English French German Spain Italian Dutch Russian Portuguese Japanese Korean Arabic Chinese Simplified

2023-01-04

Faces in a Mirror

 ريفيو كتاب : Faces in a Mirror



• فى البداية المقصود باسم الكتاب هو الاميره اشرف بهلوى وأخوها التؤام الشاه محمد رضا بهلوى ؛ أنها كانت كل ما تبص فى المرايا بتشوفه و أنه كل ما كان بيبص فى المرايا بيشوفها .


• بعد ما قريت كتاب الاميره نسل شاه و انصدمت من كمية الالاطه التركى اللا متناهيه ؛ كنت متخيله انى مش هلاقي كتاب ينافسه فى الأڤوره لكن كتاب الاميره اشرف قدر و بجداره أنه يسحب البساط من تحت كتاب الاميره نسل شاه ؛ و طلعت من الالاطه التركى دخلت على النخع الايرانى .👌


• مثلا بتقول الاميره اشرف أنها لما زارت مصر مع الاميره فوزيه فؤاد أوائل الأربعينات اشتكت لها الملكه فريده من علاقة فاروق ب ناريمان صادق !!! 💁

اللى هو حضرتك ناريمان مواليد ١٩٣٣ يعنى ناريمان وقتها كانت ١٠ سنين ؛ و معروف هيا اتعرفت على الملك امتى وازاى وفين .....


• شوف حكمة ربنا يا مؤمن ؛ رغم أن على حد كلامها أنها كانت مقربه من الملكه فريده و بتحكيلها و تبعبع لها ؛ إلا أن الاميره اشرف بتقول أن الملك فاروق كان بيعشقها و ياما رقص معاها و دخلوا اوضة المكتب لوحدهم و أن الملك فاروق عرض عليها الجواز لكن قالتله لا يا لوكى ؛ فريده دى حبيبتشي حبيبتشي حبيبتشي ...... 🥱


• انبهرتوا .... ؟ 

طب خدوا الإنبهار اللى بعده ؛

 الاميره اشرف قالت بالنص والحرف الواحد ؛ أن كل امراء الاسره العلويه كانوا بيموتوا فيها و عرضوا عليها الجواز لكن هيا كانت على نغمه واحده ؛ مخدوش يا بابا ؛ مخدوش يا بابا ؛ مخدوش يا بابا 🤚 

 ‏الامراء دول اللى هما ؛ عمرو إبراهيم ؛ محمد عبد المنعم ؛ حسن حسن ؛ اسماعيل حسن ؛ محمد على ابراهيم ؛ عباس حليم .... وهلم جراااااا 


• بتقول كمان أن الملك فاروق كان معارض جوازها من احمد شفيق وكان ساحب منه جواز السفر عشان ميسافرش إيران يتجوز الاميره اشرف لان طبعا الملك كان بيحبها زى ما قولنا أو بالأصح زى ما هيا قالت 🙄 


• الاميره اشرف كلامها عن الاميره فوزيه كان قليل جدا ؛ وموضحتش علاقتها بيها كانت عامله ازاى ؛ ولا قالت اسباب الطلاق ؛ و كذلك عن الاميره ثريا و إن كانت لمحت أن علاقتها بيها كانت مش ولابد .


• برضه متكلمتش عن الاميره شهناز بهلوى أو اولاد الشاه ؛ محمد رضا و على رضا و فرحناز وليلي ؛ و مجابتش سيرة أخواتها الغير أشقاء تماماااا ؛ ده حتى اختها الاميره شمس اتكلمت عنها قليل جدا .


• اكبر فصل في الكتاب هو الفصل بتاع محمد مصدق ؛ و اللى وضحت فيه بشكل قاطع كرهها لمصدق وكره مصدق ليها ؛ و قالت بصراحه أن عودة اخوها للحكم كانت بعملية أجاكس . 


• الاميره اشرف مقالتش اى عيب ولا هفوه ولا غلطه فى حكم والدها أو اخوها اطلاقا مطلقا ؛ وأنهم باختصار كانوا فله شمعه منوره .


• الكتاب اتكتب فى ١٩٨٠ ؛ يعنى بعد وفاة اخوها وابنها على طول ؛ يعنى المفروض أن الأحداث لسه طازه فى عقلها ملحقتش تنساها . وبالرغم أنها اتكلمت عن حياتها الشخصيه بشكل تفصيلي حبت مين وكرهت مين إلا أنها فى حاجات كتير تانيه كانت بتمر عليها مرور الكرام أو مبتجيبش سيرتها خالص ؛ زى مثلا حفلة بيرسيبوليس.


• و اخيراااا بعد ما قريت الكتاب و دخلت على الجود ريدز اكتب رأيي لقيت أن التعليقات هناك قايمه بالواجب و بيقولولها


 : Princess Ashraf, your book is full of historical lies.


ف ملقتش احلى من صورة سونيا سليم دى للتعبير عن رأيي 😂

0 اكتب تعليقك قبل ما تمشي: