أهو ده اللي صار

 أهو ده اللى صار : 🥀 

من اول ما اتعرض المسلسل لاول مره وانا مقرره انى لازم اكتب عن العظمه والجمال اللى شوفتهم فيه .... واتمنى بعد التأجيل ده كله أن المقال يكون غطى كل تفاصيل المسلسل . واللى بتدور أحداثه من ١٩١٩ ل ٢٠١٩ 

*********

"يا خديجه هانم ؛ هاتى الحلاوه يا خديجه هانم ؛ يوسف بيه رجع . "

***********

يوسف بيه ؛ الابن الوحيد لوالده نوار باشا اللى مات وهو شاب صغير ملحقش يفرح بإبنه أو يخلف غيره ؛ هو و والدته خديجه هانم خورشيد ؛ واللى بنالها نوار باشا القصر ليها و لما مات فضلت عايشه على حبها لنوار باشا وحب نوار باشا ليها ؛ و بعتت ابنها من وهو صغير يتعلم بره و كانت هيا بتقعد على الكنبه اللى فى جنينة القصر و اللى كان كاتبلها عليها : 

 ( صـفاءٌ ولا مـاءٌ ولُـطْفٌ ولا هَواً ونـورٌ ولا نـارٌ وروحٌ ولا جِـسْمٌ ) 

 ‏

**********

 ‏"بدأت الحكايه قبل سنوات في هذا القصر حينما كانت أصابعها تعزف علي البيانو وأنا أعود من الغربة علي وجه فتاة  تصلح أن تكون لي وطن ⁦"

***********

نادره بنت جميله من الصعيد ؛ والدها هو زكريا اللى بيغنى على الربابه فى الموالد و الافراح ؛ مامتها كانت نادرة ندر لو خلفت طفل وعاش فخلفت بنت وسمتها نادرة ؛ مامتها ماتت و ملحقتش تفرح بيها ؛ عاش لها ابوها هيا وبس ؛ خدها معاه مصر المحروسه ووصل لقصر خديجه هانم و بقي من خدم القصر ؛ شافتها خديجه هانم فى ايد باباها خدتها معاها فوق و لقت فيها تعويض عن ابنها المسافر ؛ علمتها كل حاجه ؛ القراءه والكتابه و كانت بتقرا لخديجه هانم جوابات يوسف بيه على كنبة الجنينه و كمان جابتلها فساتين و كتب و اكسسوارات و علمتها العزف على البيانو. وبيرجع يوسف من السفر بعد سنين يلاقي بنت جميله بتعزف على البيانو فبتخطف قلبه من اول نظره ♥️ 

**********

" لمحت نورها من على باب العشه ؛ البحر من جمالها موجه على ؛ وقلبي من ساعتها على باب القصر مستنى "

**********

على بحر ؛ عازف عود ومغنى و ممثل يعنى أرتيست كامل متكامل ؛ بيشوف نادره و بيحبها برضه من اول نظره لكن بيشوف فى عينيها حبها ليوسف بيه ؛ فبيعيش عشان نادره و الفن ؛ بيحاول كذا مره يطلب أيدها لحد فى مره نادره هتقوله بنفسها : ( اللى تتجوز يوسف بيه مينفعش تتجوز حد بعده ) .. و بعد ما رفضته اللى بيحبها بيروح للى بتحبه .... ( أصداف ) ♥️

**********

- إيه اللى رجعك  يا بحر!

= مسير البحر موجه للشط يا اصداف 

انا خفت اوي .. حسيت إني لوحدي .. دورت على كل الحبايب اللي حواليا لقيتهم راحوا .. سألت البحر ، قولتله: مين يا بحر يشبهلك ؟ مين يطمنك ؟ قالي أصداف

-ده بس من بختي 

=آني بنتطمنوا معاكي يا أصداف .. طب هو فيه حب أكتر من ان الواحد يبقى متطمن ؟! 

