مذكرات فرح بهلوي

 ريفيو مذكرات الشهبانو فرح بهلوى 👑💁 

فرح بهلوى أو فرح ديبا هى الزوجه الثالثه لشاه إيران محمد رضا بهلوى 👑 و أهدت الشهبانو مذكراتها المترجمه للغه العربيه لمصر ك بلد و شعب .

****************

١- بتقول انها لما كانت فى الكليه كان طلبة سنة رابعه بيتنمروا على طلبة سنة أولى ( اعتقد دى قاعده فى كل جامعه فى العالم 🙃 ) و كانوا بيقولوا لهم مثلا يجيبوا ليهم حاجات من أماكن فى الكليه وعشان هما طلبه جداد فميعرفوش الاماكن فكانوا دايما مش بيعرفوا وبتكون النتيجه أنهم يلبسوهم مريله ويخلوا وشهم الحيط و يكبوا على قفاهم ميه ( الجامعه دى غريبه جدا 😂 ) 

٢- بتقول أن لما عرض عليها الشاه الجواز وافقت على طول وساعتها قالها ممكن تخلى ده سر لحد ما اقولك نعلن امتى ؟! ، قالتله Deal  و روحت فرح البيت حكت لمامتها و خالتها وخالها وعيلتها نفر نفر 🤚😃 

٣- بتقول أن حصلها مواقف كتير محرجه وقت تجهيزها كملكه إيران ؛ يعنى مثلا لما سافرت فرنسا لتجهيزات الفرح  انخلعت فردة جزمتها وهيا بتجري من الصحفيين ؛ و يوم الفرح نسيت تجيب دبلة لجوزها اللى هو الملك و فى الفرح أداها أردشير زاهيدى دبلته تديها للملك ( أردشير كان متجوز بنت الشاه الاميره شهناز و دى بنته من الاميره فوزيه فؤاد) ؛ و من ضمن المواقف المحرجه أن الست فى إيران يوم الفرح المفروض تتسال ٣ مرات موافقه تتجوزي فلان ؛ فرح بقي جاوبت من اول مره و بسرعه 😆 خلت كل الموجودين يضحكوا ( واقعه واقعه يعنى 😁) 

٤- اول ما القصر عرف أن الشهبانو حامل عملوا ال لالى عشان تجيب ولى العهد اللى الشاه مستنيه بقاله ٢٠ سنه ؛ مثلا جابولها حته من سرير طفل ذكر ؛ و دكتور من سويسرا كل الستات اللى ولدهم جابوا ولاد ؛ و ست عجوزه كتبت دعاء على بطنها بالطين اللى شرط يكون صلي عليه رجل ؛ ونظام غذائي يعتمد على برتقال والسفندى ( حد هيسالنى ايه المنطق فى ان البرتقال والسفندى هيخلى المولود ييجى ذكر ... هقولك وهو فين المنطق فى دكتور كل اللى ولدهم جابوا ولاد 🙄 ) 

٥- بتحكى عن بنتها فرحناز أنها كنت بتحب تربي حيوانات ؛ طبعا انتوا هتتخيلوا حيوانات اليفه وكده ؛ هقولكم لا ابسلوتلى 😃 ؛ فرحناز كان عندها صحيح كلاب و بقره ؛ لكن كمان كان عندها شبل و ثعلب و مربيه فيران فى الحمام بتاعها 😆🐀🦁🦊 

٦- بتحكى عن ابنها على و بتقول أنه كان شقي و ظريف ؛ وأنه كان دايما يعمل مقالب فى زمايله ؛ وأنه مثلا  كان بيرمى عيش على الضيوف و وقف مره فى برميل بويا و مره خرم كل كور السله فى المدرسه و قالوله ليه عملت كده قالهم ( محدش قالى معملش كده 💁) " احنا نعتمد رد على فى اى مصيبه نعملها 🤚 "  

٧- بتقول فرح أن فى يوم سنتها انكسرت وهيا بتاكل توت كان فى الرمل بس كانت مبسوطه أنها بلعت حته من تراب بلدها ( طب ما أنتى بتاكلى من أكل مزروع في تراب بلدك ... مش فاهمه وات إذ ذا بوينت يعنى 🤔 ) 

