الملكه فريده

 الملكه فريده 👑❤️ 

" ذكرى ميلاد ال فريده ♥️ " 

*******

#الطفوله_والصبا

طفله جميله إتولدت فى مدينة الإسكندرية فى منطقة جناكليس فى ٥ سبتمبر ١٩٢١ كانت بكرية ذرية يوسف على يوسف رسمى ذو الفقار و زينب محمد سعيد . 

إسكندرية فى الوقت ده كانت منارة الشرق ؛ مليانه قصور ومسارح و مدارس ؛ وكان أشهر فنان على الساحه وقتها هو ( سيد درويش ) و أشهر أغنيه ليه كانت ( أنا هويته و إنتهيت ) ..... واللى هتكون هى عبارة عن قصة حياة صافي ناز الجايه .....

و أصل إسم " صافي ناز " هو إسم فارسي علم مؤنث ويعني "الدلال الصافي" ،يتكون من مقطعين صافي وتعني الصفاء ،وناز وتعني الدلال.

****

الاب : 

مولود فى ٦ يونيو ١٨٨٦ ؛ وهو كان مستشار فى محكمة الاستئناف المختلطه بالاسكندريه ؛ والده على باشا كان محافظ القاهرة و جده يوسف رسمى كان من كبار ضباط الجيش فى عهد الخديوى اسماعيل . 

حمل لقب " باشا " من الملك فاروق فى ٢٥ أغسطس ١٩٣٧ ؛ قبل حفل زفاف بنته من الملك فاروق ب ٦ شهور .

فى ١٣ مارس ١٩٣٩ ؛ تم تعيينه كأول سفير مصري في إيران ؛ بعد زواج الاميره فوزيه فؤاد أخت الملك فاروق من ولى العهد الإيرانى فى الوقت ده محمد رضا بهلوى .

توفى فى ١٥ يوليو ١٩٦٥ وكان عمره وقتها حوالى ٧٩ سنه ، 

*****

الأم : 

إتولدت فى ٢٠ سبتمبر ١٨٩٥ ؛ والدها تولى منصب رئيس الوزراء أكثر من مره ؛ وكانت هى وصيفة للملكه نازلى صبري ( والدة الملك فاروق ) وكان لها أربعة أشقاء أشهرهم الفنان التشكيلي العظيم محمود سعيد .

توفيت فى ١٨ مارس ١٩٩٠ عن 95 سنه .

شجرة أسرة الملكه فريده من الأم : 

https://www.facebook.com/112522095452694/posts/4430804000291127

*****

الأخوات : 

محمد سعيد ذو الفقار 

( مولود فى ١٩٢٦ ؛ وتوفى بالالفينات 

تزوج ثلاث مرات ؛ والزوجه الاولى كانت من السيده نيفين يسري " ١٤ مارس ١٩٢٤ ؛ ١١ مايو ٢٠٠٥ " ؛ وهى إبنة الأميرة زينب إبراهيم حلمى إسماعيل من زوجها سيف الله يسري سليمان باشا . و أنجبت منه ٣ أبناء ؛ 

إسماعيل ؛ 

على ١٧ يناير ١٩٥١ ؛ ٢ مايو ٢٠١٦ ) 

و طفل ثالث لم استطع التوصل لإسمه .

حوار مع شقيق الملكه فريده " محمد سعيد ذو الفقار " قبل وفاته بفتره بسيطه : 

https://oneluckysoul.blogspot.com/2014/08/a-trip-through-royal-history-with-92.html?fbclid =IwAR1Iizs0Q8JWXXh4GMtJztBp6wiPnXP_R0syLuNe7UdI4pp_vIXzSSDJQLY&m=1

*****

شريف ذو الفقار

فى جدل حول تاريخ ميلاده ؛ بعض المصادر بتقول أنه : 

مولود فى ١٩٣١ 

  ومصادر تانيه بتقول انه مولود فى ٢٢ يونيو ١٩٢٩ ؛ و ده اللى مكتوب على قبره

  ‏

  ‏اما تاريخ وفاته ف مفيش اى جدل عليه ؛ لأنه توفي فى ١٤ ديسمبر ١٩٩٨ ؛ و كان من ضمن أشابين زفاف شقيقته الملكه فريده و الملك فاروق 

****

جد الملكه فريده من الأم هو محمد سعيد باشا ذو الفقار ( ١٨63 - ١٩28 ) ؛ وهو كان رئيس وزراء مصر فى الفتره بين ١٩١٠ : ١٩١٤ ؛ وتولى رئاسة الوزراء ايضا مره اخري فى ١٩١٩ 

فى وزارته الاولى كان سعد باشا زغلول وزيرا للحقانيه 

وفى وزارته الثانيه كان عبد الرحيم باشا صبري ( والد الملكه نازلى ) وزيرا للزراعه .

