠١٧ 

• المسلسل ٩٥ حلقة ؛ مترجم عربي وموجود على اليوتيوب ( ماعدا بعض الحلقات حجبت مشاهدتها من اليوتيوب لكن موجوده فى مواقع تانيه زي حلقة عملية أجاكس ) 

• ميزانية المسلسل ١٥ مليون دولار ؛ و من إخراج محمد رضا فارزي 

• دي كانت اول مره فى حياتي اشوف عمل فني ايراني ؛ 

والحقيقة أن الإيرانيين عندهم مهارة و إتقان فى حاجات كتير زي الماكياج و الديكور ؛ أينعم في غلطات بس ده ميمنعش أنهم بيتعبوا عشان يطلعوا عمل فني جيد ؛ ياريت بس الاستاذ محمد الغيطي لو يتفرج على أعمالهم 😃

• اغنية تتر المسلسل رهيييييييبه جدا جدا ؛ مؤثرة بشكل غير طبيعي وكنت بحب اسمعها فى بداية أي حلقة ؛ وتستاهل فعلا جائزة أفضل أغنية فى إيران . و ده لينك الأغنية مترجمه للعربيه: 

https://youtu.be/UM_IYMP_Ids

• الماكياااااااج ..... مش ممكن بجد !!!! ؛ دول لو حضروا روح رضا بهلوي مش هيكون شبهه بالشكل ده ! او لو عملوا استنساخ ل عباس أميري و محمد مصدق مش هيكونوا بالشكل ده !! ... 

بجد فى مشاهد أنا كنت بأقف عندها واقول هو ده تمثيل ولا فيديوهات مسجلة للشخصيات الحقيقيه ؟؟

 • دمج مشاهد وثائقيه حقيقيه مع أحداث المسلسل كان عاجبني جدا جدا ؛ و كمان أن المسلسل كله عبارة عن فلاش باك لفيلم وثائقي عن تاريخ إيران بيتفرج عليها أب مع إبنه على جهاز عرض سينمائي ف دي حاجه في منتهي الWow ♥️

• طبعا المسلسل اتكلم اوي اوي عن عنف السافاك بشكل كبير جداا وخصوصا فى الحلقة ٧٥ واللى أذتني نفسيا بسبب بشاعتها ؛ مش هانكر أن السافاك كان عنيف بس اللي حصل بعد السافاك مكنش بسبوسه بالقشطه يعنى 😂

• ‏ المسلسل تجاهل ذكر اى مؤسسه او جامعه او مستشفي أسسها نظام الشاه ؛ رغم أن معظم المؤسسات فى إيران حاليا (إذا مكنتش كلها ) هى من إنشاء نظام الشاه! 

*‏ رغم إن مكياج الرجال لا يعلى عليه بالمسلسل ؛ إلا إنه كان وصمة عار بالنسبه للأميرات؛ بسبب التزمت فى إظهار الممثلات بالحجاب ؛ فكانت النتيجه عك فى عك في الماكياج و الشكل و الازياء ( لأن طبعا الممثلات مغطيين شعرهم ف مش هيلبسوا الفساتين الحقيقيه للشخصيات ؛ ودى خسارة كبيرة للاسف لأن كل الفساتين الاصليه موجوده ملونه فى الصور و كمان موجودة فى متحف إيران ؛ يعنى سهل تقليدها ... ) 

• طبعا الأميرة فوزيه فؤاد كانت أقرب لفوزي مش فوزيه خالص ؛ و الملكه نازلي والاميرات فائقة وفتحيه كانوا كأنهم عدى عليهم اتوبيس سياحي فاخر ( نازلى تحديدا كان عليها ربطة بونيه ما يعلم بيه الا ربنا 😂) ؛ أما الاميره ثريا وحفل زفافها ف ده كان كأنني باتفرج على فيلم كوميدي 😃

• مش بس الماكياج واللبس... ؛ لكن كمان المجوهرات ! ؛ بجد حرام عليكم تبقي مجوهرات آل بهلوي موجودة في البنك المركزي الإيراني ؛ ووقت حكم الأسرة البهلويه كان فى تصوير فوتوغرافي وبالالوان و منشوفش ولا عقد أو كوليه أو تاج من مجوهرات إيران الفخمه ...