*************

أصداف ؛ رقاصه فى كاراخانه و قلبها عند على بحر ؛ بتتجوز البساطى عشان يأجروا مرسح و عشان يكتب ابنها من احسان باشا بإسمه ؛ و لما بقي معاها فلوس هتغير اسمها ل صوفيا هاجوب . هتطلق من البساطى عشان تتجوز فرح المغنواتى اللي أبوه كان فاكر أنه بنت ولما عرف أنه ولد ملحقش يغير اسمه لأنه مات من الفرحة فبقى الفرح اللي اتولد في العزا؛ واول ما تمضي كونتراتو فيلم سيما و تاخد نفس اجر ليلي مراد ؛ بيموت فرح وهيا تعتزل الفن و تتفرغ للعباده لحد ما يجيلها على بحر و يقولها أنه عاوز يتجوزها ؛ هتوافق رغم أنها عارفه أنه بيحب نادره ؛ بس اختارت تعيش اللى باقي من عمرها فى ضل حب عمرها.

*********

"متضحكش ياسمير عشان لما نموتوا يقولوا علينا كنا محترمين . "

*********

وديع البساطى ؛ الآلاتى الفلاتى ؛ راجل حاجه اخر ١٣ خالص ؛ كاتب ومؤلف وصاحب مرسح ؛ اتجوز أصداف و حب ابنها و رباه كأنه ابنه تمام ؛ عشق المرسح لدرجه انه مات عليه و كان العزاء بتاعه من اجمل مشاهد المسلسل .

قال عنه جونى منصور : 

"كان رمزا من رموز الفن ف الإسكندرية..

كان قادرا على فهم ذوق الجمهور المتدنى.. لأنه منهم.

لن يذكره النقاد.. ولكن ستذكره شوارع الإسكندرية..

ومقاهيها.. ومسارحها.." 

قال عنه على بحر :

"كان شقيق روحى.. وشريك العمر بالنص ..

وكان ف القلب صاحب ملك..

كان اخويا.. قسمنا كل حاجة بالنص.. الحلم والفلوس وحتى اللقمة.

كان بيحلم باللوتارية.. ويوم ما أخدها..مجابش حاجة لروحه لا  أجر بيها مرسح..

كان بيعرف يلاغى الجمهور ازاى..

كان حبيبى وسرى.. والمشاكل اللى كانت بيننا كانت بتصفى علطول.. علشان الود كان غالب."

**********

لسه كلامك حلو، و لسه عينيكى بتاخدنى.. ولسه قلبي عندك يا نادره!

************

جونى منصور : 

مستشرق انجليزى ؛ جه مصر و قعد فى اسكندريه و رفض يسيبها ؛ كان بيحب أصداف ؛ لكن اتجوز من صباح  أرتيست معاها فى الفرقه وخلف منها ابنه منصور ؛ ألف كتاب عن الاسكندريه بيحكى فيه قصة المسلسل . حفيده هينضم للجماعه إياها و اخر مشهد فى المسلسل هيكون داخل يف.جر الكنيسه اللى جنب قصر نوار باشا و اللى وقتها هتكون فيه اغنيه بتتقال بيقول كلامها : ( خللى بالك من الحبايب دول أنصار القضيه ) .

**********

= انت ما اتجوزتش من وقتها ؟!

- لا .. انا اصلي وهبت روحي ليها و اللي انشغل قلبه ما يملكش غير الانتظار يا ست هانم

*************

الشيخ الزهار ؛ كان بيصحح اللغه فى أعمال البساطى لحد ما سابهم و انضم للجماعه الجديده اللى أعلن عنها حسن البنا و هنا كل حاجه اتغيرت فيه ؛ و اللى كان مصاحب الفنانين فى يوم من الايام بقي بيهاجمهم و حفيده بقي مسؤول كبير مع الناس إياها اللى بيحبوا التفج.يرات .

************

كفايه خلتنى جنبك ولميت أخر ايامى ؛ حد يطول يقضي بقية عمره جنب حبيبه ؟! 

**********

بمبه و عم ياسه و نبوى وهنديه ؛ خدم القصر ؛ و اللى عايشين فى البدروم و اللى احفاد بمبه هيبقوا فى يوم من الايام أصحاب القصر .