*****

خال الملكه فريده هو الفنان التشكيلي محمود سعيد ( ٨ ابريل ١٨٩٧ ؛ ٨ ابريل ١٩٦٤ ) وهو من مؤسسى المدرسه المصريه الحديثه فى الفنون التشكيلية ؛ ومن أشهر أعماله لوحة الخديوى اسماعيل و الامبراطوره اوحينى من إفتتاح قناة السويس ؛ وقد كانت إبنته ناديه ضمن إشبينات زفاف الملكه فريده والملك فاروق 

و محمود سعيد كان له دور كبير في غرس روح الفن والجمال داخل روح صافي ناز ؛ فكانت من وهى صغيره بتحب تتأمل لوحاته الفنية و رسم لها بورتريه ؛ وكانت كمان بتحب تطلع على سطح البيت العلوى وكان عاملها استوديو فيه لتأمل النيل الازرق و الحدائق والسماء والطبيعه بشكل عام .

بورتريه للطفله صافي ناز بريشة خالها الفنان محمود سعيد : 

https://www.facebook.com/royalstory.page/photos/a.2492662074105339/2538424942862385/?type=3

*****

خالة الملكه فريده هى ناهد محمد سعيد ( ١٩ سبتمبر ١٨٩٨ _ ١٩٧٣ ) ؛ والتى كانت زوجه حسين باشا إسماعيل سري ( ١٨٩٤ - ١٩٦٠ ) والذى تولى منصب رئاسة الوزراء ل ٥ فترات قصيره . وكان ابنتهم نيفين هى إحدى أشبينات زفاف الملك فاروق و الملكه فريده . 

*****

إتولدت صافي ناز ذو الفقار وسط العيله المرموقة دى ؛ و كان تعليمها فى مدرسة نوتردام دى سيون بالاسكندريه ؛ وكانت بتتكلم عربي و انجليزى و فرنسي كويس جدا . . وكان بيجيلها البيت مدرس مخصوص للغه العربيه و الدين؛ وكانت بتحب من صغرها العزف على البيانو و الرسم و كمان كانت بتحب التنس و البينج بونج .

*******

كانت الصغيره صافي ناز دايما بتمثل فى المدرسه دور ( أميره ) ومكنتش عارفه أن هييجى يوم وهتبقي فيه ملكه مش بس أميره ! 

كانت فى طفولتها مياله للعزله ؛ و أقرب أصدقائها من وهى صغيره كانوا : 

كريمات عبد الرزاق أبو الخير باشا – وكيل وزارة الماليه 

و الآنسه ملك نيازى كريمة أحمد بك نيازى 

والآنسه ملك ذو الفقار كريمة سعيد باشا ذو الفقار

***********

وهنا هتلاقوا مجموعة صور لطفولة الملكه فريده : 

https://www.facebook.com/112522095452694/posts/4432936280077899

*****

#الحب_و_الزواج

*****

وقت رحلة الاسره المالكه فى أوروبا سنة ١٩٣٧؛ كان وقتها الملك فاروق و الاميرات اخواته و الملكه نازلى قرروا يسافروا لسويسرا و لإنجلترا و كان معاهم طبعا وصيفة الملكه نازلى زينب هانم و بنتها صافي ناز. 

فى الرحله دى تحديدا ؛ إتولد الحب بين فاروق و صافي ناز ؛ و إن كان ده تم بتشجيع من الملكه نازلى على أساس أن لما ابنها يتجوز من بنت وصيفتها فكده هتضمن أن زوجة ابنها هتكون مطيعه لأوامرها و رغباتها ؛ و يمكن عشان كده رفضت الملكه نازلى أن الملك فاروق يتجوز أميره من الاسره العلويه ( لأن نازلى نفسها مكنتش من الاسره ) . 

*************

تم إعلان خطبة الثنائى ؛ وتصدرت صورة خطيبة الملك و الملكه المستقبليه الجرائد والمجلات ؛ و ظهرت صافي ناز بفستان بسيط مع تسريحة شعر رقيقه دون مجوهرات أو تيجان أو حتى يشمك . أو ماكياج ؛ و بفستان بسيط بأكمام طويله و مغلق من منطقة الظهر والصدر ؛ والصور كانت من تصوير ألبان 

*********

فى اول عيد ميلاد للملكه فى مرحلة الخطوبه ؛ أهداها الملك سياره كابريوليه فى عيد ميلادها ال ١٦ ؛ وفى مناسبات أخرى أهداها مصحف ثمين ؛ ده غير باقات الورد والزهور والفواكه الطازجة والطيور والأسماك اللى اصطادها بنفسه .

و أنعم الملك فاروق على والدة الملكه فريده ( زينب هانم سعيد ) ب وشاح الكمال و لقب صاحبة العصمه ؛ و أنعم على والد الملكه ( يوسف ذو الفقار ) بلقب " باشا "

**********

كان الملك فاروق بيتفاءل ب حرف القاء زى والده ؛ و كان عاوز يغير إسم " صافي ناز " إلى إسم يبدأ بحرف الفاء ؛ و إتعرضت عليه قوائم بالأسماء المقترحه ؛ فرفض إسم " فاتنه " لأنه قال إنه مشتق من الفتنه ؛ و رفض إسم " فردوس " لأنه إسم من الأسماء الدارجه و كمان الناس هتنطقه بفتح الفاء ف هيضيع رونقه ؛ و أختار إسم " فريده " 

********

تم الزواج فى ٢٠ يناير ١٩٣٨ فى قصر القبه بعد أن أقامت الملكه فريده لفتره فى قصر شماس ليتم إعدادها كزوجه و ملكه .

