كتاب الأميرة نسل شاه

 ريڤيو كتاب الاميره نسل شاه 🤞 

بناءا على طلب الجماهير الغفيره؛ قررت انى اعرض عليكم جزء من الألاطه التركى اللى فى الكتاب ؛ واهو برضه محبتش اخد الصدمه لوحدى ؛ قلت ناخدها جماعه احسن 😇

( فى البدايه كده هذا الريڤيو ساخر وهزلى وفرفوش ؛ لكن الكتاب عموما عظيم ومن اجمل الكتب التاريخيه اللى ممكن تقراها فى حياتك ) 

*********

نرجع بقي للألش 😂 

• الكتاب ده عبارة عن جرعة أوڤر دوز من التناكه والألاطه ؛ كله بيتنك على كله ؛ مثلا وقت رحلة الملك فاروق فى أوروبا بعد وفاة والده ؛ حضر جنازة الملك جورج الخامس فى انجلترا ؛ و كانت كمان الاميره در الشهوار حاضره باعتبارها زوجة أمير حيدر أباد ؛ عرض عليها الأمير عمر فاروق اخوها أنها تاخد معاها بنته الاميره نسل شاه تعرفها على الملك فاروق وأنه اكيد لما يشوفها هينبهر بجمالها ويتجوزها ... ( واثق اوى من نفسه عمر فاروق 😂 وعاجبنى ثقته فى تأثير بناته وسحرهم 😁) 

و الحقيقه ان در الشهوار طنشت اخوها و جاله رد من زوجها بيقوله ( هو انت مش عارف اختك يا عمر فاروق ؟ اختك متحبش حد يبقي احسن منها حتى لو بنت اخوها ) 

( عمتو الحربايه انتى 😇 ) 

و التويست الحلو فى الموضوع ده اللى مكنش الأمير عمر فاروق يعرفه ؛ أن الملك فاروق اصلا كان وقت الرحله عايش قصة حب مع الفريده ♥️🤞

• بتقول كمان أن اسمها كان مكتوب اول اسم فى قائمة أسماء العرايس اللى كانوا مرشحين للزواج من فاروق لكن الملكه نازلى شطبت على اسمها وقالت ( مش هاجوز ابنى لاميره تتنطط عليا ( لان نازلى مكنتش اميره ) ) ... والنبي ربنا نجدها نوسه 🙄

• بتحكى الاميره نسل شاه أنها بعد ما جت مصر كانت فى حفله هيا واختها الاميره هنزاده ؛ وبتقول أن الملك فاروق شافهم فى الحفله وقال لوالدته الملكه نازلى اللى كانت جنبه ( لو كنت أعرف أن فى بنات حلوين كده عندنا في مصر مكنتش اتجوزت فريده ) ... اللى هو وااات ذا هيل يعنى يا نسل شاه ؛ انتى كنتى حلوه اه انتى وأخواتك بس معلش فريده كانت قمرين 💁 

• بتتكلم عن الأمير حسن طوسون ( امير الاسكندريه ) خطيبها بأنه كان قبيح و دميم ؛ وأنها مكنتش موافقه عليه ؛ وأنه كان مليان قروح وبثور ؛ والحقيقه أنا مش هارد على نسل شاه أنا هسيبكم انتوا تردوا عليها لما تشوفوا صورة الأمير فى الكومنتات على البوست 👇 ؛ وبالمناسبة الأمير حسن اتجوز بعد فسخ الخطوبه من النبيله فاطمه شيرين ودى من اجمل اميرات الاسره 👌

• بتقول الاميره أنهم لما جم مصر ؛ اضطر والدها الأمير يغير اسمه وميبقاش ( عمر فاروق ) ؛ عشان ميبقاش فى اتنين فاروق فى العيله واكتفي بس ب ( عمر ) ؛ و الاميره كانت شايفه اللى هو ازاى والدها يتنازل و يتعطف ويتكرم ويتنازل عن جزء من اسمه المركب ؛ كده مش بس وااات ذا هيل ... ده WTFFF 😁😂

• اتكلمت الاميره نسل شاه عن يوم فرحها على الأمير محمد عبد المنعم ؛ وقالت إنها لبست فستان والدتها الاميره رقيه صبيحه و الفرح كان فى قصر عم العريس الأمير محمد على توفيق ( قصر المنيل ) ؛ وشبكتها كانت قلادة الوالده باشا و حضر الفرح الملك فاروق و الملكه فريده ؛ لكن بتقول انها فضلت تعيط طول الفرح وأنه كان أسوأ يوم فى عمرها لأنها مكنتش موافقه على الأمير محمد عبد المنعم .. ( تقريبا كده كانت واخده تطعيم ضد البهجه 🥲😏 ) 