٨- بتقول أن السافاك ساهم فى أمن و استقرار البلاد ؛ وان عدد المساجين فى عهد الشاه كان ٣ آلاف وفى عهد الخمينى بقوا ١٠٠ الف ؛ و بتقول عن حفل بيرسيبوليس أنها صحيح عرفت أن تكلفة الحفله غاليه بس اللى عليهم اللوم هما  المصممين و المسؤولين عن تنظيم الحفله ؛ وانا شهبانو غلبانه  فى نفسي مقدرش اعمل حاجه وضعيفه ومكسورة الجناح 🤚🙄 

٩- بتقول حصل حريق فى اكبر دار سينما فى عبدان فى إيران  ومات فيها ٤٠٠ شخص فى أغسطس ٧٨ ( حريق واخد بالك معايا 🙃) و أن المعارضه اتهمت الشاه أن هو اللى دبر الحريق 💁

١٠- بتقول أن وقت قرارهم بالرحيل عن ايران ؛ الحاشيه قالولها يهديكى يرضيكى خدى مجوهراتك و هيا ابدااااا دى فلوس الشعب ؛ و جابت صحفيين وإعلاميين يصوروا محتويات القصر من جوه مجوهرات ولبس وتحف ووانتيكات ؛ عشان تقول للعالم كله أنها ما اخدتش حاجه وعشان اللى هيجوا بعدها يحافظوا عليهم ... 

بس ياتري لما فرح بهلوى ما اخدتش مجوهرات ؛ طب اخدت ايه ؟! 

تعالوا نشوف 🙈

• اخدت جزمه ليها رقبه عشان قالت الايام اللى جايه همشي فيها على رجلى كتير 😁

• فرحناز طلبت بوستر لمغنى إيرانى اسمه ستار 😏

• الشاه اخد شوية تراب عشان يحطه على قبره لما يموت 

 

• ضمن اللى خدوهم معاهم وهما مسافرين على الطياره من الحاشيه؛  الطباخ  واللى بدوره اخد معاه حلل نحاس و اكياس حمص و رز وعدس 😎

 ١١- بتحكى فرح أن الشاه ساق الطياره لحد ما خرجوا من حدود إيران و أنها وهيا فى الطياره بعتت لرؤوساء وملوك دول العالم تقولهم ساعدوا إيران التعيس ( معرفش هيا تقصد إيران ولا الشاه 🤔) و أن لما الطياره وصلت مطار أسوان قالت :  ( من الفظيع الا يكون لدينا جدول أعمال ) 

 ‏

امال لو عرفت انى ك إيمان يعنى لا عندى جدول ولا اعمال💁

١٢- بتحكى ان كان الشاه تعبان وكلموا الدكتور قالهم أنا ورايا حفله فى الاوبرا ووقتها هيا اتنرفزت اوى ؛ اللى هو ازاى ملك إيران يتعامل بالشكل ده ؛ مع انها كان ممكن تشوف دكتور تانى عادى يعنى بس الطريقه فى الاعتذار مكنتش عاجباها ؛ و أنها كانت بتضايق جدا لما كانوا بيضطروا يدخلوا المستشفي من سرداب البدروم و نفق تحت الارض مليان بمخلفات المستشفي وسط روائح مش تمام و كل ده والشاه على كرسي متحرك ... ( شخص كان المفروض ملك لدوله غنيه و عمل اكبر حفله فى العالم 🙃 ) 

١٣- بعد وفاة الشاه كانت هيا وصية العرش لمدة ٣ شهور وكانت بتراسل رؤوساء وملوك الدول على الأساس ده لحد ما ابنها تم ٢٠ سنه وأعلنت توليه العرش فى ٣١ اكتوبر ١٩٨٠ فى قصر القبه فى القاهره ؛ و قال خطاب للشعب الايرانى من مصر اودام الصحفيين . ( ما خلاص بقي ده انت شاه فى نفسك جدا 🤚) 

١٤ - بتقول أن الملكه الام ( تاج الملوك ) اندفنت جنب حفيدها شهريار ابن الاميره اشرف فى أمريكا ؛ وانا دلوقتي محتاجه اعرف اذا كان شهريار اندفن فى أمريكا ؛ يبقي جثة مين اللى الاميره اشرف حنطتها فى شقتها وبتقول أن دى جثة ابنها ؟ 🤔 .... سؤال للتأمل 🤚 

حتى نلتقي في ريڤيوهات قادمه ؛ و متنسوش تاخدوا لفة فى التعليقات 💁😃 

#إيمان_الشرقاوى

Tweet