قصر ألفريد شماس اللى أقامت فيه الملكه فريده قبل الزفاف : 

https://m.facebook.com/story.php?story_fbid=2525506174154262&id=112522095452694

https://m.facebook.com/story.php?story_fbid=3488636127841257&id=112522095452694 .

؛ و خضعت الملكه فريده فى يوم الزفاف لإختبار العذريه ( كما ذكرت النبيله نيفين حليم فى مذكراتها ) ؛ و تصدرت صورة الثنائي الصحف والمجلات العالميه ؛ و لقبتهم بالثنائي الاكثر وسامه من بين العائلات المالكه بالعالم . 

و أطلق عليها الملك فاروق إسم : فريده 

وبذلك تحولت صافي ناز ذو الفقار إلى " الملكه فريده " 

*********

لتفاصيل أكثر عن يوم الزفاف و عن إطلالة الملكه فريده هتلاقوها فى اللينك ده : 

https://m.facebook.com/story.php?story_fbid=2960494133988795&id=112522095452694

كعكة الزفاف : 

https://m.facebook.com/royalstory.page/photos/a.148069095231327/976957989009096/?type=3&d=m

معلومات عن حلوانى ديليس ؛ صانع كعكة الزفاف الملكى : 

https://m.facebook.com/story.php?story_fbid=2380124505359097&id=112522095452694

صوره أشبينات الزفاف ومعلومات عنهم : 

https://m.facebook.com/story.php?story_fbid=2378753318829549&id=112522095452694

لقطات من حفل الزفاف : 

https://m.youtube.com/watch?v=9DVVN16Nmw8&feature=youtu.be

**********

كان الملك فاروق و الملكه فريده الثنائي الملكى الأجمل في العالم ؛ وكانت معظم الصحف بتتابع اخبارهم و بتنشر صورهم ؛ وكان دايما صورهم سوا كلها سعاده و حب و سعاده من القلب ..   

كان الملك بيقول للملكه فريده : فاڤيت 

و كانت الملكه بتقول للملك فاروق : لوكى

وبكده ؛ 

اصبح للملكيه المصريه ملك و ملكتان 🙃 

لاول فى التاريخ يكون فى الملكه نازلى ( الملكه الأم ) واللى منحها الملك فاروق لقب " صاحبة الجلاله " و الملكه فريده ( زوجة الملك ) . 

كان من المعتاد أن بعد زواج الملك بتنتقل والدته و إخوته إلى سرايا أخري و تسيب سرايا القبه ؛ واختارت الملكه نازلى أنها تنتقل إلى سرايا والدها عبد الرحيم باشا صبري فى الدقي لكن الملك فاروق أصر أن والدته الملكه نازلى تفضل هى و إخواته الأميرات معاه فى القصر وفى نفس جناحهم ؛ ويتم إعداد جناح الملك عشان يناسب العروسين أما فى فصل الصيف فبيتنقلوا كلهم لسرايا المنتزه فى الاسكندريه .

العلاقه بين فريده ونازلى فى البدايه كانت كويسه جدا ؛ لكن بعد ازدياد شعبية الملكه فريده و النميمه حوالين سلوكيات الملكه نازلى الطائشه ؛ توترت العلاقات بينهم إلى حد كبير 

واحتار الملك فاروق وقتها يقف فى صف مين ضد مين !!! 

" بحسب ( لوتس عبد الكريم ) صديقة الملكه فريده ؛ أن الملكه فى أواخر ايامها قالت لها أن الملكه نازلى كانت بتدبر بعض أنواع السحر للملكه فريده و أنها السبب أنها خسرت زوجها و تاجها و بناتها و أموالها و صحتها ... "

*************

الشعب المصري حب الملكه فريده لإبتسامتها الخجوله و إحتشامها و لإهتمامها بالمشاريع الخيريه ... والحب ده ظهر مع اول صوره رسميه للملكه فريده فى الجرائد وقت اعلان الخطوبه لما ظهرت بفستان بسيط جدا و تسريحة شعر رقيقه ومن غير تاج أو مجوهرات .

وكانت الملكه فريده قريبه من الشعب وبتحب توزع صدقات وهدايا على أطفال الملاجئ و المرضي ؛ وكانت رئيسة جمعية الهلال الأحمر المصري و اكتر من ٣٠ جمعيه خيريه تانيه 

***************

كانت الملكه فريده بتحب عصافير الكناريا جدا ؛ و كانت بتربي منهم أعداد كبيرة فى سرايا والدها ؛ وكمان كانت بتقرأ كتب كتير عن تربية العصافير و العنايه بيهم . و بعد الزواج أخدت العصافير معاها لسرايا الملك وكانت بتحطلهم الأكل بنفسها زى ما كانت متعوده.