• بتقول الاميره نسل شاه أنها كانت متغاظه من الملك فاروق لما ربي دقنه وبقي يروح يصلي الجمعه و بقي يتردد كلام أنه هيعلن نفسه خليفة المسلمين الجديد ؛ و أنها وقتها اتنرفزت و زعقت وجعجعت لزوجها الأمير محمد عبد المنعم وقالت له : ( خليفة المسلمين لسه عايش وموجود و ده يبقي جدى ؛ وان لو الملك فاروق أعلن نفسه خليفه مش هقعد فى مصر ولا دقيقه ) ... ثانكس جاد يا جماعه أن الملك ماعلنش نفسه خليفه والا كنا مش عارفين مصر هتعمل ايه من غير الاميره نسل شاه 🙄 🤚 

• كمان بتحكى الاميره نسل شاه أن الملك فاروق اختار يوم عيد ميلاده أنه يعلن فيه عن خطوبته على الانسه ناريمان صادق ؛ و يوميها كان فى دفترين للتهنئه ؛ واحد عشان عيد ميلاد الملك وواحد للخطوبه ؛ و انها كتبت تهنئه لعيد ميلاد الملك فقط و بعد كده راحلها التشريفاتى وقالها سموك نسيتى تكتبي تهنئه فى دفتر الخطوبه ؛ قالت له لا أنا منستش ؛ أنا قاصده كده فعلا 🙄 

قالها التشريفاتى هتكون لفته جميله لو سموك روحتى لفيلا الانسه ناريمان تباركيلها زى باقي أفراد الأسرة ؛ هنا شاطت الاميره نسل شاه وراحت مشوحه بإيديها كده 😂 ؛ وقالت له : أنا حفيدة سلاطين العثمانيين ؛ ومش هروح ابارك لواحده من عامة الشعب فى بيتها ؛ هيا لسه مبقتش ملكه !! 🥱 

طبعا نسل شاه ليها صوره وهى بتنحنى الانحناءه الملكيه اودام الملكه ناريمان يوم زفافها على الملك ؛ و ده يعلمنا ايه ياتري ؟! .... 

"سيب اللى يتكلم يتكلم هيفضل الصبي صبي والمعلم معلم 🤚"

• اه بالمناسبه ؛ نسل شاه قالت إن نظام خان كان مسمى الاميره نيلوفر : Small ... والاميره در الشهوار : Big 

وكان بيناديهم كده : Big ... Small ; Come Here 

( اتعشم يعنى أن نسل شاه تحمد ربنا عالنعمه اللى كانت فيها 😆 ) .

• قالت كمان أن نظام خان كان عاوز الاميرات نيلوفر و در الشهوار يركبوا حلق فى مناخيرهم زى عادة الستات فى الهند ؛ وقالهم هديلكم وزنكم ذهب و فضه ؛ لكن والدة الاميره نيلوفر قالت لها لو عملتى كده لا انتى بنتى ولا اعرفك 💁 

( بفكركم بس أن شبكة الاميره نسل شاه كانت قلادة الوالده باشا 😎 🤚) 

• مكتوب فى الكتاب أن الاميره نسل شاه كانت بتحضر اجتماعات جمعية المرأه الحديثه ؛ بس الالاطه التركى نقحت لدرجه خلتها متقولش اسم رئيسة الجمعيه واللى هيا الاميره فائزه فؤاد 💁

• معروف أن العيله كانوا فى كل حفله بيعملوا بينهم وبين بعض زى استفتاء ؛ مين هتكون اجمل النهارده ؛ الاميره فوزيه فؤاد ولا الاميره نسل شاه ؛ و برغم كده الاميره نسل شاه مجبتش سيرة الاميره فوزيه فؤاد فى كتابها ؛ اه وربنا زمبؤلك كده 🙄

• بالمناسبه ؛ الاميره نسل شاه اللى كانت بتهدد زوجها أنها هتسيب مصر ؛ واللى كانت مش عاجباها فريده و مرضتش تبارك لناريمان و بتتنك على الملك فاروق ؛ لما قالت لأختها الاميره زهره هنزاده متتجوزيش الأمير محمد على ابراهيم ؛ اختها قالت لها : انا زهقت من ترقيع هدومى و شراباتى 🤷

( تشعر بالألاطه هى و إثنان أخرون 🥱) 

#إيمان_الشرقاوى

Tweet