أم كلثوم وشريف باشا صبري

 أم كلثوم وشريف باشا صبري ☘️♥️

شريف عبد الرحيم باشا صبري؛ كان الشقيق الأكبر للملكة نازلي صبري والدة الملك فاروق وأرملة الملك فؤاد.

شريف باشا صبري ارتبط اسمه بأم كلثوم لفترة.. بس هل فعلا الكلام اللي بيتردد إنه كان عاوز يتجوزها وأخته الملكة نازلي رفضت رغم موافقة الملك فاروق هل ده حقيقي؟؟

تعالوا نحلل سوا: 

في الفترة الملكية كان كبار الفنانين والفنانات بيدخلوا قصور أسرة محمد علي وقصور الباشاوات ويحيوا حفلات؛ وكان فنهم بيسحر الموجودين ..

اللي قرأ مثلا كتاب عادل ثابت (الملك فاروق الذي غدر به الجميع) (النسخة الإنجليزية) هيلاقي أنه كان معجب وهايم بتحية كاريوكا.

وكمان أحمد حسنين باشا كان بيحب يسمع أسمهان.

وكذلك شريف باشا صبري اللي كان بيحب صوت أم كلثوم.

*******

 اتجوز شريف باشا صبري من نائلة أحمد عدلي يكن وأنجب من الأبناء:

عائشة ملك ؛ زينب نازلي ؛ محمد منير.

أمال ايه قصته مع أم كلثوم ؟

******

أنا من وجهة نظري المتواضعة إن مكنش فيه مشروع جواز أصلا بين أم كلثوم وشريف باشا.. وهقولكم أسبابي:

١- هل نازلي هتعترض وتمانع جواز اتنين بيحبوا بعض زي اخوها وأم كلثوم؟ أحب افكركم بحدوتة صغيرة عن تحدي نازلي للقصر أساسا بجواز بنتها من رياض غالي! 

٢- هل نازلي هتعترض وتمانع الجواز حتى لو في السر؟ أحب برضه أفكركم إن نازلي نفسها كانت متجوزة في السر من أحمد حسنين باشا!

٣- هل أم كلثوم هتوافق تتجوز من خال الملك وتروح تغني في الحفلات وتقابل الملحنين والشعراء في قصر الباشا.. ولا هتروح الاستوديو تمثل الافلام وتسجل الاغاني؟ 

(أم كلثوم مثلت أول افلامها سنة ١٩٣٦ وكانت وقتها رقم ١ في مصر).

٤ـ هل أم كلثوم هترفض تتجوز من الباشا في السر لأنها ضد الجواز في السر؟؟ طب بص البلوت تويست ده؟ .. أم كلثوم أصلا كانت متجوزة في السر من محمود الشريف الملحن🤷.. بقى هترفض جواز سري من باشا وتتجوز في السر من ملحن؟

٥- أي شخص من الأسرة بيطلب مباركة وموافقة الملك فاروق على الجواز؛ مش الملكة نازلي؛ يعني لو فاروق موافق (زي ما المسلسل قال.. يبقى مفيش مشكلة خلاص).

٦-الفكرة اللي بتتصدر أن ام كلثوم رفضت مصاهرة القصر وقالت لا للجواز السري فده ممكن يكون اتقال بعد الثورة مثلا

٧- واللي يضحك اظن بنت شريف صبري كانت قالت انها فضلت ع علاقة صداقة معاه بعد الثورة؛ فازاي قصة رفضهم ليها وهتفضل صديقة ليه وتروحلهم القصر كمان

٨- طب خد دي كمان؛ ‏نفت أسرة شريف باشا صبري (إشاعة) ارتباطه بأم كلثوم من الأصل.

٩- مفيش حد في حياة أم كلثوم واجهها أو سألها عن العلاقة دي..

١٠- تفتكروا أصلا بمنطق الفترة دي... هل من المعقول باشا يقرر يتجوز أرتيست بتغني وتمثل؟!

فحقيقي معرفش ليه أي عمل بيتكلم عن حياة أم كلثوم لازم يحشر الحدوتة دي؛ رغم إن في حواديت كتير لأم كلثوم مع أسرة محمد علي زي مثلا اشتراكها في حفل زفاف الأميرة فوزية وأغنية مبروك على سموك وسموه..

Tweet