وكانت كمان بتظهر دايما بملابس محتشمه طويله تغطى الصدر والظهر و الأكمام ؛ وحتى كانت حريصه دايما على إرتداء اليشمك وخاصة فى إفتتاح كل دورة برلمان ؛ وكانت كمان مش بتحب مساحيق التجميل ؛ 

اتعمل للملكه فريده عطر خاص باسمها ( ملكة مصر ) من الشبراويشي .

**************

ولى العهد بعد الملك فاروق كان هو الأمير محمد على توفيق و الثانى فى ترتيب ولاية العرش هو الأمير محمد عبد المنعم ... 

وكان الملك فؤاد كان أقر قانون بأن تكون ولاية العرش للأبناء الذكور من نسله ... و بكده كان الملك فاروق فى احتياج شديد لولى عهد ذكر ! 

أنجبت الملكه فريده للملك فاروق : 

١- الاميره فريال ( ١٧ نوفمبر ١٩٣٨ - ٢٩ نوفمبر ٢٠٠٩ ) 

٢- الأميرة فوزيه ( ٧ أبريل ١٩٤٠ - ٢٧ يناير ٢٠٠٥ ) 

٣- الأميرة فاديه ( ١٥ ديسمبر ١٩٤٣ - ٢٨ ديسمبر ٢٠٠٢ )

**********

إتوترت العلاقات بين الملكه فريده و الملك فاروق لأكتر من سبب ؛ منهم : 

١- عدم إنجاب ولى عهد ذكر ؛ واللى احتمال كبير أنه كان قربهم من بعض لو جه ! ( بيقال أن مع ميلاد كل أميره كان يعنفها الملك فاروق على عدم إنجاب ولى العهد الذكر ؛ وادمنت المهدئات والمسكنات واللى أثرت على صحتها وعلى صحة الأميرة فوزيه فاروق ؛ والكلام ده من حوار لدكتوره لوتس عبد الكريم )

٢- حفلات الأميرة شيوه كار واللى كان فى ( بعض الأفعال ) من الملك فاروق كانت بتضايق الملكه فريده ؛ زى مثلا " و بحسب مذكرات النبيله نيفين حليم " لعبة الكراسي الموسيقيه بين الملك فاروق و أميرات الأسره العلويه فى الحفلات ؛ و زى رقص الملك مع بعض الاميرات ؛ و زى وجود إمراه سوريه كانت ترافق الملك ( مثلما كان الملك فؤاد يصطحب سيده فرنسيه معه دائما من أجل إشعال النار فى قلب الملكه نازلى ) كذلك اراد الملك فاروق ؛ ربما أن يشعل داخلها الغيره ؛ و بحسب مذكرات النبيله نيفين حليم أيضا أن الملكه فريده لم تحسن التصرف أبدا و إتجهت هى أيضا لإشعال الغيره فى قلب الملك فاروق ؛ الأمر الذى لم يتقبله بالطبع و حسم نهاية حياتهما الزوجيه .

٣- حاشية الملك فاروق ؛ والتى كانت تمقتها الملكه فريده بشكل كبير ؛ و خيرت الملك فاروق بين تواجدها معه أو تواجد الحاشيه ؛ ..... وبالطبع فى النهايه رجحت كفة الحاشيه ! 

( ذكرت النبيله نيفين أن الملكه فريده تتحمل مسؤولية عزل الملك فاروق و ضياع شعبيته و إنتهاء الملكيه ؛ فهى الوحيده التى كانت تتمكن من إحتوائه .. فقد كانت زوجته ! ) 

( ايضا إتبعت الأميرة فريال نفس وجهة النظر تلك و عاتبت الملكه فريده على ما حدث لهم وللاسره ؛ بسبب كبريائها وعدم إحتوائها للملك ) 

٤- مؤامرات القصر والتى ساهمت في زيادة النزاع بين الثنائي و إشعال النيران بينهما .

الملك والكلمه كانوا منفصلين بفتره طويله قبل الطلاق تقريبا من سنة ١٩٤٥ ؛ كانت الملكه فريده متواجده فى قصر عابدين و الملك فاروق فى قصر القبه ؛ ولما الملكه فريده محضرتش إفتتاح برلمان ١٩٤٨ فهم الناس ان العلاقه بين الملك والملكه وصلت لنهايتها .

***********

كانت شخصية الملكه معروف عنها العصبيه الشديده و العند و الكبرياء ؛ ولكنها أيضا كانت من أنبل و اسمى الشخصيات المالكه .

و ذكرت المصادر أن الملك فاروق كان رافض يطلق الملكه فريده ومتمسك بيها و أن الملكه فريده هى اللى أصرت على الطلاق .... وقد كان لها ما أرادت .. ! 

وتم الطلاق بين الثنائي فى ١٩ نوفمبر ١٩٤٨ بعد حوالى ١٠ سنين من الزواج .... 

و حضنت الملكه فريده بناتها و ودعتهم و جهزت شنطها ببعض متعلقاتها و ودعت حياة القصور بكل ما فيها من أبهه و مرار .

لتعود بعدها الملكه فريده إلى حياة الظل ..... ! 

