شلة الزهريه

 شلة الزهريه 🥀👑 

************

حكاية من اغرب الحكايات اللى ممكن تسمعها ؛ ولما تسمعها جايز جدا متصدقهاش ...  

الاميره فايزه فؤاد ( اخت الملك فاروق) تزوجت من الوجيه محمد على بولنت رؤوف 

( وعشان محدش يسألنى يعنى ايه وجيه ؛ ف ده اللقب اللى اتقال قبل اسمه فى الصحافه وقت الاعلان عن الزواج ؛ وهو حفيد الاميره فاطمه اسماعيل لكنه مش امير ولا نبيل ) .

عاش الاتنين فى قصر اسمه قصر الزهريه و مكانه شارع الزهريه جنب نادى الجزيره . 

القصر كان مكون من ٣ طوابق و بولنت هو اللى اختار ديكورات القصر و كان أغلبها مودرن ؛ مكنش فيه حمام سباحه لكن كان فى ملعبين تنس ؛ و طبعا صاله كبيره و غرفة للرسم و المكتبه و غرف النوم و غرف الاستقبال وغرفه تانيه مليانه العاب اطفال و دباديب اشترتهم الاميره و زوجها على أمل أن يكون عندهم اطفال فى يوم من الايام ؛ لكن إرادة ربنا فوق كل شيء و محصلش نصيب أن يكون عندهم اولاد .

الاميره فايزه كانت ذكيه جدا و فكرها كان متطور ؛ كانت دايما مثلا بتنصح فاروق أنه يبعد عن الحاشيه اللى حواليه وكانت مسمياهم ( الانتوراج ) ؛ و كانت رئيسة جمعية المرأه الحديثه.

زوجها بولنت كان عايش فى تركيا و شاف بعينيه سقوط الدوله العثمانيه و قيام الجمهورية على ايد أتاتورك ؛ وكان شايف أن الملك فاروق لازم يعمل إصلاحات تواكب تطورات العصر ؛ و كان دايما بيحصل بينهم خلافات على حاجات زى مثلا ( الطربوش ) اللى مكنش بيلبسه بولنت ولا حتى فى فرحه ؛ و الملك كان متمسك بالطربوش و بالتقليد القديم .

كان الاتنين على درجه عاليه من الثقافه والوعى و كان عندهم اهتمامات فنيه وثقافية ؛ وكانوا دايما بيستضيفوا فى القصر شخصيات كتير زى مثلا انور وجدى و ليلي مراد و أم كلثوم وحسين رياض و سليمان نجيب .

اهتمام الاتنين بالفن و الثقافه ؛ مع عقليتهم المتفتحه ؛ مع عدم الانجاب ؛ خلاهم يعملوا فكره جديده و جميله هى ( شلة الزهريه 🥀 ) 

و دى عباره عن مجموعة من الاعضاء بيتجمعوا فى قصر الزهريه ( عشان كده اتسموا ب شلة الزهريه) و أنشطتهم هيا التجوال والترحال فى الاماكن الاثريه في مصر و تصويرها افلام قصيره ؛ و إقامة حفلات تنكريه واعياد ميلاد لبعض و الاجتماع في القصر على شكل ندوات ثقافيه .

*************

اعضاء الشله : 

كان فى أعضاء دائمين و اعضاء مكنوش بيقدروا يكونوا موجودين طول الوقت نظرا لارتباطاتهم بشغل أو سفر ...

الاعضاء الدايمين كان منهم : 

١- عادل ثابت ( حفيد محمد شريف باشا رئيس وزراء مصر الاسبق وهو من أقارب الملكه نازلى ) و كان هو مدير التصوير فى الافلام اللى بيصوروها و كان معاه أبناء عمه صالح و فايد ثابت و زوجته اللى كانت امريكيه

٢- طبعا بولنت كان المخرج وقائد الشله و تليه الاميره فايزه

٣- نيفين وعلويه حليم ( بنات النبيل عباس حليم) 

٤- الأمير حسن حسن وشقيقه الأكبر الأمير اسماعيل حسن ( ارتبط بقصة حب مع النبيله نيفين حليم لفتره )

٥- بيير فرانسيسكو دى بيرجولو ( بيفو ) ( حفيد ملك ايطاليا ) 

٦- الأمير العثمانى ناموق ( uncle Ossi ) 

٧- روبرت (بوب) سيمبسون ( و ده كان سكرتير خاص للسفير الأمريكي) 

اعضاء اخرين لم يكونوا دائمى التواجد : 

١- الاخوات : كارلو ؛ ساندرو ؛ ايرنستو ستاجنى ( أبناء اكبر تاجر خشب) 

٢- دوناتيلا و لانفرانكو سبيتشل أبناء القنصل الايطالى بالإسكندرية

٣-سميحه خياط ( من أكبر عائلات القبط فى مصر ) 

٤-احفاد زيرفاتتشى ( چيوڤانا و ڤيرچينيا و أبناء عمهم نوللى و مارك ) 