• ١٥ حلقه بالتمام والكمال عن الثوره الايرانيه فى مبالغه و أڤوره كبيره ؛ عشان يبقي نظام الشاه وحش ونظام الخميني حلو و بسمسم 🤚

• عجبني اوي مشاهد دقات الساعة ودوران العقارب بسرعة وقت تغيير الممثل اللى عمل دور الشاه؛ وكمان الفلاش باك و الشاه بيفتكر ايامه فى الحكم وحفلاته وقت ما سمع هتاف الجماهير ( يسقط الشاه ) ؛ وكمان وقت مغادرته البلاد بالطائرة ونظرته على الأراضي الايرانيه من أعلى ؛ تو ماتش مشاعر مختلطه 😍

• مش فاهمه ايه لازمة مشاكل عيلة الدكتور وزيري و جوازته الاولانيه و طلاقه وبعدين جوازته التانيه ... هو مسلسل الشاه ولا مسلسل الدكتور وزيري ؟؟؟

• برضه مش فاهمه إيه لازمة ظهور أكثر من شخصية عندها تخلف عقلي بالمسلسل وتفضل الشخصية تصرخ صراخ هيستيري أو زعيق اغلب الحلقات ؟؟ ومن غير مايكون لهم اى دور درامي !! يعنى هو المخرج قاصد يأذينا نفسيا أو يخلينا ننط بهدومنا فى الترعة مثلا ولا فى إيه ؟ طب ما تجيب صبارة وتدفنا يا ببلاوي ؟ 🙄

•تعالوا نشوف قالوا ايه عن بقية شخصيات الاسره:

•‏ تقريبا معظم الحلقات كانت عن جبروت الأميرة اشرف وعن قوى شخصيتها و تورطها فى تهريب المخدرات و تجارة السلاح ده غير تدخلاتها فى الحكم ... 

وظهرت الاميره شمس فى مشهد وهيا بتقول لاخوها أنها عاوزه تتنصر .. ومعرفش ده ليه وإزاي وامتى....

الاميرات فاطمه بهلوي و همدم السلطنة مظهروش بالمسلسل .

الأمير غلام رضا بهلوي طلعوه شخص سادي بيسهر فى الكازينوهات وله علاقات غير شرعية 

الأمير على رضا بهلوي قالوا عليه أنه شخص مستهتر و لمحوا أن الشاه متورط في حادثة وفاته في الطياره 

 ‏

قالوا عن أردشير زاهيدي زير نساء

قالوا إن الأميرة شهناز بهلوي بتعمل أفعال لا أخلاقية فى سويسرا و بتحريض من زوجها اردشير 

  قالوا إن الدكتور عبد الكريم أيادى طبيب الشاه متورط فى تجارة أدويه وسلاح ؛ 

  ‏

  ‏قالوا إن إرنست كان صديق قواد للملك

  ‏

  ‏قالوا إن الاميره فوزيه فؤاد كانت على علاقه بالسفير المصري في طهران ( اللى هو بالمناسبه كان والد الملكة فريدة وحما الملك فاروق! ) 

  ‏

  ‏ قالوا إن الشهبانو فرح إمراه فاسده ولها علاقات غير شرعيه

  ‏

  ‏قالوا عن ولى العهد رضا بهلوى بالنص في المسلسل ( أنه ذو ميول أنثوية ) !! 

متهيألي كده مفيش حد عدي عليهم فى المسلسل من غير ما يتشتم 😂 ؛ عاملين مسلسل ٩٥ حلقة وصارفين ومكلفين عشان يتفكوا بكلمتين عن نظام الشاه وعيلته وانا كتبتلكم الريفيو عشان متتفرجوش عليه 🤷

#إيمان_الشرقاوي

Tweet