وهتفت الجماهير المصرية بعد الطلاق : 

( خرجت الطاهره من بيت العاهره ) 

( خرجت الفضيله من بيت الرذيلة )

*********

#ما_بعد_حياة_القصور 

********

بعد الطلاق ؛ عاشت الاميره فاديه فاروق لفتره مع والدتها الملكه فريده بسبب صغر سنها ؛ وبعد كده إنتقلت مع أخواتها الاميرات فى القصر الملكي مع والدهم ؛ وكان مسموح لهم بزيارة والدتهم مره أسبوعيا يوم الجمعه ؛ و دى كانت الخروجه الوحيده للأميرات خارج أبواب القصر ؛ لان مكنش مسموح ليهم بالخروج إطلاقا .

وكانت الملكه فريده بتاخد بناتها اى استوديو تصوير عشان يتصوروا سوا عشان تحتفظ بصورهم عشان تتونس بيهم فى وقت غيابهم عنها

**********

والد الملكه فريده بنى لها سرايا تعيش فيها بعد الطلاق و تستقبل فيها بناتها ؛ من أمواله الخاصه ؛ وبالرغم من كده إلا أن السرايا دى هتتصادر بعد عدة سنوات بحجة أنها من ممتلكات أسرة محمد على ؛ و بعد سنين طويله هترفع الأميرة فريال فاروق و أخواتها قضيه لإسترداد السرايا لكن للأسف الشديد مش هيوصلوا لحاجه .

بعد ١٩٥٢ ؛ و إجبار الملك فاروق على الرحيل و النفي من البلاد ؛ سافرت معاه زوجته الثانيه الملكه ناريمان و إبنه الملك أحمد فؤاد الثانى و بناته الأميرات الثلاث و اللى هتتحرم الملكه فريده من رؤيتهم لسنين طويلة ! 

ومفضلش معاها غير جواب وداع كتبته ليها الاميره فريال بنتها الكبيره قبل ما تسافر مصر مع والدها .

*****

فضلت الملكه فريده في مصر لسنين مش عارفه تسافر ولا حتى عارفه تقعد ؛ عانت من تأميم ممتلكاتها رغم أنها مبقتش من أفراد الاسره العلويه بعد الطلاق ؛ ويقال كمان أنها سلمت علبة مجوهراتها بنفسها للجنة الجرد لأنها كانت فى خزنه مخبئه بالقصر ومعرفوش مكانها فسلمتها ليهم بنيه صافيه على إعتبار أنها ممتلكات الدوله الآن ؛ وكمان بعد ما سلمت العلبه إكتشفت وجود بروش بحوزتها فندهت على أفراد اللجنه و سلمت ليهم البروش .

********

 إتعرضت لمضايقات من ( ج.س ) وكان عاوز يتجوزها مقابل أنه ميصادرش ممتلكاتها أو مجوهراتها أو قصرها لكنها رفضت تماما بل و إنفعلت عليه وطردته من القصر ( بحسب رواية د لوتس عبد الكريم ) و قالت له بالحرف : " بقي بعد ما كنت متجوزه من جلالة الملك فاروق اتجوزك انت ! " 

 ‏ ‏نفس الموقف من نفس الشخص حصل مع الاميره فائزه فؤاد واللى بيقال عنها انها عرفت ( تضحك عليه ) و تحتفظ بجزء من مجوهراتها وتهرب بره مصر .

طبعا بعد طرد الشخص المذكور ؛ رجعلها القصر بعد أيام بسيطه مع بعض رجاله و صادروا وحطموا كل ما طالته أيديهم .

 ‏ . و ( ج ؛ س ) مكنش الوحيد اللى عرض عليها الزواج ؛ فى شخصيات عربيه أخري عرضت عليها ومعظمهم اسماء مرموقه ولكنها رفضتهم و قالت ( اللى تتجوز ملك مينفعش تتجوز أى حد تانى ) 

 ‏***********

 ‏قدرت تسافر بعد حوالى ٥ سنين لبناتها ؛ واللى كانت مقابلتهم ليها فاتره وحملوها مسئولية اللى حصل لهم ولوالدهم والعائله على اعتبار أنها كانت زوجته وحب عمره واقرب انسانه ليه . وحتى كانوا بينادوها ب " مدام " ؛ ولم تسمع من إبنتها الأميرة فريال كلمة ( ماما ) سوى عندما تعثرت مره أثناء سيرها وكادت تسقط ؛ فتلفظت بها الاميره فريال تلقائيا ؛ وذكرت الملكه فريده أن تلك كانت اسعد لحظه فى حياتها 

فقد كان شئ مؤلم جدا بالنسبه ليها أن بناتها و أسرتها و أقاربها حملوها نتيجة التشرد اللى حصلهم ؛ وكانت بتبكى كثيرا وتقول ( لو كنت أعرف أن طلاقي من الملك فاروق كان هيبقي سبب فى كل اللى حصل ده مكنتش ابدا طلبت الطلاق )

****

فى أوروبا قابلت الملك فاروق بعد سنين طويله فى لقاء محدش يعرف تفاصيله غير أن بس الاميره فريال ذكرت فى لقاء مع ريكاردو كرم أنهم تزوجوا بعد اللقاء ده ولم يتم الإعلان عشان الملكه فريده متتمنعش من دخول مصر وان الاميرات الثلاثه" مسألوش عن الأمر " بحسب كلامها ؛ وانا شخصيا شايفه أن ده امر غير مقبول للأسباب التالية : 

١- إذا تزوج الملك فاروق من الملكه فريده مره اخرى ف ده شئ مينفعش ابدا يستخبي ؛ ده شئ هيكون حديث الصحافه العالميه واللى كانت بتتابع اخبار الملك فاروق فى المنفي .

