ريفيو كتاب أفندينا

 ريفيو كتاب أفندينا ✨

الكتاب ل ملك بيير إبنة النبيلة فاطمة شيرين؛ وتعتبر من الناس القليلين اللي عاصروا الملكية وقابلوا شخصيات ملكية من العيلة ويقدروا يفتكروا أحداث وشخصيات بشكل كويس.. وعشان كده كنت متفائلة بالكتاب 🤷

أول ما جبت الكتاب قلبت في صفحاته عشان أشوف لو في صور نادرة لملك بيير من طفولتها وعائلتها ووالدتها أو صور للأسرة؛ لكن للأسف مفيش ولا صورة نادرة واحدة!

الصور كلها متداولة وموجودة على الإنترنت لدرجة إن في صورة للملك فاروق عليها لوجو قناة يوتيوب!

ودي كانت أول خيبة أمل!🤕

*****

ملك بيير كانت إشبينة في أكتر من حفل زفاف بالأسرة؛ ورغم كده متكلمتش عن تفاصيل ووصف أفراح الأسرة؛ والزفاف الوحيد اللي إتكلمت عنه هو زفاف فاروق وفريدة واللي كان من قبل ما تتولد أساسا 😃.. وملك بيير متكلمتش عن جوازها هيا نفسها أو عن حياتها الشخصية؛ لكن الحياة الشخصية للملك عادي في المعادي 😂

*****

مفيش ذكر لأميرات الأسرة زي إخوات الملك فاروق أو بناته أو الأميرة شيوه كار؛ يمكن قالت إنها كانت بتلعب مع بنات الملك وبتقابلهم لكن مقالتش...

 هل إستمرت العلاقة بينهم بعد إنتهاء الملكية ولا لا؟ 

طب كانت بتقابل الأميرة فوزية مثلا في فيلا سموحة مثلا ولا لا؟

 طب تبقى معدية.. لا لا 💃

******

مفيش أي معلومة جديدة عن والدتها النبيلة فاطمة شيرين 

ولا حتى قالت حاجه عن الأمير حسن طوسون ولا أسرته غير أنه الشخص اللى أداها اسمه واسم عائلته..؛ ومفيش ولا صورة ليها من طفولتها معاهم!

*****

اتكلمت ملك بيير عن عيلة برجانزا عيلة اخوها واصلهم اكتر من عيلتها شخصيا بشكل مستفز جدا؛ رغم إن إسم الكتاب (أفندينا- الملك فاروق)؛ واللي بيشتري الكتاب بيشتريه عشان عاوز يعرف معلومة جديدة عن الملك فاروق! 

******

الكتاب بيتمحور حول معلومتين مشكوك في صحتهم:

الأولى هيا إن الملك فاروق كان مصاب بمتلازمة الفص الجبهي نتيجة لحادث القصاصين؛ وده إجتهاد شخصي من ملك بيير ولم يتم إثباته طبيا في حياة الملك؛ وبالتالي يحتمل الصواب أو الخطأ.. ولو إنه منطقي بعض الشيء..

المعلومة التانية معلومة خطيرة جدا وجريئة جدا؛ ومفيش لها أي إثبات لصحتها؛ ولا أي مبرر؛ ولا حصلت إمتى وإزاي.. 

وللأسف الشديد مش هقدر اقول المعلومة لسببين؛ أولهم إنها معلومة جريئة جدا وتخص سمعة وعرض ونسب ومحبش أكون سبب في تداولها على النت؛ والسبب الثاني هو إني وعدت أسرة الملك أحمد فؤاد الثاني إني مش هتطرق للموضوع ده على النت.

*******

إنتهت أحداث الكتاب في عام ١٩٤٣؛ بحجة إن دي السنة اللي حصل فيها حادث القصاصين واللي إتغير فيها الملك فاروق؛ رغم إن دي السنة اللي إتولدت فيها ملك بيير يعني المفروض الأحداث تبدأ مش تنتهي ... ! 😁

#إيمان_الشرقاوي

Tweet