الأميرة فوزية والأميرة أشرف بهلوي

 ناس كتير سألتني

( هل المشهد إياه في مسلسل ملكة في المنفى ما بين الأميرة أشرف والأميرة فوزية حصل فعلا؟)

( هل فعلا حصل اعتداء على الأميرة فوزية فؤاد ؟ )

كان جوايا حاجه بتقولي لا مش معقول تحصل؛ ولما كنت ارد واقول .. لالا مش معقول ؛ كان الرد يتقالي .. " وهو انتي هتعرفي اكتر من راوية راشد؟ "

كنت ساعتها اقعد افكر و ارجع واقول بقى هل من المعقول يتم تصوير مشهد زي ده في دراما ولأشخاص حقيقية ( كانوا وقت عرض المسلسل على قيد الحياة) من غير مايكون في دليل قوي على الحادثة دي؟ 

وأرجع برضه اقول طب حتى لو حقيقة؛ ليه اصلا نتطرق للحديث عنها في عمل أدبي ومسلسل درامي؟

******

علشان اجاوب على الأسئلة دي كان لازم أولا أقرأ كتاب ملكة في المنفى ل راوية راشد؛ علشان افهم هيا القصة دي جت منين وعرفتها ازاي! 

وهنا كان أول الخيط:

بتقول راوية راشد في كتابها نصا:

"تصف أشرف الأميرة فوزية بعبارة She was aloof cold fish أي باردة ومنعزلة، 

وتضيف الأميرة أشرف : لا أنكر أنني أحببتها كما أحبها أخي تماما."

هنا بقى بتعلق راوية راشد وبتقول:👇

" ولهذه العبارة أبعاد مخيفة، فمن المعروف أن الأميرة أشرف مثلية، أي أنها تمارس العلاقات الخاصة مع النساء، فهل كان اقترابها أكثر من اللازم من الأميرة فوزية أحد أسباب الانهيار العصبي الذي أصيبت به الأميرة والذي كاد يودي بحياتها قبل أن ترحل عن إيران؟

لا توجد إجابة بالطبع عن هذا التساؤل، ولا أحد يمكن أن يكون قد عرف الأسباب"

يعني هنا راوية راشد بتتكلم كتحليلها هيا الشخصي؛ مجرد فكرة جت في دماغها؛ ظن مر بخاطرها بعد جملة قريتها في كتاب الأميرة اشرف بهلوي.. 

ورجعت أكدت في نهاية كلامها وقالت ( لا أحد يمكن أن يكون قد عرف الأسباب"

يعني راوية راشد في كتابها بكل وضوح بتقول أن ده مجرد.. ( ظن )! 

اهو مجرد الظن ده اتحول لعمل درامي اتعرض على قنوات فضائية!

اهو مجرد الظن ده ناس مصدقاه عادي جدا؛ لأن جس وااات ؟ في شريحة كبيرة جدا من الناس بتاخد معلوماتها من المسلسلات!

وبالنسبة للأميرة اشرف؛ فبرضه دي كانت تكهنات وشائعات حواليها طلعها عليها النظام التالي؛ وبديهي اي نظام حكم بيطلع اشاعات على النظام اللي قبله؛ واكيد انتوا عارفين اتقال ايه عن فاروق واتقال ايه عن فريدة بعد سقوط الملكية..

يعني برضه منقدرش نجزم ١٠٠٪ بميولها الخاصة.

*****

طب تعالوا برضه نشوف الأميرة اشرف بهلوي قالت ايه عن الأميرة فوزية فؤاد في كتابها عشان برضه نبقى قفلنا كل الابواب؛ والمفاجأة أنها اتكلمت عنها كويس جدا وقالت : 

"During the years that my brother was married to Fawzia, and in the course of his two later marriages, there would be endless gossip printed about my rivalry with one sister-in-law or another. But the simple truth that has dictated my relationships with all of my sisters-in-law is consid- erably less colorful: I have always tried to love anyone who is an important part of my brother's life because, for me, that is part of loving him."

Page 35 

اللهم صلي على النبي 🙂

يعني الاميرة اشرف بتقول أنها حبت جميع زوجات اخوها الشاه واعتبرت ده جزء من حبها له هو شخصيا؛ أو بمعنى آخر؛ بتحب اخوها يبقى تحب زوجاته! 

طبعا المعنى هنا مختلف تماما وكلية عن اللي قالته راوية راشد! 

واظن مكنش يستاهل المشهد الفج والمهين اللي تم تصويره في مسلسل عشان يشوفوه ملايين المشاهدين..

******

ملحوظة كمان: 

كتاب ملكة في المنفى يحتوى على عدة أخطاء تاريخية أخرى كثيرة أتمنى مراجعتها في الطبعة الثالثة من الكتاب..

فمثلا الأميرة شيوه كار لم تكن متزوجة قبل الملك فؤاد ولم تنجب قبل زواجها منه.

والأمير اللي كان عنده مطامع بالعرش من ايام الملك فؤاد هو الأمير محمد علي توفيق ولبس الأمير محمد عبد المنعم.

الملكة نازلي لم تتزوج قبل الملك فؤاد ( ودي معلومة اتقالتلي من أسرة الملكة نازلي نفسها).

وغيرها..

********

وبكده نبقى قفلنا صفحة النقاش والحوار في النقطة دي؛ ويمكن اكون ساهمت ولو بجزء بسيط من سرد الحقيقة لأشخاص كانوا جزء من تاريخنا...

#إيمان_الشرقاوي

Tweet