٢- لا يوجد زواج دون وثيقه زواج ؛ فأين الوثيقه التى تثبت الزواج ؟ 

٣- من المستحيل أن يحدث زواج للملكه فريده والملك فاروق دون علم الاميرات البنات الثلاث ؛ ومن غير المنطقي أن تذكر الاميره فريال : " لم نسأل عن الأمر " 

٤- احيانا بتتقال بعض الاشياء التي لم تحدث وهذا فقط لتجميل مظهر شخص ما ؛ وفى تلك الفتره كان الملك فاروق على " علاقه " بإيرما مينوتولو و إنتقل معها في مسكن واحد ؛ بل وتذكر إيرما حتى الآن أنها أرملة الملك فاروق ! 

****

الثابت تاريخيا فى لقاء الملك فاروق و الملكه فريده هو طلب الملك من الملكه أخذ البنات بعيدا عن أوروبا ؛ والحياه فى بلد عربي إسلامي حتى لا يتزوج أبناؤه من أجانب كما فعلت شقيقته من قبل ؛ ( الغريب بالأمر أن جميع أبناء الملك فاروق تزوجوا من أجانب فعلا ؛ بالطبع ماعدا الاميره فوزيه فاروق التى لم تتزوج ) 

وفعلا بتاخد الملكه فريده البنات و بيعيشوا فى لبنان لفتره قصيره ؛ لكن مبيقدروش يتأقلموا وبيرجعوا تانى لأوروبا .

***

وبتكتفي الملكه فريده بزيارات متنقله ما بين مصر و اوروبا كل فتره ؛ مصر فيها والدها ووالدتها ؛ وأوروبا فيها بناتها ؛ 

بتلجأ للرسم زى خالها الفنان محمود سعيد ؛ وعشان تقدر تصرف على احتياجاتها ؛ وبتعمل معارض فنيه في دول كتير . وكانت دايما بتقول ( الفن هو اللى أنقذ حياتى ) ؛ لانها لولاه كانت إنتحرت أو جنت ؛ و مع المسكنات و المهدئات إستخدمت الرسم كعلاج إضافي . و سافرت إلى اللوڤر لتتعلم اصول الفن . 

طبعا اتعرضت للنصب كتير ؛ يعنى مثلا حد يكلمها أنه عاوز يعملها معرض فى البلد الفلانية ؛ فتجهز لوحاتها وتروح وقبل معاد المعرض تتفاجئ بسرقة اللوحات . و مثلا فى الولايات المتحدة الأمريكية اتسرق منها حوالى ٢٠٠ لوحه .

****

فى يوم من الايام ؛ بعتت الاميره فاديه فاروق رساله إلى والدتها تطلب منها حضورها في أهم يوم فى حياتها " يوم زفافها " .

وحضرت فعلا الملكه فريده فرح اقرب بناتها لقلبها و أصغرهم ؛ وهتلاقوا قصة الأميرة فاديه فاروق بالتفصيل فى الرابط ده : 

https://m.facebook.com/story.php?story_fbid=10220760575299259&id=1083771090

***

بعد زواج الاميره فاديه بحوالى شهر ؛ يموت الملك فاروق على طاولة عشاء و بتحضر الملكه فريده جنازة زوجها الملك وحبها الوحيد في إيطاليا ؛ ولما بيتم نقل الجثمان إلى مصر برضه بتكون موجوده و بتبكى على فقدانها الرجل الوحيد اللى حبته فى حياتها .

طلب بناته الثلاث تشريح الجثمان لمعرفة سبب الوفاه لشكهم فى وفاته مسموما ؛ لكن الملكه فريده رفضت بشكل قاطع وقالت حرام نعمل كده فى جثمان الملك ؛ و إثبات أنه مات مسموم مش هيغير أى حاجه . و ان اهم شئ حاليا هو تنفيذ وصية الملك بأن يدفن في مصر ؛ و أن تشريح الجثمان ممكن يؤدى إلى مشاكل كتير و يترفض دفنه في مصر .

حكاية الاميره فوزيه فاروق بالتفصيل : 

https://m.facebook.com/story.php?story_fbid=10222151934402367&id=1083771090

***

و بعد حوالى 4 شهور من وفاة الملك فاروق ، يتوفى والد الملكه فريده عن عمر ٧٩ سنه 

**********

#نهاية_ملكه 

**********

عاشت الملكه فريده فى شقه فى شارع الشانزليزيه فى باريس كانت هديه من شاه إيران محمد رضا بهلوى من سنة ١٩٦٨ لحد ١٩٧٤ ؛ و بعد سنين إضطرت تبيعها بعد كده عشان تصرف على علاجها لتوقف المساعدات الماليه اللى كان بيبعتها الشاه بسبب الثوره الاسلاميه ؛ 

وبعدها رجعت مصر مره تانيه ؛ وكانت على علاقه طيبه بالرئيس محمد أنور السادات ؛ واللى رجع لبناتها الجنسيه المصريه و سمح لهم بدخول مصر ؛ ولما طلبت الملكه فريده منه مسكن تعيش فيه قالها هو صعب أرجعلك القصر بتاعك لأنه إتباع ؛ قالت له أنا مش عاوزه قصر أنا عاوزه شقه على النيل ؛.