************

- طيب افرضي يا سلمي إن أنا طلعت وحش؟ 

= وأنا مالي يا عمنا؟ أنا مالي بجد، أنا عيني مش شايفه غير الحلو اللي فيك.. ما تقلقش

- أقلق من إيه؟

= حتى لو طلعت وحش.. ربنا هيحليك في عيني لإنك حبيبي

- مسألتيش يعني هنروح فين؟

= واسأل ليه؟ مش أنا معاك! خلاص 

***********

سلمى و يوسف ؛ هما احفاد بمبه اللى جمعهم الحب و عاشوا فى القصر ؛ ماهو اصل الحب هو اللى بيتورث  .

سلمى ... ابوها انطرد من القصر زمان وحلف لا يرجعله تانى ويكون ملكه بكل الوسائل المباحه والغير مباحه ( إسقاط واضح ) 

يوسف .... مش حابب القصر ؛ ومش حابب يعيش فيه ؛ وعاوز يروح حته تانيه بعيد عنه ( برضه إسقاط واضح ) 

***********

‏أنا عيان بالسعادة إللي مكملتش يا خديجة هانم ،

السعادة لمّا مبتكملش بتبقى جوّه الجسم علَّة ..

**********

يوسف بيتجوز ٣ مرات من غير ما يخلف و مكنتش الخلفه فارقه معاه على قد ما كانت فارقه مع خديجه هانم أن القصر يكون له وريث ؛ و بعد الطلاق الثالث بيكتشف أنه عيان بالكبد زى والده و أن أيامه بقت معدوده .

نادره بتتجوز هلاوى فى البلد وده عنده ثور بيسترزق منه ؛ و هتعيش معاه و مع حماتها حريره ؛ هلاوى بيموت و يطلق نادره و تروحلها خديجه هانم مخصوص عشان توافق تتجوز يوسف ؛ و بترجع نادره القصر هانم و زوجة يوسف بيه نوار ؛ بس نادره حامل من هلاوى و كده الجوازه باطله ووريث القصر وريث غير شرعي ... ( اسقاط تالت ) ؛ بس المهم أن نادره مبسوطه مع يوسف و يوسف فرحان بنادره ؛ و خديجه هانم جالها الحفيد اللى مستنياه. 

*********** 

- سمير ابنى بيقول أن الإنسان أصله قرد يا بحر !

- ‏الواد ده ممسوس يا بساطى لازم حد يرقيه ...  هو قالك اصل البنى ادمين كلهم ... ولا أصله هو بس ؟ 

- ‏ يا عديم التمييز والنبي لنمشي ونسيبوك

**********

استخدم عبد الرحيم كمال الشخصيات العامه لتأريخ فترات من الأحداث .. 

فمثلا ....

الشخصيات اللى ظهروا فى المسلسل ؛ سيد درويش فى مشهد ثورة ١٩١٩ واللى من اجمل مشاهد المسلسل ؛ ريا وسكينه مع أصداف ؛  عبد اللطيف أفندى البنا فى فرح يوسف بيه نوار ؛ و أم كلثوم و أحمد بدرخان فى قصر نوار باشا ؛ و بيرم التونسي مع البساطى ؛ و نجيب الريحاني وبديع خيري مع على بحر و البساطى ؛ و الشاعر كفافيس وفى مشهد جميل ل على بحر و أصداف وهما بياكلوا چيلاتى وهما خارجين من مسرحية مدرسة المشاغبين ؛ و مشهد تالت وهما بيتفرجوا على نيللي لما لقت كتاب في الصندره أوراقه صفرا مشرشره. 

***********

- يعني إيه غموض؟

= زي عيون أستاذ يوسف كده. 

**********

تتر المسلسل حكاية لوحده : 

-مشهد ليوسف و جنبه اقفال كتير ؛ والمشهد اللى بعده خديجه هانم ومعاها مفاتيح كتير ؛ فى اشاره أن يوسف أسير و حريته فى ايد خديجه هانم ( طبعا بسبب رفضها أنه يتجوز نادره ) 

- مشهد لنادره وحواليها اقنعه كتير ؛ فى اشاره لحياتها أن فيها تمثيل ادوار من اول قصر خديجه هانم لجوازها من هلاوى لحد ما اتجوزت يوسف وهيا حامل .