٥-ومن أسرة رومانوف ( موريتز رومانوف ) وهو أيضا حفيد لملك ايطاليا 

و ( ديميتري رومانوف ) ... وكان معجب بالنبيله اوليفيا حليم و كانت تحبه النبيله نيفين حليم 

٦- بيير ( بيتى ) وهو سويسري الجنسيه وكان يمتلك اراضي بالعجمى 

٧- لورد ويستبري ؛ ايدى جاثورن هاردى ؛ فيلستى انجليبي ماتشينيز ؛ جيمس موراى ( من انجلترا ) و دول كانوا سكرتاريه فى السفاره الانجليزيه

٨-جيمس موراى ( و ده بعد كده بقي سفير انجلترا في الأمم المتحدة )

٩- ستيفن بويدڤ ( بلغاري ) 

١٠- سميحه و سميره وهبه ( من أكبر عائلات القبط فى مصر) 

١١- أنا ماريا ؛ ماكس ايدري ؛ ( من أكبر عائلات اليهود في مصر) 

١٢- ماركس لويس ( السكرتير الاول في السفاره الاسبانيه ) 

١٣-جابرييل مارتينز 

١٤- چوچو نعوم ( ابن اكبر عازف بيانو فى مصر ) 

١٥- جورجى سوروندو ( من امريكا الجنوبيه) .

١٦-نينى كامارا ( أصبحت لاعبه دوليه في ما بعد ) 

١٧-لويس دى بيرينات ( أصبح سفيرا فيما بعد) 

١٨- جونى كريستو 

١٩- كاتسلفيس 

٢٠- صلاح عرابي ( هيتجوز من النبيله نيفين حليم بعد كده)

٢١- بوبي صعب 

********

عملوا حفلات كتير ؛ و كان اشهر الحفلات عيد ميلاد علويه حليم فى ٧ نوفمبر و تانى يوم عيد ميلاد الاميره فائزه فؤاد فى ٨ نوفمبر و تالت يوم عيد ميلاد جدة نيفين و علويه فى ٩ نوفمبر .

سافروا كمان الاقصر و راحوا معبد دندرة و الكرنك ووادى الملوك و زاروا هناك السلطانه ملك واللى كانت  مقيمه وقتها فى الأقصر

وكمان اتعزموا فى عشاء رسمى فى قصر اندراوس باشا .

و زاروا الاهرامات و هناك صوروا اول فيلم ليهم والمستوحى من اوبرا عايده .

ناموق كان فى فريق التصوير وكان قايم بدور امنريس 

دوناتيلا كانت راداميس 

جونى كريستو كان عايده 

ونيفين حليم كانت الفرعون 

حسن حسن و كاتسلفيس كانوا الجواري

كانت نيفين تحت ابو الهول ؛ و عادل ثابت بيصور وكان فى سياح افتكروا أن ده فيلم سينمائي بحق وحقيق .

صوروا افلام تانيه على سطح قصر الزهريه و على شاطىء البحر فى العجمى و كان فى مشهد لنيفين وهى بتحاول تنتحر فى البحر فى فيلم ووقت تصوير المشهد كل الشله وقعوا ضحك .

الاميره فايزه فؤاد رفضت تماما تظهر فى اى فيلم ؛ و بتقول عنها النبيله نيفين حليم: 

" She refused to appear in any of our epics and how right she was ."

بعد إنهاء فيلم عايده بدأوا فى يناير ١٩٥٢ فى تصوير فيلم النفط والرمال Oil And Sand ؛ و ده الفيلم اللى نحط تحته ١٠٠ خط ؛ الفيلم اتصور فى صحراء سقاره .فى عزبة عادل ثابت فى بنى يوسف فى الجيزه جنب الاهرامات 

وكان فى مجموعه من الفلاحين فى ادوار الكومبارس،

 وكان فى مشهد للنبيله نيفين أنها اميره فى الفيلم بيتم خطفها من بوبي صعب ( من البدو الاشرار فى الفيلم ) وبييجى الفارس صلاح عرابي ينقذها على الجمل ( واللى هتتجوزه بعد كده فى الحقيقه ) 

وفى مشهد تانى لممثله وهى ملفوفه بسجاده وبتدحرج على الأرض اودام الحاكم ؛ والمشهد ده كان المفروض تمثله ريتا هيوارث لأنها كانت فى زياره مع زوجها على خان لمصر فى الوقت ده لكن سافرت فجاه واللى عملت المشهد النبيله نيفين حليم

الفيلم ببساطه كان بيتكلم على حاكم بيحصل عليه إنقلاب و بيتشال من الحكم ( و ده كان قبل حركة يوليو وعزل الملك فاروق بشهور بسيطه ) 

الأحداث بتدور في إمارة صحراوية نفطية، يتصارع فيها البريطانيون والأمريكيون علي تقوية نفوذهم في الإمارة وبيدبروا المكائد مع أحد شيوخ هذه الإمارة عشان ينقلب علي الحاكم .