فى عهد السادات ؛ زاروا الاميرات الثلاث ( بنات الملكه فريده ) مصر لأول مره بعد خروجهم منها فى ١٩٥٢ . 

وطلبت الملكه فريده من الرئيس السادات تنفيذ وصية الملك فاروق بدفنه بجوار والده في مقابر أسرة محمد على بالشافعى ؛ ووافق فعلا الرئيس وتم نقل رفات الملك فاروق من مكان دفنه فى مقابر أسرة إسماعيل شيرين إلى الشافعى حيث مثواه الحالى ؛ و حضر عملية نقل الرفات الملكه فريده و الأميرة فوزيه فؤاد و الأميرة فريال فاروق .

**********

قابل الفنان سمير صبري الملكه فريده فى منزلها مع الاميره فريال فى لقاء للإذاعة ؛ و إتكلم عنه بالتفصيل فى كتابه الأخير " حكاية العمر كله " 

كمان قابلت الإذاعية أمال فهمى الملكه فريده فى برنامجها الإذاعى الشهير " على الناصيه " 

وكمان الملكه فريده عملت لقاء مع مجلة المصور سنة 1958 و مع مجلة الموعد مع الصحفى محمد بديع سربيه

وكمان فى لقاء مع الملكه فريده في التليفزيون الفرنسي هتلاقوه فى اللينك ده .

https://youtu.be/0XerQo3Gp0k

وهنا نفس اللقاء ولكن مترجم : 

https://youtu.be/c2xnkUqNxmg

****

عانت الملكه فريده من مشاكل صحيه كتير وكانت مؤمنه أن كل حاجه حصلتلها كانت بسبب " سحر " عملته الملكه نازلى ليها ؛ خلاها تتحرم من زوجها و تتحرم من تاجها وتتحرم من بناتها وتتحرم من صحتها 

***

فى عهد الرئيس محمد حسنى مبارك ؛ كانت الملكه فريده بتاخد معاش ٢٠٠ جنيه شهريا من الدوله ؛ وكان أجر الخادمه اللى بتراعيها فى الوقت ده ٣٠٠ جنيه. 

و منحها الرئيس مبلغ ٣٠ الف جنيه ؛ إشترت بيهم شقه في منطقة المعادى أوضتين وصاله و عربية لادا صغيره .

وكانت الملكه فريده محتاجه مخزن تحط فى لوحاتها و ادواتها لان شقتها كانت صغيره ؛ فلجأت إلى صديقتها المقربة د لوتس عبد الكريم و نقلت جميع لوحاتها إلى بدروم الڤيلا الخاصه بيها .

***

كانت الملكه فريده بتصحى الساعه ٧ صباحا ؛ تقرأ الجرائد أو المجلات و تفطر الساعه ٨ وكانت بتحب على الفطار الخبز الأسمر المصري ومكنتش بتحب تشرب شاى أو قهوه خالص ؛ وبعدين تركب عجله ( بسكلته ) و تمشي بيها شويه كنوع من أنواع الرياضه ؛ وبعدين ترجع الشقه تنام شويه أو ترسم لوحات أغلبها تحتوى على لفظ الجلالة أو مناظر طبيعيه أو أشخاص من وحى التراث المصري زى الفلاحين أو الصعايده .

وكمان كانت بتحب تلبس مشغولات يدويه مصريه ؛ و إكسسوارات من التراث الشعبي زى الفضيات و زى المنتجات الشعبية فى خان الخليلي .

****

كانت اكتر حاجه مضايقاها هو المبانى العاليه اللى حجبت رؤية الاهرامات ؛ وكانت بتقول أن فى العهد الملكى كان ممنوع اى مبنى يزيد عن طابقين عشان تفضل الاهرامات الثلاثه ممكن رؤيتها ولو من على بعد كشواهد على عظمة مصر .

وكذلك المبانى العاليه اللى أخفت النيل ؛ و الاعشاش الصغيره اللى إتعملت حوالين النيل بشكل عشوائي فأخفت رؤيته و جماله ؛ وكانت شايفه أن ده مخطط لتشويه جمال مصر .

كذلك كمان فى مره حبت تروح تحضر مسرحيه لكن إتضايقت جدا لما شافت أكوام من الزباله بجوار باب المسرح و فضلات على السلالم وغبار على الكراسي ؛ فإنسحبت و خرجت من المسرح وهى حزينه على تجاهل ركن إنسانى أساسي وهو النظافه .