- مشهد ليوسف وجنبه عقارب ساعات فى اشاره لساعاته المحدوده فى الحياه .

- مشهد على بحر وحواليه اقفاص اودام البحر فى اشاره أنه مش حر زى ما كان فاكر .

- مشهد لزكريا وهو بيبص ليوسف نوار وبينهم ازاز مكسور ؛ فى اشاره للكسره اللى فيها زكريا اودام الباشا 

- مشهد خديجه هانم وحواليها ضباب كتير ؛ ومشهد تانى ليوسف ومعاه شمعه وسط الضباب ؛ فى إشارة أن يوسف كان بيحاول ينور الطريق العتمه اللى كانت رسمتهاله خديجه هانم.

************

قوم روح هناك بعيد عند اللوحه اللى هناك دى تعرفها ؟ انطق تعرفها ؟ الڤازه اللى وراك دى تعرف تمنها ؟

************

عاشت نادره مع خديجه هانم ؛ وفى يوم من ايام انفتاح السبعينات هييجى واحد اسمه ( الزفتاوى 😉 ) سباك وعنده محلات قيشانى وورق حائط وعاوز يشتري القصر بمحتوياته و يهده ويبنى مكانه برج يناطح بيه السحاب ؛ وفلوسه حاضره من جنيه ل ٣٠٠ ألف جنيه وهتقوله خديجه هانم : 

"مش معنى أن ربنا خلقك فى الدنيا وعشت معانا انك تشتري القصر ." 😉

 فهيقولهم : ( خليكوا قاعدين في القصر لحد ما يتهد فوق دماغكم ) .... ده الاسقاط الكام عشان بطلت أعد 😃

***********

هما ٣ ايام ...

اهو كل ده حصل عشان الولد حب ... يمكن لو مكنش حب كنا كلنا ارتحنا ... 

احكيلك ؟!

************

فى النهايه كل شخصيه ماتت مع اكتر حاجه بتحبها ؛ يوسف نوار بيموت فى حضن نادره ؛ و نادره بتموت و هيا بتعزف على البيانو  وإحسان باشا بيموت لما يعرف أن عنده ابن و فرح بيموت جنب أصداف و البساطى بيموت على المسرح و زكريا بيموت وهو بيغنى لبنته حتى هلاوى بيموت مع التور و بمبه بتموت وهيا بتتكلم مع خديجه هانم؛  خديجه هانم بقي بتموت على كنبة الجنينه ... كنبة نوار باشا .

***********

- مين هيخلى باله من القصر بعد ما كلنا نمشي ؟ 

- ‏احنا بنمشي والحكاية بتعيش وتكمل 

************

إتقفل القصر سنة ١٩٨١ وفضل مقفول ٣٠ سنة ؛ ورجع يوسف للقصر في ٢٠١١ بإعتباره الوريث ... ؛ ( ده الإسقاط الكام ؟ ) 

*********

وفى النهايه ؛ ادعوا بالرحمه لمخرج التحفه الفنيه دى ( حاتم على ) 

**********

الحب هو شجرة الخلد و الملك الذى لا يبلي ❤️

*******

 

استمتعوا بالمشاهد دى : 

ثورة ١٩١٩ : 

https://youtu.be/O3dQmRidVIM

البساطى وهو ماشي بالاوتوموبيل : 

https://youtu.be/AXSQO69m_9A

أم كلثوم في قصر نوار باشا: 

https://youtu.be/OACRqG2hcfw

 مسرحية دبرنى يا وزير : 

https://youtu.be/mD-v9vMjFyg

الزفتاوى رايح يشتري القصر: 

https://youtu.be/WDSNvZbgJeI

عزاء البساطى : 

https://youtu.be/nI7-1idTFQo

وفاة نادره : 

https://youtu.be/UbqVeyZpz00

وفاة خديجه هانم : 

https://youtu.be/SO3RDnOYFGk

#إيمان_الشرقاوى

Tweet