طبعا النيجاتيف بتاع الفيلم تم إتلافه و ماتبقاش منه غير مشاهد وصور بسيطه لقاها محمود ثابت بالصدفه فى بدروم بيته و إتعمل عنها تقرير جميل معاه ومع النبيله نيفين حليم من الجامعه الامريكيه و إتسمى التقرير ( In Search of Oil And Sand ) .... 

او "البحث عن النفط والرمال" و بيحكي قصة الفيلم اللى اتعمل سنة 1952 باسم "نفط ورمال" 

الشرايط اللى لقوها كانت 8 مللي للابطال وهما بيستعدوا لتمثيل الفيلم ، او التقليد المعروف في عالم السينما باسم "الماكينج" يعنى تصوير اللى بيحصل في الكواليس أثناء العمل.

 وتم العثور علي نسخة "الماكينج" دى في منزل محمود ثابت، ابن عادل ثابت، 

 ‏

فيديو الماكينج : 

https://youtu.be/xo-6FK8B13w

 ‏ أما النسخة ال 16 ملي من فيلم "نفط ورمال"، واللى قال محمود ثابت بانه تم تنفيذها بالتعاون مع أستوديو مصر، ف مخرج الفيلم، بولنت رؤوف حرقها بعد يوليو ١٩٥٢ عشان محدش يستغلها فى التشهير بيهم .

ولأن المادة الفيلمية التي تم العثور عليها تعد ملكية عائلية لمحمود ثابت، فقد قرر ان يكون هو الشخصية الرئيسية في الفيلم الجديد الذي يحكي قصة الفيلم القديم، "البحث عن النفط والرمال

 بيحكي محمود ثابت فى الفيلم الجديد حب الشله لفن السينما، وان الاميرة فايزة وزوجها التركي كانوا عاملين سينما صيفي علي سطح قصر الزهرية، وكان عندهم معدات سينمائيه مختلفه .

   اجمل أجزاء فيلم "البحث عن النفط والرمال" هي الأجزاء اللى بتظهر فيها نيفين عباس حليم بعد لما كبرت في السن وهيا بتتفرج على فيلم ل أفراد الشله اللى كانوا صحابها و عيلتها و بيتجمعوا سوا على طول و مكنتش متوقعه أن الفيلم لسه موجود أجزاء منه و بتقول بوضوح أن الفيلم كان إسقاط على الملك فاروق واللى كان مكروه فى أواخر حكمه .

بتقول النبيله نيفين حليم عن بولنت رؤوف: 

" Bulent could be impossible at times; he was very cultured man ; a cousin to all of us " 

و بتقول عن الاميره فايزه: 

" Princess Faiza had a charm ; was generous and kind and incredibly beautiful. I have never seen her look anything but lovely; not at the beach; in the early hours of the morning; or any time at all.

She had to be perfect at all times; and she was .

She always behaved perfectly; rarely got annoyed or showed that she was bored ."

**********

ايه اللى حصل للشله بعد كده : 

★ بولنت رؤوف مات سنة ١٩٨٧ واندفن فى انجلترا؛ وتفرغ بشكل كامل إلى الصوفيه وله عدة مؤلفات واعمال مترجمه فى مجال التصوف .

★ الاميره فايزه فؤاد انتقلت للاقامه بجوار والدتها الملكه نازلى و اختها الاميره فتحيه فى الولايات المتحدة الأمريكية و اشتغلت فى محل ورد و ماتت سنة ١٩٩٤ بعد معاناه مع مرض السرطان واندفنت فى الولايات المتحدة 

و الاميره فايزه و زوجها اتطلقوا اوائل الستينات.

★ الأمير ناموق اتقبض عليه فى تهمة محاولة إعادة الملكيه و مات فى السجن فى ١٣ نوفمبر ١٩٦٣

★ النبيله علويه عباس حليم عاشت فى مصر لفتره بعد انتهاء الملكيه بعد كده عاشت فى إيطاليا و ماتت فى ١٦ مايو ٢٠٠٦ ؛ ولمعلومات اكتر عنها : 

https://www.facebook.com/1083771090/posts/10220075229526043/

★ النبيله نيفين عباس حليم عايشه ما بين الاسكندريه و سويسرا ؛ و أصدرت فى ٢٠١٠ كتاب ( مذكرات أميره مصريه ) 

★ عادل ثابت أصدر كتاب ( الملك فاروق الذى غدر به الجميع ) 

★ الامير حسن حسن أصدر كتاب ( in the house of Mohamed Ali ) و مات فى ١٧ ابريل ٢٠٠٠ و لمعلومات اكتر عن الأمير : 

https://www.facebook.com/112522095452694/posts/3303091823062356/

واخيرا قصر الزهريه بقي معهد التربية الرياضية بالجزيرة .

ومن عجائب الدنيا أن شلة الزهريه اللى مكنتش عاجبه الملك فاروق و كمان كان محدد إقامة الاميره فايزه و زوجها فى قصرهم لحوالى سنة ونص ؛ هما اللى كان عندهم حق وقتها ؛ و هما اللى عملوا كتب يدافعوا فيها عن الملكيه وعن فاروق .

#إيمان_الشرقاوى

Tweet