و فى يوم من الايام عرفت أن الدوله عملت متحف للمجوهرات الملكيه و فرحت جدا و حبت تشوف القطع اللى كانت عندها ومشافتهاش من سنين ؛ لكن للأسف لما راحت إتصدمت ؛ و قالت إن كل القطع المعروضه مزيفه مفيش فيهم قطعه واحده حقيقيه .

وده ڤيديو لدكتوره لوتس عبد الكريم وهى بتحكى الواقعه : 

https://youtu.be/MrrDBmVSChc

وده مقال كتبناه من فتره لما إكتشفنا أن طقم المرجان الاحمر المعروض فى متحف المجوهرات مزيف : 

https://m.facebook.com/story.php?story_fbid=10220383976604527&id=1083771090

***

كان أخر معرض فنى عملته الملكه فريده فى مصر سنة ١٩٨٠ ؛ و إتفاجئت فيه بزياره لطيفه من الملكه ناريمان صادق " ثانى زوجات الملك فاروق " فى فندق الميريديان .

وفى سنة ١٩٨٦ عملت معرض فنى تانى فى مملكة البحرين .

***

فى مره كانت بتتفرج مع صديقتها د لوتس عبد الكريم على اوبرا عايده فى الاوبرا ؛ حست بحمى شديده ؛ فاخدتها صديقتها إلى مستشفى الدكتور مصطفى محمود وعملت فحص شامل ومجموعه كبيره من التحاليل اللى أثبتت إصابتها بمرض اللوكيميا 

عانت مع المرض و مع سوء أحوالها الماديه ؛ و إضطرت لبيع شقة فرنسا هدية الشاه وحتى باعت ملابسها فى باريس من أجل تدبير نفقات العلاج ؛ و جه يوم على صافى ناز ذو الفقار صاحبة العصمه و جلالة الملكه فريده بعد ما كانت بتلبس من أرقى بيوت الازياء العالميه ومنهم طبعا محل ورث اللى صمم لها فستان الزفاف بقت بتفصل هى هدومها بنفسها و تبيعهم فى فرنسا عشان تجيب حق العلاج                                                                                                                            

وفى نفس الوقت ده جالها عروض لشراء مذكراتها ولكنها رفضت تماما بيع التاريخ أو نشر أسرارها و اسرار الملك فاروق ؛ و كانت فقط تكتب مذكراتها باللغه الفرنسيه و ترجمها إلى العربيه دكتور بطرس غالي ؛ و تم حرق تلك المذكرات لاحقا .

تدهورت حالتها الصحية و إختارت ترجع مصر ؛ و دخلت المستشفي فى سبتمبر ١٩٨٨ وهى تعانى من اللوكيميا؛ وكانت الملكه فريده كانت محتاجه لنقل دم بسبب ضعفها و رفضت تماما أن تتم عملية نقل الدم بالخارج وقالت ( اخاف يكون فيه إيدز ) و طلبت أن يتنقل لها دم فى مصر لكن للاسف كان الدم ملوث بالإلتهاب الكبدى الوبائي واللى زود حالتها الصحيه سوءا 

 كانت الملكه فريده بتعانى كمان من الإلتهاب الرئوى ؛ وفى ٢ اكتوبر من نفس العام دخلت العنايه المركزه وماتت يوم ١٦ اكتوبر ١٩٨٨ عن عمر ٦٧ عاما وهو عمر صغير نسبيا مقارنة بأفراد الاسره العلويه و بأفراد أسرتها ؛ فوالدها توفي عن عمر ٩٩ عاما ؛ أما والدتها زينب هانم سعيد فقد توفيت بعد وفاة إبنتها الملكه فريده بعام واحد .

وظلت الملكه فريده محافظه بخاتم الملك فى اصبعها حتى وفاتها ؛ وكانت مواظبه على زيارة قبر الملك فاروق والبكاء أمام الضريح .

ودفنت الملكه فريده فى مقابر أسرة ذو الفقار ؛ ويقال إنها كانت تواظب على كتابة مذكراتها طيلة حياتها وبعد وفاتها قام بناتها بحرق تلك المذكرات .

وفى أيامها الأخيرة ؛ اخبرت الملكه فريده صديقتها المقربة د لوتس عبد الكريم أنها قد تزوجت من الملك فاروق حينما سافرت له و تقابلا ؛ و إنها خشيت إعلان الأمر ؛

وانا هنا فى رأيي أن الملكه فريده كانت تعانى من سرطان الدم و وربما جعلتها الغيبوبه كبديه تقول كلاما لم يحدث فعلا ؛ وعلى صعيد أخر فقد نفي بشده أستاذ ماجد فرج ( مؤرخ الاسره العلويه ) زواج الملك فاروق و الملكه فريده في المنفي .

وعلى أية حال .... 

سواء تزوجت الملكه من الملك بعد زوال الملك .. 

فقد كان فاروق هو ملك قلبها حتى النهايه ... 

****

أو زى ما قال سيد درويش : 

أنا هويــــته وانتهيــــت .

وليه بقى لوم العــــــزول

يحب إني أقـــول ياريت

الحـــب ده عني يــــزول

ما دمت أنا بهجره ارتضيت

خلي بقى اللى يقول يقول .....

**********

#إيمان_الشرقاوى

Tweet